乳癌化療療程 - 吊針過程大公開

Posted by in Chemotherapy 化療

一講起乳癌化療,無論係自己要做/定係屋企人做都好,大家都好驚。

其實化療係點做㗎呢?唔知。

係咩都未知嘅情況下,其實驚咩先?唔知喎,睇電視/戲總之好恐怖。

實情乳癌化療療程係點㗎呢?辛唔辛苦㗎?洗唔洗訓醫院?呢篇話你知⋯⋯

做戲呢,個女主角一定係一個後生靚女(唔好話上年紀,盛女都唔會見到),開始咗化療之後,就會甩晒D頭髮長期住院。呢個時候,男主角就會揸住一大束花黎到一個有一大片草地嘅醫院(香港地都唔知邊間醫院有咁靚)探佢,入到一間得女主角一個人嘅病房,見到女主角死吓死吓氣若游絲咁訓係床度,氣都透唔到戴住個氧氣罩。當女主角接過男主角束花,想除底個氧氣罩聞吓嘅時候⋯⋯「吖~~」一聲⋯⋯你即刻放番低你嗰舊夾到一半嘅半肥瘦燒肉集中睇返電視屏幕,鏡頭一轉已經close up緊跌緊落地下嗰束花,重要關頭當然係去廣告,廣告完返黎束花經過5分鐘反地心吸力終於著地,只見到有隻男人手(唔好問點解乜唔係女人黎咩,CCTVB係咁上吓)係床邊垂底fing吓 fing 吓,男主角即時發晒矛咁搵醫生,場景中咁大間醫院居然連人影都冇個,之後男主角好情深咁成傷心埋下半世。睇到呢度,感性嘅你已經忍唔住落涙,好傷心咁食埋舊半肥瘦燒肉,再冇怨阿媽又唔記得攞芥醬。睇得多電視劇,只會比食燒肉冇芥醬嘅負面情緒影響咗你對乳癌化療嘅觀感,實情乳癌化療程序係點㗎呢?

乳癌化療療程

「化療點樣做㗎?洗唔洗日日住醫院?」

化療前要抽血度高磅重,之後見醫生睇吓抽血報告同埋心臟檢查報告正唔正常。如果正常頂得順,醫生就會就住你嘅身高體重去計吓化療藥物劑量,之後開藥單比你去醫院藥房買藥,化療通常都會安排第二日做唔洗住院㗎,日間化療中心搞掂就得㗎喇。

視乎你打咩組合,有D要前一日食定類固醇。

化療嗰日如果有人陪就梗係好,因為可以幫手排隊攞藥/買野食/執頭執尾,冇人陪都唔緊要嘅,你叻女黎㗎麻。你依預約時間去到醫院,量血壓磅重之後,就要慢慢等叫名。

等⋯⋯等⋯⋯等⋯⋯等⋯⋯公立醫院就係咁,得個等字⋯⋯等⋯⋯等⋯⋯等⋯⋯等。不過真係慳返唔少。

等咗好耐,喺你嘅角度當然冇野做過,不過幕後姑娘就好多野要做,要同藥房聯絡上藥,預備藥物,對名對盛對幾十萬次(因為化療藥一定唔可以錯)。

經過漫長嘅等待,手機都玩到冇晒電,好在有帶尿袋差電,終於等到叫你個名。之後姑娘/實習醫生就會幫你打個以前叫「黃豆」嘅注射器(而家係藍色嘅)用黎落藥。

乳癌化療療程

圖片來源:互聯網

之後就鹽水呀、抗敏藥呀、止嘔藥呀、胃藥呀、化療藥呀根據醫生前一日寫落嘅計畫去落藥。化療藥始終係勁野,要有心理準備可能會

乳癌化療療程

圖片來源:互聯網

滴⋯⋯滴⋯⋯滴⋯⋯滴⋯⋯滴足幾個鐘(尤其T針唔急得,如果太快會敏感),終於滴晒,原來唔經唔覺已經到咗下晝收工時間,朝九晚五又收工。

私家可能快半日,主要係D行政程序流暢D/冇咁多人等等,但係落藥嗰幾個鐘走唔甩。

如果冇咩唔舒服/過敏反應,就可以返屋企。搞咗成日都攰喇,如果仲要跨區返屋企就會好辛苦,所以揀間近屋企嘅醫院係好緊要。

「吓,唔洗住院訓病床㗎咩?」

醫院D床位咁貴,冇野就日間化療中心搞掂得㗎喇,有張舒服D嘅櫈比你坐嘅,放心,唔洗罰企。

返到屋企,通常都冇咩大問題,有D人可能會肚痾/小便紅色,有心理準備就冇咩野。

第一個星期

成個乳癌化療療程最辛苦就係頭一個星期,會冇咩胃口,胃氣脹,作悶作嘔(尤其紅魔鬼就嘔到飛起)。

另外成日都好攰,冇精力去做野,雙腳冇力等等。打T針就有可能手痺腳痺

第二個星期

如果打T針,身體嘅白血球會喺第七至十日急降,身體呢個時候最易受感染,所以應該避免去人多擠迫嘅地方,費事野到流感。

無論自費定政府包,如果要打升白針,就通常第四日開始打(專登早過我地預期嘅白血球低谷,希望可以谷起佢),打四至七日不等。

「點樣打㗎?」

打肚皮嘅,怕麻煩可以去賽馬會診所比姑娘打,都係$17姐。

如果唔想出街,想減少感染機會,可以自己學打/叫屋企人學打,好簡單㗎姐,支針好幼唔痛嘅。或者叫社康姑娘上門打,80蚊一次。

不過因為骨髓加班做白血球嘅關係,有D人會覺得骨痛,通常食必理痛已經搞掂。

第三個星期

女士最怕嘅事情終於發生,頭髮開始一束一束咁脫落,甩幾多/甩幾快因人而異。

另一方面,身體狀態/白血球水平開始恢復,有D人甚至繼續返工都仲得。嘅然身體頂得順,又係時候進入下一個週期同乳癌細胞搏命,再抽血、再見醫生、再睇報告、再按計畫落藥,直至完晒成個療程四針至八針為止。

有時白血球水平唔合格,就要留班等多一個星期,等身體頂得順先可以再開始。

「有冇咩食療可以幫手催谷白血球水平?」

問西醫,係冇嘅,只有升白針係有科學根據(所以賣你咁貴)可以提升白血球水平。

問病友,好多人都教你煲花生衣,科學根據係冇,不過得唔得就真係信不信由你。

問中醫,花生衣就係升血小板,幫唔到白血球嘅。

問營養師,嗰D幾貴嘅營養奶粉只係補充養分,冇證據話可以提升白血球水平,千祈唔好信嗰D失實嘅廣告。

「甩頭髮點算?」

呢個咁重要嘅題目梗係要開新一篇去講。

下篇「乳癌化療甩頭髮 - 點處理?幾時生返?」再見⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網