乳癌免疫治療－解放你的抗癌潛能
一聽到抗癌提升免疫力，一定會諗起市面林林總總的産品，什麼褐藻糖膠、什麼營養蛋白粉、什麼日本乜乜療法，話佢地呃人可能過於武斷，但起碼大部分都係缺乏科學化的嚴謹驗證，但原來乳癌．真．免疫治療已經悄悄來臨，一個乳癌新治療的紀元即將展開⋯⋯
免疫系統
免疫系統，真係「我細細個就聽過呢個名」。當我地傷風咳，阿媽就會話：「乜你抵抗力咁差㗎？」
或者到大個咗，最得人驚的傳染病愛滋病，正式學名就係「後天免疫力缺乏症」。原來，缺乏免疫力係可以死人咁大件事。
「咁究竟免疫力或者免疫系統係乜？」
簡單黎講，就係你身體嘅軍隊，有敵人入侵時就打佢。最常見的敵人就當然係細菌病毒。第一次黎入侵你，自己軍隊少不更事，唔知佢係敵人，當然中招。中過一次招下次自然學精，下次佢再黎時因爲有經驗有記憶，未引起問題時軍隊已經擊退外敵，呢個就係抵抗力。
出於對免疫系統的認識，我地發展出不同疫苗（卡介苗、乙型肝炎、破傷風、水痘、麻疹等等），幫助我地對抗細菌病毒，救返千千萬萬嘅人，所以千祈唔好比D無知女歌手誤導。背後原理就係將一D淨化後的細菌病毒（只得軀殼沒有靈魂）打入身體，幫手預演一次入侵情況，好讓我地係未中過招之前已經訓練好軍隊，咁真係有敵人黎時，我地就會喺不知不覺的情況下，已經擊退外敵。
現實世界其實又點會咁簡單呢，細菌病毒亦都唔係省油的燈，佢地識變身易容，避免被軍隊發覺。所以你見流感疫苗點解要年年打，就係因為細菌病毒好似古天樂的「今期流行」咁，年年流行唔同樣，我地要睇住今期流行乜樣去update去訓練軍隊。
圖片來源：esquirehk.com
乳癌．真．免疫治療（immunotherapy）
你會見到理論上免疫治療係幾咁天然，幾咁方便，幾咁舒服，又唔洗食藥打針，又冇副作用，如果可以用黎對抗乳癌咪好正？可唔可以自動認清癌細胞為敵人，自動殲滅癌細胞？好事多磨，中國人冇講錯，咁正嘅野又點會係好容易做到嘅野，所以過往醫生絞盡腦汁，又癌症疫苗、又樹突細胞、又NK細胞、又T細胞輸入免疫療法，總之一大堆好pro好科學的字眼，又係隻隻字你都識讀，但講到底你又唔知佢噏乜。呢D唔同方法往往present到幾勁幾勁好似好有曙光咁，但往往就好似光咁捉不緊的，這麼近卻那麼遠，往往停滯喺研究階段。所以呢D研究野今日就唔講喇，我地唔係要畫餅充飢，我地作為病人的，最想知嘅係要貼地實際用得著的乳癌．真．免疫治療。
原來乳癌．真．免疫治療喺2019年三八婦女節已經悄悄到來。
乳癌免疫治療藥物
「咁正？咁咩係乳癌．真．免疫治療？」
乳癌．真．免疫治療所指嘅係第一隻獲美國FDA批准的乳癌免疫治療藥物，佢叫做「阿替利組單抗（特善奇）」atezolizumab （Tecentriq），原理就係年初一派利是比看更阿伯。
「派利是？？」
黎得我呢度睇開乳癌資訊都知，識睇一定係睇故仔，平時生活已經夠苦悶，唔通閒時仲要睇埋D學術悶野？
話說都市有個叫香港仔隧道的傳說：知唔知香港仔隧道幾時會間封？
圖片來源：生活情報
唔係8點，唔係9點，唔係繁忙時間，幾時間封就係當你趕住過隧道嘅時候就會間封。當你唔趕時，佢就好順𣈱。有時真係好難明隧道公司的神邏輯，我而家好急尿，你叫我忍一陣唔好去廁所住，難道D尿就會消失咗？之後咪又係要去返。
看更阿伯一樣，知唔知看更阿伯幾時會唔知去咗邊？
圖片來源：蘋果日報
唔係8點，唔係9點，唔係繁忙時間，幾時會唔知去咗邊就係當你有需要時、有賊時佢就會唔知去咗邊。當你年初一唔需要佢開門時，佢唔單止天未光已經企咗係度，仲會衝住埋黎恭喜你。
為嘅就係你有血有汗的利是，就係呢封利是將看更阿伯徹底激活咗，回復年輕時的幹勁。
「咁同乳癌．真．免疫治療有咩關係？」
看更阿伯就係你嘅免疫系統你嘅軍隊，癌細胞就係賊，利是就係atezolizumab。
原來平時有賊（乳癌）時，你個看更阿伯（免疫系統）係一定訓緊覺嘅，賊？見唔到播。只要呢個時候我地有利是（atezolizumab ）派，真係行一億新春金多寶神跡般跛都企返起身，所有賊都無所遁形，殺無赦。
圖片來源：互聯網
乳癌免疫治療成功率
「咁乳癌免疫治療我又啱唔啱用？」
究竟乳癌免疫治療成唔成功，終歸取決於乳癌類型。由以上比喻睇得出，要個看更阿伯貪錢，我地先激活到佢，佢唔貪嘅超級大蛇嘅，話知你年初一都好，你都係無緣見佢一面。
原來三陰性乳癌的看更比其他種類的乳癌更貪錢更易激活。而三陰性乳癌當中，又以PD-L1 positive（陽性）的最貪錢最易激活。
所以暫時atezolizumab FDA只係批准比第四期或做唔到手術的三陰性PD-L1 positive乳癌病人使用，背後的理據建基於一個劃時代的研究IMpassion 130，我地發覺PD-L1 positive（即係要驗過真係貪錢）嘅三陰性乳癌病人，用atezolizumab 加化療abraxane（nab-paclitaxel），相比起只用化療abraxane ，整體存活率由15.5個月，提升至25個月。
「好impressive 喎，但香港有冇D咁新嘅藥物？」
Atezolizumab 喺2018年2月在香港正式註冊，只係之前只批准用喺肺癌、膀胱癌度，而家有美國FDA認證用喺乳癌度，只要假以時日等更長覆診的數據出爐，相信atezolizumab 加化療Abraxane，將會成為PD-L1 positive嘅第四期三陰性乳癌的一線藥物。
乳癌免疫治療費用
「好實際，咁幾多錢？」
三星期一針，每次三萬蚊度。打幾耐，就打到失效或者負擔唔起為止。
「咁好貴喎，有冇資助？」
就算醫生幾有愛幾有責任都好，我好明白普羅大眾都係要面對窮的困苦。
之前聖雅各福群會惠澤社區藥房曾經有資助過atezolizumab 喺其他癌症，不過而家又唔見咗，可能下咗架。
政府就暫時冇資助，亦未納入關愛基金資助項目。
乳癌免疫治療副作用
「副作用又如何？」
其實主要副作用來自一齊用的化療藥abraxane。
佢自己就會引起累，冇胃口，肚痾，咳，發燒，周身骨痛，甲狀腺功能減弱等。但相比化療副作用，呢D已經叫小巫見大巫。
結語
當自己不幸患上第四期或做唔到手術的三陰性乳癌時，記得提醫生喺個腫瘤樣本驗一驗PD-L1，睇下係唔係PD-L1陽性。如果係的話，atezolizumab加abraxane就會成為你的一線曙光。但如果唔係以上情況的話，就要放遠目光等待乳癌免疫治療的發展，希望有日突破終降臨自己身上。
當最惡最難搞的第四期三陰性乳癌都有重大突破時，你仲要驚乳癌嗎？等乳癌．真．免疫治療解放你的抗癌潛能，一齊努力打贏呢場仗，迎接美麗的二次人生。
香港乳癌及乳病治療中心 
文中提及三星期一針，但政府醫院說兩星期一針，靖問有沒有分別？另外，免疫治療需要長期治療，有沒有案例治療一段時間後可以停藥？
要問返政府係咪用同一隻藥。暫時冇話見好就收的做法。
免疫治療是否有很多控制唔到的副作用？例如會傷害自己內臟，產生很多感染併發症機會？
上文末段已經交代咗。
醫生，你好！
請問這免疫治療可用於三陰性復發或轉移上嗎？（即已切除全乳及已做化療、電療等）
謝謝！
轉移可以，復發則看情況。
家母60歲，三陰2b期 grade 3, 已做局部手術，正在政府FEC x3, TT x3, 宜家打咗第四針
1. 很多報導有提及免疫治療同三陰好夾，請問政府有免疫治療嗎？政府會主動提供免疫治療嗎？還是只有私家才可要求做？
2. 免疫治療是與化療一起做嗎？還是化療後才做？
3. 之前私家醫生提及過只有復發才會做免疫治療，對嗎？還是我們現在可主動要求做？
4. 家母打完TT針後，覺得腸胃嗱住，甚至有些作嘔，是正常反應嗎？
5. 如果之前沒有驗過PD-L1, 現在是否已經沒有機會做免疫治療?
另外，打完TT針，全身也有水腫，可以怎樣舒緩？
1）政府有。有需要就會提免疫治療，不過都係要自費。
2）和化療一起做。
3）擴散或晚期都可以用，唔一定要復發。媽媽情況唔需要。
4）唔可以話正常，不過唔關TT針事。
5）可以補驗。
6）去水丸。
感謝你快速回覆
1. 免疫治療適合擴散用，意思是轉移至其他器官？如只是淋巴，這不算是擴散？
2. 去水丸需要醫生開嗎？還是可以自己到藥房買？因為要兩星期後才見醫生
3. 另外母親有痔瘡，經常出血，這時期適合處理痔瘡問題嗎？還是要完成化療及電療後才處理？
1）指擴散去其他器官。
2）要醫生開。
3）處理得到就處理，處理唔到就容後處理。
醫生你好！我係乳癌第一期患者，今年40歲 ，治療後一直吃Tamoxifen，己吃了大概五年半，現在仍有定期在政府醫院覆診。心裏有以下疑問:
1.我看過一些文章說吃Tamoxifen 10年比5年好，請問呢個說法是正確嗎？
2. 我曾經問過政府醫生，我要吃幾耐因為我己超過半年，他叫我自行決定。請問我需要什麼因素決定自己停藥與否？我可否要求醫生幫我做一些測試才決定嗎？
3. 我曾經在東華醫院做過抽血基因測試，他說我有乳癌基因，幸運地我的父母都沒有cancer. 請問這個因素影響我應服5年或10年Tamoxifen嗎？
謝謝你！
1)正確。
2）食十年。
3）唔影響。
你好 回應第二點，即刻我不用要求醫生作任何檢查，可繼續服用Tamoxifen到十年？ thanks
對。
母親打了三次FEC, 一次TT, 腹部越來越脹，像懷有六個月孩子般那麼大，但醫生說他不是水腫，只給了一些消化餅給她
請問腹脹是正常嗎？可以怎樣舒緩？
咁脹聽落去唔正常，照下腹部睇清楚穩陣。
再去看醫生，醫生說腹脹是因為水腫，給了去水丸
母親上星期五剛打了第二次TT, 昨晚起開始很難去小便，小便也很黃，但今天交通不便看醫生，應該再喝多些水嗎？
多飲水就加劇水腫，自己要平衡水腫同小便邊樣重要。
母親喝水習慣不變，並没有很多，但這兩天很難小便，這情況普遍嗎？不知道應該怎幫她，因為不知今天交通情況可否容許看醫生
情況普唔普遍同母親個人狀況冇關係。
謝謝醫生，會再觀察一下. 除此之外，母親面紅紅有少少興，但暫時冇發燒，作為女兒不知可以怎樣幫她
你自己要放鬆D，太緊張會影響媽咪。
馬醫生你好。六年前曾在這裡留言，謝謝醫生你細心回覆。今天想再問問意見：太太六年前四十多歲時確診乳癌四期，屬荷爾蒙陽性受體，有骨轉移。在公立醫院接受療程，開始是化療紅白針，荷爾蒙藥。然後標靶Ibrance，口服化療Xeloda，期間一直打骨針。直至上年尾，太太身體狀突然轉差，無胃口及劇烈骨痛，公立醫院建議轉化療藥紫杉醇Paclitaxel。吊了兩次針，期間太太身體出現貧血、白血球及血小板指數過低，要接受輸血。醫院提議停止化療，並提議可以試一隻新標靶藥，但要驗有否基因突變（未知是否atezolizumab來，若驗出不是三陰性乳癌又是否合用⋯⋯）
馬醫生，現在太太身體狀況尚算可以，痛少了亦活動自如，但醫院就好像表示已經沒有藥可用。到這個階段是否只有在等待？請馬醫生賜教。
佢地想驗PIK3CA mutation，睇吓可唔可以用alpelisib。
謝謝醫生回覆。即是需要先做基因排序、睇下是否適合用alpelisib? 請問alpelisib是否荷爾蒙標靶藥物？價錢高昂嗎？驗PIK3CA mutation嘅程序複雜嗎？謝謝醫生🙏
是。
是。
高昂。
一般。
感激！
您好醫生，我太太35歲，於7月中確診三陰性乳癌(Ki-67 30%, size 2.37cm, 照PET無淋巴擴散). BRCA negative & PD-L1 <1。
依家係私家做緊每星期打Taxol + Carboplatin,另外每隔3星期打一次KEYTRUDA。
因為最近FDA approve 左用KEYTRUDA去治療早期三陰性乳癌(就算PD-L1 negative), 都有significant improvement係pCR 同EFS。所以最後打都加左KEYTRUDA入去。但想請教下您既睇法..
因私家醫生表示100ml dose 已經有效果同少d副作用(instead of 200ml dose recommended by FDA), 所以都go for 左100ml. 其實個效果會唔會有分別？係咪亞洲人對比外國人可以用少啲既dose都可做到同樣效果？因為body mass& weight?
另外想知腫瘤縮細速率應該要幾快先可以確認treatment係effective？
謝謝醫生
最早期keytruda研究係用2mg/kg嘅劑量，但當藥廠發現隻藥有效時，之後研究就轉咗用200mg單一劑量（唔冼計體重），兩個劑量副作用冇大分別，從此200mg成為標準劑量。三陰性乳癌所有keytruda嘅研究（不限種族）全部都係用200mg，所以計正黎講應該用200mg先跟足研究原汁原味。如果用100mg，冇人知道／保證到成效，最大好處就係藥費平一半。
縮細速率冇硬指標，只要唔大就會繼續打落去。
多謝醫生甘快回覆我，我一直以為副作用與打既劑量成正比..
另外想問下4AC + 12TC 係比較standard 處理TNBC既combination, 但腫瘤醫生建議採用較温和既12TC + Carboplatin。請問兩個組合係PCR, Disease-free survival 同OS上有無分別？
AC對心臟長遠有麥影響？
醫生既睇法係點？應該轉AC?
非常感激！
冇直接對頭對比，不過預4AC + 12TC 會好D。如果都打得keytruda博到盡，我又睇唔到點解化療又縮落黎。
AC就係可能傷心臟，搞到心臟衰竭。
多謝醫生既comment!
媽媽2年前三陰性3期完成左6次化療。剛確診已轉移到全身 多處，如骨，肝，腦都有 醫生建議先電療腦部。
1） 上次已用紅藥 紫衫等藥 還有其他藥可用嗎？公立私家會有唔同嗎
2） 如想在公立做免疫治療 但錢唔多10幾萬左右 可以與化療一齊做 做完6次就唔做嗎？
3）已完成晒所有腦部電療才可開始做化療嗎？
1）有其他藥物可用。可以同亦可以唔同。
2）已經離開公立醫院一段時間，唔能夠代答，最直接就係問公立醫生。
3）對，電個腦急D。
請問打一劑200mg Keytruda 要多少錢，有冇資助。是否可以防止三陰性乳癌復發
公立大概40000，私家大概70000。以我所知，暫時（2022年5月）乳癌係冇資助，第時有冇更新就唔知。
目前數據都係用喺控制三陰性乳癌方面，至於預防復發方面就要拭目以待。
打Keytruda 政府有冇資助
以我所知，暫時（2022年5月）乳癌係冇資助，第時有冇更新就唔知。
多謝快速回覆🙏，請問七萬蚊係唔係包所有費用（包唔包輔助藥物同醫生費）
七萬係約數，如果醫生收得平，已經包輔助藥物同醫生費。如果醫生收得貴，就當然唔包。
醫生你好，我是三陰3A淋巴有擴散 ki67,50-60，pet scan 無去遠端器官位置。
1:而家已打左第3劑次pembrolizumab (200mg) ，但打之前無驗到PD-L1，其實有冇必要打之前去驗呢？
2:如果PD-L1 呈陰性，行免疫治療，其實有沒有用呢？
3:其實打了三劑次免疫+每星期化療之後，腫瘤原發位及淋巴係明顯細咗，但係因為真係十分之擔心會擴散，所以我想問，如果化療係對源發位/淋巴有效，喺同一時間癌細胞會唔會擴散到去其他器官？
謝謝！另外十分之感謝你寫這個詳細的專頁！
1-2）冇必要驗。Pembrolizumab 用在術前治療特別D，研究發現PD-L1陽性定陰性都同樣有效，所以冇必要驗。
3）機會唔大。
馬醫生你好，家母56歲，確診三陰性三期乳癌(with apocrine features)，已擴散到3組淋巴，今日與政府腫瘤科醫生會面時他只有提及打紅針及紫杉醇，我主動查詢是否有免疫治療法，他表示有但要自費，共用17針，即差不多70萬。由於價錢關係於是我又徵詢了另一位醫生的意見，另一位醫生以數據指出免疫治療法提高的存活率不算太多，只有10%以下，他認為我們如果因經濟因素而未能負擔，可先試試紅針和紫杉醇，以下是我的問題:
1.如果試了頭2針紅魔鬼發現沒有效，可否中途加入免疫治療法？還是要第一針化療時已經要開始配合免疫治療法？
2.馬醫生對於這個個案，覺得是否值得嘗試免疫療法？
謝謝！
1）可以中途加入。
2）主要都係經濟障礙，如果唔係問題嘅話，一定係加埋免疫治療。
謝謝馬醫生！
我還有少少問題想問
1.請問除了免疫治療外，還有其他治療/口服藥可用嗎？
我目前知道有PARP抑制劑，家母剛做了brca test未出結果，如到時brca test結果是negative，你會建議做埋pdl1 test嗎？因不知道免疫治療是否適合她
2.另外，我上網睇到NTRK抑制劑，但資料較少，請問是什麼藥？需要先進行測試嗎？
非常感謝你的回覆🙇🏻♀️🙏🏻
1)做唔做PDL1主要視乎你會唔會負擔得到免疫治療，如果都係負擔唔到，咁就無謂測試。
2）NTRK 抑制劑我冇經驗，NCCN guideline 有提過兩隻藥，Larotrectinib同Entrectinib，我懷疑香港都未必有。
我係三陰性擴散到淋巴，現時做緊術前治療，暫時打咗一針紅針
我想問馬醫生：應該打到第幾針先有感覺腫瘤縮細咗
兩針度應該開始有反應。