乳癌復發點算好？
弊喇弊喇，醫生懷疑我乳癌復發呀！點算好？仲有冇得醫？⋯⋯
「復發呀～弊喇弊喇～死喇死喇～」
如果懷疑復發，唔好亂，千其唔好亂，亂係幫唔到件事嘅。
「而家復發呀！咁我唔亂又可以做咩？」
有兩樣好重要嘅野要做：
1）組織上嘅確診
2）重新評估第幾期
1）組織上確診
「醫生都話懷疑復發咯，死梗喇呢次，仲咩仲要拮我一針？」
雖然唔係所有復發都可以再抽組織（例如骨），但如果可以再抽組織嘅話，絕對值得再抽，理由如下：
1）百分百確定。因為照掃描／造影話有復發，係可以搞錯嘅。例如話擴散去肺，點知原來係肺勞。如果診斷有誤，而做錯治療，就白白承受咗治療嘅風險。因此可以嘅話，一定要再抽組織確定。
2）睇吓標靶受體／荷爾蒙受體有冇轉（由有變冇／冇變有）。復發嘅乳癌同原來嘅乳癌係可以唔同嘅，咁亦部分解釋得到點解治療失效，情況有如細菌同抗生素嘅「抗藥性」關係咁。如果由冇受體變有受體（即係對治療由冇反應變有反應），咁就有多D藥可以用。另一方面，如果由有受體變冇受體，咁就唔洗晒心機／金錢／時間喺D冇效嘅治療度。
當確定咗真係復發同有咩治療夾之後，下一步要做嘅就係重新評估自己第幾期⋯⋯
2）重新評估第幾期
要斷定第幾期，都係好似開初咁，離唔開「電腦掃描加骨掃描」vs「正電子掃描」。
呢個時候，已經衰第二次，如果經濟許可嘅話，我會強烈建議照正電子掃描，因為我地真係好需要一個高清掃描去幫我地計劃下一步點做。
「Breast HK，我好窮，真係負擔唔起，有冇方法幫幫我？」
如果真係好窮（家庭資產大概三萬蚊樓下）／攞綜援／公務員（家屬），記得叫醫生轉介醫療社工，可以政府資助免費去伊利沙伯醫院（住九龍），或者東區醫院（住香港）照正電子掃描。
「我照咗正電子掃描喇，之後要點做？」
之後就對返自己最新係屬於第幾期：
乳癌零期原位癌 － 我係咪0期？
乳癌一期 － 我係咪第1期？
乳癌二期 － 我係咪第2期？
乳癌三期 － 我係咪第3期？
乳癌四期 － 我係咪第4期？
再對號入座，睇返相應嘅攻略，就大概知點做：
乳癌零期治療攻略 － 原位癌有咩咁特別？
乳癌一期治療攻略 － 早期都要做化療？
乳癌二期治療攻略 － 做手術先？做化療先？
乳癌三期治療攻略 － 醫好機會大唔大？
乳癌四期治療攻略 － 末期仲有冇得醫？
不過既然今次係復發，即係之前有做過治療啦，以上嘅乳癌治療攻略要再微調一下先得。
乳癌復發大作戰
仲記唔記得上篇講過嘅乳癌復發3大類：
1）曾經有事嗰邊乳房／胸口局部復發
2）另一邊冇事嗰邊乳房生乳癌
3）遠端復發（即係擴散／轉移）
原來3樣野嘅治癒率同處理方法好唔同，下一篇「乳癌復發治療攻略 － 求生大作戰」就住以上乳癌復發3大類，幫你微調乳癌治療攻略，同你一齊對抗乳癌復發⋯⋯
香港乳癌及乳病治療中心 
感謝醫生ㄧ路寫文章，教我哋咁多呢方面嘅知識，完全感受到你嘅仁心，希望香港有更多如你ㄧ般，醫者父母心嘅醫生，讓病人在困苦中得到幫助、安慰。感恩！
醫生你好，又係我……，之前問過因自己不想在做手術那間公立醫院做重建，得你告知香港共存4間公院有整形科，我覆診時請醫生寫轉介信到廣華做，但醫生不肯?,請問醫生我還有什麼渠道可以轉去廣華排期呢？
好簡單，比幾百蚊屋企樓下嗰家庭醫生叫佢寫。
吓，真係架,多謝醫生解答?
醫生,可否跟您問一下乳癌藥物和抑鬱症藥物的問題？
我媽媽2001年開始有抑鬱症狀，因為頭兩年係試藥物量，醫生好隨意減藥所以基本上媽咪每3個月病發一次，2006年(當時52歲)做左癌細胞切除手術後食左5年他莫昔分，期間與未患癌前都係咁上下，每相隔幾個月至半年或者一年這會抑鬱症復發
到2011年停了他莫昔分後未再有抑鬱症狀
減藥後食藥量都無再改變
但媽媽2015年8月在同邊乳房再有癌細胞，9月做了左邊乳房切除手術後開始食AI新藥，
2016年4月抑鬱症病發因為佢自己奇怪咁減藥，之後食番正常量2星期後康復
現在在沒有減藥情況下，佢9月又再抑鬱症病發
這樣問可能好傻，但是乳癌藥物與抗抑鬱藥應該沒有抵觸，對嗎？之前您有一篇提及舊舊同埋抑鬱藥嘅衝突，同新藥無關的對嗎？公立醫院都有媽媽病歷資料，應該不會開了您提及不能夠一起吃的藥，對嗎，等待您的回復。
部分抗抑鬱藥會影響Tamoxifen效力，所以食舊藥要小心。至於新藥AI就冇關係嘅，同抗抑鬱藥唔會互相影響。
明白，謝謝回復。
我已是子宮全切除，吃了兩年他莫昔芬，醫生提出要轉藥，但我因怕會有骨質疏鬆所以拒絕轉藥，醫生暫時容許我繼續吃舊約，其實是否一定要轉新藥呢？
要睇下咩原因醫生建議轉藥。如果係舊藥失效復發，就會建議聽醫生話去轉。如果舊藥一路好地地，只係想轉藥療法，咁就可以選擇唔轉。
醫生你好
6月頭時才請教過您應選哪款荷爾蒙治療，揀左食5年Temoxifen, 但好景不常，早幾日婦科檢查，超聲波發現兩邊卵巢各有約6cm腫瘤，醫生話有實心成份，形狀衰，加上我有乳癌底，好大機會係惡性擴散，(Roma 血報告指數合格), 黎緊會手術切除卵巢子宮，我個心好亂好慌，點解1期做哂手術化電療，咁快就擴散？轉移卵巢嘅治療方案會係點呢？預後又係點呢？我真係好擔心好驚…
謝謝你!
乳癌甚少擴散去卵巢，五十個擴散都冇一個係咁，除非你係BRCA突變，咁乳癌同卵巢癌先有關聯，唔好自己嚇自己，做完手術自然一清二楚。
醫生你好，我媽媽五月時驗到有乳癌，做完手術後，腫瘤係2cm以下，有一粒淋巴擴散。依家做緊化療，啱啱打完4枝TC針。
最近我媽咪係頸到摸到有粒野，唔紅唔腫同埋唔痛，請問會唔會係擴散？
另外，佢前嗰排下腹有痛，腫瘤科醫生安排照超聲波。當時醫生特別重複照咗幾次右邊第一條肋骨下面。本身排期到十一月覆診，醫院之後打去我屋企話覆診提早一星期同埋要帶埋腫瘤科醫生轉介信，請問係唔係會有事？
感謝解答。
冇得估，要臨床評估同睇報告先知。
明白，多謝醫生咁快既答覆 ?
醫生你好。
媽媽20年2月確診4期（胸10cm,淋巴10粒，肺左右都有，骨兩個），一直食Ai 同Ibrance, CEA 33去到4.7， 上年6月減到100mg,9月Pet CT係舊有瘤旁多左粒0.8cm suv 8.3的新野。CEA就係5.6-7左右返覆政府叫我地再觀察下。我覺得有再大到，想問下
1.應該再抽針嗎？
2.手術有冇用（原本的size 己細到4.5cm,但PET 話有anterior skin involvement?即係痴住入面？）
3.如果轉藥，應該轉荷爾蒙定CDK?
4.洗唔洗考慮基因測試？
十萬分感謝🙏🏻
1）唔係明顯轉差，就唔使再抽針。
2）手術有冇用要睇其他擴散控制成點先可以決定。
3）兩個都可以考慮。
4）可以考慮驗下BRCA/PIK3CA，睇吓仲有冇其他藥可以用。
馬醫生，你好。
我太太2年前確診原位癌，做了局部切除乳房手術，也做了25次電療。1年前做了乳房造影，無發現不妥，月前做了另一次乳房造影，發現手術附近任置，出現了很多鈣化點，有些為線狀，現已經做了抽粗針，在等待結果。請問
1) 如果是局部復發，會否還有可能是原位癌嗎？
2) 如果是，是否做乳房全切手術，就可以？在發現後，什麼時候內做手術會好点？政府醫院好像要排很久。這樣復發，存活率及再復率又如何？
3) 在私家做乳房重建，費用大约多少？
3) 如果變成侵犯性乳癌，是否要抽淋巴或做PET SCAN?
4) 還有什麼事要注意？
本人十分擔心我太太，希望馬醫生能否提供一些專業意見，萬分感激 !!
衛爾信上
1)可以係。
2）全切已經可以。越快越好。如果仲係原位癌，存活率都仲係好好。
3）30-50萬。
4）如果有侵蝕性，就要驗淋巴，PET scan 就選擇性。
馬醫生，你好。我太太左邊乳癌2A，去年做完左全乳切除，今年1月尾做完化療，4月初完成電療，現在繼續每3星期標靶。但佢做完電療后左邊胸口近中間位置痛&有舊長型的嘢（大概2/3隻食指），當時以為是電療原因，但到現在還未退，請問會是復發嗎？本人和太太都十分擔心，希望馬醫生提供一些專業意見，萬分感激 !!
仲做緊治療，應該冇咁快復發。可以係積水，最好都係搵返自己手術醫生去搞清楚。