乳癌淋巴水腫 - 真係冇得搞?

Posted by in Soul 心靈復康, Surgery 手術

「醫生,我有冇淋巴水腫?」

「你而家冇。」

呢個時候病友總覺得張家輝會上醫生身:「你而家冇,但係將來會有⋯⋯」

究竟咩係淋巴水腫?有咩咁得人驚?有冇得預防?有冇得根治?呢篇為你解開重重疑團⋯⋯

 

什麼是淋巴系統?

「我知!排毒系統!」

淋巴系統並唔係坊間所講嘅排毒系統。

「唔係喎,我嗰美容師真係咁講喎!」

如果佢可信,消委會就唔會收咁多投訴。

「咁淋巴系統即係咩系統?」

我唔打算好學術咁講佢係咩黎,作為病友,你可以簡單咁當佢係一個液體回收系統

「咩野液體回收系統?」

打個比喻,就好似水嘅循還回收系統。水每一日都會蒸發,積聚成雲之後落雨,經過雨水渠收集,去返水塘比我地再用。

雨水就係淋巴液,雨水渠就係淋巴管道

我地身體每一日都會製造淋巴液,積聚係身體之後就會經過淋巴管道收集,去返血液循環比我地再用。

「咁咩係淋巴水腫?」

淋巴水腫就係當淋巴管道受損,淋巴液回收唔到,積聚喺手臂,搞到手腫。

水浸就係當雨水渠受損,雨水回收唔到,積聚喺路面,搞到水浸。

淋巴水腫症狀

「手腫又有咩問題?」

視乎嚴重程度,你可能覺得隻手好重好墜,郁得冇咁靈活,著衫/買衫有困難,甚至好谷好痛。受影響嘅手亦都會易D感染

乳癌淋巴水腫

乳癌淋巴水腫

乳癌淋巴水腫發炎

「好似好得人驚咁喎,咁一開始淋巴管道點解會受損?」

乳癌治療有兩樣野會令淋巴管受損:手術同電療。

手術講緊腋下淋巴手術,切斷呢D雨水渠,好易理解點解會水浸。越切得多淋巴,好自然越易水腫,所以全淋巴切除係易過只切前哨淋巴有水腫。

電療同樣道理,如果電腋下淋巴呢D位置,係會有機會傷到呢D雨水渠。

另外,如果好多癌細胞擴散去腋下淋巴,塞曬D雨水渠亦都可以搞到水浸。

預防淋巴水腫

「咁有冇得預防淋巴水腫/預防水浸?」

可以由以下幾方面去睇吓點樣預防水浸:

1)好好保護僅餘的雨水渠:正如人地有10條渠,你得返5條渠,咁唔該你好好保護佢地,你係易D水浸嘅。所以姑娘會教你唔好係呢隻手量血壓/抽血/打針,呢D動作我地怕佢會傷到剩落黎嘅雨水渠。

2)唔好落大雨:你嗰5條渠平時細雨可能都夠用,黃紅黑雨梗係水浸。所以姑娘會叫你唔好浸溫泉/焗桑拿/做劇烈運動/拎重野,因為呢D動作係會令血管擴張,增加淋巴液分泌(令到落大雨)。另外亦都要避免受傷,例如避免蚊叮蟲咬/寵物爪傷/小心D剪指夾,因為發炎又係會增加流量。

淋巴水腫治療

「死啦,我已經水浸咁點?」

最簡單醫生會叫你得閒/訓覺「浪」高隻手,因為水向低流,幫一幫/理順雨水渠嘅積水。

「試過,唔係太幫到⋯⋯」

下一步就係美容師/按摩師最鍾意嘅「淋巴水腫按摩」。

淋巴水腫按摩/物理治療

「咦咦咦,你又話佢地呃人嘅?」

佢地鍾意sell客姐,佢地係唔識嘅。因為真正嘅「淋巴水腫按摩」並唔係佢地大大力咁到你好毒就「通咗淋巴/排咗毒」,相反,亂咁按係會傷到剩落黎嘅雨水渠

「咁咩係真正嘅淋巴水腫按摩?」

真正嘅淋巴水腫按摩(Manual Lymphatic Drainage,MLD)喺由受過專業訓練嘅物理治療師去做,係好溫柔嘅(就好似你嘅性格咁)。原理係「好輕、好柔、好慢」咁去疏導積水,你而家手部嘅雨水渠去唔切水麻,物理治療師就將呢D積水掃去/引去身體其他冇積水嘅地方,等D積水可以由其他通暢嘅雨水渠回收。

「咁自己按唔按得?」

當然得,物理治療師唔會跟你一世嘅,你可以自己/另一半跟物理治療師學,有樣學樣唔難學。文章最底段片都有教少少,或者以下條link都圖文並茂:

淋巴水腫按摩

另外如果唔介意比幾百蚊,香港乳癌基金會有開班教點樣做淋巴水腫按摩,可以自己打去25256033查詢/報名,其他淋巴水腫服務/收費如下:

淋巴水腫服務收費表

「我見其他病友用壓力衣/袖,又係咩原理?」

普通壓力袖嘅原理就好似掩耳盜鈴咁,封咗雨水渠入水口,等佢就算唔通暢都倒灌唔到。

淋巴水腫壓力袖

圖片來源:互聯網

如果淋巴水腫嚴重,就要靠物理治療師幫你紥壓力繃帶,佢會紥到越近遠端(手掌)壓力越大,目的係希望製造壓力分野,咁D水自然由高壓區(手掌)流去低壓區(身體),同「浪」手水向下流原理差不多。

淋巴水腫壓力繃帶

圖片來源:互聯網

「人地話搭飛機一定要著壓力衣/袖,係真唔係真?」

佢地覺得飛咗上天係低壓區,同埋長途機手部活動減少,易D誘發淋巴水腫,所以建議著壓力袖去預防水腫。

至於係咪真係預防到呢?冇好強嘅科學證據去支持呢個說法,不過作為一個簡單易行嘅建議,做吓又冇防嘅,信則有不信則冇咁囉。

淋巴水腫治療機

「有人sell我淋巴水腫治療機,又得唔得㗎呢?」

淋巴水腫治療機

圖片來源:互聯網

佢原理同上面壓力繃帶差不多,都係製造高壓低壓區。不過因為用機嘅關係,所產生嘅壓力可以大得多。亦都正正因為呢個原因,唔識/唔清楚了解自己做緊咩嘅,我建議唔好亂咁試,怕嘅係怕過大嘅壓力(大過50mmHg)傷到剩落黎嘅雨水渠,令到情況越做越衰

「我睇書/網上資料講到咩淋巴水腫沒法根治,其實係咪真係咁灰?」

傳統黎講,淋巴水腫真係一個棘手問題,如果唔係都唔會有以上五花百門嘅建議/你都唔會咁好心機睇到呢度。

不過呢度係要帶來希望嘅地方,我地唔應該咁灰嘅。

「咁你有咩希望比到我?」

近年原來淋巴水腫可以試吓做手術。

淋巴水腫手術

「乜原來淋巴水腫有手術做㗎咩?」

近年興起兩款手術:駁通小淋巴管(lymphovenous/lymphaticovenular anastomosis)同埋淋巴移植(lymph nodes transfer)

兩款之中,以淋巴移植效果比較令人鼓舞。做法就係全身麻醉底下,整型科醫生喺大脾攞一D淋巴移植上去腋下。理論上呢D淋巴可以落地生根/刺激腋下淋巴管生長,就好似重新鋪設一D雨水渠,從而改善積水情況,甚至根治水浸問題。

淋巴水腫運動

坐咗喺電腦前睇咗咁耐,係時候去片郁吓做吓運動,呢段片係由網友upload去YouTube,版權屬於廣華醫院乳病中心,有關淋巴水腫運動嘅片段(冇2個鐘咁耐,大概一個鐘度啦,唔知點解upload時重覆咗)。

有唔明?係下面寫低佢,我會盡量解釋你聽⋯⋯

封面圖片來源:英皇金業廣告截圖