乳癌復發治療攻略 - 求生大作戰

Posted by in Recurrence 復發, Treatment 治療方法

上次講到乳癌復發原來分3大類,治愈率同治療方法都好唔同,究竟乳癌復發仲有冇得醫?為咗生存,你可以去到幾盡?「乳癌復發治療攻略-求生大作戰」開始⋯⋯

1)曾經有事嗰邊乳房/胸口局部復發

個名太長,以下我地簡稱為「局部復發」,即係上次局部割/保留咗嘅乳房,甚至重建出黎嘅乳房,又再生乳癌。或者,上次全乳房切除冇重建嘅,就喺個胸口復發。

呢個仲係有得醫嘅,不過會因應你之前做過嘅治療而有所微調:

局部復發手術篇

乳癌手術

1)之前局部割嘅,而家一定要全乳房割。因為事實證明保留乳房失敗,同埋以前電過唔可以同一部位電2次。
2)之前全乳房割嘅,而家要睇吓仲可唔可以再割,有可能要植皮/皮瓣先可以刪得埋個傷口。
3)之前有做乳房重建嘅,仲割到嘅就就咁割,但要有心理準備可能要拆咗個重建乳房去

 

局部復發化療篇

乳癌化療需知

1)之前有化療嘅,喺化療嘅藥物選擇上,要就住以往用過嘅劑量/種類調節一下,可能用其他第一線化療,或者第二線,甚至第三線化療。另外有D化療藥(例如紅魔鬼)係有劑量頂點嘅(呢D我地叫cumulative dose),你身體呢一生可以打幾多其實係有限制。
2)之前冇化療嘅,而家就要化療返

 

局部復發標靶治療篇

乳癌標靶治療

要睇返之前做過未,同埋復發腫瘤嘅特性(標靶受體陽性定陰性),先可以決定點做。呢個十分複雜,因為人人唔同,一定要問返自己醫生,2015年大方向就好似以下個表咁(注:醫學發展太快,下一刻可能就更新/變/錯,記緊問返自己醫生最update最貼身嘅方案)

乳癌復發標靶治療

局部復發電療篇

乳癌電療

1)之前電過嘅,而家冇得再電。
2)之前冇電療嘅,而家要電返,藉以加強局部控制。

 

局部復發荷爾蒙治療篇

乳癌荷爾蒙治療

同標靶治療一樣,要睇返之前做過未,同埋復發腫瘤嘅特性(荷爾蒙受體陽性定陰性),先可以決定點做。呢個十分複雜,因為人人唔同,一定要問返自己醫生,2015年大方向就好似以下個表咁(注:醫學發展太快,下一刻可能就更新/變/錯,記緊問返自己醫生最update最貼身嘅方案)

乳癌復發荷爾蒙治療

2)另一邊冇事嗰邊乳房生乳癌

呢個係最簡單嘅,就係所有野回帶咁黎多次,又係乳癌治療5寶(手術化療標靶治療電療荷爾蒙治療)出動嘅時候。

唯一有少少分別:
1)如果手術上次原本有事嗰邊,係全乳切除而又冇重整嘅話,咁呢次新呢邊都傾向全乳切除,因為對稱D。除非特別原因,如果唔係嘅話,大部分病友好少可話想/揀保留單邊乳房。
2)之前有化療嘅,就好似上面咁,就住以往用過嘅劑量/種類調節一下化療嘅藥物選擇。
3)標靶治療同荷爾蒙治療:大方向就好似以上兩個表咁。

 

3)遠端復發(即係擴散/轉移)

呢個係最唔開心嘅,去睇睇「乳癌四期治療 - 末期仲有冇得醫?

 

乳癌復發治療攻略結論

清楚晒乳癌復發應該點面對,心裡嘅不安雖不至一掃而空,但我地可以做嘅已經盡晒力,剩落黎嘅就安然交返比個天啦。

下次我地轉轉話題,講下生BB沖喜吓:「乳癌康復後懷孕 - 我想生BB!

有唔明?係下面寫低佢,我會盡量解釋你聽⋯⋯

封面圖片來源:互聯網
分段圖片來源:改篇自互聯網