乳癌手術 4 - 乳房重建手術 你要知

Posted by in Surgery 手術

如果情況唔容許你保留乳房(即係要全乳房割),下個決擇就係開刀時做唔做乳房重建手術?咁點解要重建?幾時重建?用咩重建?呢篇有你要知嘅野⋯⋯

點解要重建?

喺診症室見病人同屋企人,一講到乳房重建,十個有七個屋企人會反對,佢地最大理據「唔好搞咁多野喇,切左個乳房算數啦」。

乳房重唔重建,點可以咩都唔知/咩都唔問,就做個咁重大嘅決定呢

買卷兩蚊廁紙消委會都要比拼25個品牌,寫個「測試找出乾淨、柔韌又抵用的廁紙」嘅評測啦,更何況乳房重建,點可以唔比較吓。

乳房重建手術

圖片來源:互聯網

「好啦,唔重整啦⋯⋯ er ⋯⋯ er ⋯⋯醫生,我想問吓乳房重建⋯⋯」

口裏說不,身體卻很誠實。

嘗試搵出一百萬個理由去說服自己/屋企人重建/唔重建。

「點解要重建?」

一百個人有一百種答案。

「乳房係最重要嘅女性性徵,牽涉我嘅靈魂,影響我第時能唔能夠企翻起身」

「我怕老公/未來老公介意」

其實答案好簡單「重建就好似愛情咁,係唔洗講理由/原因⋯⋯重建(愛情)係講Feel(感覺)嘅,你仲愛唔愛佢(乳房)

如果講理由,你隔離嗰個有一萬個缺點令你飛咗佢,你仲同佢一齊,係因為仲有Feel。

愛情,就係比全世界人睇到你跪係度比人打咗14巴都唔走⋯⋯係唔洗講理由/原因嘅。

如果醫生而家要你立刻決定,唔比你諗咁多,你只得0.00009秒考慮「重定唔重建?」

你會點答?

記住呢個答案,佢就係最忠於你感覺嘅答案。

至於合唔合適?你就要了解多D有咩選擇/有咩好處唔好處,先可以決定做定唔做乳房重建。

如果想重建,下個問題就係「幾時重建?」

 

幾時重建?

主要分兩類:

1)即時重建:開刀切除乳癌同時即時重建。主要用係早期乳癌(如何分期請睇返乳癌分期 ﹣ 我係早期定末期?),好處係一次手術搞掂晒,同埋盡量減低冇咗乳房嘅傷痛

2)延遲重建:等完成所有治療後先重建。主要用係晚期乳癌,因為呢類癌症比較容易復發,所以寧願搞掂好晒D輔助治療(化療/標靶治療/電療),等一兩年穩定D先重建。費事揀咗即時重建,之後唔好彩好快復發,手術咪白做,白白多個傷口。另一個用處就係以前做咗全乳房切除,但而家後悔/始終接受唔到嘅病友,再做乳房重建,重新建立一條忠於自己感覺嘅道路。

揀好時間,下一步就揀用咩方法重建⋯⋯

 

乳房重建手術

乳房重建有四大類:

1)鹽水袋/矽袋

直接喺胸大肌底下放入鹽水袋/矽袋:好處係簡單,身體唔洗多一個傷口。但係袋始終係外來野,手感一定唔夠自己組織自然。同埋佢係冇皮嘅成份,即係你如果個腫瘤好大/要割好多皮,咁剩係袋就唔係咁合適。你要問問乳腺科/整形科醫生自己用唔用得剩袋重建,呢樣野冇得自我評估。

第二個問題就要考慮襟唔襟用,袋係唔會永久襟用嘅,你要有心理準備十幾二十年後可能要再做手術更換。如果醫生同你講,一樣外來野幾十年都唔會老化/一世襟用,你都唔信啦。

同埋如果你要電療,袋係唔夠自己組織襟電,傷口裡面易D會有疤(capsular contracture),呢D疤可以令重建後嘅乳房變型/痛楚。

乳房重建手術

圖片來源:BRO Development

鹽水袋/矽袋重建真人相

 

2)自身組織(肚皮/背脊)

自身組織:好處係自然/襟用/手感好,同埋同一時間連皮膚捐贈,就算腫瘤要割好多皮都唔怕。但你自己捐D組織比自己,即係身體會多一個大傷口

乳房重建手術

圖片來源:BRO Development

第一個選擇就係用自己背脊,即係醫生講嘅「背闊肌肌皮瓣(Latissimus Dorsi Flap – LD Flap)」。

「嘩?!咩黎?」

唔洗驚聽唔明醫生講咩,其實好簡單,「背闊肌」即係背脊舊肌肉,「肌皮瓣」即係「肌」肉連「皮」連皮下脂肪,轉去前面重建乳房。簡單D講,即係「背脊」囉。

「咁我用咗背脊重建,會有咩影響?」

背脊會多一條六吋度嘅傷口,膊頭嘅力量差咗10%度。

「咩人最合適?」

乳房A Cup 或以下而又冇咩肚腩嘅女士。因為背脊提供嘅脂肪唔多,主要靠背肌,但係肌肉轉咗去前面冇抽捉就會萎縮,所以做唔到太大嘅乳房出黎。冇肚腩即係唔可以用肚皮重建。

背脊重建真人相

 

乳房重建手術

圖片來源:BRO Development

第二個選擇就係用自己肚皮,即係醫生講嘅「腹直肌肌皮瓣(Transverse Rectus Abdominis Myocutaneous Flap – TRAM Flap)」。

「嘩?!又係咩黎?」

同上面背脊嘅情況差不多,「腹直肌」即係腹肌,「肌皮瓣」即係「肌」肉連「皮」連皮下脂肪,轉去上面重建乳房。簡單D講,即係「肚腩」囉。

「咁我用咗肚腩重建,會有咩影響?」

肚皮會多一條一尺長嘅傷口,因為腹肌轉咗上去,肚皮會弱咗,導致第時可能有小腸氣。

「咩人最合適?」

乳房B Cup 或以上而又有肚腩/曾生育嘅女士。因為肚腩提供嘅脂肪多,所以做到大D嘅乳房出黎。

肚皮重建真人相

乳房重建手術

圖片來源:BRO Development

如果要D Cup以上,就要用「游離腹直肌肌皮瓣(Free TRAM Flap)」,即係要駁血管手術失敗機會大少少(5%),同埋如果去D脂肪嘅血氣唔好,D脂肪可以硬化,就好似D小石頭咁(Fat necrosis)。

 

3)背脊自身組織加袋(即1加2)

如果你天生麗質,乳房豐滿又冇肚腩,咁就要用背脊提供皮膚及矽袋提供所需體積(即1加2)。

背脊加袋重建真人相

 

4)抽脂肪填補

全抽脂重建,香港比較少用,外國開始流行,不過長遠安全性仍然受爭議。

 

以上圖片轉載自一個好好嘅外國網站 http://www.breastreconstruction.org,有幾點要留意:

1)外國人疤痕埋得比香港人好,唔好預期會好似佢地D真人相咁,條疤靚到唔係好睇到。要睇本地相片,請問自己乳腺科/整型科醫生。

2)外國人比較大件頭,乳房同肚腩都大過香港人好多,所以佢地多用肚皮重建。你要知自己洗唔洗重建咁大,同埋自己有冇肚腩捐比自己。

3)擺得上網一定係成功例子/得意之作,你要問醫生比D一般效果嘅相你睇,甚至睇一啲有併發症/手術失敗嘅相,咁你先有一個清晰圓滿嘅印象。

4)啱啱重建完係冇乳頭乳暈嘅(除非你做保留乳頭乳暈全乳切除手術nipple-areola sparing mastectomy),呢D係之後跟手嘅微調工作。

 

乳房重建簡單指引

咁多選擇,究竟點揀好?
你要問問自己以下問題:

1)接唔接受到有外來野喺自己身體裡面?接受到(袋),接受唔到(自身組織) 。

2)接唔接受十幾二十年後要做手術換袋?接受到(袋),接受唔到(自身組織) 。

3)接唔接受身體多一個大傷口?接受到(自身組織),接受唔到(袋)

4)洗唔洗電療?要電療(自身組織),唔洗電療(袋)

5)想重建嘅乳房有幾大? AA-A級(背脊),B-C級(背脊加袋/剩係袋/肚皮),D級以上[肚皮(駁血管)]

6)介唔介意手感?要自然(自身組織),冇所謂(袋)

7)自己有冇肚腩/想唔想修埋肚腩?想(肚皮重建),唔想(其他重建)。

以上只係簡單指引,由於乳房重建牽涉大量專業知識/個人臨床評估,詳情請問返自己嘅乳腺科醫生/整形科醫生。

 

伸延閱讀:義乳的秘密 - 重建乳房手術外的另一片天

 

下篇我地由乳房跳去腋下淋巴,講吓有咩選擇⋯⋯

乳癌手術 5 - 前哨淋巴結活檢術?咩黎㗎

有唔明?係下面寫低佢,我會盡量解釋你聽⋯⋯

封面圖片來源:互聯網