乳癌手術費用 － 手術收費貴唔貴？醫療保險包唔包？
保險經紀除咗會氹你買危疾保險外，另一個好多人買嘅就係醫療保險，貪佢嘅住院同手術保障。咁究竟乳癌手術費用貴唔貴？保險包唔包得晒D費用呢？呢篇講講你聽⋯⋯
我之前講過，乳癌手術係治療乳癌主力中嘅主力，咁你好自然問：「手術收費貴唔貴？如果我支付得起，我就唔想係公立醫院等咁耐先開刀。」
我未詳細講前，希望你溫下書，睇返之前嘅文章「香港乳癌醫生－睇公立好？睇私家好？醫生攻略1」。
裡面有個好重要嘅收費表，其實已經答咗你個問題：
第七項就係你要嘅答案。
你而家知道公立同私家係差天共地，就算私家自己都可以差天共地。
假設你係公立醫院做乳癌手術，開刀前一日入院準備，之後手術順利，三日後出院，總支出：$50（入院費）+400（四日住院）+10（止痛藥）=$460
私家醫生點收費？
睇得呢篇文，梗係想知私家醫生點收費啦，好，就講你聽：
手術方面有三項支出：
1）外科醫生費：就算同一手術同一醫生，收費都人人唔同，睇你等級。基本上原則同香港政府自願醫保一樣，即係點？即係奉行「能者多付」。
2）麻醉科醫生費：通常係外科醫生嘅三分之一
3）手術室費（私家醫院收嘅手術室姑娘／場地／燈油火蠟／手術用品開支）：通常都估計到幾多錢，視乎手術嘅複雜程度，霸佔手術室嘅時間。
手術後又有三項支出：
1）醫生巡房費：逐日計，好清楚。
2）住院床位費：又係逐日計，視乎你住咩等級嘅床。
3）雜費：膳食、洗傷口、化驗、針藥等等。
乳癌手術費用 ： 收我幾多錢？
當你知道有咩項目收你錢，下一個問題就係「收我幾多錢？」
收你幾多錢，你梗係以為係商業秘密，原來近年政府近年大力推廣「收費預算 （budget estimation)」，好多收費資料已經可以係各大私家醫院的網頁下載：
根據聖德肋撒醫院嘅統計數據：http://www.sth.org.hk/download/zh/ccssp.pdf
圖片來源：聖德肋撒醫院
係佢地度開刀割粒野（例如乳房纖維瘤），平均你要洗$27190
咁另一間私家醫院仁安醫院又係點呢？
https://www.union.org/new/tc_chi/charges/files/CCSUH_chi.pdf
圖片來源：仁安醫院
係佢地度開刀割粒野（例如乳房纖維瘤），平均你要洗$28780
如果成個乳房割，平均你要洗$76740（細分項目自己睇圖表）。
小貼士：成個手術嘅收費模式，同埋以上嘅統計數字，其實可以應用到所有癌症手術，甚至其他一般手術。
不過要留意，以上私家醫院只係統計最基本割乳房費用，其他增值服務（乳房重建／急凍切片）係未包嘅。例如乳房重建用多一倍時間，咩野都雙計，咁就已經$150000。
醫療保險包唔包？
係咪真係買得大、賠得大？我地一齊睇睇保險公司嘅「大亨」計畫，睇吓自己享唔享用到頂級的醫療服務：
圖片來源：藍十字
圖片來源：藍十字
勁啊，佢話咩都「全數賠償」呀，等我搵全港最有名乳腺科外科專科醫生，享受吓頂級的醫療服務先！
慢慢黎，仲記唔記得上一篇「乳癌治療費用 － 危疾保險保唔保？」提過你魔鬼在細節裡：
圖片來源：藍十字
你嗰個放大鏡呢？唔好咁快收埋住⋯⋯
圖片來源：藍十字
睇清楚未？人地講「全數賠償」，係指保險公司覺得嘅「合理慣例」。唔好買咗「大亨」保險就真係以為自己大亨，走去學人享用頂級名醫服務，唔係到時落唔到樓真係安信兄弟都幫你唔到。
記住睇清睇楚你份保險包到幾多（佢應該有詳細例明以上每個細項可以賠幾多），先知自己有冇資格去私家做手術。希望呢兩篇保險篇幫到你保護自己，總之就有買保險都要小心計算清楚，以免大失預算！
當準備好晒錢，我地下一步就去傾吓一個香港討論區嘅熱門題目「有乳癌怎麼辦？」，究竟乳癌應該用咩方法去醫？
乳癌治療方法 － 我需要用咩方法醫？1
乳癌治療時間 － 我需要用咩方法醫？2
香港乳癌及乳病治療中心 
Breast HK, 先多謝你花時間整理有關乳癌的資料，深入淺出，對我了解此病真的很有幫助。
我三月尾確診導管癌，四月頭做手術局部切除。報告出了size of tumour1.4cm，invasive focus 0.2cm，這樣寫法是否已代表不是原位癌？因為保險經紀覺得我醫生填危疾的claim form有點奇怪。另外，雖然前哨淋巴冇事，但有0.2的invasive是否代表可能有癌細胞經淋巴或血管散了出去不知那裡？
有invasive focus即係侵蝕性癌，假設你照咗掃描冇擴散，期數就會係T1aN0(sn)M0，Stage1A，中咗危疾保險公司要賠足。
侵蝕性即係佢「有能力」走去其他地方，但冇人可以講實／咬定呢一刻「有定冇」癌細胞「已經」經淋巴或血管散了出去，不過以現有檢測技術（前哨淋巴／掃描），只可以話你個情況「冇」走散嘅機會大。
多謝你的即時回覆！
清楚明白晒！
講到保險呢個問題，話說我年頭一月去做左個乳房超聲波，左乳有0.5mm既cyst, 近乳暈位置，份報告寫住要跟進。作為你既忠實讀者，我當然知道我無需要太過擔心，於是我就打算年尾再檢查。早幾個月我想加大份危疾保險，結果保險公司要我自費去做多一次超乳房聲波檢查，雖然好平只係五百蚊，但係我唔想隨便向出面不知名既地方檢查，所以加保險一事就此打住。到左呢個月，我公司幫我買group insurance, 咁我如實地按要求提供一年內做左檢查既報告俾保險公司，結果佢地又來信追問我有乳房問題咩follow-up. 其實我真係有好大疑問，其實呢d cyst 都唔代表有大問題，癌變機會咁微，我唔明點解兩次d保險公司都咁緊張，定係一般來講保險公司係有殺錯唔放過？！我今年３１歲。 而家我打算的起心肝搵個乳腺科醫生幫我睇多一次，希望可以得到一個証明我係無事既結果，如果唔係我買親保險都kick住，我都幾煩。
保險公司係咁，佢唔會分你咩病變，總之有殺錯冇放過。佢地一見你乳房「有野」，有2個常見做法，一係唔保乳房、一係加保費。
我試過有病人好耐之前報漏咗良性乳房纖維瘤，之後生乳癌，保險公司都冇得賠，佢話因為你漏報而令佢錯誤評估。雖然兩樣野唔關事，亦都幫佢寫咗信證明，在商言商係冇用嘅。
嘩！半夜留言竟然朝早就收到回覆，真係劉華級服務呀！多謝你呀！
您好！我係乳癌確診三期C，醫治次序係：化療/電療/手術，我由懷疑初期到確診都只係五個月，癌細胞增長得好快，全個過程都係政府醫院跟進，下星期開始接受化療，因為政府醫生解釋完病情及治療次序後我只吸收到一半，當時當刻亦不知怎提問，真的一知半解，唯有自費睇乳房專科醫生，醫生看完我電子病歷後再即時照超音波及臨床了解我現時狀況，後詳細解釋，現在大至上明白！現還有些問題懇請閣下解答：
1-請問是否可以跨區選擇醫院做切除乳房手術？
2-義乳手術是否同時進行？是否需要自費做義乳手術？
3-我在聯院檢查，轉介到伊院化療，現想到港島瑪院做手術，這樣可以嗎？是否要在化療前事先通知聯院安排？
4-確診癌症是否可申請傷殘津貼？可以幫補吓化療期間車費開支都好！
不好意思，太多問題，請不要見怪，謝謝！
1）基本上可以，不過時間上係咪理想，則另一個問題。因為你跨得區，即係要喺唔同醫院都當新症來睇一次先，快唔快／配唔配合到係你要關注嘅地方。
2）義乳一般泛指外在的，我諗你想講矽袋或者水袋。通常一次過做埋，手術公立就唔洗額外收費，不過矽袋／水袋要自費，大概三四千蚊一個。
3）理論上可以。越早知會醫院／越早安排，無論對自己／對其他人，都係一個效佳的做法。
4）可以申請，批唔批由醫生決定，一般化療期間都會批。
非常非常感謝回覆！
若有問題會再請教，萬分感謝！
再請問，公立醫院會否幫病人在切除乳房時同時做埋乳房整形手術？我意思係將肚腩脂肪/皮膚切割補上切除乳房位置，做番個型，是不是公立醫院不會這樣做？若可以，是否要自費？
謝謝！
有提供乳房重建服務，不額外收費。不過唔係間間有整型科醫生駐院，只有瑪麗、廣華、屯門、威爾斯有整型外科。其他醫院由外科醫生兼任。
再提問：
1/ 請問是怎樣決定為病人選擇做化療或標靶藥治療？如醫生建議要先接受標靶藥治療，這藥沒有太大副作用對嗎？日常生活可如常進行？有沒有要注意事項？
2/ 療程時間因人而異？
以我個案通常要食幾耐呢？
3/ 我知道這藥是很昂貴，以我個案，大約需要幾錢一個月？我是公務員家屬有沒有支助或可申請全免葯費？
4/ 是否因為太昂貴而未被廣泛使用？
謝謝！
1）乳癌惡而臨床情況合適就會做化療加減標靶治療。詳情睇：
乳癌治療方法 － 我需要用咩方法醫？1
2）乳癌治療時間 － 我需要用咩方法醫？2
3）公務員家屬政府全包。
4）已廣泛使用，當然有人付擔唔起而唔用。
?真的無限感激！
解釋得清楚明白，真係無得輸呀！
我都唔會輸，一定會打低“佢“嘅！
謝謝回覆！
您好！又有問題如下：
1/ 今天是化療第二針前見醫生，但驗血報告顯示我白血球指數係0.7唔合格，正常1.5，得一星期時間點追升回正常水平呢？
2/ 醫生話要等下星期睇吓血報告後才決定打唔打升白針，但睇網上資料話升白針會產生骨痛嘅副作用，請問對嗎？每次打都會痛嗎？還有什麼副作用？聽聞針葯昂貴，公務員家屬會否全免？
3/ 我現在成個乳房(右)還很腫脹痛，但腋下淋巴核真的縮細了很多，未打化療針前外觀及觸摸到已經有雞蛋般大，超聲波量度有4.5cm，請問第一針後會咁快縮細嗎？我整個化療程要打8針，會否視乎情況而有所增加或減少針數？我知道有些病人是4/6/8/…16針不等！
4/ 還有另一擔憂問題，上兩星期回聯院照了下腹盤腔電腦掃描，今日醫生話照到脾臟有一個黑影同脹大咗，又話照計無理由乳癌會擴散到脾臟，唔常見…對嗎？但之前正電子掃描又無顯示脾臟有問題，我又上網睇資料，脾臟都和淋巴有關連，癌細胞亦會影響脾臟，而我係地中海貧血攜帶者，請問會否互相影響到呢？現在化療期間，脾臟問題有什麼方法去治理？
不好意思，太太太多問題，煩請回覆，謝謝！
1）等自己身體復原，或者靠升白針。
2）升白針可引致骨痛，沒有其他明顯副作用。同所有藥一樣，反應因人而異。費用方面，公務員家屬免費。
3）如果同D化療藥夾，反應係可以好顯著的。雖然實際針數醫生會隨著臨床反應去調節，不過定咗嘅方案通常都跟。如果你反應繼續保持理想，9成機會話8針就係8針。
4）乳癌單獨擴散去脾臟的確罕有，如果PET scan都冇著燈，唔洗太擔心。隱性地中海貧血唔會搞到脾臓大，只有重型／中型地中海貧血先至會。脾臟陰影只需跟進，冇咩治理嘅，只有切同唔切。
感謝回覆！
另再想問：我現階段還有7針化療約半年時間，是否會在化療後才跟進脾臟問題？或要在化療期間開刀切除脾臟？我真擔心承受不了，化療已經辛苦！
脾臟脹大沒有葯物可醫治嗎？一定要切除？沒有“他“對身體有多大影響？
煩請回覆，謝謝！
做完化療最理想就照多一次PET scan去作為手術前評估，呢個scan已經可以順手睇埋脾臟陰影。化療其間唔需要／亦都唔會切除脾臟（因為會影響抵抗力）。
至於詳細脾臟問題，已經超出討論主題，建議問返自己醫生。
非常感謝回覆！
現在完全明白，可安心接受化療！
唔該醫生！！！
醫生，您好！現提問如下：
1/ 好不容易才打了第二針，我上兩星期照了磁力共振，報告顯示脾臟脹大黑影醫生話應該係血管瘤，而唔似係癌腫瘤，咁就好d，可以等化療後再治療，對嗎？
2/ 但另外照到盤骨有兩點發光，可能驚癌細胞擴散到盤骨，醫生話要開會睇過晒d片先諗點做…其實跟住將會點做呢？
3/ 請問醫生若確實係擴散，盤骨遲些會痛嗎？我都問過醫生，佢話咁細，未會痛嘅…咁，上網睇過資料，話乳癌擴散到骨係常見，骨擴散速度比較慢，對嗎？化療後又點醫骨擴散呢？
真係好灰，過完一關又有第二關，而家好似等判刑咁，我咁擴散，係咪已經第四期？末期？明白期數係“數字“遊戲，我仲係有信心嘅！
勞煩醫生回覆，謝謝！
1）如果係血管瘤，就係良性的，除非好大（怕有流血風險），如果唔係唔洗做咩治療。
2）之後通常都係繼續化療。醫生要開會，即係佢都唔肯定係唔係擴散。開會後話冇野，第三期C又係繼續化療。開會後話有野，第四期又係繼續化療。分別只在於之後展望，究竟樂唔樂觀，同埋做唔做埋手術／電療去，呢D野要化療後再照先決定到。
3）如果係擴散，視乎程度同個人反應，有人痛有人唔痛。骨擴散相比其他擴散，係生長得較慢。治療主要係化療／骨針／加減電療／標靶治療／荷爾蒙治療。
4）醫生要開會，現階段冇人講得實第幾期，只可以話時間會證明一切。
唔該醫生，謝謝回覆！
醫生，你好，我已接受全部療程：化療，右邊乳房/腋下淋巴切除手術，電療，現在要服用荷爾蒙五年，我化療共打8針，到第6針後右手前臂開始水腫腫脹，直至做完乳房/淋巴切除手術後情況更嚴重，跟住再電療16次，水腫情況又增加了，之後做了10次淋巴水腫物理治療後，改善了少許，治療師話只有做多些手部運動，沒有藥物治療可舒緩…但現在一星期持續全手臂麻痺/酸痛/痺痛，極其嚴重，情況真令我難受，非常痛苦…痛苦…痛苦，現在明白為什麼有人會“因病厭世“，我化療手術電療幾辛苦我都捱到，沒問題，但現在痺脹痛係超級難受…
醫生請問:
1~有什麼方法/治療可做可舒緩？
2~因為腫瘤科覆診期還有一個月，若現在看私家醫生可以嗎？
3~屬於那一科？
4~有藥物可控制舒緩嗎？
不好意思，太多問題煩請回覆，謝謝！
睇咗呢篇先：乳癌淋巴水腫 － 真係冇得搞？
唔好意思啊，我想問我媽咪（54歲）抽咗幼針驗證實係乳癌，照超聲波個瘤1.5cm左右，但仲未抽粗針。我地想快啲俾佢做手術切咗個瘤但又擔心負擔唔起想喺公立醫院排期做，想問其實確診咗之後幾耐做手術好？如果要等2-3個月個病情會唔會轉差好多？唔該晒你
越快越好，等2－3個月會影響病情。
我家姐確診乳癌 星期六做了pet ct scan 肺同肝都clear 係盤骨同左邊大腿骨 好似有癌細胞 醫生話語吾confirm 但report 寫worrisome 應該係有問題 醫生建議先做手術後做化療 請問去到骨很嚴重嗎？我家姐沒有骨痛 加上她只有43歲 可否醫好呢？
如果真係去到骨，屬於第四期，情況嚴重。詳細睇：
乳癌四期 － 我係咪第4期？
乳癌四期治療攻略 － 末期仲有冇得醫？
絕大部份情況應該先全身治療（systemic treatment）：化療／標靶治療／荷爾蒙治療，控制得到／控制得好，先會考慮做手術。「做手術先」呢個好大機會唔係一個好選擇。
我想問癌症初期大概1期需要標靶針嗎還是只做化療就可以。
要睇size同屬性。
我想問係咪切咗個瘤就無事架喇?因我也是1CM左右.
如果未擴散就係。
你好！由於私家整形收費好貴，想問公立醫院重建手術效果好不好？一般需排期多久？費用多少呢
效果睇彩數，睇下你抽到有經驗醫生做定新仔做。排期間間唔同，好多因素影響，冇概括數字，不過一定比唔重建等得耐D。
手術唔洗錢，住院120蚊一日。
醫生：我係手術前打雙標雙化，都手術了，出來結果係淋巴沒感染，之前有，腫瘤仲有2.2cm,係原位癌，但手術後十幾日，引流傷口都好左之後發現傷口下生左一粒痘，依家擔心係復發，接落來要電療
唔似，不過最終評估要問返自己醫生。
多謝，因為粒痘都有小，今日姑娘話都做唔到咪現在，因為都要電，電完再睇，多謝你
醫生你好，由於我太太的保險只有住院保障，如需要化療，電療或標把療法，療程在私院做是否需要住院呢？
因為保險是需要住院六小時才乎合保障的。
正常做法係唔需要住院。
如果我在私家醫院做根治性乳房切除術，之後可以轉去公立醫院做後面的治療嗎？公立醫院會受理嗎？
可以，會受理。
我太太十多年前發現有一邊乳房有3粒良性的纖維瘤，醫生話唔需要再跟進，我哋有保留醫療報告和超聲波圖。
好多人都話同癌症無關，不過有間保險公司話如果同佢地買自願醫保，佢地唔會包任何乳房疾病。
請問啲保險公司係咪多數都係咁架?
係，有任何風險都唔做你生意。
醫生你好，我是14年經私家醫生做了全乳切除，同時即時用矽袋做重建手術。今年去私家醫生覆診才告知18年出了醫療報告，說有0.03%的病人會在重建後8至10年後會有機會發展成淋巴癌。現醫生建議我找整形醫生做移除手術，還說這個機會率可能會越來越高。想問這類的手術找整形醫生做大概要幾錢？（再以自己肚腩脂肪再重建）我當年是在瑪麗做化療，現在也有繼續在瑪麗複診，我可以要求瑪麗醫院替我做這手術嗎？其實我需要積極考慮拆建嗎？希望能聽你的意見，謝謝你！
拆除矽袋加肚腩重建你預私家20萬度，可以要求瑪麗醫院做。
現在主流意見係無事無幹嘅話，唔建議拆除，觀察住就已經足夠，如果有唔妥先拆除。
醫生好.我，我是10年前，經私家醫生做了全乳切除，同時即時用矽袋做重建手術，現在想移除，請問手術大約多少。
你預手術費兩萬一邊，兩邊即係四萬，連埋醫院的費用，你預八萬蚊埋單。
醫生您好。我太太今年三十中，her 2 第三期，Ka67 60% ，腫瘤有三粒(2-3cm)非常相鄰的腫瘤，被私家乳腺科醫生計為 6cm，荷爾蒙 positive，pet scan 腋下輕微著燈，抽細針腋下一粒脹大淋巴未有發現癌細胞，私家腫瘤科醫生相信有擴散到腋下。
太太11月頭已於浸會進行所有前期檢查，上星期5 (13/11)在私家腫瘤科醫生的診所接受了雙標靶雙化療治療 (TCHP)，第一次11萬幾，然後將於今星期4(11月19日)見政府腫瘤科醫生。
想請問，1. 政府腫瘤科醫生會不會同意繼續雙標靶雙化療治療 (TCHP)的治療？
(私家腫瘤科醫生的plan : 雙標靶雙化療6 * 3weeks =18 weeks；然後休息4 weeks，做手術/+ – 重建；再然後再休息weeks；荷爾蒙藥+電療+雙標靶HP*12 cycles * 3 weeks = 36 weeks)
2. 大唔大機會第二針可以在公家打 (第二針時間應該是4/12，如果政府話要7-8/12先有得打，又可否等)。(因為私家第二針要8萬幾，我地現在只有不多於30萬的現金，危疾買得少，所以如果可以，都想在公家接受雙標靶雙化療治療)
3. 私家腫瘤科醫生話每次覆診都會照超聲波，睇下雙標靶雙化療有無效縮細腫瘤，請問公家會唔會同樣禁做？如不，需不需要我地自費出去照？/繼續同時睇私家乳腺科醫生，應該幾時去做。(我們有公司醫療保險，基本上私家專科門診費用+所有pet ct/mri/ultra sound 可 claim 到 80%以上)
4. 私家乳腺科醫生話做完二次雙標靶雙化療，要返去見她落返個定位，但呢下未決定到在公家/私家做手術，應否照去私家乳腺科醫生度落定位。 (太太有買婦女保，醫療保險包重建；宜家等11月19日見政府腫瘤科醫生時，拿轉介信排埋公家乳腺科)
5. 完成6次雙標靶雙化療治療後，政府會不會安排pet ct/mri/ultra sound檢查胸部腫瘤情況？ (有無需要自費出去照mri ultrasound pet ct？-難得有公司醫療保險包到80%)
6. 考慮公家/私家做手術，應該考慮什麼因素？
我地介乎於有d 地方可以找私家 (手術、專科門診，lab test)，有d 地方就一定要依靠公家(雙標靶雙化療治療)的情況；所以好多野諗，問題較多。真的很抱歉問了禁多問題，如果有時間，希望你能回覆，非常感謝！非常感謝！非常感謝！
1）政府都會跟TCHP方案，手術後仲用唔用雙標靶則視乎病理報告結果。
2）應該夾到。
3）唔洗次次照，三針先做一做。
4）如果會考慮局部割就盡早落記號。
5）視乎臨床情況，可以同政府醫生商量。
6）對手術有要求、想指定醫生、經濟負擔得到，就揀私家。對手術冇要求、唔需要指定醫生、經濟唔許可，就揀公立。
謝謝您抽空回覆。想追問
1. 政府都會跟TCHP方案，手術後仲用唔用雙標靶則視乎病理報告結果。
>>>即是像醫生您其他post 講，計%？到時醫生睇返病理報告，覺得術後加P有利 (+康復/ – 復發%)，先會用雙標靶。
(但如果我手術去私家，我又應該如果讓公家腫瘤科醫生知道個情況？我有無什麼要準備？)
3）唔洗次次照，三針先做一做。
>>>明白，禁樣我地不私自出去照了。
(因為有d 同路人姐妹話他們會次次做完一次雙標靶雙化療，自己出去照ultrasound睇下腫瘤有無細到。)
4）如果會考慮局部割就盡早落記號。
>>>太太三十中，有得揀，他想局部割的。禁我應該宜家找私家乳腺科醫生落記號，還是做兩次雙標靶雙化療之後？ (呢個兩次之後先去，係之前私家乳腺科醫生講的)
5）視乎臨床情況，可以同政府醫生商量。
>>>明白，因為我好大機會在3個月後入職公務員，入職後就太太就會無左宜家我公司claim 80% MRI PET CT的醫療褔利，所以都會同政府醫生講我們的情況，同他商量，希望政府醫生會善用我地宜家可以claim 私家的情況。
6）對手術有要求、想指定醫生、經濟負擔得到，就揀私家。對手術冇要求、唔需要指定醫生、經濟唔許可，就揀公立。
>>>明白明白，謝謝你。
多謝醫生解答，我會消化好再轉達太太，非常感謝。
1）睇病理報告睇下仲有冇殘餘癌細胞去決定。私家做手術嘅話，帶埋手術後嘅病理報告返公立醫院腫瘤科就可以。
3）可以次次照，日日照都仲可以。只係「可以做」唔代表「有需要做」「值得做」。針藥唔係仙丹，唔係一打就一定有即時反應。如果冇反應你又係繼續打針，有反應你又係繼續打針，咁次次照來做乜嘢？另外個瘤你都摸到，摸都知有冇反應，邊洗次次照。
4）要落記號就盡早落，最好開針前落添。如果個腫瘤對針藥好好反應，打一兩針就已經散晒或者唔見咗，咁落幾號個位已經唔準確。
謝謝回覆，我會轉達太太，非常感謝您的回覆！
尋日我地見左政府腫瘤科醫生，都係如你所講，說落記號就應該盡早落，更應該是開針前落。政府不會為開針前未落記號的病人做局部切，所以太太如果在政府做手術，就一定是全切了。但我同太太都好清楚記得，私家乳腺科醫生當日在醫院是叫太太做兩次化療之後先去覆診同落記號的……考慮到落號應該要盡早，而私家落記號應該都要一萬多，呢下真係有點confused。不過太太還是希望先去私家乳腺科醫生度覆診的 (她應該始終希望有機會局部切)。
政府腫瘤科醫生現在說如果想在公立做手術/重建，就在第四次雙標靶雙化療前通知他們。
另外，也幸好政府腫瘤科很大機會接到做第二次雙標靶雙化療 (政府腫瘤科醫生說會可能遲4日 (8/12)，原本應該是4/12，但醫生話會盡量安排看有無早點的期)，加上政府做雙標靶是P送H，一次3萬幾 (私家8萬幾)，實在大大減輕當下的經濟壓力 (也會申請基金)。
你好!想請教醫生如果需要做乳房全切+重建(breast mass 7cm, 粗針結果:DFSP)會否建議找資歷較深的專科醫生做比較好?本人感覺是一個比較大具有一定複雜性的手段。有三點concern:
1. 病灶切除不夠乾淨,需行第二次手術,或進行輔助治療(電療/化療)
2. 選即時重建還是後期重建比較好?我相信即時重建對外觀上及心理上較好,但對病情有沒有分別?
3. 重建後的外觀
目前考慮選公立做還是私家做比較好,
而私家醫生資歷有深有較淺
我應該如何選擇?
謝謝醫生抽空解答!
1）唔乾淨就切到乾淨為止。
2）即時重建比較好，唔重建怕閂唔埋傷口。重建唔影響病情。
3）選擇一個比到信心你嘅醫生。
謝謝專業解答!
Breast DFSP 應該較罕見，切得唔夠乾淨又擔心復發，想請問從醫生角度會否有一些睇法/數字能一TAKE過手術徹底切除的成功率有多少?
另外，全乳切除及乳房重建在香港算是乳腺外科的常見手術?
主要想有多少少心理準備
THANKS!
視乎DFSP有幾深，所以要現場評估先知。全切及重建屬常見手術。
剛見左HA醫生，方案同私家醫生很不同
HA果邊沒有急凍切片（覺得不夠準確怕病人會空歡喜一場），而術後有復發風險建議後期重建，不會割淋巴。
而私家3位醫生都會安排急凍切片，可以即時重建，其中一個醫生表明需要割淋巴。
我有3個疑問：
1.急凍切片在DFSP切除的重要性/準確性有多少？
2.假如選擇即時重建而萬一不幸復發，進行第二次手術時需要把義乳全切嗎？
3.關於割淋巴，其實需要嗎？DFSP大多經血液轉移而非淋巴。如果割淋巴會否容易引起上肢水腫？
1）有一定好過冇，有幾準好視乎病理科醫生表現，冇單一數字。
2）視乎復發位置及大細，最差情況要犧牲重建的乳房。
3）DFSP唔會擴散去淋巴，唔需要割淋巴。
Hi doctor. Can I have your advice? My recent ultrasound findings showed an intraductal lesion. The specialist advised it is probably an intraductual papilloma. A core needle biopsy has been completed to confirm any presence of hyperplasia or abnormal cells. Can I have your advice whether a surgery is needed? Thank you
Depends on the core biopsy result. If it shows intraductal papilloma, it is worth to do surgery to remove it.
你的資訊對病者好有用，萬分感謝你的無私奉獻🙏🏻
請問，biopsy done with newly diagnosed invasive lobular carcinoma, PET scan just done with below Impression:
1. Two minimal hypermetabolic lesions at 12 o’clock
40 mm and 2 o’clock 25 mm positions of left breast are in keeping with biopsy proven malignant breast pathology. The overlying skin and the underlying chest wall muscles are not involved.
2. Two minimal hypermetabolic nodes in level I left axilla are in favor of reactive nodes or lymphadenitis. As understood, early or micro lymph node metastases can only be confirmed or excluded by histopathology. No hypermetabolic node in levels II & IlI left axilla and left internal mammary chain.
3. Minimal to mildly hypermetabolic nodes in level I bilateral jugulars and level II-Ill right jugular are likely due to reactive nodes or lymphadenitis also.
4. A hypodense isometabolic lesion (~20 mm LD x 17 mm PD) in left adnexal region can be due to benign ovarian pathology.
5. No 18F-FDG avid lesion in the remaining body survey.
1）請問系咪已擴散至淋巴？
2）？ T1N0M0 or ? T2N1M0
感謝回覆🙏🏻
1)淋巴PET scan覺得似發炎。
2）cT2N0M0
Me again, 補充資料：
Just Diagnosed as Left breast cancer cT2 (multifocal) NO ILC ER 6 PR 6 HER2 score 2
又係我Ms K， further to my last 2 comments on 24 July, my HER2 Fish result also available w dx:
Left BREAST, L1ZH 5FN mass and L2H 3FN mass, core biopsy. paraffin block (23BX-017807 -C & -D). for HER2 DISH test:
– NEGATIVE FOR HER2 GENE AMPLIFICATION.
請問系咪即係 唔洗化療？
感謝回覆🙏🏻 多謝你一直的資訊🙏🏻
唔係。要視乎手術後報告。
醫生你好，我已抽粗針, 醫生話high grade 原位癌, 範圍大約4cm, 只需手術全切除不用化療, 若果2個月後才做手術, 情況會唔會變化改變很大？萬一𨍭化為入侵性1期乳癌，還可以不用做化療嗎？
當然唔建議等兩個月，情況會唔會惡化得好緊要冇人估到。一期可能要做化療，亦都可能避到化療。
馬醫生，我前兩天做了mammogram, ultrasound ,core biopsy, 初步確診患上乳癌第二期，醫生提出了兩個方案，局部或全切，但我今年61歲了，是否全切會好D？我concern 嘅係存活率，真的很心煩!
如果局部割割得清，加埋電療，存活率同全乳切除一樣。