管腔A型管腔B型乳癌 - 不吸眼球的甘草

Posted by in Anti-hormone 荷爾蒙治療, Subtype 乳癌分類

乳癌病人經常討論的乳癌類型必然圍繞三陰性乳癌、HER2型乳癌,因為他們吸眼球,但原來大部分病友有嘅乳癌類型,卻是像甘草演員般被人遺忘的「管腔型乳癌」⋯⋯

睇一個演員做戲,我地會品評佢內外,一方面我地會睇佢有冇外貌,另一方面,我地又會在意佢有冇演技,演唔演活一個角色,交唔交到內心戲。

原來乳癌細胞都好似演員咁有表有裡,一方面醫生會睇佢表面同咩藥夾,另一方面,醫生又會在意佢內心性格,骨子裡係咪一隻惡的乳癌,要嚴加防範。

睇一個人外表容易,了解一個人內心很難。睇一隻乳癌表面同咩藥夾容易,了解佢的內心卻很難。

以前後生入世未深,揀男朋友當然睇樣行先。以前醫生入世未深,醫乳癌當然睇樣行先。

「乳癌都有樣睇?」

當然,之前你見我成日提荷爾蒙受體(ER,PR)、標靶受體(HER2),呢D就係乳癌的外表,喺顯微鏡底下做特別漂染(immunohistochemical staining)就已經知道,正常化驗室都做到。

荷爾蒙受體陽性,咪荷爾蒙受體陽性乳癌囉。
HER2型受體陽性,咪HER2型乳癌囉。
荷爾蒙受體陰性,HER2型受體又陰性,咪三陰性乳癌囉。

「係囉,咪就係咁簡單囉,又有幾複雜呀?」

開頭我都認為作為病人,識到咁簡簡單單咪算囉,所以之前寫咗上面嗰三篇就算,直到有一日,有病人咁問我:

「我係荷爾蒙受體陽性,同時HER2型受體又係陽性嘅乳癌,咁我係咩類型乳癌?三陽性乳癌?」

事實上我真係見過D台灣網站咁樣叫,不過照譯黎講,英文我地又唔會叫Triple positive cancer,醫學界我地叫呢D做Luminal type(管腔型乳癌)。我諗係時候要寫一篇深入的進階文章去解釋清楚。

「無端端又多咗個新名嘅?」

呢個新名係源於我地對乳癌的內心世界了解多咗。

以前後生入世未深,揀男朋友當然睇樣行先,到年紀大咗,見過情場騙子受過情傷之後,揀老公當然睇性格。以前醫生入世未深,醫乳癌當然睇受體行先,到了解多咗,見過乳癌的各種表現之後,醫乳癌當然睇性格。

「點樣可以睇到乳癌性格?」

要睇乳癌性格(intrinsic molecular subtype),技術上係複雜好多,要遂個基因排序(DNA Microarray),之後睇每個基因分佈,醫學界觀察到原來乳癌有7種人格,常見臨床重要的有5種,分別係管腔A型(Luminal A),管腔B非HER2型(Luminal B HER2 negative),管腔B HER2型(Luminal B HER2 positive),HER2型非管腔型(HER2 non luminal),同基底細胞型(Basal-like),臨床冇乜用的normal-like 同Claudin low type就唔多講,聽過下就算。

「我又想驗下我隻乳癌係乜型人格⋯⋯」

對唔住,因為技術複雜,好多野都發展中,暫時冇統一標準,所以冇商用的測試可用。

「唓,浪費我睇咗咁耐原來冇得測試⋯⋯」

唔好唓住,難道你認為我天生愛打字?當然唔會打咁多字去浪費你寶貴時間。我地冇得測試姐,有得估都得㗎。

「估??」

原來我地實在受過太多情傷,去得太多speed dating相睇,睇佢眉頭眼額講多兩句,已經摸底成功。醫生只要根據ER、PR、Ki67、HER2、乳癌復發基因測試(例如OncotypeDx/Mammaprint/Endopredict/PAM50)呢五樣野,就可以大致摸到乳癌個底,從而作出治療的建議。跟住下面就會遂隻講講,拿,唔好話唔警告,悶野黎喇:

管腔型乳癌(Luminal type)

簡單黎講,管腔型乳癌(性格)即係荷爾蒙受體陽性乳癌(外表),原來佢佔據咗整體乳癌的七成,即係大部分人都係呢類,咁常見但咁少人講,以一套戲入面黎講,佢就係唔起眼的甘草演員。喺佢之下細分出三種性格:管腔A型(Luminal A)、管腔B非HER2型(Luminal B HER2 negative)、管腔B HER2型(Luminal B HER2 positive)。

乳癌人格一:管腔A型乳癌

要稱得上管腔A型乳癌,要滿足以下5個條件:
1)ER positive
2)PR positive
3)Ki67低
4)HER2 negative
5)乳癌復發基因測試要低危復發組別

「 佢有咩咁特別?」

管腔型乳癌

圖片來源:電影<我是路人甲>

佢係侵蝕性乳癌之中最心地善良的一員,活躍度低(即係喺套戲出現一兩個鏡頭嘅路人甲,連名都冇,對白梗係冇),所以好多時做完手術荷爾蒙治療已經足夠,好少可化療(除非期數好惡),唔需要標靶治療(因為HER2 negative),電唔電療就睇手術類型同結果。

乳癌人格二:管腔B非HER2型(Luminal B HER2 negative)

要稱得上管腔B非HER2型乳癌,要滿足以下3個條件:
1)ER positive
2)HER2 negative
3)起碼以下是但一樣中:
       a)Ki67高
       b)PR negative/low
       c)乳癌復發基因測試要高危復發組別

「 佢有咩咁特別?」

管腔型乳癌

圖片來源:TVB<張保仔>

你會見到雖然佢都仲係荷爾蒙受體陽性乳癌,但已經進一步活躍咗(有一兩句對白,通常都係「吖」一吓就死咗係地下嘅清兵),所以好多時做完手術荷爾蒙治療固之然要,但在此之前洗唔洗用化療就一個個人,唔需要標靶治療(因為HER2 negative),電唔電療就睇手術類型同結果。

乳癌人格三:管腔B HER2型(Luminal B HER2 positive)

要稱得上管腔B HER2型乳癌,要滿足以下2個條件:
1)ER positive
2)HER2 positive

Ki67/PR係高係低冇所謂嘅。

「 佢有咩咁特別?」

管腔型乳癌

圖片來源:蘋果日報

你會見到雖然佢都仲係荷爾蒙受體陽性乳癌,但同時亦都係HER2型乳癌,所以已經属於非常活躍(已經進身4線甘草演員,套套戲都有佢份,你一定認得不過噏唔出真名嗰D),所以好多時做完手術荷爾蒙治療固之然要,但在此之前好多時都要化療標靶(侵蝕性大過1cm已經要),電唔電療就睇手術類型同結果。

既然都講曬D綠葉,雖然有少少離題,唔差在講埋最佳女配角HER2型非管腔型(HER2 non luminal)同最佳女主角基底細胞型(Basal-like),等成個畫面完整D。

乳癌人格四:HER2型非管腔型

要稱得上HER2型非管腔型,要滿足以下3個條件:
1)ER negative
2)PR negative
3)HER2 positive

「 佢有咩咁特別?」

圖片來源:<第36屆香港電影金像獎>

你會見到佢比起荷爾蒙受體陽性乳癌又再已經惡咗一大節(呢D最佳配角,外貌雖然唔係最出眾,但演技一流,一定留下深刻印象),因為冇荷爾蒙受體,所以少咗D把柄比我地揸住,做完手術後好多時都要化療標靶(侵蝕性大過1cm已經要),電唔電療就睇手術類型同結果,荷爾蒙治療就唔需要。

乳癌人格五:基底細胞型(Basal-like)

要稱得上基底細胞型(Basal-like),要滿足以下3個條件:
1)ER negative
2)PR negative
3)HER2 negative

「 佢有咩咁特別?」

圖片來源:TVB<宮心計>

冇錯,你會見到好大程度上(學術研究上雖然唔係百分百相等的),佢即係三陰性乳癌(現實係喺街撞到仲要追住黎鬧琴晚劇中點解你要咁賤格嗰D大奸角),再少D把柄比我地捉住,冇得用荷爾蒙治療,又冇得用標靶治療,手術後好多時只可以靠化療加減電療

「死啦,我係公立醫院做手術,報告冇Ki67,咁點算?我即係咩型人格?」

冇咩點算,就正如唔係好多人做乳癌復發基因測試一樣,只可以靠其餘有嘅資料,依住上面的條件盡量去對。

乳癌的五型人格

當你了解到原來乳癌都分咁多種性格,唔好再奇怪點解自己同隔離病友,明明腫瘤同一size同一期數,但係治療方向卻大相逕庭,佢唔洗化療而我要,原來真係性格決定命運,了解自己喺套戲的角色設定,無論係大奸角定甘草演員都好,安分守己去演活自己呢個角色,先能夠做到真正的樂天知命。

有唔明?係下面寫低佢,我會盡量解釋你聽⋯⋯

封面圖片來源:毛記電視