乳房檢查 - 乳房檢查三步曲1

Posted by in Investigation 檢查

乳房檢查 ﹣ 有三個好重要嘅基石,分別係乳房臨床檢查 、乳房造影檢查及乳房抽針/組織檢查。佢地就好似奧運嗰標誌咁,一環扣一環,缺一不可⋯⋯

「驚生乳癌咪睇醫生囉,預約行入去比錢就得㗎啦,咁都要教?咁都要乳房檢查三部曲?」

聽落好似好無聊,但你唔清楚個醫生做乜,你又點知個醫生好唔好?有冇搵錯人?好多時誤會因此而起。

你要清楚自己權益,最好都係了解吓醫生做緊乜⋯⋯

乳房檢查三部曲

所有乳房檢查,都有三個好重要嘅基石,分別係乳房臨床檢查、造影檢查及抽組織檢查

佢地就好似奧運嗰標誌咁,一環扣一環,缺一不可。如果你個醫生唔做是但一個環節,你就要問清問楚,點解唔做齊佢?

如果三個環節都話你無事嘅,恭喜你,九成九冇事。

但如果是但一個環節話你有可疑嘅,你要做進一步跟進。

所以第一個重點:就係你能唔能夠完全通過晒呢三個環節的測試

 乳房臨床檢查

我地今次先講呢三個環節的第一部曲:臨床檢查

臨床檢查包括兩樣野:問病歷,同埋做身體檢查。

問病歷就係睇吓有無乳癌症狀乳癌症狀 : 我係咪生乳癌?),同埋有冇高危因素乳癌成因 : 我易D生乳癌嗎?)令你易啲生乳癌。

身體檢查呢,就係睇吓有冇乳癌嘅跡象(包括兩邊乳房,兩邊格勒底淋巴,兩邊鎖骨上的淋巴,肝有冇大,肺有冇積水,背脊骨有冇痛)。

要合格過關,就要冇乳癌嘅病徵/冇乳癌嘅跡象/同埋冇乳癌嘅高危因素

「車,我咩都冇就唔會去睇醫生啦。」

唔好車住,你睇討論區就知,好多人以為自己有野(其中一大謬誤:以為乳房痛楚係乳癌嘅病徵),驚自己生嘢而去睇醫生,去到好多時梗係咩都冇,剩係得自己驚餐飽。

仲有更多人自知咩都冇,但見親朋戚友有事,所以都驚自己中招,咪去睇醫生囉。(所以呢個blog嘅誕生,就係希望幫吓哩啲女士,等佢地知多啲,舒緩一吓佢地嘅疑慮。)

咁當然,乳癌嘅病徵同埋高危因素就可以上網搵資料,身體檢查呢一部份,醫生既經驗同埋專業係唔可以取代嘅。

會考(乳房檢查三部曲)唔合格(我知而家冇會考,但對好多香港人黎講都係集體回憶,考中學文憑試嗰啲,可以離開,呢啲大人野有排都唔關你事),肥一科梗係好過肥晒三科。

如果你中英數三科(乳房檢查三部曲)是但一科肥咗,阿sir(醫生)同你講:「唔緊要,好少事,唔洗跟進(照乳房),唔洗補考。」,你都知唔合理,都係去搵過第二個名師補習吧啦。

如果你三科都肥晒,盲既穴位按摩師都知要跟進啦。

最尾又要歸納一下重點:

第一步嘅臨床檢查就係睇三樣野:乳癌嘅症狀、乳癌嘅高危因素同埋乳癌嘅跡象

而頭兩樣乳癌嘅症狀、乳癌嘅高危因素,就係你要留意嘅野(功課)。

 

下一篇就講吓⋯⋯

乳房造影檢查 ( 乳房X光 / 超聲波 ) - 乳房檢查三步曲2

 

相關醫學專欄:乳房檢查三步曲-幫你分辨良性惡性的利器

馬國權醫生

封面圖片來源:改篇自互聯網