乳癌手術 5 - 前哨淋巴結活檢術?咩黎㗎

Posted by in Surgery 手術

仲記唔記得乳癌手術1教過你,乳癌手術有兩大部份:乳房同埋腋下淋巴?前三篇講完乳房,呢一篇我地跳去淋巴,講吓有咩比你揀。你可能已經由醫生度聽過「前哨淋巴結活檢術」,不過似明非明,「咩前哨淋巴結,又造影,又定位,又追蹤,又活檢」。究竟係咩黎㗎?

未講新野前,我地要溫一溫書,記返呢張圖:

前哨淋巴結活檢術

你會見到腋下淋巴有兩個選擇過你揀:

1)全淋巴清除(Axillary dissection):即係等如你嘅醫生/網上講嘅割兩組淋巴。

2)前哨淋巴清除(Sentinel lymph node biopsy)+/- 全淋巴清除(Axillary dissection):先割少少/幾粒淋巴即場去驗。如果有癌細胞跡象,就全淋巴清除。如果冇癌細胞跡象,就嗰刻收隊。

 

點解要做腋下淋巴手術?

侵蝕性/入侵性乳癌就好似惡嘅賊咁,會周圍搞事(擴散),最佳最快嘅方法就係搭地鐵(經腋下淋巴擴散)。 相反,原位癌(善良嘅賊)喺唔會擴散(唔會周圍搞事),所以係唔洗做腋下淋巴手術。呢一點,正正解釋咗之前(乳房檢查三步曲3-乳房抽組織檢查)點解話懷疑乳癌抽粗針好過抽幼針

前哨淋巴結活檢術

「點解之前你話原位癌開刀時唔洗做淋巴手術,但上圖你係寫選擇性嘅?咁即係幾時先要做?」

兩個情況醫生會原位癌都問你做唔做淋巴手術(做都係做前哨淋巴,唔洗全淋巴清晒嘅):

1)全乳房切除:因為呢個係做前哨淋巴嘅最好機會。如果第一次開刀時唔做,之後術後先發覺個乳癌原來係有侵蝕性,係有需要翻手做淋巴手術,到時未必做得返前哨淋巴。

2)懷疑唔係原位癌咁簡單:例如好大舊腫瘤/抽針話比較惡嘅原位癌(High grade DCIS)。呢D情況,醫生估你個腫瘤有可能有侵蝕性,開刀時可以順手做埋前哨淋巴。當然你都可以選擇唔做住,到真係病理報告返黎話你有侵蝕性乳癌,先翻手做返(不過就做兩次手術)。

前哨淋巴結活檢術

圖片來源:改篇自MTR

講返D惡嘅賊(侵入性乳癌),咁多個地鐵站(腋下淋巴),你都唔知佢邊個地鐵站上車。

前哨淋巴結活檢術

圖片來源:改篇自MTR

所以傳統乳癌手術(捉賊),係採用有殺錯無放過嘅方法,總之有理冇理將所有淋巴結(地鐵站)清除左先,務求做到堵截賊人(乳癌)擴散。

事實亦都證明呢個方法係有效嘅,我地發覺切晒腋下淋巴嘅病人係長命啲。

但係你用呢個斬腳趾避沙蟲嘅方法去清晒D地鐵站(淋巴),賊(乳癌)係就係捉到,不過影響到其他市民(身體要循環嘅淋巴液體)冇地鐵搭,所以放工時候D人(淋巴液體)滯留係港島(手腫/淋巴水腫lymphedema),返唔到過九龍。

申延閱讀:乳癌淋巴水腫 - 真係冇得搞?

前哨淋巴結活檢術

 

咩嘢係前哨淋巴結活檢術?

為咗減少手腫/淋巴水腫嘅機會,近十幾年發展出一種針對性嘅技術「前哨淋巴結活檢術」。

「咩嘢係前哨淋巴結?」

前哨(第一站)淋巴結(地鐵站),即係站頭/個賊上車嘅地方。

假如我地能夠有線報知道D賊(乳癌)將會係邊度上車(入侵淋巴),我地只要針對性咁封鎖搜查(活檢)嗰個/幾個站頭(前哨淋巴結),就會知道究竟有冇賊人入咗閘上咗車。

前哨淋巴結活檢術

圖片來源:改篇自MTR

 

點造影/定位/追蹤?

成個計劃聽落好簡單好合理,不過問題係咁多個地鐵站(腋下淋巴結),邊一個先係站頭(前哨淋巴結)?

個賊究竟會選擇喺邊度上車呢?上環?柴灣?

要知D賊係邊度上車,我地要代入賊嘅角度去諗「邊度上車方便?」,最簡單,就係用臥底。

我地先派兩款(兩個準確D)臥底(放射性藥水同埋藍藥水),模擬一下D賊(乳癌)會喺邊度上車(站頭),之後我地追蹤返臥底嘅行蹤,就會知上環定柴灣係站頭(前哨淋巴結)。
定到「上環」嗰面係站頭之後(定位),就可以局部封鎖頭幾(穩陣D)個地鐵站(前哨淋巴結)去仔細搜查(活檢)。

 

點活檢?

警察(醫生)會即時[手術進行中送急凍切片(frozen section)]仔細研究呢面頭兩/幾個站頭(前哨淋巴),睇吓有冇賊人(乳癌)嘅蹤影。

如果賊人已經入咗閘上咗車(前哨淋巴結有癌細胞),我地唔知佢可以搭車搭到去邊,?銅鑼灣?炮台山⋯⋯

前哨淋巴結活檢術

圖片來源:改篇自MTR

正正因為唔知D賊(乳癌)可以擴散去邊,所以就要清晒全港島線所有地鐵站(全淋巴切除)。

前哨淋巴結活檢術

圖片來源:改篇自MTR

如果賊人都未入閘(前哨淋巴結冇癌細胞),理論上其他地鐵站(淋巴結)應該無賊人,我地係可以解封其他地鐵站(保留其他腋下淋巴)嘅。越保留得多地鐵站(淋巴結),人群滯留(手腫/淋巴水腫)機會越細。

點樣揀?

前哨淋巴結活檢術

好簡單,如果醫生有得比你揀,就揀先進D嘅前哨淋巴。因為手腫/淋巴水腫嘅機會係少一倍。當然針無兩頭利,前哨淋巴活檢術唔係百分百準確,都有百分之七到十嘅誤差(已經非常準確),有機會要做第二次手術(急凍切片話冇野,之後詳細病理報告話有野)。

 

咩人冇得揀?

以下幾個情況醫生可能唔比你揀

1)腋下淋巴手術前已經有擴散跡象:觸診摸到/造影照到/正電子掃描著燈/淋巴抽針確定。

2)孕婦:怕幅射

3)用背脊做乳房重建:唔係一定冇得揀,只不過如果你唔好彩,前哨淋巴有誤差,之後處理會好麻煩。呢個情況要同返自己乳腺科醫生傾

 

手腫有咩問題?

手腫有D人會消,有D人唔會消,一世都係咁

唔消可以好大問題,例如脹痛、發炎。

申延閱讀:乳癌淋巴水腫 - 真係冇得搞?

前哨淋巴結活檢術

前哨淋巴結活檢術

結論

如果手術前冇腋下淋巴擴散跡象,唔係孕婦,唔係用背脊重建乳房,做手術時就盡量選擇做前哨淋巴(年紀大都做得),藉此減低手腫嘅機會。

下一篇我地講下專做乳房手術醫生嘅增值服務⋯⋯

乳癌手術 6 - 專做乳房手術醫生的增值服務

有唔明?係下面寫低佢,我會盡量解釋你聽⋯⋯

封面圖片來源:MTR