乳癌化療AC針TC針 - 乜藥黎㗎?

Posted by in Chemotherapy 化療, Target Therapy 標靶

一去到腫瘤科醫生度聽化療療程,又乳癌化療AC針TC針,十個病人十個聽完都一頭霧水。叫齊屋企人/朋友再去聽,出到黎大家都係聽唔明。唔係你問題,而係化療本身係好深嘅題目,你唔準備一下,去到見醫生只會浪費寶貴嘅診症時間。你準備得好D,就可以把握見到醫生嘅時間,去問一D最核心最困擾嘅問題。呢一集,我會同你補補課,由淺入深去教你呢一個咁艱深嘅課題「乳癌化療藥物」⋯⋯

醫生喑號 

「雖然我偷睇到醫生寫D化療藥名,但全部都係英文單字字母,咩黎㗎?上網查唔到嘅?」

醫生好鍾意簡化D藥名,因為可以寫快D,但外人睇上黎就好麻煩,好似暗號咁好難明,想查都冇得查,因為得一隻/幾隻字母。所以未深入講D藥前,你要明白醫生嘅習慣,佢地通常都用隻藥嘅第一個字母代表嗰隻藥,我下面會用括號代表嗰D喑號。 當你遲D識咗D常用藥嘅全名,要同醫生溝通時,識英文併音嘅,就成個字併出黎讀,唔識嘅,就講暗號英文字母得㗎喇,唔洗嘥時間查字典譯中文,因為中文譯名對醫生黎講係外星文,呢次到佢唔識呢D化學怪名,唔知你講咩。

乳癌化療藥物與標靶藥物

唔之你仲記唔記得我係乳癌治療方法 - 我需要用咩方法醫?1講過一個好重要嘅概念,就係如果你隻乳癌係HER2型,化療加埋標靶藥一齊用先可以發揮抗癌嘅最大威力。

「點解呢個概念重要?」

因為一線標靶藥只係得一隻,人人都用佢,就係Herceptin (H),係咪好簡單?

乳癌化療AC針TC針

圖片來源:互聯網

Herceptin通常三個星期吊一次針,吊足一年,淨標靶藥物成本25-27萬。如果你係HER2+型,化療加標靶組合不出嗰三個,而且佢地療效差不多一樣,所以你/醫生都易揀D用咩計畫。 如果唔係HER2型,就萬千組合化療藥過你揀,仲慘過睇萬千星輝賀台慶。

2016年更新:醫學發展急速,想知乳癌標靶藥最新發展,可以去睇吓:
乳癌類型巡禮 - 與你細數HER2型乳癌的歴史

「萬千組合?咁點算?我學得黎都蚊訓啦~」

你黎得呢度,咁好心機睇咁多字,都係想知道自己用咩藥姐,識咗常用嗰D咪得囉。明星咁多個,睇紅嗰D一線大明星咪得囉,唔洗理嗰D帶咗黑超就以為自己好巴閉嘅五六線茄喱啡。

「咁有咩常見大明星?」

原來大明星只得兩個,就係你見其他病友成日講嘅乳癌化療AC針TC針。

乳癌化療AC針TC針

「咩係乳癌化療AC針/TC針?」

呢D就係醫生嘅暗號。 AC針就係Adriamycin(A)-Cyclophosphamide(C)嘅簡寫。 TC針就係Taxotere(T)-Cyclophosphamide(C)嘅簡寫。

「咦?咁咪三大天王A/C/T?又話得兩個嘅?」

乳癌化療AC針TC針

圖片來源:互聯網

你見咩組合都有C份,就知佢唔係主要分別,就好似演唱會伴舞咁,咩show都有佢份,都唔係主角,不過冇佢場演唱會又冇咁好睇。真正主角,就係Aaron同埋Twins。

Adriamycin(A)

A當然唔係Aaron。雖然郭富城本身就一D都唔毒,但以前好多女性都中咗佢D毒。 A係代表Adriamycin,亦即係Doxorubicin,就好似藝名同真名嘅分別,都係同一個人。 你上網搵資料,就兩個名都用得。 同醫生溝通就講「A針/Adriamycin」,始終藝名常用啲,唔好懶醒講「D針」,冇醫生明你講咩,因為「D」會同Taxotere嘅真名Docetaxel 混淆。 同病友傾計,佢地會叫佢做「紅魔鬼」,同曼聯係冇關係嘅,咁叫係因為支針係紅色嘅同埋嘔到飛起

乳癌化療AC針TC針

圖片來源:互聯網

台灣網站呢,就叫佢做「小紅莓」,其實邊有咁可愛呀。

「我明白佢點叫喇,咁佢係咩黎呢?」

佢就係90年代嘅大明星之一,嗰時好紅好多人用,之後2000年代人氣開始下滑,但都仲係好多人鍾意用佢,一來懷舊,二來風采依然。

「嗰時仲有其他大明星?」

當然有。好似Epirubicin(E)咁,其實佢地係同一個經理人(Anthracyclin),同一類野,所以所有野都好似,包括佢嘅副作用,就好似韓國明星個個一模一樣咁。

「Anthracyclin 有咩副作用?」

化療一般有嘅佢都有,包括成個人好攰/冇精力/冇精神/冇胃口/免疫力下降/易感染/甩頭髮/口腔潰瘍。 佢自己獨特嘅副作用就係嘔到飛起,不過都有藥可以舒緩,遲D係「乳癌化療嘔吐 - 終極止嘔藥」再詳細講。 感覺唔到嘅副作用就傷心臟,所以化療前要檢查心臟功能,同埋唔可以同標靶藥Herceptin同一時間落藥

「咁2000年後,邊個最紅?」

當然係之後所講嘅Twins。

Taxotere(T)

Twins,屬於經理人公司Taxane Group,有兩名成員Taxotere同埋Taxol。 Taxotere係藝名,真名叫Docetaxel三個星期打一針Taxol又係藝名,真名叫Paclitaxel 一至兩個星期打一針。 兩個真係好鬼似,好易混淆。

「醫生暗號又係咩?」

Taxotere有醫生叫佢做「T」(取其第一字母,但同Taxol好易混淆),所以比較多醫生用「TT」(取其TaxoTere)或者「D」(所以「D」係代表Docetaxel而唔係Doxorubicin,唔好問點解,約定俗成冇得解)。 Taxol醫生一係叫佢做「T」、或者叫佢做「P」。 病友叫佢「紫杉醇」,只不過叫做有個中文名叫吓,好過叫「乜水/阿邊個邊個」,其實都係冇咩意思。

「咁Taxane有咩副作用?」

化療一般有嘅佢都有,包括成個人好攰/冇精力/冇精神/冇胃口/免疫力下降/易感染/甩頭髮/口腔潰瘍。 佢自己獨特嘅副作用就係發燒,因為佢㩒嗰免疫力都㩒得幾犀利,所以好易感染/發燒,不過都有藥可以舒緩,就係提升白血球針(升白針),遲D喺「乳癌化療副作用 - 辛唔辛苦?點處理?」講。 另外佢會搞到手掌/腳掌麻痹,同埋吊針時落得太快會敏感

「點解佢會受歡迎過A針?」

因為醫生發覺醫乳癌T針原來比A針仲有效

「咁T針好D,點解佢唔係全面取代晒A針嘅?」

其實兩隻針唔係互相排擠,以前阿SA受歡迎D,唔代表阿嬌唔好,Fans可以兩個都鍾意,佢地兩個可以個人發展亦可以組合埋一齊。一樣道理,醫生可以組合埋A針T針

「嘩,仲阿SA阿嬌,Breast HK,你都好out姐~」

冇辦法,我係屬於嗰個年代,Taxane又係屬於嗰個年代,Twins都係屬於嗰個年代。你都可以將化療組合睇成韓國跳舞組合嘅,人多好辦事,高矮肥瘦/燕瘦環肥,總有一個成員啱你口味。不過鍾意男團女團嗰D,又未到有乳癌煩惱嘅年齡,會光臨我呢度。

「我其實唔想化療,唔想要咩男團女團組合~」

唔買都埋黎睇吓先啦,可能跳舞跳得好好睇呢~

總結

記住呢幾個大明星同埋佢地嘅暗號,你想了解醫生用咩化療,一定會遇到佢地:
1)標靶針Herceptin(H)
2)紅魔鬼Adriamycin(A)或者Epirubicin(E)
3)紫杉醇Taxotere(TT/D)或者Taxol(P)

總括黎講,T針好過A針,佢地有共通嘅副作用,亦有各自獨特嘅副作用。兩隻針唔係互相排擠,可以獨立/組合發展。

係時候落堂喇,講咁多,你未做化療未打A針已經嘔㗎喇。等你消化吓,我地先再深入D去了解吓化療組合。 下一回:乳癌化療選擇 - 咁多組合點樣揀?

有唔明?係下面寫低佢,我會盡量解釋你聽⋯⋯

封面圖片來源:互聯網