乳癌成因 : 我易D生乳癌嗎?
「究竟我有冇患乳癌嘅高危因素?」睇報紙/網上資訊,樣樣都係高危因素,你一定中幾樣(就好似讀者文摘啲抽奬咁,你一定中㗎。)
咁中咗又有幾影響患乳癌嘅機會呢?呢篇有你想知嘅野⋯⋯
你帶個男朋友返去比阿媽睇,大家都係毒男樣(同樣病徴)
如果男仔冇家底(高危),阿媽會話:「毒男(癌)黎喎,阿女小心。」;
如果有家底(低危),話之佢50歲禿頭,阿媽都會話:「鑽石王老五黎喎,阿女唔好咁膚淺淨睇樣,好仔黎㗎(良性腫瘤)。」
醫生同阿媽都一樣唔膚淺,睇病係睇你㡳蘊。
你高危嘅,話之你病徵唔太可疑,一樣要小心。
相反,你低危嘅,就算病徵好可疑,低危就係低危。
乳癌的高危因素
隨隨便便,我都可以列舉一大堆患乳癌嘅高危因素:女性/年紀大/曾患乳癌/有家族病史/早初次黎經/遲收經/從未懷孕/冇餵人奶/長期用口服避孕藥/收經後肥胖/收經後用荷爾蒙補充劑/黑人/酒精/早年曾受胸腔電療。
就咁講完,係好多醫生/網頁嘅做法。
聽完你只會有兩個反應,跟得切嘅就會話:「死喇死喇,我中喇⋯⋯又中⋯⋯又中⋯⋯」就好似啲星級補習名師上咗身話齋:「這才是中!」
跟唔切嘅就會話:「醫生,我唔明」。你唔明,醫生再慢啲講多次,你都唔會明,唔係你蠢,而係咁多個因素互相影響,好難講得埋有幾差。呢啲又唔係六合彩有分特別號碼,我中呢四個,你中嗰四個,邊個衰啲?邊個係特別號碼?唔好話你唔明,你叫醫生比個具體啲嘅數字你,佢都好難做到。
點去理解?
「吓?咁無奈?」又係唔哂,我都有四樣野講到過你聽:
1)越中得多,越高危(好合理吖)
2)要睇重一啲重中之重嘅因素:女性/年紀大/曾患乳癌/有家族病史,呢四大天皇,緊要過其他二打六。
伸延閱讀:遺傳性乳癌-我洗唔洗驗基因?
3)要改變一啲可改變嘅因素:你睇以上四大天皇,有邊個可以改到?唔通真係地鐵站廣告「肌齡回復」咩。你可改變嘅就係「唔好食避孕藥、早啲生小朋友、餵多啲人奶、收咗經唔好食荷爾蒙補充劑、但又要努力保持競爭力(瘦)、同埋唔好飲酒。」
4)早初次黎經/遲收經/黑人/早年曾受胸腔電療,呢啲又唔緊要又改變唔到嘅,算吧啦,佢地嘅重要性等如隔離陳師奶話:「你生野呀?都幾黑仔喎。」冇意思。
患乳癌機率計算機
「Breast HK,一開始你又話會講『中咗有幾影響患乳癌嘅機會』嘅,而家又講到醫生都比唔到實在數據我,咁即係點?」
本地醫生唔係好興計機會率,不過外國就好興呢家野。其中一個喺外國好出名、經過驗證嘅計算患乳癌機率計算機叫Gail Model,你可以喺美國政府嘅官方機構National Cancer Institute 度搵到(呢方面,美國D大國的確係做得好)
Breast Cancer Risk Assessment Tool
圖片來源:National Cancer Institute
圖片來源:National Cancer Institute
你入晒啲資料入去,佢就會話比你聽黎緊5年/呢一生人(到90歲)中招嘅機會率。
圖片來源:National Cancer Institute
要套用到香港,我估要將它計算出黎嘅機會率除2,因為美國嘅乳癌病發率係高香港一倍。
不過人算不如天算,好多野都係講運,與其機關算盡,不如珍惜所有,抱緊眼前人。
下一篇同大家講吓一個好重要嘅題目⋯⋯
Breast HK, 我40歲三個月前確診乳癌一期,最近養和報告話我係BRAC2 帶因者,主診話我一生再中癌症的機會高,我個腦已經空白一片,真係灰咗!以為就跑到終點,原來一直在起跑線。在治療上或預防上可做什麼?我已經全切了有問題個邊,但化療/荷爾蒙藥的治療有不同嗎?
誠如你醫生所講,你再患癌的機會比人高,不過已經好過BRCA1嘅患者。醫學文獻上,將來再患癌嘅機會,會因為種族嘅關係而有頗大差異:
到你70歲時累計風險(cumulative risk):
另一邊有乳癌(contralateral breast cancer)嘅機會:62% (44-80%)
卵巢癌(ovarian cancer)嘅機會:16.5%(7.5-34%)
治療上(化療/荷爾蒙治療)其實同冇BRCA基因突變的乳癌病人冇咩大分別,分別只在於「預防/監察」上。
因為我地知道你另一邊乳房同埋卵巢患癌嘅機會高,有D病友會選擇係未有事之前,預防性咁割埋冇事嗰邊嘅乳房/卵巢。最出名嘅例子要選上年做咗呢個手術嘅荷李活影星安祖蓮娜祖莉(Angelina Jolie),當時全球熱烈討論。
做預防性割乳房(prophylactic mastectomy)嘅好處係可以大大減低另一邊嘅乳癌風險9成以上。如果唔想做呢個手術,醫生通常會建議定期照埋MRI去密切監察,即係照完乳房X光/超聲波半年後照MRI,半年後又再照乳房X光/超聲波,一路咁樣半年半年密切監察。
至於卵巢,亦都可以預防性咁割咗去(prophylactic salpingo-oopherectomy),好處係可以大大減低卵巢癌風險8成以上,同埋喺未收經嘅病友身上,減低患乳癌嘅風險。通常到40歲度,而又唔再想生小朋友,醫生就會建議呢種手術。如果唔想做手術,就抽血驗癌指數CA125,加埋每年照盆腔照聲波(pelvic ultrasound)去監察住。
多謝你解答。今次完成化療後,我轉回政府醫院跟進口服荷爾蒙藥可以嗎?我住港島東醫院管理局的醫院會受理我嗎?如果受理,要去什麼科?
我仲有兩個15、17歲的仔,我想留多點錢比他們,萬一遺傳咗比佢地都有錢醫。BRAC2遺傳比下一代男性機會率有幾高?什麼歲數是高危期的開始?有無得預防?或者做什麼可以減低風險?應該找什麼科醫生?
英文網站數字無提亞洲人,台灣網站個個不同嚇親人,更不知網主專業程度。所以;對唔住Breast HK,我還是一堆問號解決不了,請幫幫忙比多點資料我,我快想瘋了。
你完成化療後,當然可以轉回政府醫院跟進,繼續食口服荷爾蒙藥。港島東嘅病友按地區就應該去東區尤德醫院,不過你已經確診BRCA2基因突變,當然去返上環東華醫院好D,因為嗰度有全港唯一(公立)嘅BRCA高危診所(high risk clinic),會幫你跟進得密D/定期照埋MRI去監察。
BRCA遺傳方面,我地知道佢係highly penetrant 嘅autosomal dominant mutation(呢度唔明嘅話唔洗理,下一句先係重點),所以你有50%機會會遺傳咗比你兩個仔。不過與其50/50估估吓,最實際嘅做法,就係當佢地18歲以上又明白事理時(因為要了解到做咗測試之後嘅心理壓力),喺佢地同意底下(因為佢地有權去知/唔想知自己有冇BRCA基因突變)去做BRCA基因測試,咁就知道佢地實在有定冇遺傳到你嘅BRCA2基因突變。
如果佢地遺傳咗BRCA2突變,係會比起其他人高D機會有乳癌/前列腺癌,不過始終男士有乳癌嘅機會係細過女士好多好多,所以「呢一刻」(我強調呢一刻,因為呢D野成日更新/轉)嘅國際指引,都只係建議定期比醫生檢查住有冇乳癌/前列腺癌跡象,冇咩預防性治療要做(唔似女士可以做預防性手術)。因為呢D野要長期作戰/監察,都係去返東華醫院嘅高危診所跟進好D,一來專業,二來又可以解決咗你錢方面嘅擔心。
呢刻是我人生最黑暗的日子,在網絡無意間發現Breast HK你的網頁,我總算不幸中之大幸。希望東華醫院的醫生有機會同你一樣,唔會覺得遇上我,就是執人難灘子。真誠感謝你。
你好,
刚抽粗針報告如下:
Microscopic Description:
The tissue cores contain serveral detached fragmentss of papillary lesion composed of stratified cellular layers of ductal cells with moderate nuclear atypia lining fibrovascular stromal cores. Immunostaining for p63 shows loss of myoepithelial cells around the stromal cores. No necrosis is evident. The features are those of an atypical papillary lesion, with features suspicious of intraductal/intracystic papillary carcinoma. Assessment for stromal invasion is not possible due to tumour detachment from the stroma.
Diagnosis:
Left breast mass at 4 o‘clock, core neddle biopsy
– Atypical papillary lesion, with features suspicious of intraductal/ intracystic papillary carcinoma
– Recommend excision for further evaluation.
請問是否乳癌? 原位癌?
未知,粗針只係見到有非典型乳頭狀細胞,會建議做手術去排除/確定乳癌。
己在政府医院再抽14号粗針,医生話原位癌,未見淋巴擴散,要全切,前哨淋,医生話要手術後,要睇病理報告先可決定是否有浸入性癌,想問有浸入性机會大嗎?要化療嗎?
冇得估,要等做完手術先明朗化。
如確診為原位癌,為何報告用懷疑來形容?.
懷疑即係未確診。
唔好意思,因好担心要做化療,
可唔可以將報告理解為由癌前病變去原位癌,有侵入性低
唔可以因個人喜好而去咁理解。
今年48歲早前醫院説在例行檢查見到一邊乳房有黑影,請問有黑影代表什麼?會是癌機會大嗎?我很怕痛如抽針會很痛嗎?
黑影好多可能性,只可以話要檢查清楚,講唔實患癌機會大唔大。抽針少少痛,可以接受的。
之前到私家照x 光,話個胸有白點,跟住寫信俾我到仁濟照部機,現在話要等電話,再按排抽針,甘樣是否表示醫生好懷疑出問題,我現在非常擔心,成日無端會驚到喊
代表醫生覺得D白點要搞清楚有冇問題,所以要抽針攞D組織去確定有野定冇野。
講錯左,不是要x 光,係做夾胸個種
夾胸即係X光。
甘樣情況,如果未抽針,醫生會否根據佢自己的經驗,話可能會係腫瘤?因為佢咩都冇講,就甘叫我等,我真係好擔心
如果你有報告係手就可以睇下佢有冇寫BI-RADS 幾。詳細睇乳房鈣化點 - 係咪好危險?
Hi 醫生你好,我前些日子去了團報的健康中心做了乳房超音波,以下是報告內容:
The left breast appears an ill-defined and hyper vascular hypoechoic solid lesion measuring 1.2 x 1.2×1.2 cm at 12 o’clock position 3cm fromnipple.
The parenchymal echotexture of both breast appear normal.
No sign of intramammary ducal dilatation is identified.
Bilateral axillary lymph nodes appear not enlarged.
請問狀況是不是很不好,我約了私家醫院下禮拜去做further check.但想到可能是不好的組織,就有點擔心,我還想在生第二胎,看來計畫是不是要先postpone了⋯⋯
Hypervascular即係有血管生入去,簡接代表粒野可以生長迅速,雖然未必係衰野,不過要搞清楚佢係乜。
可是我想請問Hypervascular的狀況會發生在良性組織的可能嗎?如果是,那是不是代表無論最後抽針結果是良心或惡性我都得要開刀把它拿掉呢?謝謝
可以發生在良性,唔代表一定要開刀切。
想問下照PET scan係咪就知第幾期呀 抽完針個醫生話要成個切左先知第幾期
照完初步會有個概念。
醫生你好,想請教🙏🏻上年我摸到粒嘢就去檢查超聲波做埋抽針,報告話係良性纖維瘤,今年再檢查就被建議做手術因為都有2點幾cm,手術後報告話係良性纖維瘤但同時發現有非典型小葉增生,也是良性,已切除,醫生話日後患乳癌風險比其他人高。我聽完好擔心,請問呢樣問題係咪可以隨時變壞?上網呢方面資訊唔多,感動解答
患癌風險比常人高少少,唔太大問題。
Hello醫生
有時我會聽到有d乳癌case係無近親有乳癌病史,又有case係無咩不良生活習慣又熱愛運動,又有case係正正常常20幾歲都生左小朋友,除左遺傳基因同年齡係好significant既因素之外,其實現實其他唔係遺傳既cases係咪都真係好多都無跡可尋,無得解?咁到底d高危因素係點定出黎?現實情況有幾準確反映係真係高危因素?
咁如果好多高危因素都唔係咁significant,現實都好似有唔少case係患者自己都覺得唔知點解,點解唔直接話「除遺傳因素外,任何的女性都有機會患上乳癌」?
如果唔煙唔酒,維持生活良好習慣都可能避唔過乳癌一劫,咁即係除左定時做檢查,都無咩特別野可以預防乳癌?買大細睇自己成世人好唔好彩?
現實中85 %嘅個案,係冇任何高危風險因素。
預防方面可以做嘅野唔多,生唔生病係睇自己條命生成點。
醫生,想問一下,我有家族性乳癌病史(由媽媽那一代開始,姨姨也全部患乳癌,暫時只有姊妹,表姊妹還沒患上乳癌),而且我初經來得早,大概9歲或10歲,30歲前也沒生育。雖媽媽驗過沒帶有BRCA1 或 2基因,但我知我是高風險的,不知道有什麼方法預防?除了多做運動,吃健康食物等等,最近有了解到有選擇性雌激素受體調節物(SERMs)的藥好像也可以預防,不知道醫生建議高風險的人士吃這種藥嗎?
冇,都係得早D定期檢查。
香港甚少咁樣食藥去預防。