乳癌荷爾蒙藥 - 究竟食咩藥?
醫生叫我食5年抗荷爾蒙藥,但佢比兩隻藥我揀,咩新藥舊藥咁,咁究竟我應該食咩藥?食幾耐?幾多錢?唔會好似化療咁有副作用架?今次我地研究吓「乳癌荷爾蒙藥」呢個課題⋯⋯
同乳癌手術一樣,未講有咩抗荷爾蒙藥比你揀之前,先要搞清楚你有冇資格揀。
有冇資格揀?
「吓?!資格?咩資格?我點先知自己合唔合資格?」
因為唔係所有乳癌病人都要食藥,就算要食藥都唔係隻隻抗荷爾蒙藥都啱,所以要知道三樣野,先知有咩藥啱你洗。
「咁邊三樣野?」
第一樣野要知嘅當然係你隻乳癌係咪ER+(陽性)。唔知咩係ER+嘅朋友,返去睇返「乳癌治療時間 - 我需要用咩方法醫?2」「乳癌荷爾蒙治療-點解我仲要食藥?」。
1. ER+定-?
如果係ER+(陽性),請睇落去。
如果係ER-(陰性),唔洗睇落去,因為食藥冇幫助。
「我係ER+呀,咁第二樣野係?」
第二樣就要知道你隻乳癌係原位癌定係有侵蝕性。
2. 原位癌定侵蝕性癌?
原位癌冇得揀,只可以食舊藥Tamoxifen5年,因為冇臨床證據話新藥/10年舊藥喺原位癌有效。
(2016年1月更新:而家已經有一D新證據話新藥(AI)喺原位癌都有效預防復發,尤其係收經後及60歲以下女士可能更見優勢。呢D係一D好新嘅野,詳細問返自己醫生。)
「我係原位癌呀,但我個醫生叫我唔洗食藥喎,但你上面又話食5年舊藥,即係點呀?」
喺原位癌個情況食唔食藥,係有2派學說,我地先睇吓食咗5年舊藥Tamoxifen,15年內有咩著數先:
同一邊侵蝕性復發由9%降至6.6%。
另一邊侵蝕性復發由5%降至3.3%。
另一邊原位癌復發由2.8%降至1.6%。
存活率冇分別,都係9成人有15年命以上。
醫生話唔洗食藥,主要係佢將個重點放係存活率度,食咗藥15年都冇長命到,更係唔食啦。
醫生話要食藥,主要係佢將個重點放係復發度,減少復發理應減少擴散,理應會長命D,雖然15年覆診未證明到有分別,可能再長期D會有分別呢。
「咁Breast HK你建唔建議食呢?」
我會睇你年紀同埋態度進唔進取。
後生/進取,食。點都好過食埋D冇根據嘅健康產品/試埋D古靈精怪另類療法。
年老/保守,唔食。
另一方面,如果係侵蝕性乳癌,就一定係食好D,不過點食法就要睇第三樣野。
「咁咩係第三樣野?」
第三樣野就係你收咗經未?
3. 你收咗經未?
「收唔收經都關乳癌事?」
仲記唔記得上篇講到你要控制男人,就要扣佢零用錢,咁第一個問題姊妹要問嘅就係「你D錢邊度黎?」
醫生要控制乳癌,就要對抗女性荷爾蒙,咁第一個問題醫生要問嘅就係「你D女性荷爾蒙邊度黎?」
未收經,女性荷爾蒙主要來自卵巢。
收經後,卵巢收工,女性荷爾蒙主要來自脂肪。
「我割咗子宮冇經期喇喎~」
冇經期唔等如收經,例如有D人因為子宮肌瘤割咗子宮,但仲保留卵巢而又未到收經年齡(香港女性平均52歲收經),咁係乳癌角度就當仲未收經。
乳癌荷爾蒙藥:舊藥 vs 新藥
「咁我地知道女性荷爾蒙來源又點?同食咩藥有咩關係?」
原來口服乳癌抗荷爾蒙藥只係得4隻,分為兩類:
1)Tamoxifen 他莫昔芬-同醫生溝通時識讀就照讀英文,唔識讀都唔好講「他莫昔芬」,我幾肯定醫生「他唔識分」,就咁叫「舊藥」醫生就明㗎喇。佢主要抑制女性荷爾蒙作用,所以咩年齡都用得。
2)Aromatase Inhibitor (AI)芳香環轉胺酶抑制劑[包括Femara(Letrozole),Aromasin(Exemestane),Arimidex(Anastrozole)]-又係識讀就照讀英文,唔識讀都唔好講「芳香環轉胺酶抑制劑」,我自己試讀一次都好似鬼上身咁唔知自己噏乜,就咁叫「新藥」或者「AI」醫生就明㗎喇。佢主要抑制脂肪製造女性荷爾蒙,所以收經後嘅女性先用得。
(2016年1月更新:Femara過了專利權已經再次大降價,副廠藥現價為$1一粒,即最平頭兩年每月$30)
未收經,冇得揀,只可以食舊藥Tamoxifen。
收咗經,有得揀,可以揀食舊藥Tamoxifen或者新藥AI。
「如果我有得揀,究竟新藥AI好D?定係舊藥Tamoxifen好D?」
新藥好少少,主要係少D復發(8年復發率由13.4%降至10.7%),不過整體存活率冇分別。
所以由治療角度,有得揀就揀新藥AI啦。
如果冇得揀要食舊藥Tamoxifen,千祈唔好心灰,其實都係好野黎,先可以咁多年都屹立不倒,老字號嘛。
「我見有病友先食舊藥Tamoxifen一排,再轉新藥AI嘅?」
有以下幾個可能性:
1)更年期就收經:先食住舊藥Tamoxifen(通常2年),之後確定收咗經,就轉新藥AI食埋餘下年份,總共5年為止。
2)已收經想食新藥AI但唔想比錢:因為政府會全數資助尾3年新藥AI藥費,所以頭兩年就慳錢食住免費嘅舊藥Tamoxifen先。
3)已收經揀咗食舊藥Tamoxifen不過唔受得:例如敏感/有副作用。
「嘩,又新藥又舊藥又先舊後新,仲加埋又5年又10年,頭都大喇,點揀呀?」
就咁講有時都幾難明,等我得閒畫幾幅圖解釋過你聽,你就會明㗎喇。
下次「乳癌荷爾蒙藥-不同年紀嚴選最正確食法」再見⋯⋯
我收左經,食新葯,點解只可以食五年而不一直食落去以免復發?有病友說五年停葯之後就復發!
好問題!講到底,就係冇人知道新藥其實食幾耐先至係最好。
最初,當新藥AI面世嘅時候,醫生想知究竟係新藥好D?定或是舊藥好D?好自然梗係做研究對比吓咪知囉。要對比,當然要建基於公平基礎之上,嗰時舊藥Tamoxifen標準係食5年,好自然,新藥都係食5年先有得對比(情況有如烹飪比賽,中餐大廚5年經驗,你冇理由搵個西餐大廚3年/10年經驗去對比,咁樣唔公平)。自此,新藥標準都係食5年。
你問會唔會食耐D好D/甚至食足一世好D,現階段冇人知。另一方面,同一隻藥食咁耐會唔會有其他罕見副作用亦都係冇人知。咁多野唔知,最穩陣做法都係摸石過河,跟返大圍食法食5年,直至有新證據先再算。
至於有病友話5年一停藥就出事,情況有如「瞎子摸象」,我可以話比你聽,有人食緊藥未夠5年就已經出事,有人5年一停藥先出事,亦都有好大部份人5年停咗藥都冇事。個個病友期數唔同/年齡唔同/隻乳癌有幾惡又唔同,復唔復發根本就唔應該歸咎於單一因素。
多謝醫生解答。明白。我們也真是要信賴醫生要讓醫生牽着手抗癌。
我40歲。
第一、二次化療都有月經,之後就沒有月經了,是收經了?抑或化療影響沒有月經?咁適合食新藥嗎?
食乳癌荷爾蒙藥使身體沒有荷爾蒙?是不是都影響沒有月經?
當身體沒有荷爾蒙,身體機能是不是開始衰老?
你個情況係化療影響假收經,所以都係只可以食舊藥。
由乳癌/乳腺角度,舊藥係對抗女性荷爾蒙嘅作用,並唔係令身體「冇」女性荷爾蒙,所以唔會話食咗舊藥就令身體開始衰老。不過話分兩頭,佢係有可能令你經期亂/潮熱,所以有D病友覺得好似更年期咁。
Breast HK,我食了Femara 兩年幾,現在骨質疏鬆( T score L spine -3), L2 也剛剛collapsed(L2 曾電療)正電子掃描沒有異樣,但腫瘤科醫生建議我打骨針,每四星期一次,是否真的比口服雙磷酸有效,如果要打,應該打新藥(denosumab)還是舊藥(zometa)? 我現在還繼續打標把針,經常喉嚨痛流鼻水。
你要電L2同埋而家都仲打緊標靶針,我估即係開初有骨轉移,而家打完化療控制得住。
打骨針其實唔單止好似口服雙磷酸(bisphosphonate)咁可以阻慢骨質疏鬆,佢仲可以減少因為乳癌骨轉移引致嘅併發症(骨痛/骨節/血鈣過高)。
因此我同意你嘅腫瘤科醫生建議打骨針。
Denosumab 相比起Zometa有3個好處:
1)更有效減少以上因乳癌骨轉移引致嘅併發症
2)皮下注射(subcutaneous injection),唔洗吊針(intravenous injection),對打完化療冇晒血管嘅病友尤其吸引。
3)開藥前唔洗抽血驗腎功能去教劑量
但我會建議用Zometa,因為有研究(AZURE,ABCSG-12)顯示,用AI加Zometa除咗可以減少乳癌骨轉移引致嘅併發症之外,仲可能有抗癌作用,包括可以減少復發,什至延長壽命,對收經5年以上人士尤其有效。
Denosumab因為好新,對乳癌復發/壽命有冇幫助,暫時冇呢方面資料(唔代表佢冇抗癌作用,只不過我地冇證據)。
點樣揀睇下你睇重邊方面嘅好處,另外Denosumab本身三千幾蚊針,貴Zometa千零蚊度。
多謝你,Breast HK!你講得很對,我是骨轉移。那麼zometa 和Denosumab 開始了有沒有療程?抑或好似我現在打Herceptin 一樣,看情況而定?四星期一次咁密集,副作用相對大好多,尤其是下顎骨壞死,好擔心。另外Denosumab 和Herceptin 同樣是monoclonal antibody,同時打兩樣antibodies, 我好擔心免疫力會好差!請賜教!
乳癌骨轉移之後打骨針,冇一定章法可言(尤其FDA 2011年先批Denosumab用喺乳癌,根本冇人知點打先最好)。另一方面,雖然Zometa用咗好多年,但係喺轉移病人身上應該點用,一直都缺乏大型數據去支持一個統一打法,所以就各處鄉村各處例:
1)有人一直每月打,打到冇錢/有併發症先唔打。
2)有人每月打,打到骨轉移穩定之後就慢慢疏D(例如每兩個月打,之後再每三個月打)。
3)有人跟返早期乳癌用zometa咁打(adjuvant setting - AZURE),5年內打19針(頭6針每月打,中間8針每三個月打,尾5針每半年打),之後休息(drug holiday),遲D再算。
如果你跟方案3咁打法,6年內加加埋埋有2.1%嘅人下顎骨壞死(osteonecrosis of jaw),http://www.ncbi.nlm.nih.gov/pubmed/23796998,其實Denosumab研究顯示仲多人有呢個問題。
任何Monoclonal Antibody係「理論上」都有可能令身體免疫力差咗,不過跟據我個人非科學化嘅經驗,我又唔覺我D用緊Herceptin/denosumab嘅病人會比唔用嘅病人易D病。
如果你咁驚「下顎骨壞死」同埋「免疫力差咗」,最簡單做法就係用返zometa先,等遲D研究有新發展先再算。
Breast HK,感激萬分!解釋得非常清楚到位,現在安心很多了,謝謝你!
Breast HK,因應早前十二月 L2collapse而安排了磁力共震腰骨,現在報告出了並且認為傾向癌症引起骨折(more favour metastatic collapse of L2 vertebra),醫生現轉介脊椎骨科硏究手術的可能性。
非常擔心,欲請教問題:
1. 我現在是在政府醫院跟進,是否需要尋求其它覆檢和意見,例如私家磁力共震、腫瘤科、骨科
2. 骨科切除是唯一有效的方法?唔做後果如何?
3. 脊椎手術是大手術?一聽見脊椎手術就非常擔心
1)覆檢就唔洗,因為都肯定咗係乳癌骨轉移導致L2 collapse,冇咩爭議。腫瘤科都唔洗,因為之前已經電過,冇咩額外野可以提供。骨科呢就可以搵第二方意見,因為公立/私家各有利弊:公立傾向保守,好多時覺得唔嚴重時就話唔洗做,但到嚴重時又唔適合做,即係好多時都唔做。私家呢,就傾向進取,因為始終存在利益衝突。因此,骨科意見聽多個都冇壞,先再決定採納邊個建議。
2)骨科手術主要用途唔係切咗個乳癌轉移去,佢係用黎鞏固(fixation)嗰幾節尾龍骨,等佢唔好霖落黎壓到神經(cord compression)。如果真係壓住神經,係會下半身癱瘓。
3)脊椎手術係超大型手術,係有一定風險(最大風險就係做手術時傷到神經,術後下半身癱瘓)。雖然係咁,不過如果骨科醫生建議做手術嘅話,即係佢覺得「唔做手術」下半身癱瘓嘅機會係大過「做手術」,所以放手一搏。
醫生,換句話說我除了要處理下身癱瘓問題,還要處理L2癌細胞問題?是否要考慮轉藥?
L2骨轉移是手術後化療前發現的,正電子懷疑磁力共震肯定的,大約1cm。自從2011年12月完成療程後一路打Herceptin 和食Femara至今(2011年10月正電子報告指出L2的陰影已解決,但當時沒有做磁力共震)2012年及最近因L2collapse而做的正電子也沒有陰影。
我有個奇想,是否L2癌細胞一路存在,只是縮小了?
即使切除L2,其它骨節也會擴散,做一次手術也未必可以解決癱瘓問題?
下身癱瘓問題係要「預防」,預防嘅方法就係做手術去鞏固尾龍骨。
L2癌細胞問題當然要處理,重點係判斷癌細胞活唔活躍。如果活躍,即係治療失效,要轉治療。如果唔活躍,就唔洗轉住。
L2癌細胞最有可能係好似死灰咁冬眠,唔知幾時會死灰復燃。
其他骨頭將來有冇癌細胞/骨折冇人知,去到呢個地步,都係見步行步。如果同一時間好多節尾龍骨都有,我地叫呢D做multiple levels involvement,就唔會做手術,因為冇可能固定咁多levels。
解釋得非常清楚,我和我家人都非常感激你的幫忙,Breast HK你不只是上醫,還是上上醫,多謝你!
你好,我已經做完手術,化療及電療,但是一直未開始吃藥,原因見到說明書的副作用,就害怕了,點好?
你要明白3點:
1)食藥嘅好處一定大過副作用,即係食藥有著數。
2)說明書一定有咁詳盡得咁詳盡,因為藥廠怕你告佢。結果就係一D罕見唔緊要嘅副作用都列埋出黎,正常人見到水蛇春咁長嘅副作用,邊有人肯食藥。所以唔好再睇說明書紙上談兵,直接問醫生佢嘅實戰經驗,會有一個比較貼近現實嘅概念。
3)食藥唔洗簽合約嘅,你可以試食吓先,隨時停都得(有副作用可停、冇副作用唔高興亦都可以停),冇合約鎖死你嘅。
如果咁都仲係驚,只好唔食藥囉,做完手術,化療同埋電療已經好叻。
可以揀晤食?真的嗎?
當然可以揀,呢D係個人選擇。
唔食藥,自然冇食藥嘅好處,呢個好合理/好公平,喺同乳癌嘅對抗上,自然比食藥嘅病人表現得冇咁好。
唔溫書,自然冇溫書嘅好處,呢個好合理/好公平,喺同考試嘅對抗上,自然比溫書嘅學生表現得冇咁好。
溫唔溫書,呢D係個人選擇。
可唔可以唔溫書,又考得好?得,講運氣。
可唔可以唔食藥,又好長命?得,講運氣。
請問Tamoxifen是否有2間藥廠生產?
剛姑娘回覆我是$180/月,我話乜唔係成千蚊一個月咩!她話呢隻不是正廠出所以平d。
我又問咁又咩分別?她説正廠副作用少d。
是否真呢?
請問政府醫院係比邊隻病人食?
因為專利已過,Tamoxifen唔止兩間藥廠生產。
成千蚊一個月嗰D係AI,正廠Tamoxifen實際幾錢我唔知,因為公立醫院係用副廠藥,不過我估都係幾百蚊咁上下。
客觀地講正副廠應該冇分別,主要成份過咗專利後又唔係咩高科技野,應該好多廠都做到(好似山寨手機咁)。
原廠實話副廠有雜質,副廠又會話自己冇分別/性價比高。
雖然如果經濟許可,我係會覺得原廠係好啲嘅,起碼心理上好D,呢D我地叫placebo effect(安慰劑效應)。同一支紅酒,7-11賣$50,酒莊賣$5000,你實話酒莊嗰支好飲D,7-11嗰支叫「苦」,酒莊嗰支叫「醇」。
原廠貴藥,食完「心理上」都覺癌細胞死快D。
又再麻煩你,我已經完成手術,你知道我可以返回政府跟進嗎? 政府重會唔會每年比我例行檢查跟進架? 如果我食開私家醫生的 Tamoxifen,如將來有機會政府跟進,可唔可以又食政府的 Tamoxifen?
唔同政府醫院唔同部門有唔同做法,有D跟一世,有D跟五年,有D唔跟。
當然可以食返政府嘅Tamoxifen。
有人話食荷爾蒙藥前先去檢查子宮頸及度下子宮壁厚度,等下一次再檢查可以比較下有冇厚咗?請問醫生你覺得有需要嗎?
我應該半年定一年檢查子宮頸一次呀?
並唔係所有抗荷爾蒙藥都要定期做婦科檢查。只有食Tamoxifen先要,AI係唔洗嘅。
因為我地知道舊藥Tamoxifen,係會增加患子宮內膜癌嘅風險,所以如果食緊Tamoxifen而仲有子宮嘅,人地外國就會建議每年都做婦科盆腔檢查(睇住子宮內膜情況,至於子宮頸同食Tamoxifen係冇關係嘅,當然好多時都順手做埋柏氏抹片去篩查早期子宮頸癌)。
香港公立醫院資源有限,我地就當有唔正常下體流血,先會轉介婦科跟進。
醫生意思是子宮頸同子宮內膜係沒有關係,咁子宮內膜有無厚咗係咪由醫生即場可以度到?你會否建議我先給婦科檢查一次先?我真係唔知有冇需要?你說2者沒有關系,咁子宮內膜有冇問題或癌症是怎樣檢查?
我唔知道去睇婦科醫生時,醫生會否肯做度厚?
唔好意思,我對呢方面真的無認知!
麻煩你!
其實真係唔洗諗得太複雜,只要知自己有冇錢/同想唔想做婦科檢查就得:
有錢又想做,就去搵個婦科醫生睇睇。
冇錢/唔想做,就乖乖地食藥,到有唔正常下體流血先話比乳腺科醫生聽,等佢轉介婦科。
去到睇婦科,只要講明自己病徵/食緊Tamoxifen,婦科醫生就會識做相應檢查。至於技術細節/點檢查,呢D交返比醫生啦,跟佢指示就得㗎喇。
明白,唔該晒醫生。
我食咗四個月tamoxifen,十月頭嚟M到現在還未停,已找私家婦科醫生跟進,安排下星期做子宮鏡檢查,我當然希望不是子宮出什麼問題,而是荷爾蒙葯的影響。如真是荷爾蒙葯影響,我是否應該跟腫瘤科醫生商量停葯/減葯/轉葯?
啱啱先食咗Tamoxifen冇耐,冇咁快因為佢而子宮內膜有變異嘅,當然唔代表你子宮冇野,只係時間性上就算有變異都唔關Tamoxifen事。
至於你話可唔可以商量停藥/減藥/轉藥,無論咩原因都好,只有食同唔食過你揀。唔會轉藥,因為你未收經,AI係唔啱你嘅。亦都唔會減藥,因為Tamoxifen只有一個劑量,就係每日食20mg。
吓!咁咪食又死(長期流血死),唔食又死(復發死) 🙁
唔好自己嚇自己住,睇咗婦科醫生檢查咗,睇佢點講先。
我是乳癌0期,剛做了全乳切除1個半月36歲。
ER十>90%
正如你們所說,醫生叫我自己決定是否食葯。
我感覺醫生言語間偏向因為我是原位癌,可以唔食葯。只要定期檢查。
我現在唔知食定唔食。因為食葯減低另側乳房的復發率好似不多,但反而曾加子宮内膜病變。
1. ER十的百份率越高,就越應該食?
2. 我的年齡,是否要食?
3. 是否可以考慮下,遲幾年先開始食?
4. 是否食食下可以停食?停食左之後,是否可以再食反?一定是不間斷地食5年才有效?
1)準確D講,應該話百份率越高,食藥越能夠達到研究嘅效果。你原位癌同埋高分,食咗就應該有上面研究嘅成效,呢個唔係百份百等如要食,因為正如你所講「減低另側乳房的復發率好似不多」。如果你認為1.7%功效叫大,就食。如果你認為1.7%功效叫細,就唔食。
2)醫學界無一個統一建議,我個人傾向食好D,因為你後生。
3)冇人知遲幾年先食仲有冇效,所以唔建議咁考慮。
4)食食下係可以停,停食咗之後亦都可以再食返,同3)一樣,冇人知咁樣食仲有冇效,不過合理地預期,功效一定少過不間斷(當然常人總會漏咗有時唔記得食一次半次)咁食5年(即係仲少過1.7%)。
我就快食完5年femara, 請問有冇方案會食多5年?
有人咁做,不過冇大型研究數據話好D,所以主流食完5年femara就算。