乳癌化療時間 - 手術前做?手術後做?

Posted by in Chemotherapy 化療

乳癌化療時間人人唔同,有人手術前做,有人手術後做,有人手術後唔洗做。咁點樣做/幾時做先最適合自己呢?入黎睇吓你會明白更多⋯⋯

乳癌化療時間

乳癌化療幾時做?主要有2大類:
1)手術前化療(已經包埋第四期唔知做唔做到手術)
2)手術後化療

手術前化療

「我見人人都係做完手術先決定洗唔洗化療,點解我醫生叫我做咗化療先做手術㗎?」

其實化療叫得做輔助治療,原意就係手術之後去輔助成個療程,以達致更佳嘅治療效果。之後有D醫生諗,可唔可以將化療搬去手術前面做,去輔助手術,等到手術易做D,咁就成就咗「術前化療」呢樣野。

乳癌化療時間

「手術前做化療,可以點樣幫到手術?」

最大著數就係縮細嗰腫瘤,等手術易做D/割少D。好似下圖上半部,你會見到腫瘤(蛋黃)由2.5cm縮細到1.1cm,如果局部切除,咪可以保留更多乳腺組織(蛋白),或者易D割得清(咩叫蛋黃蛋白請睇返乳癌手術 6 - 專做乳房手術醫生的增值服務)。腋下淋巴都可能會縮,好似下圖下半部,腋下淋巴由4.8cm縮細到2.3cm,手術咪易D做/快D完成/易D割清。

乳癌化療時間

圖片來源:Magnetic Resonance Imaging Lab

「好似好正咁喎,我都好想做⋯⋯」

唔好咁心急住,化療唔係人人啱/需要。如果你乳癌係早期,本身手術都好易做,術前化療就冇額外著數喇。再者,手術後可能根本連化療都唔洗,仲講咩「術前做」定「術後做」吖。

「咁邊D人先啱做術前化療?」

當醫生估計手術後本身都要化療,而又想割少D/易割D時就會考慮術前化療,具體D講:

1)本身腫瘤好大,例如T3/T4(咩叫T3/T4返去睇乳癌分期 ﹣ 我係早期定末期?),個腫瘤蝕咗出黎,就算全乳房切都閂唔埋傷口/割唔清。目的就係希望化療能令腫瘤由做唔到手術變成做得到手

2)本身腫瘤唔大,但位置好衰,例如近乳頭/內上側見光位,又唔想全乳房切除/想保留乳房做靚D/割少D。目的就係希望化療能令保留乳房手術做得更好。

3)臨床好多腋下淋巴受影響

4)已經擴散去其他遠端器官。

5)醫生估計對化療好好反應嗰類腫瘤,例如HER2型三陰性乳癌。你見上圖下半部腫瘤直情縮細到唔見咗。

如果你係以上是但一樣/幾樣,記得問醫生會唔會術前化療會好D/你洗唔洗術前化療。

「如果手術前做咗化療,咁手術後仲洗唔洗再次化療?」

因為你只係轉咗治療方法嘅先後次序,所以做完術前化療,係唔使再做術後化療

「手術前化療,即係遲咗做手術,會唔會搞到擴散㗎?」

唔會因為術前化療而搞衰咗(當然有機會化緊療個腫瘤仲大咗/擴散,不過係唔關你做唔做手術先事,係關本身腫瘤好惡事),其實如果有擴散至身體其他器官,更加應該化療,因為化療係全身性治療,相反手術就係局部治療(只針對乳房同腋下淋巴)。另外,文獻記載手術前化療同手術後化療嘅存活率係一樣嘅,有D醫生甚至相信術前化療會好D添,因為早D派軍隊入身體去追殺癌細胞,但係暫時我地冇實在嘅證據去證明呢個假設係啱。再者,當你見到個腫瘤縮唔縮,你就知道佢同D化療藥夾唔夾(術後化療就唔會知夾唔夾),好夾嘅人第時會長命D(多一個資訊比到你)

手術後化療

「咁手術後化療又係點呢?」

顧名思義,就係做咗手術先做化療。傳統/大部份人都係呢隻,因為手術前評估腫瘤兇惡程度始終有一定局限。相反,手術後就一定齊晒資料,例如手術前以為冇影響淋巴,點知喺顯微鏡底下原來好多粒淋巴都有癌細胞,咁就要術後化療(油防漏)喇。

乳癌化療時間

「咩人做完手術要做化療?」

當病理報告話嗰乳癌已經好惡(例如第三/第四期),或者估佢第時會好惡(HER2型/三陰性乳癌)因為易復發(漏水),所以我地要做多D預防措施(化療)

「我點知自己嗰乳癌係咪已經好惡(例如第三/第四期)?」

要返去睇乳癌分期 ﹣ 我係早期定末期?

「我點知自己嗰乳癌係咪第時會好惡嗰類(HER2型/三陰性乳癌))?」

要返去研究吓自己嗰病理報告。

「我已經做完手術,有埋病理報告喺手,可唔可以教我點研究?」

呢樣野好講經驗,最好問乳腺科醫生,佢做完手術有責任詳細解釋你聽。

病理報告八大重點

「我嗰個醫生冇咩詳細講,淨係叫我睇腫瘤科。我真係好想知我個腫瘤惡唔惡⋯⋯」

見你咁想知就講你聽(講真,太過學術性,你要有一定基礎先會明,唔明講到尾又係要問/信醫生),乳腺科醫生睇病理報告,就係睇以下八大重點:

1)侵蝕性癌有幾大(Invasive tumor/cancer size):重點係「侵蝕性 invasive」呢個詞,侵蝕性範圍越大,Tumor (T)期數越後,乳癌越惡。如果有多過一個源頭(multicentric/multifocal),就睇最大嗰個源頭作準,並唔係加埋一齊。另一方面,原位癌有幾大唔重要,有時D報告好誤導,會寫腫瘤(侵蝕性加埋原位癌部份)整體幾大,你睇侵蝕性部分得喇。

2)腋下淋巴有幾多粒有癌細胞(Lymph node metastasis):越多粒受影響,Node (N)期數越後,乳癌越惡。

3)荷爾蒙受體水平(Hormone receptor):其中包括Estrogen receptor (ER)同埋Progesterone receptor)水平,睇下佢地係陽性positive (ER+ or/and PR+),定係陰性negative(ER-AND PR-)。陽性本身已經係好野黎(乳癌冇咁惡),仲要同抗荷爾蒙藥夾(即係有藥物控制到佢,日日食,藥箱都變手飾箱)。相反,陰性嘅本身已經惡,仲要冇把柄比我地捉住,冇藥食,所以傾向做化療。

4)標靶受體水平(HER2 receptor):通常有個叫cerbB2嘅分(0-3分),0-1分即係陰性(HER2-),2分係中性(即係唔知陰定陽,要做一個進一步測試「FISH test」先知),3分就係陽性(HER2+)。有一個常見謬誤,就係D人見到自己報告1+或者2+個「+」就以為係HER2+,其實並唔係。只有「cerbB2 3+」或者「cerbB2 2+及FISH 陽性」先係HER2+型乳癌。HER2+型乳癌本身好惡,所以腫瘤大過1cm,未睇其他因素,已經會建議做化療加標靶。另外如果HER2-(陰性),ER又-(陰性)加埋PR都係-(陰性),呢隻乳癌就係醫生成日講好惡嘅「三陰性乳癌」,因為佢冇把柄比我地捉住,荷爾蒙治療同埋標靶治療都對付唔到佢,所以又係要靠化療。

5)生長速度指數(Proliferative index Ki67):百分比越高,生長速度越快。冇一個統一標準去睇呢個指數,通常<=15%叫善良,16%-30%叫一般惡,>30%叫好惡;有D醫生就用14%黎做分界。

6)腫瘤的組織學分級(Tumor/histological grade):分三級,一級(Grade1)善良,二級(Grade2)惡,三級(Grade3)好惡。

7)入侵附近小淋巴管小血管(LymphoVascular Invasion LVI):有入侵 (LVI+)惡,冇入侵(LVI-)冇咁惡。

8)你病發時歲數:35歲以下惡,35歲或以上冇咁惡(年紀越大越唔惡)。

「好複雜咁喎,又惡又唔惡,我自己一D因素惡一D因素唔惡,咁結論即係惡唔惡呀?」

其實真係唔簡單,怕麻煩嘅搵個信得過嘅嘅乳腺科醫生去幫你去睇報告算啦。有時睇醫生就好似婚姻咁,你老公(醫生)唔洗係最好/最叻嗰個,不過如果你信佢/佢比到信心你,你段婚姻咪就係最幸福囉

「我點知我個老公/醫生信唔信得過?」

你一定會感覺得到嘅,究竟佢樣樣野都咦咦哦哦,唔清唔楚,收收埋埋?定係有條不紊,深入淺出,有問必答?點會逃得出女人嘅直覺吖。

「我就係怕老公/醫生信唔過,如果唔怕麻煩,有冇得check吓佢?」

男人天生就係信唔過,如果真係唔怕麻煩,我下一篇教你點樣綜合以上八大因素⋯⋯

乳癌化療需唔需要 - 著數計算機火併乳癌基因測試

有唔明?係下面寫低佢,我會盡量解釋你聽⋯⋯

封面圖片來源:互聯網