乳癌復發10大病徵 － 你記緊要留意
乳癌檢查我一定跟足指示去做，但我平時有咩要注意？乳癌復發／轉移有咩病徵㗎？有冇復發先兆？⋯⋯
喺講乳癌復發病徵前，我地要了解一D基本資料先。原來乳癌復發分3大類，唔同種類有唔同病徵⋯⋯
乳癌復發3大類
乳癌復發分3大類：
1）曾經有事嗰邊乳房／胸口局部復發
2）另一邊冇事嗰邊乳房生乳癌
3）遠端復發（即係擴散／轉移）
1）曾經有事嗰邊乳房／胸口局部復發
個名太長，以下我地簡稱為「局部復發」，即係上次局部割／保留咗嘅乳房，甚至重建出黎嘅乳房，又再生乳癌。或者，上次全乳房切除冇重建嘅，就喺個胸口復發。
「咁局部復發有咩病徵㗎？」
通常就係摸到有舊野（硬塊／腫塊）／有粒粒，呢次病友通常都學精咗，唔會再以為自己唔痛就冇事，或者掉以輕心以為「良性乳房纖維瘤」姐。
「咁喺邊度摸到有舊野／粒粒？」
如果係局部割嘅，最大機會就係以前手術範圍嗰度。因為我地知道出過事嘅地方係易D再出事嘅（漏過水嘅地方係易D再漏水嘅）。
「但我點知邊度係以前手術範圍嗰度呢？」
如果第一次有乳癌時喺摸到嘅，就係喺返嗰度。
如果第一次有乳癌時喺摸唔到嘅，就要靠條疤痕喺邊度去估。
「但我條疤痕唔係直接喺乳房腫瘤之上嘅，我個乳腺科醫生手勢好好，幫我隱藏咗喺乳暈邊，咁我點知要留意邊度？」
咁要問返你個乳腺科醫生，睇返D舊記錄先知。
「我係全個乳房切晒但冇重整嘅，咁應該摸邊度？」
摸成個胸口，因為冇重建乳房，成個胸口都係平嘅，所以有咩硬塊／粒粒野都好易摸。
「咁如果有重建乳房又點呢？」
呢個就難摸D，雖則都係成個新乳房周圍摸，不過可以集中精力摸「圓型疤痕」嘅外圍，因為嗰度先係真正乳房皮膚／最接近原本乳癌嗰個位。
「死啦死啦，我真係摸到舊硬硬地嘅野，點算好？係咪一定係復發？」
硬塊唔一定係復發，可以係好多野嘅，例如：疤痕／脂肪硬塊（fat necrosis）。不過你有前科，都係快D去睇乳腺科醫生，做齊乳癌檢查三步曲（等佢又檢查吓／照吓／抽吓組織），睇吓係咪真係出事。
「除咗有粒粒，仲有冇其他病徵我要留意？」
其實其他病徵（乳頭分泌物／乳頭凹陷）相對乳房有粒粒黎講，可以話相對罕有。
唯一要留意嘅係胸口發炎，因為有時乳癌復發未必發現有粒粒，佢可以個胸口紅咗一撻（好似發炎咁），自己唔會退，越來越大撻，其實係癌細胞黎。呢個常見於D好惡／好後期嘅乳癌，例如第三期三陰性乳癌。
「都摸唔到野，咁醫生點先知係復發，而唔係普通發炎？」
呢樣野又係講醫生嘅經驗，如果醫生有懷疑，佢會叫你喺局部麻醉下，割少少皮膚拎去驗，咁樣就知有事定冇事。
2）另一邊冇事嗰邊乳房生乳癌
嚴格黎講，呢個唔算係復發，因為同有事嗰邊係兩個獨立事件（雖則我地知道自己有乳癌病歷，係會增加另一邊乳房生乳癌嘅風險嘅，呢D就可能係傳統智慧所講嘅「黑開有條路」）。不過喺病人角度，當然算係復發，一邊搞掂完另一邊又出事。
「咁有咩病徵？」
即係所有野回帶黎多一次：
3）遠端復發（即係擴散／轉移）
「成日聽人講乳癌擴散／轉移，我真係好驚呀，其實乳癌會走去邊度㗎？」
圖片來源：American Society of Clinical Oncology
乳癌可以擴散去淋巴，或者遠端器官：
1）淋巴轉移（lymph node metastasis）：呢個病徵同乳房復發差不多，都係摸到有舊野／硬塊／腫塊／粒粒。不過位置今次唔再喺乳房／胸口，而喺係腋下／鎖骨對上／頸兩側。
2）骨轉移（bone metastasis）：即係你聽人講嘅「入骨」，病徵就係骨痛，有時嚴重可以痛到訓唔到。（不過唔好見自己周身骨痛就驚定先，可以係普通風濕／食抗荷爾蒙藥AI嘅副作用）。另外如果嚴重嘅骨轉移，係可以壓住脊髓神經（cord compression），搞到下半身癱瘓。
3）肺轉移（lung metastasis）：通常都係肺積水，搞到你覺得條氣唔順，呼吸有困難。通常病友呼吸有問題，都已經一早去咗急症室求診，唔會等到門診覆診話醫生聽。
4）肝轉移（liver metastasis）：通常冇咩病徵，後期右上腹可能痛（因為肝大脹住咗），另外個人可能會黃（黃疸jaundice）。
5）腦轉移（brain metastasis）：慢性病徵就係頭痛同埋無緣無故嘔（因為腦內壓力過高），急少少嘅可能好似有D輕微中風跡象（突然間手腳唔協調／冇力，口齒不清）。
乳癌復發10大病徵
清楚了解咗乳癌復發3大類，係時候歸納一吓，由你角度要留意嘅「乳癌復發10大病徵」：
1）乳房／胸口有硬塊／腫塊／有粒粒／有舊野
2）胸口紅咗一撻／發炎
3）乳頭分泌物
4）乳頭凹陷
5）淋巴位置（腋下／鎖骨對上／頸兩側）有硬塊／腫塊／有粒粒／有舊野
6）骨痛／下半身癱瘓
7）條氣唔順
8）右上腹痛／個人黃
9）頭痛／無緣無故嘔
10）中風跡象
睇到呢度，你實心諗「死喇死喇，我中咗呢樣⋯⋯又中咗嗰樣呀⋯⋯」
就算冇中都好，你實會擔心「而家冇姐，第時到我中咁點算好？」
下一篇：「乳癌復發點算好？」再見⋯⋯
香港乳癌及乳病治療中心 
謝謝你，這是我見過，惟一解釋得讓我明白的地方。我雖然說是已經清除了癌細胞， 但常常都有很大的陰影，害怕復發， 連傷風感冒耳朵入水都擔心會不會轉移。怕痛怕死怕死得辛苦死得難看，但這些都不是我所能控制， 閣下這溫暖有愛心的地方幫助我很大，起碼減低了很多恐懼。超感謝。
很多謝你的資訊,有無得預防復發?
輔助治療（化療、標靶治療、電療同荷爾蒙治療）就係預防，日常生活就冇得避。
能夠遇到你這位無私的醫生，是我們的福氣！
維園哥哥：
我康復快五年了，外科醫生著我照一次PET Scan, 請問養x和仁x真的有分別嗎？價錢相差接近一倍，醫病醫到快山窮水盡了，相省回幾千元…………
一牽涉兩樣野比較，分别一定有（不過係咪真係咁大分別／究竟邊個好D基本上好難講實）。既然經濟開始感覺有壓力，我支持去平D嗰間照，因為你只係保健式得閒照吓，本身有問題機會都唔高，有分別都未必感受到。
知道，明白，多謝！
剛剛食完五年tamoxifen 驗了血醫生話不用再食藥但仍然有熱潮是正常嗎
繼唔繼續食藥不是取決於驗血結果。
潮熱係一個好普遍病徵，除咗辛苦D之外，冇咩問題要擔心。
想問胸ロ紅咗一撻.我媽82歲 2015年11月頭全切,今日見到佢條巴上面胸ロ紅咗. 三個月會復發嗎
三個月就復發雖然罕見，不過都唔係冇可能發生（例如乳癌第三期好惡加埋第一次手術切唔清）。如果你都見到唔正常的紅，最正路梗係快D去睇醫生。
我媽媽2015年頭做完晒所有療程，近幾個月周身痛，去覆診時同醫生講，醫生在她身上鎚了幾下，大約脊錐位置。醫生表示骨沒有痛沒有問題，應該是神經問題，如坐骨神經痛(她HIP位2邊都有痛)，叫佢做物理治療，但無咩功效就改去做水療，我媽媽好驚自己會復發，又驚醫生斷錯症。我想問復發會是周身痛嗎? 復發有咩跡象，我睇左你POST，會是”骨轉移”嗎?
骨轉移可以係周身痛，用手鎚只是一個很粗略的檢查，並不能完全排除骨轉移的可能性。如果擔心，就做骨掃瞄（bone scan）去排除。
我今年55岁 ，2015年8月确診左边乳房三阴性第二期乳癌，未扩散，至2016年3月完成了化疗、保乳手术、电疗疗程，手术切除了一粒前哨淋巴，经检验癌细胞己全部清除，但近期手术部位附近摸到有硬块，按下有些痛，不知复发的可能性有几大？
冇得估，有唔妥一定係搵醫生檢查清楚，無謂亂咁估估下。
你好，我媽媽今年59歲，三年前患上HER2第三期乳癌，當時在左邊乳房有數粒瘤並擴散至左邊淋疤，手術切除左邊乳房及全部左邊淋疤，不用服荷爾蒙藥。
近來媽媽常咳嗽，有時感頭暈，睡得不太好，有時失眠，腰背酸痛，所以去公立醫院照了肺部（半年前），頭部及腰部X光（2個月前）後，醫院告知如果有異會再作通知，若正常則十一月再到腫瘤科覆，數星期過去，都沒有收到通知，所以我們當結果正常；而她被割除的乳房及腋下位置有生出兩粒顆粒的東西，經過抽針檢查其中一粒（不用抽晒兩粒？），顯示正常。
另外，昨天我幫她按背時才知，她頸下方皮膚內，在近幾月前生出一粒大概2-3mm的顆粒（粉瘤？），但沒有怎樣變大。
她是否需要照PET scan?或是其他檢查？
如果要照PET Scan 是否可以去睇普通科取轉介紙去出面照（專科預約期在十一月）
媽媽現職兼職學校清潔，是否對她健康不利？勸她不工作較好？但不工作又怕她在家中亂想。怎樣才對她較好？
謝謝！
先去睇咗醫生，等醫生初步評估咗先，才決定洗唔洗照PET／做其他檢查。
普通科好少直接寫轉介去PET，雖然佢應該係有能力做嘅。
適量的工作對身心健康都係有利。
突然摸到腋下有一粒米粒大小的粒粒 好似呢一兩日突然出現 有點硬的 不痛 但用力擠時有dd血水同一粒白色野 之後仲係度想問是否會是腫瘤？ 我只手術切除過良性孅維瘤 22歲 今年2月超聲波同婦科檢查過冇事 好驚….
22歲有事的機會極微，不過有任何懷疑都係嗰句，睇乳腺科醫生。
冇知一問，我呀媽有第三期乳癌，依家仲做緊化療，我想問如果切左另一邊冇事嘅乳房，會唔會降低復發率？
好大程度上唔會，除非證實BRCA1/2突變。
我媽咪今天進了醫院，照了X光應該是肝轉移。因為肝已經好脹，係咪已經沒辦法醫治？聽說肝臟有病徵時已經晚了，醫生還說X光片看到肺部也有
乳癌四期治療攻略 － 末期仲有冇得醫？
我現在38yrs,在2011年患上原位癌，只做了電療，今年2018年年頭發現原位復發診斷為1a期，正在接受化療TTCx4和之後的荷爾蒙治療，想問乳癌會復發完又復發嗎？真的很擔心。
有咁嘅可能的。
想問維他命D是否對乳癌復發有关係,有足夠的維他命D就可減少復發機會？
冇堅實數據去支持以上說法。
本人在2014年右邊乳癌，左邊原位癌，兩邊全乳切除，沒造重建，化驗屬Her2T2N2G3，接受了4針AC及4針TH，之後進行30次電療，再接受為期一年14針Herceptin，至今已差不多4年⋯手指腳掌仍然麻痺剌痛，近期更甚，在5月進行Pet/CT Scan一切正常，也見了骨科，做了MRI，沒有異樣，請問醫生可有好建議予本人減輕麻痺刺痛，謝謝！
冇咩好建議，雖然好多野可以試，自己睇下 https://en.m.wikipedia.org/wiki/Neuropathic_pain
我阿媽無以上病癥但是昨天剛剛去看新症今日就叫我地聽日去複診唔知咩事好驚
我阿媽是三陰性乳癌第一期已經做完化療
18年7月左邊乳癌1A期做左全切加重建，9月再電療25次至10尾完成及服tamoxifen 5年。沒有做過PET SCAN 。電療前照肺，突然收到醫院通知右邊肺有陰影，要下星期返去見腫瘤科醫生。
想問是否應該做PET SCAN確定肺陰影是什麼?電療後不足1個月做PET SCAN會否有不準確的情況?
PET scan係一個好選擇。
影響唔大。
醫生，我媽媽系her2第三期 全切 而加打左化療第三針，黎緊打第四針，但佢呢幾日膊頭下面舊骨有啲痛，揸左藥都未好，系咪照下會好啲?但有時又唔想郁啲就去睇醫生，搞到心理壓力好大
既然打緊針，就唔洗照住，照到有野冇野都係繼續化療標靶先。等到完曬化療再睇下點。
明白，謝謝你，而加真系好驚，風吹草動都驚一排
但系如果有野，咁系咪證明隻藥唔啱?系咪要換藥?
要按個別情況去睇，唔能夠一概而論。
你好，我2014年確診乳癌3期，做了切除，重建，化療與電療。剛剛2018年12月發現腦部有一個小的癌腫瘤，我是否已變成乳癌4期？
如果是來自乳癌，是。
我係her2局部復發 現在接受 每兩星期 一次化療,4針紅針4針紫杉醇加標靶, 已完成3次化療。 想問下醫生提過做雙標靶但成效只不過高1%,我想問有冇咁嘅需要,還是單標靶已足夠
視乎期數同荷爾蒙受體。
醫生，我系her2第三期, 局部切除，前哨淋巴检验發現有5粒有癌细胞，巳做3次Epirubicin及3次Docetaxel, 還有1年標靶Trastuzumab，電療已度位，昨天覆診醫生說要食5年Tamoxifen, 還建議我打Gaserelin Acetate(自費), 請問是否打了好些?
比唔到意見，成個治療都好怪，同一般個案有出入。
醫生，我我乳癌二期，已做了部分切除手術一年和已完成電療，正在服食荷爾蒙藥，但最近再做身體檢查，醫生回覆X光肺片有影，要再做個肺部做影，我很擔心是否轉移肺部？
唔好估，跟醫生指示檢查咗先。
我媽媽19年8月做了左乳切除手術，之後食抗荷爾蒙藥，今個月抽血複查CEA數值5.8，腫瘤醫生話正常，外科醫生話超標，咁應該要點算？
有冇食煙？之前數值幾多？
之前係5.0，無吸煙史，2月份做了腹部加強ct，腫瘤科醫生說正常，3月頭抽血，CEA5.8，外科醫生說超標，咁應該點算？
一係等6－8星期後再抽多次血睇趨勢，或者做PET scan check 一check。
我係公立醫院跟進，19年8月手術後無任何不適，醫生安排6月底再抽血，外科醫生有建議做腸鏡檢查。乳癌類型是Luminal A型，60歲。早在20年前已經切除了子宮。其實cea5.8哩個數值是否很高？
唔係好高，不過要觀察趨勢。
唔該曬醫生的解答，其實腫瘤科醫生同外科醫生睇的cea的角度係咪唔一樣？我係唔明點解腫瘤醫生講係正常～
角度理應一致。要問返嗰個腫瘤科醫生背後邏輯。
好的，其實係咪都有需要做腸鏡檢查？
CEA高可以係腸癌，所以如果PET scan冇野，下一步就做腸胃鏡，如果都冇野，最尾搜身就係照埋個腦。
今日做左腸胃鏡～胃部發炎比較犀利，有胃酸倒流，有兩處小出血～醫生開左胃潰瘍的藥。大腸切左幾粒瘜肉，咁胃部的情況同cea升高有無關係？
胃冇關係，瘜肉要睇病理報告。
醫生，今年36歲，如果左邊有2個原位癌經抽粗針証實，右邊癌前病變手術後發現有原位癌細胞，醫生建議左全切右可局切加電療，最終結果都要睇埋最後手術結果，但他提及我36歲好後生，右邊全切比局切加電療復發率較低，但我搜尋資料又見其實全切和局切加電療復發率生存等其實差不多，定因爲我後生高危所以唔同，希望你可解答我的疑問，謝謝
後生並唔係全切的原因，只要局部切切得清，加埋電療，效果同全切相約。
謝謝你的解答，雖然一開始佢比我選擇，但他強調我後生加2邊都有原位癌，所以全切唔留番會較好，無咁易復發，仲提及如果一年1%復發率，我如果仲有50年命，都成50%。
正如醫生你所說，我也看了很多資料，全切的迷思，我呢個情況局切十電療，應該同全切效果相約，難道仲關2邊乳房都有原位癌事同高危？但左邊我已選擇全切手術，遲d會2邊乳房一齊完成手術，因為有個良性同有2個原位癌在左邊。
我睇既醫生仲話局切留番D組織所以比全切容易復發，加後生加2邊乳房有事
其實我想右邊揀局切加電療，如同醫生你所講其實效果相約，但我唔明點解我睇既醫生咁講，係米真係會咁？
情況複雜，點做最好要現場評估先知。1％引申的50%復發機會，雖未至於誤導，但有以偏概全之嫌，全切每年也有0.9％機會復發。50年只有5％之差別，仲未計係唔影響壽命。
補充番少少，我左邊一個4cmx3cm既良性（完成左超聲波及乳房造影同抽粗針），醫生話肯定良性，但宜加都有點驚弓之鳥，驚又唔同結果，
因為上星期割癌前病變返來話有原位癌細胞，如果醫生話良性係米應該係啦？ 會滑動同都跟了一年多，無比開初時大左好多（開初2cmx1cm)
另外就左邊抽粗針話暫時原位癌有2個，加埋右邊1個原位癌共3個，我呢個情況所以睇緊既醫生要我2邊乳房全切較好
左邊就不定要全切？右邊係米可以選擇呢？謝謝
只現場評估先知。
您好，我家人10年前患乳癌並完成化療治療，宜家發現另外一邊胸部淋巴大1點幾cm，醫生淨係話希望唔好繼續大，4個月後再檢查，請問宜家可以怎樣做？好擔心會再有問題啊
視乎嗰個位抽唔抽到針，抽到就抽去搞清楚有冇野。
大約9個月前循例夾胸檢查，發現右邊胸部有0.6cm結，刺穿化驗話冇問題。但宜家佢越來越大，應該點做好？做乜檢查同治療呢？
要覆檢。
請問係要X光嗎？今日再照超聲波，右邊乳房的確有陰影，下週覆診再有報告
視乎歲數同可疑度。
馬醫生，請問打完化療針2個月後同一位置發現腫瘤，是否對化療藥有抗藥性？一般是否要靠手術+化療二線藥物/標靶來治理？是否復發就是第四期？
雖然可以話係抗藥性，但更似係手術前評估及病理報告出咗問題／漏洞，如果唔係，冇理由咁快同一位置發現腫瘤。
可以再手術就手術解決。
復發唔等如第四期。
馬醫生，想請教如果手術後要化療，係咪會用唔同藥物/二線藥物呢？同埋點知隻藥有效呀？有無得驗㗎？
啱啱先完成化療，好多時唔會咁快再化療。切完睇吓屬性有冇變，睇吓有冇D藥（例如標靶藥）之前冇用過而家啱用。
你好阿， 我媽媽都做完手術同化療一段時間， 但佢手術果邊身 成日間唔中痛， 覆診醫生又沒點解釋， 如果我擔心。幫媽媽佢定期去照pet scan / ct 去做檢查 可以嗎？？
雖然冇話唔可以，但唔建議冇目標咁去檢查。最正路都係同醫生講你地嘅擔心，等佢去幫你安排合適的檢查。
多謝你嘅回覆, 我會下次覆診時同醫生反映.
但想再問下 磁力共振是否都一樣能檢測到癌症腫瘤 , 肝 / 骨之類的遠端復發嘅呢??
因為搵過啲 資訊話 CT SCAN 那類檢查 幅射量都不少的, 有機會致癌?? 謝謝
磁力共振可以檢測到，不過靈敏度個個器官唔同。正常密度照CT scan，雖然有輻射，但唔會致癌。
你好阿, 我屋企人係已經完全切除左, 左邊的乳房. 另外右邊就係完整的
想問下的就係上面提到 乳癌復發 其中一種係 [遠端復發（即係擴散／轉移） ] , 係咪呢種遠端復發發生前, 都會係曾經有事嗰邊胸口發現腫瘤 或者 係另一邊冇事嗰邊乳房發現腫瘤 , 先會繼而引發遠端復發架呢??
如果係, 我只需要把關好胸口呢兩個地方 集中檢查住呢兩個地方的狀況就足夠嗎??
唔該你
唔係，可以一黎就遠端擴散而胸口冇事。
多謝回覆， 如果情況是以上咁講一黎就遠端擴散而胸口冇事， 咁咪好難會察覺到？ 因為照我屋企人現在定期每年先覆診一次， 而醫生都只係建議每半年做一次胸部的超聲波及造影檢查。 可以點樣更早一步發現到其他器官遠端擴散的情況呢？ 感謝
係可以好難察覺。
要早一步發現不外乎留意10大病徴，得閒抽下血驗癌指數、定期照下掃瞄。
想問下，我係0期high grade,已經全乳切除，仲需唔需要做電療，減低復發的風險呢？
切清就唔洗。
醫生你好，我媽媽60歲，19年7月確診乳癌，8月係公立醫院手術乳全切，病理報告ER+，PR+，HER2-，KI-67：10%，T1N0M0，醫生說只需要抗荷爾蒙藥，不需要做化療和放療，術後一直有定期抽血驗cea，由最初確診的5.0，5.3，5.6，5.8到今年5月驗到7.8，做了腸胃鏡檢查無事。7月底做了pet ct，顯示肺部有1個磨破玻璃影，suvmax值係1，另有多發小結節，沒有吸收FDG。咁的情況其實係咪轉移左到肺部？
唔可以肯定，要放長雙眼複照睇有冇變化先講得埋。
醫生睇pet ct片話個磨破玻璃影生得比較入，抽組織都難抽到，建議胸腔鏡手術切除，其實有無必馬上要做手術？（肺科醫生覺得係轉移，外科醫生覺得係肺部原發），咁我可以點做？
冇必要馬上做手術，等多4至6個月再照先決定。
巳經切清，不過deep margin少過0.1cm，我今年38歲！私家醫生建議我做電療減低復發，政府醫生就話唔使電！我現在好苦惱！我想知如果唔電療，復發機會係咪高D？
好視乎手術醫生切到幾底，如果好肯定到肌肉，deep margin 唔夠1mm都可以唔洗電，因為原位癌唔會蝕穿底膜，平時講要求2mm margin係主要針對circumferential margin，我地怕skip lesion跳層姐，deep margin 到肌肉的話其實已經唔係乳腺組織。如果唔肯定到肌肉的話，電埋就穩陣D嘅。
明白，唔該曬醫生的解答，另外4~6個月複照會唔會因為時間耐而拖延左病情㗎？（補充個磨破玻璃影大小為：2.7cm×1.8cm×1.4cm）
呢個世界99.99%嘅野都係有可能，無論你揀咩方案都好，都係有風險的。
我媽媽10年前患過乳癌…最近驗證身報告-Breast cancer. T1N1. E R low positive. PR-. herb2-…字面睇好驚.請問應該點解讀呢.唔該
就咁話乳癌，冇頭冇尾，唔知係講舊陣時定係復發。
及 left breast Ca post OT
家人在10年前右邊原位癌全切除及重建，近期有變型及漏情況，是否一定要找之前醫生做手術，不可換其它醫生呢？
可以換。
馬醫生，想問下如果頸岀現有粒粒，後頸都有，不只兩側，但唔係好多，係好似濕疹咁，好痕，係咪好大件事?我不知道係熱到汗疹定係點，好擔心
好難單憑你幾句去判斷，擔心就睇醫生。
馬醫生，你好，本人2011年左邊乳房確診乳癌經手術、化療、電療及荷爾蒙治療後於2022年6月停用所有荷爾蒙藥(5年Tamoxifen + 5年 AI)。但於今年8月右邊乳房確診乳癌 (腫塊生長得非常快，6月份做乳房造影時是一切正常的)，今次ER, PR 是 negative, C-erbB-2，請問本人個案是「黑開有條路」還是與停止服用荷爾蒙藥有關呢？
今次係黑開有條路，荷爾蒙受體陰性，即使有荷爾蒙都唔會刺激到佢，所以唔關停藥事。
醫生想請教下，我2年前左右做過全切手術＆淋巴，化療電療標靶，現在繼續食AI及打標靶針，這2星期同住家人確診新冠肺炎，期間一直感覺手術電療附近嘅胸口位有時腫，熱，有時痛及感覺奇怪好難形容，不過皮膚沒紅，胸口近心口有時有一粒圓滑但硬嘅1cm左右嘅野（本人沒有確診肺炎），請問我需要提早復診嗎？
擔心就睇醫生。
我左邊乳房乳癌二期，上年十一月已做局部切除手術，今年二月已完成電療，三月開始食Tamoxifen 。
但最近左胸好痛，又係有硬塊。醫生話係𥚃面傷口有肉芽，叫我多啲按摩，但都係無乜好𨍭。昨日去照超聲波，依個醫生又話好多乳線增生，所以痛。
想問下可以點樣改善肉芽/乳線增生問題？因為真係好痛，加上成日自己檢查都覺得有硬塊好擔心會復發。
肉芽就冇得改善，痛就只可以戒咖啡因（要戒咖啡、茶、可樂、朱古力）。
醫生你好！新年快樂！
我係左邊 T1C，年中做了局部切除手術，8月開始食Tamoxifen，9月尾完成電療 。
11月尾到外科診覆，當時檢查正常，之後再6月照MMG。
12月尾到腫瘤科診覆，當時有驗血(肝腎 CA 15-3)，檢查正常，之後3月覆診。
不過腫瘤科醫生都建議我每年做 PET SCAN 及定期照肝腎肺。
因為當時聽到每年做PET SCAN 有點意外，所以當下冇問清楚。
我想知道每年較保障的檢查係？
例如每年一次: PET SCAN, CT SCAN (肝腎肺), 抽血, MMG？還是某檢查緊密點較好？
另外，手術後5個月，手術部位仍會刺痛，而且近日胸口會痛 …..
因為我才剛覆診，應該不是復發吧！但又擔心….
乳癌檢查 － 醫好乳癌之後點跟進？
https://www.breasthk.com/follow-up/
馬醫生你好，
我上年5確診三陰性2A期，先化療，9月尾做手術，12月中完成電療。
今年1月10日返過外科醫生覆診，照超聲波一切正常。但最近呢個星期係以前手術範圍嗰度摸到一粒西米咁上下大的粒粒，請問會唔會咁快復發？
我過2日就去旅行，要復活節後才可見醫生，真係好驚。
驚都幫唔到件事，都係要等你睇咗醫生檢查咗先知。
終於做咗超聲波檢查，一切正常。但馬醫生我想問下，做完手術後乳房入面有疤痕，摸落去感覺都係硬硬地。究竟如何辨識是疤痕還是不正常的硬塊？
另，亦想問下馬醫生，我在完成所有治療後是否可以看中醫調理身體？中藥會否有trigger異常細胞增生的風險？
冇經驗其實係好難分辨，醫生主要都係靠照超聲波，同啲舊圖片對比，先會判斷出係舊疤痕定係新生嘅硬塊。
可以睇中醫，一般中藥應該可以視作安全，當然「中藥」呢個詞語包含無限咁多藥，答你唔到會唔會有例外。
多謝馬醫生回覆！
我上年12月中完成電療，但手術位置仍會戚住戚住咁痛。我見你寫的十大復發病徵又無包呢樣，咁有無可能係電療副作用呢？
主要都係關手術事。
馬醫生你好，又係我。
想問骨轉移既骨痛係咪可以任何部位？我左邊肋骨在申展/拉扯，或者側睡時會隱隱作痛（乳癌都係左邊乳房），請問需唔需要搵醫生睇睇？應該做咩檢查呢？
可以任何部位。
擔心就搵醫生睇，擔心骨轉移就要照骨掃描或者正電子掃描。