乳癌電療大解構 - 原來唔洗驚

Posted by in Radiotherapy 電療

啱啱先做完手術/咁辛苦先捱完化療嗰幾針,轉個頭又要面對電療,究竟同化療有咩分別?過程係點㗎?有咩副作用?有冇後遺症?費用幾多?呢篇「乳癌電療大解構」幫你釋除疑慮⋯⋯

乳癌電療 vs 化療

「我啱啱先做完手術/咁辛苦先捱完化療嗰幾針,咁快又黎過?」

做完手術化療,我地只係好似特區政府D施政咁,只係取得階段性成果,仲未能夠好似民建聯咁拉banner「成功戰勝乳癌」,所以同志仍需努力。

乳癌電療

「咁電療同化療有咩分別?」

仲記唔記得我係好耐之前嗰個post「乳癌治療方法 - 我需要用咩方法醫?1」講過,乳癌電療係局部治療嘅一種。

如果話化療係成個天台油多幾浸防漏嘅話,咁電療就係局部針對漏水嗰條裂縫去做功夫,希望可以加強局部控制。醫生就好似D怪獸家長咁,唔單止要求子女總分考第一,仲希望科科可以攞滿分;唔單止要求整體唔漏水,仲希望搞掂問題源頭條裂縫。所以有冇做到化療,同洗唔洗電療係冇關係嘅。有4類人,我地知道電療可以減低局部復發機會,從而長命D

「咁邊4類人要電療?」

局部割(保留乳房手術)一定要電療

全個乳房割,以下三個情況都建議電療:
1)腫瘤大(T3或T4,即係大過5cm,或者蝕咗出皮膚/肌肉時)。唔明就參考返以前文章「乳癌分期 ﹣ 我係早期定末期?」。

2)全個割都仲未割得清時,例如切割出黎嘅標本底床仲有癌細胞。

3)有四粒或以上嘅腋下淋巴有癌細胞的跡象(即係N2,唔明又係睇返「乳癌分期 ﹣ 我係早期定末期?」)。有D醫生進取D,事旦一粒淋巴有癌細胞(即N1)都會建議你電。

2014年4月更新:國際權威期刊The Lancet喺2014年3月刊登左以下一個大型研究(支持N1都要電):
http://www.thelancet.com/pdfs/journals/lancet/PIIS0140-6736(14)60488-8.pdf

研究發現全乳房切除及N1(1-3粒淋巴受影響)嘅病人,電療後:
10年復發率由45.7%減至34.2%(Absolute risk減少11.5%,relative risk減少32%),即係100個呢類病人,電療10年後12人因而得益冇復發。
20年死亡率由50.2%減至42.3%(Absolute risk減少7.9%,relative risk減少20%),即係100個呢類病人,電療20年後8人因而得益冇死到。

因此,我會預期越來越多醫生會建議N1都電。

所以如果你係以上4個情況其中一個,醫生就會叫你穩陣D做埋電療。

注:我地一般講嘅乳癌電療係電胸口,當然電療仲有其他用處,例如末期乳癌擴散去腦就電「腦」,擴散去骨就電骨。

乳癌電療過程

「我係其中一個情況呀,咁電療有冇化療咁辛苦?」

有個好消息話你聽,電療舒服過化療千萬倍。叫得做局部治療,即係好處同壞處都係局限於胸口嘅地方。

「即係點?」

即係唔會甩頭髮、唔會嘔、唔會唔想食、唔會冇精力、唔會抑制抵抗力。

「咦,唔辛苦就做得過,咁實際點做㗎?」

通常做完手術/打完化療3至4個星期,等身體狀態恢復之後,就可以開始電療

要電療,當然要見臨床腫瘤科醫生,講解清楚之後,就可以制定電療計畫,有兩大類做法:

1)傳統電療25次,日日去醫院(又係唔洗住院嘅),星期六日休息,所以搞你5個星期,如果癌細胞有侵蝕性,就要局部再加電5次,即總共30次(6星期)

2)新做法電療15次,同樣日日去醫院,星期六日休息,所以搞你3個星期,如果癌細胞有侵蝕性,就要局部再加電5次,即總共20次(4星期)

「點解有兩類做法?邊個好D?」

傳統黎講,不嬲都電開25次嘅,但因為2013年9月英國發表咗個大型研究(UK START Trial),發覺電15次同25次效果冇分別(10年復發率),但方便好多同埋少D副作用,所以英國全面採用15次方案。香港呢就睇你醫生信邊套,有D覺得15次OK啦,人地英國都有晒證據有晒指引咁做咯;有D就疑慮多D覺得10年結果仲未夠耐,想睇耐少少先採用新方案。因此你問其他病友,最短佢會話你聽電15次(原位癌加新方案),最長佢會話30次(侵蝕性加舊方案),咁大差異唔好見怪。

姑勿論揀新定舊計畫,之後做法都係一樣,就係先設計劃位,電療技師會幫你畫D界線上身,同埋紋D「點」,用黎記住要電嘅範圍,咁就唔會電錯/電多/電少,可以放心正常沖涼,D「點」預咗你短期洗唔甩,咁當然你都唔好搏老命想捽甩佢

「咁之後點電?好似測謊機坐電椅咁電?」

千祈唔好比電療嗰「電」字嚇親,誤以為有電流通過身體。電療正名叫放射治療,大陸D講,就係「放療」,原理好似照X光咁,不過就用D再高強度嘅幅射照吓你

乳癌電療

圖片來源:互聯網

你會好似照正電子掃描/電腦掃描咁先訓係張床度,之後電療技師同你對名對位,準備就緒後就開始電療,成個過程20-30分鐘度,幅射就會係不知不覺嘅情況下完成工作,就好似美容院照太陽燈咁,完全唔痛唔辛苦嘅,電完就返屋企,唔洗住院嘅。煩就煩在日日要去醫院姐,後生冇咩所謂,老人家行動不便就要人陪。因為要日日去醫院,部電療機又冇大分別,著實冇需要跨晒區去間人地話好嘅醫院,都係揀間近屋企嘅方便D好過啦。

乳癌電療副作用/後遺症

「唔痛唔辛苦咁正?咁有咩副作用/後遺症?」

以前技術冇咁先進,電療就會傷埋附近組織,例如心臟/肺。而家技術已經進步咗好多,影響附近組織嘅情況已經大大改善,所以你係感覺唔到嘅

你主要感覺到嘅副作用就係皮膚灼傷,通常第三個星期就開始明顯,反應高峯期大約喺完成療程一到兩個星期出現。情況有如曬太陽曬得勁過頭,D皮膚紅紅滾滾興興,之後起水泡甩皮滲水皮膚變黑好似「燶」咗咁。甩皮時梗係痛,所以皮膚護理好緊要。

另外如果要電埋腋下淋巴嘅位置,可能會令淋巴水腫嘅情況加劇

乳癌電療皮膚護理

「咁皮膚點護理?」

電療技師通常會教你平時搽一隻叫電膚寶(Radiagel)嘅護膚啫喱,幾十蚊一支,可以喺病人合作社買到。最主要都係潤吓D好乾嘅皮膚,因為電療會令皮膚嘅油脂分秘減少。另外佢涼涼地,會令你感覺舒服D。電療前3個鐘內唔好搽野,因為驚阻隔咗D電療效果。

乳癌電療

圖片來源:互聯網

 

好多病友會嫌電膚寶(Radiagel)太「立」,佢地會去百貨公司/藥房買其他潤膚膏/蘆薈膏(Aloe Vera Gel)黎搽:

 

乳癌電療

圖片來源:互聯網

乳癌電療

圖片來源:互聯網

平時你當自己係初生嬰兒D皮膚咁護理就得㗎喇,例如用BB沖涼液,貪佢少D刺激。另外唔好用太熱嘅水沖電療位置,天氣太凍可以諗諗買部暖風機,吹暖個浴室先沖涼。沖完涼就用毛巾輕輕印乾D水,唔好大力捽D皮膚。

醫生會第三星期起每星期見你一次,睇吓有冇野唔舒服,胸口D皮膚點。如果甩皮甩得好犀利,可以叫醫生開一隻Solcoseryl Ointment比你,等傷口可以快D埋口。

乳癌電療

圖片來源:互聯網

有D人就會當燒傷咁護理傷口,用D油性紗布同埋敷料黎阻隔D衫同皮膚嘅摩擦,一方面可以索咗D水,另一方面貪佢有浸油,等到換敷料時唔會黐住個傷口。另外呢段時間唔戴胸圍都會舒服D。

甩皮梗係痛,通常痛四五日度,可以食止痛藥舒緩吓,等新嘅皮膚生出黎就好好多。整體黎講,皮膚一般電療完成後兩個月慢慢回復正常,深色咗嘅皮膚就要多D時間先會白返

乳癌電療費用

「聽落原來電療過程都OK,咁唔知收費又點呢?」

公立醫院$80一次,如果電最多嘅30次,總數$2400,而最少嘅15次,就$1200。

私家醫院就幾萬到十幾萬蚊不等,好處係整體流程順暢D,機器可能先進D(例如TomoTherapy)。值唔值?有冇需要?留返比你自己同醫生傾傾。

化療一講就講足12篇,電療1篇就講完,你就知道乳癌電療原來真係唔洗驚

要吊標靶針herceptin嘅,就繼續3星期吊一次,直到一年為止。如果唔洗吊嘅,已經過晒成日要去醫院嘅黑暗日子,黎緊只係日日喺屋企食藥,同埋慢慢復康過返D正常日子

乳癌電療

下篇我地一齊睇吓最後一個治療階段「乳癌荷爾蒙治療 - 點解我仲要食藥?

通告:經過5個月嘅日夜努力,呢篇係呢個網站嘅第50篇文,不過就係呢個時候,我要休息一陣喇。因為近日工作非常非常忙碌,我已經被壓得透唔過氣,著實冇時間繼續以呢個速度發文。不過你可以放心,我唔會爛尾嘅,一定帶你走出困境為止。

最後好多謝每一位支持呢個網站嘅朋友,尤其係留過言/比過Like鼓勵我嗰D。

封面圖片來源:互聯網