乳癌手術 6 - 專做乳房手術醫生的增值服務

Posted by in Surgery 手術

「嗰個醫生專做乳房手術好出名⋯⋯」

「一定要搵個專門做乳癌手術嘅醫生,有冇好介紹?」

作為乳癌病人,當然想搵個專醫乳癌嘅專家/名醫去幫自己做手術/開刀。但叫得做乳癌專家/名醫,收費一定唔平。比得咁貴手術費,同公立醫院有咩分別先?呢篇同你講吓專做乳房手術醫生的增值服務⋯⋯

乳房手術都有得增值?八達通呀?幫我增值100⋯⋯

專做乳房手術的醫生

冇錯,專做乳房手術嘅醫生,賣點除咗係佢地嘅經驗/手勢/刀法之外,好多時,力求完美嘅佢地仲有一D增值服務可以令乳癌手術能保留乳房嘅成功機會大大增加。咁神奇?其實唔神奇,好多醫生都識,不過因時間/環境所限,所以唔做/唔做得姐。咁即係咩增值服務呢?就係我之前都有提過嘅「手術超聲波」同埋「急凍切片/冰凍切片Frozen section」⋯⋯

 

保留乳房手術的基礎

要局部乳房切除嘅治療效果(存活率/局部復發率)同全個乳房切除嘅一樣,我地要滿足兩個條件:

1)手術要割清,即係邊緣唔可以有癌細胞。

2)一定要撘電療

 

乳癌點樣割?

開刀割乳癌,就好似煎太陽蛋咁。蛋黃就係有毒嘅乳癌,蛋白就係包圍乳癌嘅正常細胞,亦即乳腺科醫生所講嘅緩衝區/紙口位/邊界位(margin)。要成功煎太陽蛋(切除乳癌),就要唔好整爆嗰蛋黃(乳癌)。

專做乳房手術

圖片來源:改篇自互聯網

 

點為之割得清?

如果醫生能夠見到四圍有蛋白包住蛋黃,即係蛋黃無爆,成功煎太陽蛋啦。

如果醫生能夠見到四圍有正常細胞包住癌細胞,即係乳癌無爆,成功切除乳癌啦。

割得清,就係喺顯微鏡底下,乳癌周圍有足夠嘅正常細胞包住佢,咁樣醫生先能夠確定冇乳癌細胞殘留係乳房。

「好簡單姐,開刀割多D咪得囉⋯⋯」

割多D係易D有足夠緩衝區,最極端就係全個乳房割晒,不過好多病友就係想保留乳房麻,你割咁多無辜嘅正常細胞,咁個乳房咪凹晒囉

專做乳房手術

圖片來源:改篇自互聯網

所以割得清唔等如割得準

個平衡點應該要放喺有足夠緩衝區得黎,緩衝區又要盡量少,即係我成日講嘅「割得準」。

專做乳房手術

圖片來源:改篇自互聯網

 

點為之割得準?

乳癌黎講,專做乳房手術嘅醫生開刀時會攞1cm緩衝區,目的就係喺顯微鏡底下有起碼1-2mm邊界位。

如果緩衝區少過1mm,醫生叫呢D做「好近/好貼(close margin)」,就好似個蛋黃側埋一邊,最好就再做手術,割多D好貼嗰面嘅緩衝區做清佢

專做乳房手術

圖片來源:改篇自互聯網

如果直情見到癌細胞係邊邊位,呢D叫做「割唔清(involved margin)」,因為蛋黃已經流晒出黎(可能有乳癌殘餘喺乳房),一定要翻手再割

專做乳房手術

圖片來源:改篇自互聯網

 

點為之割得好?

割乳癌割得好,除咗要割得清割得準,仲有一大要點,就係要識善後(即係點砌返靚個乳房),唔好凹咗一大忽。近年醫學界好流行講嘅就係切除乳癌時嘅整形技術(oncoplastic surgery),擅長oncoplastic surgery就能夠喺未割乳癌時,一早預計好點砌返靚個乳房。

割得清割得準割完靚,此為之割得好。

 

點解會割唔清?

「好易做姐,醫生用間尺周圍度住攞1cm咪得囉,點解咁都會割唔清?」

你要明白外科醫生係冇一對超聲波手/顯微鏡手,做手術都係靠摸/靠觸覺。

因此如果你個乳癌好難摸/甚至摸唔到,割乳癌側埋一邊係好易理解嘅。

就算你粒野好易摸,都唔一定好易清。因為乳腺細胞早期變癌時,係摸唔到嘅,即係你摸到嘅腫瘤就1cm,摸唔到嘅喺顯微鏡底下而有癌細胞嘅範圍可能已經2cm,判斷緩衝區當然有誤差(以為係蛋白,點知原來係蛋黃)。

 

割唔清會點?

割唔清,即係問題未處理,乳癌未醫好。未醫好嘅乳癌係會攞命嘅。

要處理未解決嘅問題,當然就要再做手術切清佢,即係你最唔想聽到嘅消息-「要再做手術」。

一般黎講,保留乳房手術割唔清嘅機會率大概係兩至三成,即係十個人有三個要再做手術。

 

再做手術你會點諗?

割唔清,做完手術聽病理報告,醫生同你講要再開刀,你一定「晴天霹靂」問:「點解第一次開刀唔割多D/割清D?係咪個醫生手勢差?係咪想dum我症賺多D錢?」

你唔會再信嗰位醫生,你會叫人介紹一個專做乳房手術/乳癌手術嘅名醫比你,希望可以割得清/割得準/割完靚/割得好。

 

專做乳房手術的名醫可以割準D??

專做乳房手術的名醫除咗贏經驗之外,仲有兩大增值服務能夠增加準確度,就係「手術超聲波」同埋「急凍切片」。

 

咩係手術超聲波?

之前講過一般開刀時,醫生只可以靠摸/靠觸覺去引導點切,所以難摸/摸唔到嗰D腫瘤咪準確度低。

「咁如果我地唔只靠摸,加埋其他感觀,咪會好D準D囉?」

正是如此,專做乳房手術嘅名醫,開刀時除咗靠摸/觸覺,仲會靠睇/視覺,所以會好D準D囉。

當然,唔係靠肉眼去睇,而係靠平時乳房造影嘅超聲波去睇。同平時唔同,佢地係一路做手術一路照(intraoperative ultrasound)住去做。所以就算難摸/摸唔到嗰D腫瘤,都難佢地唔到,因為佢地超聲波睇到麻。

 

咁咩係急凍切片?

「咁如果好似你頭先講,摸唔到又睇唔到,剩係顯微鏡先知嘅早期變異,咁點算呢?」

好問題!如果睇都睇唔到,呢樣真係手術超聲波都幫唔到。不過醫生仲有第二樣法寶「急凍切片」。

「急凍切片」就係喺手術中途做快速測試:醫生會將四邊嘅紙口位(margin/蛋白),都切一D立即送去化驗室,比病理科醫生立刻喺顯微鏡底下睇吓有冇癌細胞。如果有癌細胞(蛋黃),即係唔清,醫會生即場再割多D,以求割清晒。

當然叫得急凍(快速測試),一定唔會百分百準確,因為冇特別染色/慢慢詳細睇。不過顯微鏡加埋手術超聲波,已經能夠令翻手嘅機會大大降低九成(唔係百分百)。

 

割清晒你會點諗?

割清晒,做完手術聽病理報告,醫生同你講恭喜你,你一定「天天天晴」諗:「點解第一次我唔搵一個專做乳房手術的醫生做手術?呢個醫生咪就係手勢好,洗多D錢都值得睇嘅名醫囉!」

 

呢兩大增值服務係咪好貴?

貴唔貴,視乎你個乳腺科醫生有幾出名,因為最主要都係時間成本,做多咗額外野,自然收返相關費用。情況就好似請大狀咁,越出名,每個鐘頭收費就越貴。

 

咁值唔值?

見人見智,睇你將重點放係邊度。情況有如買保險(手術超聲波/急凍切片),你要比保費(醫生費),不過佢保你唔會出事(唔洗再做手術)。

如果你唔買保險,冇事發生割清晒,恭喜你慳咗保費。

如果你唔買保險,有事發生割唔清,翻做手術條數點計(心理/生理/荷包)都一定貴過保費好多。

買唔買,視乎你進取定保守。

 

咁邊度可以增值?

私家呢,專做乳房手術嘅乳腺科醫生一般都有得增值,好公平,用者自付原則。

公立呢,對唔住,一般都冇得增值。唔係唔識,只係資源所限,時間唔容許慢慢增值。因為喺醫管局嘅角度十個有三個要翻手,即係七個(大部份)冇事OK啦,仲咩要浪費呢D時間呢?做多幾個手術幫多幾個病人好過啦。

「我有咁嘅需要,可唔可以特事特辦?」

譚耀宗事件之後,我諗唔到醫生會同你特事特辦,唔通唔怕比人抽秤?

呢個現實世界,同我地教比小朋友嘅理想啱啱相反,由始至終都冇公平過⋯⋯

「平等機會」只係會出現喺比人投訴世界唔公平嘅機構名稱之上。

專做乳房手術

圖片來源:東方互動

做完手術,休息三至四星期後,治療進入一個新階段「化療」。

專做乳房手術

下一篇同你講吓乳癌化療需知 - 我洗唔洗化療?

一連6篇講乳癌手術嘅文章已經連載完畢,有唔明?係下面寫低佢,我會盡量解釋你聽⋯⋯

封面圖片來源:互聯網