乳房鈣化點 - 係咪好危險?

Posted by in Breast Disease 乳腺病

「我啱啱照左乳房X光造影(Mammogram),醫生話我左邊胸有鈣化點。其實乳腺鈣化點係乜黎?自己會唔會消失?會唔會變乳癌?點先確定係良性?係咪一定要抽針/做手術?」究竟乳房鈣化點,係咪好危險⋯⋯

三招對付乳房鈣化點,及早偵測乳癌有法|馬國權醫生

乳腺鈣化點成因

「其實乳腺鈣化點係乜黎?」

乳房鈣化是指鈣離子化合物沉積在乳房組織中,這些鈣離子化合物多是磷酸鈣或氫氧鈣磷灰石成分。乳房鈣化主要因為乳房組織內的鈣化物以鈣鹽形式存在⋯⋯

「你講緊乜野?」

以上解釋節錄自網上資料,我睇完同你一樣,R爆頭都唔知佢噏乜野。

乳腺/乳房鈣化點,簡言而之,就係乳房組織新陳代謝之後,喺乳房X光造影(Mammogram)下留低嘅一D痕跡(白點)。因為呢D白點非常細小(細過芝麻),手係摸唔到嘅,只可以靠照X光照出黎。

乳癌

「關唔關我食得多鈣質事?」

同日常生活所攝取嘅鈣質根本冇關係,並唔會因為你食得多高鈣食品就多D乳腺鈣化點。

會唔會變乳癌?

「咁呢D鈣化點有冇毒?會唔會變乳癌?」

乳房鈣化點本身只不過係痕跡,本身並冇毒,亦都唔會變成乳癌,所以如果確定良性係可以唔洗理佢。不過另一方面,佢可以因乳癌而起

「咩又唔會變乳癌,但又可以因乳癌而起??Breast HK,你講乜呀?」

打個比喻,呢D痕跡就好似消防警鐘響起,本身響警鐘並冇問題,亦都唔會變火警,所以如果確定誤鳴係可以唔洗理佢。不過另一方面,警鐘響可以因火警而起。

「咁係咪一響警鐘/有乳房鈣化點就出事?」

唔係

其實響警鐘有樣睇,有D一睇就知冇事(晨早通知咗你嘅定期火警演習),有D就灰色地帶要跟進(可能有人喺辦公室食煙),有D一睇就知出事(已經見到火同濃煙)。

其實乳房鈣化點有樣睇,有D一睇就知冇事(良性),有D就灰色地帶要跟進(抽針),有D一睇就知出事(惡性)。

乳癌鈣化點

「咁我點先知我D乳房鈣化點有冇事?」

最簡單問醫生,佢安排得你照乳房,有責任解釋返個報告比你聽。

「我問到醫生就唔洗上網搵資料啦~」

上網呢,你見D網頁話原來鈣化點又分粗/大鈣化點(macrocalcification),又幼/微細鈣化點(microcalcification)咁。睇完都一頭霧水啦。

仲未計D咩圓點狀、分支狀、爆米花狀、茶杯形、一點點、一條條狀、不規則外型、分岔形狀、線形。分佈情況又可以分為聚埋一堆/分佈密集,或者散開。

加加埋埋萬千變化,唔好話病人,大部份醫生都唔識分,所以唔洗嘥時間上網學點睇,係唔會學得識嘅,只會越睇越亂。

「大部份醫生都唔識分??」

係。呢D野好講經驗,經驗最多嘅當然首選專睇乳房X光嘅放射科醫生,即係寫X光報告嗰位醫生。

所以作為病人嘅你,睇吓佢有咩結論/建議得喇。通常有經驗嘅放射科醫生,寫報告都會跟美國放射學學會(American College of Radiology)嘅BI-RADS 系統。

BIRADS 系統

「咁咩係BI-RADS系統?」

佢係一個等醫生之間可以有更好溝通嘅系統(放射科醫生用黎話比乳腺科醫生知有幾可疑生乳癌),詳見下圖:

乳癌症状

佢分咗7個級別,你只要跟住個級別對吓,就知你D鈣化點可唔可疑/生乳癌機會率,同埋之後應該點做。

1)BI-RADS 1/2,即係正常,咩都唔洗搞。

2)BI-RADS 3,應該良性,選擇性抽組織。

3)BI-RADS 4,可疑,要抽組織。

4)BI-RADS 5,非常可疑,快D去抽組織。

鈣化點會唔會自己消失?

「咁D鈣化點會唔會自己消失?」

呢D「白點痕跡」就好似小朋友整污糟咗件衫咁,係唔會自己消失嘅,只有三個可能性:
1)平穩冇變化(仲係咁污糟)
2)多咗鈣化(越整越污糟添)
3)做微創/手術拎走咗(阿媽整返乾淨)

「咁唔會自己消失,係咪代表一定要抽針/做手術?」

好明顯唔係「一定要」抽針/做手術,因為乳房鈣化點本身並唔係癌,佢只不過係痕跡,所以抽唔抽針/做唔做手術,就要視乎以上BIRADS咩類別。

乳房鈣化點抽針/微創

「咁如果我係BIRADS4要抽針,過程係點做?」

鈣化點識得抽一定抽粗針,冇人抽幼針嘅。(伸延閱讀:乳房檢查 三步曲3 - 乳房抽組織檢查

過程同平時超聲波抽粗針差不多,不過今次唔係訓係度抽,係坐係度/扒係度抽

乳癌檢查

圖片來源:Haderer & Muller Biomedical Art, LLC

「點解要坐係度/扒係度抽?」

因為要X光機夾住個胸照住黎抽,所以要坐係度/扒係度就返部X光機。你可以相像,如果扒加埋夾,其實真係好唔舒服。

「咁有冇麻醉?」

公立醫院局部麻醉,個人醒嘅,所以要忍一忍耐。

私家醫院通常有麻醉科醫生監察住,比咗鎮靜劑,舒服D,不過要比額外嘅麻醉費。

「咁抽粗針同微創有咩分別?」

抽粗針(Stereotactic guided core biopsy)係坐係度抽3幾下,務求有代表性就算

微創(Stereotactic vacuum-assisted breast biopsy)呢就扒係度抽十幾至幾十下,務求刨清D鈣化點(如果D鈣化點範圍唔大嘅話)。好處係樣本一定有代表性,另外如果返黎報告話良性而你又刨清嘅話,咁第時就唔洗成日觀察住D鈣化點。但如果返黎係惡性,你都係要做第二次手術(攞一個清嘅紙口位,加減淋巴手術)。

乳房鈣化點手術

「咁幾時要做手術?」

以下3個情況會建議做手術:

1)乳房太薄/鈣化點太深層或太淺層,搞到做唔到抽粗針/微創
2)抽粗針/微創後,報告返黎話惡性
3)抽粗針/微創後,報告返黎話良性,但乳房X光實在太樣衰,醫生唔信冇野(覺得抽唔中姐)

「手術點做?」

手術其實同平時其他乳房手術差不多,只不過有兩樣野要留意:

1)因為鈣化點好細手係摸唔到,而超聲波白底睇白點(又係睇唔清),所以手術前要確定鈣化點位置,一般做法係手術當日,去X光部放條幼嘅鐵線/鈎針去乳房,指住鈣化點嘅位置,乳腺科醫生就跟住鐵線嘅指引去割(呢D叫Hookwire guided excision),或者有人叫鈎針手術。

乳房鈣化點

2)呢個手術只係確診性質,所以如果確定生乳癌,係要做第二次手術(根治性質)。[私家可能送急凍切片(乳癌手術 6 - 專做乳房手術醫生的增值服務)/加減手術(乳房檢查 三步曲3 - 乳房抽組織檢查)去減低翻手機會。]

結論

乳腺鈣化點係乳房X光中見到嘅小白點(痕跡),本身並冇毒,唔會自己消失,亦都唔會變乳癌,所以如果確定良性係可以唔洗理佢。不過另一方面,佢可以因乳癌而起。唔好/唔洗學睇自己張乳房X光片,你要做嘅野就係返去睇下自己個報告結論係BIRADS幾,對返上面個表就知下一步點做。如果需要抽組織,理論上就有三個方案揀:抽粗針/做微創/做手術。技術上做唔做到/做邊個好,就要問返自己乳腺科醫生。

下回預吿

如果你有乳房鈣化點,抽組織返黎咁唔好彩中咗招,好多時都係乳腺管原位癌(Ductal Carcinoma In Situ - DCIS)。正當你興幸自己當年有買危疾保險,想claim保險之際,點知保險經紀覆返你原來乳房原位癌唔係癌,冇得賠。吓,有冇搞錯?!原位癌唔係癌,唔通佢係淨「原位」呀?⋯⋯

下一回:乳房原位癌 - 究竟係唔係乳癌?

有唔明?係下面寫低佢,我會盡量解釋你聽⋯⋯

相關醫學專欄:
乳房百寶箱五:乳房鈣化點,有沒有危險?

乳房鈣化點

封面圖片來源:互聯網