乳腺增生 － 好多人誤解
「乳腺增生」－ 一個成日都聽到，但問落又唔清唔楚嘅病變。好多人都想知乳腺增生是什麼回事？有咩成因？有咩治療？洗唔洗戒口？有冇咩食療？一大堆問題，配上一大堆誤解，其實答案又係好簡單⋯⋯
乳腺增生
一般人講嘅乳腺增生，即係fibrocystic changes，或者fibrocystic disease （其實都唔係病，所以唔應該叫disease，不過呢個名實在太根深蒂固），佢只係描述乳房喺唔同女性荷爾蒙水平底下嘅變化／症狀，所以正常過正常。
「即係咩變化／症狀？」
即係經期前乳房谷谷脹脹，好痛，凹凹凸凸，經期過後好返好多，冇咁谷，冇咁痛，冇咁凹凹凸凸。收咗經就唔應該再有呢個問題。
「咩叫正常過正常？」
最多可以去到成6成婦女有呢個問題，即係有乳腺增生先係大多數，咁你話佢係咪正常過正常，我地已經分唔到有呢個問題仲喺咪問題。情況有如D女明星個個都乳腺增生，我地已經分唔到女明星乳腺增生仲喺咪問題。
「咁乳腺增生同乳房纖維瘤有咩分別？」
乳腺增生係冇一個清晰嘅邊界，通常係好大範圍（例如四分一個乳房）以至整個乳房（甚至兩邊乳房）凹凹凸凸，好似抽葡提子咁。乳房纖維瘤呢就成型一舊野，有清晰邊界，你好清楚嗰度有舊野。
「我家庭醫生都話我係普通乳腺增生，係咪唔洗照乳房？」
其實所有臨床診斷，最好都係有乳房造影的結果去支持／否定它的結論。所以唔好聽到「乳腺增生」呢個深入民心的名稱便掉以輕心，以為唔洗照乳房。
「咁即係點？又係要乳房檢查三步曲先確診？」
今次有少少唔同，未必要第三步抽針。如果臨床同照乳房都吻合係普通乳腺增生嘅話，係唔洗抽針嘅。因為超聲波只係見到乳腺組織整體性咁增厚咗，冇一個清晰邊界／冇可疑目標，冇目標咁又點抽呢？唔通亂咁拮？所以起碼要做齊「乳房檢查三步曲」嘅頭兩步，先至穩妥。
「呢D變化會唔會變變吓變成癌？」
普通乳腺增生（fibrocystic changes）係絕對唔會變癌嘅。同乳房纖維瘤一樣，佢唔會變惡性攞你命，不過佢又唔係護身符／保你一世唔會生乳癌。你同其他女性患有乳癌嘅機會係一樣，隨年紀而增加。
「唔係喎，我上網睇，好多網站都話『如果你唔理乳腺增生，會導致第時生乳癌。』㗎喎！？」
糾正呢啲謬誤，就係我呢度嘅最大目的。點解佢地嗰嗰都咁錯呢？
可能性一：你抄我、我抄你，抄嗰個見人人都咁寫，咪咁抄囉。
可能性二：喺咪會導致第時生乳癌根本就唔緊要，最重要夠嚇人，因為重點就係想sell你張藥方。
可能性三：喺英文譯中文嘅時候同其他增生撈亂咗。會導致第時大啲機會生癌嗰啲增生叫「非典型增生」 atypical ductal hyperplasia (ADH)／atypical lobular hyperplasia (ALH)，呢嗰係一個病理學上嘅診斷，即係顯微鏡底下睇先知，唔係臨床檢查／造影檢查可以得出嘅結論。仲記唔記得我喺「乳癌成因 ： 我易D生乳癌嗎？」提過嘅風險計算機Breast Cancer Risk Assessment Tool？人地美國政府都喺睇atypical hyperplasia （第6b項）去計算患乳癌風險，冇人會睇普通乳腺增生㗎，唔好搞錯！
「醫生臨床分唔分到普通定非典型增生？」
臨床分唔到。
「咁我點知自己係普通乳腺增生，定係非典型增生？」
我地靠嘅就係造影檢查加減抽針檢查。造影檢查可能可以睇到啲線索，非典型嘅增生照出黎會樣衰少少，呢個好取決放射科醫生嘅經驗。如果醫生覺得照出黎嗰增生樣衰／有可疑，就會建議第三步曲抽針，因為今次有目標（就係樣衰嗰個位）。
「普通乳腺增生咁點醫？」
普通乳腺增生唔係病，唔洗醫，唔洗戒口。最緊要排除唔係生乳癌，其餘痛就止痛。
「洗唔洗好似乳房纖維瘤咁割咗去？」
乳腺增生割都唔洗割，你諗吓佢都冇清晰邊界，點割？點知割幾多？冇可能／冇理由割晒成個乳房㗎。
「咁非典型增生又點醫？」
非典型增生（atypical ductal hyperplasia／atypical lobular hyperplasia）就要割。
「點解非典型唔同D，要割嘅？割幾多？」
因為係顯微鏡底下非典型增生同原位癌其實好似（atypical ductal hyperplasia似ductal carcinoma in situ；atypical lobular hyperplasia似lobular carcinoma in situ），文獻記載抽針話係「非典型增生」嘅病人，割出黎有20%其實係原位癌，所以抽針診斷為非典型增生就要割。至於割幾多，就割到顯微鏡底下清為止（有時可能要做多過一次手術），因為咁樣醫生先可以確定你冇生原位癌。
「可唔可以總結一下我有咩要知？」
乳腺增生有普通（fibrocystic changes）同非典型（atypical ductal/lobular hyperplasia）兩款。一般人講嘅乳腺增生就係普通嗰款，大部份女性都有嘅，即係經期前乳房谷谷脹脹，好痛，凹凹凸凸，經期過後好返好多，冇咁谷，冇咁痛，冇咁凹凹凸凸，收咗經就唔應該再有呢個問題。睇乳腺科醫生嘅目的就係排除啲凹凹凸凸唔係乳癌／非典型增生，醫生要起碼要做齊臨床檢查／造影檢查／加減抽針檢查先至正規。如果確診為普通乳腺增生，係唔洗醫／唔洗割／唔洗戒口／唔洗跟進，因為唔係病，如果痛就止痛。如果確診為非典型增生，就要割到清為止，之後定期跟進。
提漏咗第三款，叫做「瞬間乳腺增生」，良性嘅，醫生叫你割你死都唔會制，因為會影響你嘅事業，女明星最清楚，佢地叫呢啲做「自然、非人為第二度發育」。
相關醫學專欄：乳房百寶箱二：乳腺增生要分典型非典型
香港乳癌及乳病治療中心 
21歲右邊乳房有很多乳房增生，最大個粒超過3cm,而且係冇啦啦增生，上年都唔見有，我算正常嗎?
聽你描述，似乳房纖維瘤多過乳腺增生，因為乳腺增生係冇一個清晰邊界，所以唔會清楚度到「最大個粒超過3cm」，你可以去返「乳房纖維瘤」度睇睇。
正唔正常就要做齊乳房檢查三步曲先知，唔應該網上亂估，雖然21歲統計學上出事嘅機會率係好細好細好細。
請問非典型增生算唔算乳癌？割除後是否不用電療？復發機會高嗎？
非典型增生唔算係乳癌，割除後唔洗電療。
第時係大少少機會有乳癌，所以要定期跟進，冇人當呢D做復發，所以冇所謂「復發機會高唔高」。
謝謝你的回覆！！
我剛抽針後話我有非典型導管細胞存在
要再做手術作化驗
醫生話超聲波知道7mm大，其實算唔算大？？
Thx!!!
如果抽針話有「非典型導管細胞」嘅話，係要做手術嘅，因為佢同乳腺管原位癌好似樣。
佢自己本身個Size係唔緊要嘅，最緊要係附近「有」定「冇」癌。
好多謝你的解答！聽完都好憂心，初時諗住如果屬於細粒，希望代表唔擴散，但原來唔關事!好怕割出嚟原來發現擴散左………
附近有癌嘅可能性大概10%，就算係有都係零期原位癌多（唔會擴散），所以唔洗太擔心。
謝謝！衷心覺得你呢個網站比左好多資訊病人，令我哋了解多啲，個心都定啲！！！多謝你
我做手術後，冷凍切片証實係原位癌，但醫生話要再做化驗才可確定沒有擴散淋巴
請問擴散機會大唔大？
如果擴散，係咪一定要做化療？？
真係令人擔心
如果真係原位癌，擴散淋巴嘅機會等於零。不過問題係冷凍切片唔係百份百準，要睇最尾報告先可以講實。醫生知道冷凍切片結果後，有冇做額外手術（例如前哨淋巴）？
無，佢話冷凍切片係無擴散，但95%準確
所以想做埋呢個染色化驗再確定無擴散
如有，就要再做前哨淋巴手術
染色化驗睇吓有冇侵蝕性（有侵蝕性等於有能力擴散，唔等於擴散咗），有就先要做前哨淋巴手術。
明白，謝謝回答
好唔開心個染色化驗話我有microinvasive carcinoma,黎緊要再做前哨淋巴
睇返報告話我係 ductal carcinoma-in-situ,intermediate grade
Intermediate grade 係咩意思？？
好怕再做前哨淋巴，佢繼續話你知個同當初預期唔同…………
即係腫瘤係T1mi，起碼第一期，原位癌係咩grade已經唔再重要。
去睇吓以下兩篇文章，對你有幫助：
乳癌一期 － 我係咪第1期？
乳癌一期治療攻略 － 早期都要做化療？
我做了前哨淋巴追蹤，冷凍切片話無癌細胞，現等待染色化驗再確定
之前瘤既染色化驗話我有少過1mm既侵蝕細胞，淋巴中招既機會高唔高？？
而家好希望淋巴既染色化驗結果理想！
睇晒你既文章，知道第一期似乎都係要做化療，我有冇理解錯？ 我今年33歲
中招機會唔高，急凍切片有95％準繩度。
乳癌第一期唔一定要做化療，你而家如果確定淋巴冇野，就係早期中嘅早期T1miN0(sn)，僅僅差過零期原位癌，唔需要化療／標靶，只係要電療（因為局部割），加減食藥（視乎荷爾蒙受體係咪陽性）。
我都好希望，因為上次割腫瘤既時候，凍片都話無，點知染色化驗都係中左！！！
我個醫生都話將舊野拎去再驗下荷爾蒙受體！
請問係等待輔助治療期間，會唔會由唔擴散去淋巴，變為擴散左架？？
冇人可以講實／保證會唔會「係等待輔助治療期間，會唔會由唔擴散去淋巴」，不過經驗話我地聽，呢個可能性好微。
我都明白呢條問題好傻，不過呢個病黎得太突然，真正明白好多野根本自己控制唔到！可能好想由醫生口中聽到d好消息，安慰自己！
唔係傻嘅，所有人經歷你嘅情況都會嚇疾，知多D條路會點行，心裡就會定好多，亦都係呢個網頁存在的意義。
感謝主，個報告話我無擴散淋巴，而家待傷口好及公立醫院排期，繼續向復康既路邁進！！多謝你係過程中咁快回覆我既疑問！！
醫生你好，個報告出左，我estrogen receptor 同progesterone recepror 都係strongly positive (270/300,250/300),C-erbB-2 negative,Ki-67 proliferation index 1%
醫生話d數字都好理想，除電療外，要食抗荷爾蒙藥
但我較早前，因經期與經期之間排卵時有出血現象，婦科醫生要我做子宮內窺鏡檢查(因我發現有乳癌,所以未有處理)
想知道我電療或食抗荷爾蒙藥前，是否應先處理此問題？
另外，我是否需要做PET scan去確定我有否其他擴散？？？？
電療／食藥同婦科問題冇抵觸，可以同步處理。
PET scan 就意見不一，大部分醫生都覺得咁早期唔洗照。另一方面，照埋亦冇壞（只係錢嘅問題），雖然揾到野嘅機會確實唔高。
謝謝你的答覆
你好啊！我先17-18歲 我想問我左邊乳房上面有硬塊，而且會痛，有時呼吸有小小困難，不過唔係成日，想問咁樣係咩原因，會唔會係乳癌？
咁後生，乳癌係非常非常非常之罕有，不過實際係咩，要睇醫生先知。
咁可唔可以同我講下咁樣大多數似咩原因，同埋有冇危險性？
唔可以咁樣憑空講。
醫生你好, 我今年40歲, 今日右邊乳頭擠壓時出現黃色液體, 乳房不痛亦沒有任何硬塊, 請問是什麼原因? 謝謝
乳頭分泌物 ： 我係咪生乳癌？3
醫生你好, 今年49歲,本人是有乳腺增生, 2/5來經期,到了20/5又有月經至今,23/5我左邊乳房開始痛, 自我檢查發覺左邊乳房有硬塊, 但26/5開始收細,於27/5到廣華醫院婦女普查部見醫生, 醫生嘗試抽組織化驗, 但抽吾到, 可能水囊內的水太傑或支針咀太幼. 請問咁樣係咩原因，會唔會係乳癌？
唔可以就咁判斷係咩原因，建議你問返醫生乳房檢查三步曲究竟有咩發現。
謝謝回覆
我右邊胸部入面有粒好似黃豆咁大既野
吾知係咩黎 噤佢會移位
係咪淋巴塞左？
唔係。
我係23歲 我需要去睇醫生嘛？
平時冇咩問題吾會痛 只係我按胸既時候摸到
想搞清楚當然係去睇乳腺科醫生。
我今年51歲，去年左邊原位癌，做咗30次電療，今年檢查右邊有問题，經粗針化驗是ADH，同時做CT scan 右邊肋骨有陰影，現安排入院做 PET scan 後，若報告冇著灯就只切除右邊的 ADH,现問題如下:既然 ADH 唔算原位癌，是否可以不切除前哨淋巴？若切除後報告是一期，爲何要再切除淋巴驗證？左邊曾電療，若是原位癌，右邊是否不可電療？感覺变數太多，有點混亂
ADH唔需要切淋巴。其他後續問題變數太多，到你切完再返黎問。
唔好意思，又係我！已做手術， PET scan 冇著燈，醫生話唔算原位癌，唔需治療跟進，但唔明化驗報告字樣如下:
Sclerosed papilloma with atypical epithelial proliferation（margins not involved）
Lobular carcinoma in situ（哩句）
Background florid adenosine , sclerosing adenosis, papillomatosis,epithelial hyperplasia
No evidence of invasive malignncy
係咪真係只需觀察就得？有點怕要治療跟進，真的需要你的定心丸。謝謝
都係原位癌，不過唔係平時常見的ductal carcinoma in situ。
要視乎Lobular carcinoma in situ清唔清，同埋係咪Pleomorphic subtype 先可以話洗唔洗跟進治療。
咁係咪要腫瘤科決定？先知道需否跟進治療？sorry,太意外，唔知措詞有否問題！
可以搵多一個腫瘤科／乳腺科醫生，幫吓眼詳細睇吓個病理報告，睇吓洗唔洗跟進治療，咁你會安心D。
又係我，有個離題嘅問題，我在未做手術前腫瘤科轉介信給外科信內，除咗右乳房有 ALT外，亦建議做 CT scan 跟進肺及骨的陰影，昨日交給腫瘤科的 PET scan report 後，腫瘤科醫生（非常冷淡）冇提及任何事項，半年後覆診。我有點苦惱是否已做 PET scan 後毋須跟進（report 有照到0.6cm）？或需由政府外科跟進？（私家有點貴），非常抱歉問題多多。謝謝
要搞清楚以下東西：
1）咩係ALT，有冇打錯字？
2）之前冇記錯嘅話你係原位癌，一開始做咩要照CT？
3）骨有陰影，點解係照CT跟進，而唔係照骨掃瞄去跟進？
4）點解又照咗PET scan？
5）0.6cm指什麼？
sorry ,係打錯字。
1.正確是 LCIS
2.CT 是手術前做的。
3.苦惱哩個問題？
因為手術前的轉介信有以下:
A 6mm nodule over the lateral aspect of LUL . A 6mm faint ground glass opacity in apical segment of RUL. Suggest follow up with interval CT for these lesions.
所以個人認為做完手術後，腫瘤科會有跟進，但醫生完全冇提及，不知是否已做 PET scan 後就不用理會或醫生漏眼？
4.醫生建議手術前做 PET scan,若著燈，就不用做手術。
5.（0.6cm）sclerotic focus over the anterior aspect of right 2nd rib.
抱歉文筆混亂，見諒。
如果冇理解錯，即係手術前做完CT，又分開做PET，之後發現三個偶然發現（incidental findings):
包括左右肺及右邊第二條肋骨各有6mm陰影。
腫瘤科醫生冇提／冇理佢，不外乎兩個可能性：
1）佢認為冇野，唔洗理。（原位癌唔會擴散，理應如此）
2）佢冇為意睇漏咗。
如果你擔心，覆診時就問問／提提醫生呢D偶然發現，洗唔洗定期照吓跟進。
明白，非常感謝你的回覆，謝謝。
thanks a lot for your information!
That’s helpful!!
去年11月左邊確診T1miNo(sn)，6 月到私家醫生照超聲波和九月底覆診時，均表示沒有異樣，但近月覺得右邊乳暈位置間中有痕癢，令我記起未確診左邊乳癌前，左邊乳暈亦有痕癢
請問這是否癌症徵兆？
如果只係痕癢，好多時都唔係。但如果同時皮膚有損傷，就要小心去檢查。
我搞唔清係咪自己抓損，有一點血
咁去揾個乳腺科醫生睇吓穩陣。
謝謝你的回覆
半年前開始發現乳頭上長了幾粒肉粒，是連住一齊的，不痛，沒有分秘流出，請問會有大問題嗎？
只可以話比你聽大部份乳頭上的肉粒都係良性瘜肉（fibroepithelial polyp），至於你問你個情況會唔會有大問題，我唔想單憑你的簡單描述隨隨便便下結論。
增生，可唔可以食黃豆，山藥，紅棗，黑豆？
可以。
醫生你好 我今年25歲
上星期覺得胸骨對上痛，所以去醫院照超聲波。琴日出左報告，醫生話照唔到有生野，只係有2粒正常淋巴，但佢話係正常。之後觸診就話我有少少乳腺增生……佢係報告上寫 minimal.
佢建議我半年至1年內再照一次。我想問醫生話冇事，但又要我再照，系咪代表我情況會惡化呀？定系我情況差？
雖然醫生覺得唔似有野，但佢又唔敢拍心口一口咬實一定冇野時，就會買保險叫你定時覆照。
你好，想請教下，我買左激光脫毛course,做左一次，但岩岩體檢發現有乳腺纖維腺瘤，想問下咁仲做唔做得脫毛？會唔會有影響？
脫毛冇問題。
醫生 我想問乳頭附近周圍有好細細粒粒 當有時突起時
周圍就肉就會浮起 是否正常？
唔可以單純根據你的描述去評估，有任何疑問都係去睇醫生。
你好，我做左乳房同盆腔超聲波，有以下COMMENT:
ultrasound of breast: mild fibroadenosis in both breasts. two small hypoechoic nodes up to 0.92cm in right breast, likely fibroadenomas or hyperplastic nodes. please further investigation and follow up USG periodically
ultrasound pelvis (transvaginal scan): one cyst 2.1cm in right ovary, likely follicular cyst. Please correlate cinically history and follow up USG periodically
即是嚴重，需要跟進嗎? 個醫生叫我抽針，需要嗎?
會不會影響生小朋友?
謝謝
報告就冇講有可疑的地方，洗唔洗跟進視乎醫生評估。醫生叫你抽針，我冇理由要懷疑佢嘅判斷。暫時睇唔到會影響生小朋友，當然如果最後確定有病變則另作別話。
你好，最近兩年，於經期前我左邊腋下都會腫脹，好似有一兩條筋腫起嚟咁，有時會拮拮地咁痛，經期完就會消腫，睇開中/西醫生時，都話會問問有無問題，通常都係話經期完無野就唔洗驚，但上個月我又睇中及西醫，兩位都突然話照下好啲喎，我因經痛而睇西醫的，佢仲話驚我子宮內膜異位走左上腋下！請問問我應點做？
照清楚點都有利冇弊。
你好 我最近有一天起來突然左胸就有個痛的小腫塊，我正處於月經中期，請問是正常的麼
睇醫生。
醫生你好，我今年29歲，之前做左超聲波，照到一粒0.9cm既野，結論係：an ill defined hypoechoic lesion with mild distal shadowing is noted in 11-12H of the right breast. Nature is indeterminate. 由於放射科醫生唔可以肯定個粒野係咩，我去睇乳線科，醫生睇完片就話粒野雖然細，但樣衰，相當可疑，於是叫我抽粗針，當時佢都摸到，又照到有0.8cm。因為我做超聲波時係經期前，而見乳線科醫生時係來緊經，所以唔知會唔會因為月經週期，粒野好明顯，亦可以一摸就搵到個位。但點知琴日經期完左後，我覺得粒野收細左，唔容易摸到，要摸深少少先搵到一舊硬硬地，少少突起既野。今日做粗針時，姑娘起初都照唔到有野，要搬枱勁d嘅超聲波機先搵到個確實位置。而放射科醫生就話個度唔係一粒野，係一達野，最後抽左兩條組織走。我想問，如果係乳線癌，個腫瘤會唔會因為月經週期而改變大細？我大概發現到呢粒野/達野有四個月到，一直無消失過。而我呢個情況，我自己推測佢會唔會係非典型乳線增生。雖然我知道最後都係由報告去定斷一切，但因為仲要等報告，又呢排實在等得太耐，又比個乳線科醫生咁講嚇一嚇，所以好忐忑，想聽聽醫生你既睇法。
乳癌唔會隨月經週期而改變。
粗針報告出左，診斷結果係fibroadenosis、no evidence of in situ or invasive malignancy，真係放下心頭大石！醫生，我有以下問題，希望你可以指點下:
1. 請問咩喺fibroadenosis？呢個同普通乳線增生的情況有無分別？
2. 我呢個位置，持續幾個月都在月經期間會脹起來出現腫塊狀，月經過去就凹返落去，問題大唔大呢？我個乳科醫生話可以做手術，可以唔做，我覺得好似無咩需要做，所以決定半年後再覆診檢查，但有無話咩時間做檢查較好呢？經前定經後？見有腫塊脹起來時，定平左之後呢？我係腫塊脹起來時照超聲波，結果就存疑；但抽針時，腫塊收左，結論就fibroadenosis，係唔係因為症狀改變左而影響兩個測試結果唔一致呢？
題外話，純粹抒發感受，當醫生話我個腫塊樣衰時，個心真係好沉重，而呢段等抽針同等報告既時間，我已經假定自己會出事，除了唔開心，更多的是恐懼，因為唔知道將來會點。呢段時間，我每日都來呢個網站，好似搵到一個知音人，而了解多左乳癌的資訊後，心入面多了一些平安。我唔喺你既病人，但我感受到你的謙卑同仁心，一個懂得感謝病友，知道醫人又醫心的醫生，真係可遇不可求，你的付出令到好多徬徨無助的人得到安慰，真係好多謝你！要繼續造福人群呀！
1）良性病變，可以睇成同乳腺增生同一類不過唔同嘅野。
2）半年後覆檢，經期唔太重要，夾到就夾經期後。
我有乳腺增生, 乳房2邊各有0.4及0.6cm 的水囊4個, 請問可以做腋下激光脫毛嗎?會否影響到水囊的増大? 或是影響到會有乳癌或乳腺癌嗎?
乳房問題與激光脫毛沒有關聯。
我35歲未生育，年頭超聲波照到one small hypoechoic cystic node 0.65×0.37cm in right breast, likely fibrocystic node or lipoma. 這是什麼？見公立醫生排到下年做mammo. 醫生話應該冇事，未知咩來，照左再講。最近我又照超聲波，左邊都有一粒。即係短短半年，可生多粒。這東西會消失嗎？如何跟進治療？
Nodule 就nodule，cystic lesion 就cystic lesion, fibrocystic disease 就fibrocystic disease，我地唔會叫cystic node／fibrocystic node，唔知你個報告想講咩。
醫生：你好，我右邊已確診為乳癌0期，3.5mm已抽粗針，報告出係原位癌，需要做手術，而左邊粗針報告出了，良性，係乳腺增生，但醫生問我會否考慮將左邊“乳腺增生“嘅組織都割埋，我想問問意見
要睇片先知，純粹由病理報告角度乳腺增生就唔洗割。
你好，因為我之前生過腦下垂體瘤，所以一直有滲乳跡象，我又無去公立醫院覆診。近期又邊乳房腫熱痛，帶有奶黃色乳汁不時可唧出，睇過政府醫院要排大半年。食完抗生素藥一個月後，又到另一邊乳房痛……到底是否不詳之兆，定話我自己出去照超聲波（今年32歲，已生過，月經一直失調）
請指教！……
要搵乳腺科醫生睇睇。
您好 我今年23 每次黎m左邊腋下就會腫左 輕輕整到就會好痛 月經後就會縮細同埋唔痛 但都比顯比右邊腫左dd 就咁望係一整個腋下area 腫左無明顯凹凸 兩邊乳房係18歲到就有好微無味既白色分泌 之前做body check 醫生睇完d分泌都無講咩 想問下乳腺增生機會大嘛?
冇得單憑你三言兩語就可以評估的。
醫生您好!
我剛攞到抽幼針的報告, 病理診斷寫住”Ductal epithelial cell hyperplasia with sweat gland cell metaplasia and foci of atypical hyperplasia”. 請問”foci of atypical hyperplasia”和ADH是一樣意思嗎? 但上次抽針時, 醫生話抽完粒野都唔見左了, 咁即係唔使割?
另, 乳管上皮細胞增生&汗腺細胞化生同乳癌又有咩關係? 是癌前病變嗎?
Foci of atypical hyperplasia可以係ADH（atypical ductal hyperplasia），或者係ALH（atypical lobular hyperplasia）。處理方法大同小異，都係要切。不過你話醫生話粒野已經唔見咗，咁想割都搵唔到目標割。所以下一步係複照去確定真係唔見咗先好。
另外嗰幾句唔洗理，純病理學描述，對你冇意思嘅。
你好！我今年30歲，未有bb，我最近這2個月左邊的乳房都有好似靜電電般痛，持續了2個多月，痛楚有時比較利害，而且我左邊胸部比右邊的較大，而且按下去會更痛，有時好似會按到有粒野，我最初以為是胸圍問題，所以夜間也沒穿胸圍睡，日間也會把胸圍較得比較鬆來穿，但痛楚仍然持續，請問怎麼會這樣的？
冇可能單憑三言兩語描述去斷症，睇醫生檢查方為上策。關於乳房痛楚可以睇睇 乳癌警號五：乳房痛楚怕不怕？
您好，我剛做完左乳纖維瘤切除手術數天，唔知係未無戴bra件衫磨到，今天發現右乳暈既粒粒位有微紅，摸落去是痛（不是全乳暈，是1／3part)我呢兩日是失眠的，訓唔到。9月初先去覆診，會耽誤嗎？因呢幾日睇左好多乳癌野，仍住仍住: (
啱啱做完手術，有咩事都係搵返主刀醫生最合適。
与Amy 同感，谢谢有此網站，了解更多乳癌資料及可以詢問，冇咁驚。衷心感谢_
醫生你好，我剛剛照咗超聲波，醫生話我係乳線增生，但留意到你話有非典型同普通兩種增生，但個醫生冇提及過我係邊一種，咁係唔係要做埋造影檢查先比較好？
呢個係一個病理學的診斷，即係抽針後先知，照埋造影唔會幫到太多。
醫生你好，我今年40歲，有乳腺增生，之前發現左邊有粒3cm良性腫瘤，前一年已做手術，但一年後，又發現再有一粒3cm硬塊在差不多位置，已檢查係良性，切完又有，醫生我應該再切嗎？近年覺得增生比之前嚴重，大部分時間兩邊胸都覺得好痛，由其硬塊位，我應該點做？現在只有定期檢查，一年一次
3cm應該再切。
痛楚就睇 http://www.hkbreast.com/breast-pain-the-rail/
我家庭醫生照我有乳腺增生．想攞多個醫生意見。請問應該睇婦科醫生定外科醫生？
另我係做MRI發現的，同乳房造影，一樣嗎？
外科醫生。
MRI係乳房造影的其中一種，主流係X光同超聲波。
20歲，之前摸到有粒野咁，去左睇醫生，做左超聲波話咩都見唔到，所以話係乳腺增生，依家仲會有粒野，黎m前都會’張’痛，正常嗎？😭
要檢查過先知。
如果係乳缐增生，咖啡奶茶是否盡量介
係。
液下激光脫毛會增加乳癌風險嗎
唔會
我之前抽幼針驗到非典型增生細胞
醫生建議做手術割左佢
做完手術攞去化驗
報告話係focal pseudoangiomatous stromal hyperplasia
醫生話係好罕有
係良性
唔會演變成癌
我見網上無咩講尼個
一係又全部係英文
都睇唔明
係咪真係唔會變成癌？
因醫生話有機復發同唔理佢都會變大
仲要唔知咩成性做成
其實唔罕有，係良性唔會變癌。
醫生你好，我28歲
之前感到左邊乳房一直疼楚，右邊完全沒痛
加上發現兩邊乳房都出現一圈的啡啡的色素圍住乳暈外圍（左邊較深色）及在乳房胸前上生了很多啡色點點（有點似手臂果類粒粒）偶然還感到很痕癢
之前有看到報章說有痕癢和皮膚問題都有可能是乳癌先兆….看了家庭醫生轉介照了超聲波，報告醫生說沒事，只是乳腺發炎，開了消炎，抗生素，服後好像沒那麼痛，但近來又開始覺得有痛楚，而且那色素令我很在意，又不懂分辨是皮膚問題還是乳癌先兆…我應去找專科醫生再檢查嗎？
擔心的話就揾專科醫生再檢查。
好的 Thanks😀
一直有點擔心 都係再check下唔使成日驚
你好我是一位男士，大約一年前右面乳頭有點痛，去看過專科醫生，照過CT有陰影，醫生問我 抽不抽針，我不抽針先觀察一下，之後 食過海帶， 合桃等對乳腺增生有幫助的食物，之後就不痛了，但今次左面乳頭右有點痛，以經兩個星期了，想問會不會是乳癌定右是 乳腺增生
檢查過先知。
你好，我今年35 歲，突然右胸摸到有一粒野突起，而且好痛…..想問下危險嗎？
有硬塊就要睇醫生。
我想問下做左抽針檢查話乳頭溢液有非典型細胞存在，咁係咪代表有癌？
可以係亦可以唔係。
咁係咪做MRI先確認到？
唔係，好多時都要做埋手術，切咗源頭的乳腺管先確認有事冇事。
醫生，請問非典型乳腺增生需唔需要食藥？ 我唔係好想食藥，tamoxifen 副作用好似好多。5mg 要吃3年。 謝謝。
香港主流就唔食。
你好
上年中做左超聲波，報告寫
A circumscribed ovoid parallel hypoechoic nodule is noted at R12, 3cm from nipple, measuring 4.3mm x 2.5mm x 5.8mm. it increased in size (in 2015, 2mm x 2mm x 3mm) it is probably benign
A probably benign R12H breast lesion could represent island of adenosis or fibrocystic change.
其實即係有乜嘢？2015年時醫生又無叫我要定期檢查
呢個係咪會影響買醫療保險？
報告覺得係良性結節。
好多時保險公司都會唔保。
馬醫生，你好！已抽粗針，報告寫不排除非典型乳腺增生不排除低級和中級原位癌要做手術。要將整個細胞切除來檢驗，是否當腫瘤手術一樣做？打算安排政府醫院做，已交轉介信，但沒有給日期，只是收了副本轉介信和聯絡電話，他說等醫生看轉介信先，咁是否要繼續等他們回覆？唔知要等多久? 因沒有這經驗，如果私人做手術費要多少?可以最快安排做呢？現十分迷茫。
切出嚟驗同腫瘤手術唔一樣，起碼唔洗切咁闊／唔洗切淋巴。
政府就要等。
私家就個個醫生收費唔同，期都係一樣，要打去心儀醫生診所問。
你好，我今年31歲，去左超胸超聲波，醫生話應該係乳線增生唔洗擔心，但因為只係照過一次，叫我半年再去照多次，內容如下：
FINDINGS:
At the site of subjective lumpiness in the upper half of the right breast, there is a well-circumscribed hypochoic non-vascular 7 x 5 x 9mm lesion at 11 o’clock, 1cm from nipple.
It is non-tender.
No posterior shadow is found.
There is no other focal mass.
No ductal dilatation is found.
Skin is not thickened and the nipples are normal.
There is no enlarged axillary lymph node on both sides.
COMMENTS:
A 9mm benign looking lesion in the right breast at 11 o’clock. This is probably an area of fibroadenosis.
BI-RADS Category 3 (probably benign. Suggest ultrasound for follow-up about 6 months later.
請問我情況有惡性機會大唔大？同埋我本身有食開低劑量避孕藥，洗唔洗停藥？我有問醫生但佢話應該無咩影響，但都想再問下你既意見，謝謝！
少於2%。
避孕藥唔好長期服用。
承上補充：我食左低劑量避孕藥大約兩年，未生育過
係咪繼續食會有好大影響?
增加患乳癌風險。
長期食避孕藥有咩影響?
增加患乳癌風險。
有冇話食幾多年要停?
越短越好。
謝謝，咁除左避孕藥，我呢個情況有冇咩應該食少啲？
冇。
同埋我宜家食左2年叫唔叫長?
冇硬定議，一般泛指5年。
你好醫生，我太太有增生，係韓國抽針後，醫生話not cancerous, 不過有Atypical Squamous Cells of Undetermined Significance，建議切除，然後2周後再覆診檢查，話檢查後無問題就每半年檢查一次。我問過做家庭嘅朋友佢話，ASCUS一般係子宮頸方面嘅。唔知係咪翻譯問題，ASCUS同atypical ductal/lobular hyperplasia有無分別，同埋有咩分別呢？ 多這醫生
你朋友講得啱，乳房係冇squamous cell 嘅，如果佢個報告寫atypical squamous cells of undetermined significance ，我建議你搵過第二個醫生睇清楚先決定做唔做手術。
醫生, 你好。
想問下抽針後發現非典型導管增生涉及硬化性病變, 通常這個情況, 手術後發現原位癌的機會高嗎? 謝謝
可以高達2成機會。
醫生您好，我最近例行驗身報告發現一粒1.5cm 的mass …因爲粒野外表醜樣，邊位凹凸，深色有閃光，所以放射科醫生就建議抽針。化驗報告話次suggestive fibroadenoma ..再建議驗ALH…. 驗了真實有ALH ，看到你的文章有提及ADH ,咁我需要驗嗎？
現在就一定要割了粒瘤，看了你的文章說有20%機會是cancer .. 同我醫生所說一樣。請問ALH 是否就算是cancer 也只會是原位？會有機會擴散要切淋巴嗎？
我應該選擇割的時候做立即檢驗？如過真的有cancer 立即做埋手術係咪可以減少擴散？如果切了出來再之後化驗，有事再開刀係咪會比較難處理得好呢？
請問ALH 有原位癌的機會率是否跟ADH 一樣也是20%?
請問做了抽幼針，會否增加原位癌變擴散？？ （吉穿了所以漏了出來？） 謝謝
謝謝解答
ALH 就算upgrade 都係去LCIS(同DCIS唔同，LCIS而家當唔係癌)，要再上多一級先係ILC(癌)。
手術中途快速測試好難分以上唔同嘅病變，所以都係切完驗清楚先再決定下一步點處理。
抽針唔會令原位癌擴散。
請問茶需要介嗎？例如earl grey (唔加奶）
怕乳房痛就戒。
你好，醫生！請問非典型乳腺增生可用微創手術切除嗎？
唔建議，因為附近可以有原位癌。
醫生您好：我46歲，已經做了三步曲，五月尾東華抽粗針報告指
MMG bilateral BIRADS 2 few scattered benign microcals in both breasts；
USG L9H PA 5x10x19mm segmental lesion with dilated ducts and tiny cysts (ddx papillary lesion/FC changes) BIRADS 4; R6H PA similar 6x13x16mm segmental lesion with dilated ducts noted BIRADS 4; bilateral breast cysts; no abnormal LN bilaterally
USG-guided biopsy: L9H and R6H BIRADS 4 lesions-fibrocystic changes, no malignancy
當時醫生說這情況很普遍，但怕抽針不準確，要開刀手術才清楚，不過又可以給我選擇不做，一年後覆診，請問：
1. 報告顯示普通乳腺增生又ddx papillary lesion 又BIRADS 4其實依幾點加埋唔係好明，即是良性嗎？
2. 普通乳腺增生 唔係無係病，咁係咪唔洗開刀？
3. 醫生話我都幾大粒最好切左佢？
4. 如果需要切，會唔會因為左邊病灶位置好近乳頭要切埋乳頭，甚至全切？因為之前有另一個最初未抽針時醫生講過。
5. 如果唔洗切，有無機會變咗癌？一年後先覆診會唔會太耐會變？
萬分感謝您的解答！
1）就咁睇樣就低度懷疑有問題，可以良性可以惡性，所以要抽針。
2）普通乳腺增生唔需要開刀。
3）一般用2cm做分界。未叫做好大粒。
4）良性就唔會切乳頭或者全切。
5）遇上盲區嘅機會少過1%。嫌一年太耐嘅話，可以半年到九個月再覆照。
你好，我於2021年乳腺原位癌完成治療，我想做激光或彩光腋下脱毛，請問可以嗎？
可以。
Hello 馬醫生
請問33歲女士發現有乳房增生 係咪一定要搵醫生跟進？
乳腺增生唔需要搵醫生跟進，不過個邏輯係你唔睇醫生，究竟邊個話你／確定你係乳腺增生？
岩岩做左個body check, 包埋ultrasound breast, report 話係乳腺增生； 咁幾時先需要特別去分典型/非典型？ 因為佢就咁照左USG 話我乳腺增生；咁我需唔需要進一步去了解係邊個類型？😂謝謝
冇可疑目標就唔需要去分辨。