義乳的秘密 - 重建乳房手術外的另一片天

Posted by in Soul 心靈復康, Surgery 手術

幫我開刀嘅醫生冇得我揀,一定要成個乳房切晒,但我又唔想做重建乳房手術,唔想多條疤痕,咁仲有咩辦法?原來手術世界之外,仲有另一片天叫「義乳」⋯⋯

以禮待人

「其實我就唔貪靚,不過切晒成個乳房又唔重整嘅話,咁我點著衫?」

係,我同意所有女性無論中女、盛女、定沒女,無論作戰唔作戰都好,都係唔貪靚嘅。不過全乳房切除之後,一邊平一邊凸,諗起都怕D膚淺男人覺得自己冇禮貌。

係,我都同意男人無論鑽石唔鑽石都好,都係膚淺嘅。

「咪係囉,咁點先可以著衫有禮貌D?」

原來呢個世界上有樣野叫「義乳」。

唔好問我佢個「義」字係咪代表好有「義氣」?定係同「關二哥」有冇關係?

義乳的秘密

「唔明,咁義乳即係咩?」

恕我通俗D講,即係「裝假狗」,就好似平時姊妹墊pad/用砵仔糕/水餃墊咁。雖然咁講好粗鄙,但真係一講就明。不過為咗提升返呢度嘅文化水平,以下我都係用返「義乳」好D。

「哦~~咁我明喇,不過我係裝假狗方面又冇咩經驗,咁有咩義乳過我揀?」

唔同階段嘅你,有唔同嘅需要。主要分為:
1)啱啱做完手術
2)已經康復後

剛完成手術

「啱啱開完刀,有咩要留意?」

啱啱開完刀,嗰傷口如果順利嘅話,大概兩個星期埋口,引流幾時拆就因人而異(有人幾日拆,有人幾星期先拆)。

呢個時候,通常咩都唔戴,不過亦有部分有禮貌嘅病友會揀戴胸圍加義乳。

胸圍就揀一D冇硬膠條/鐵線嘅,例如運動型胸圍(sport bra),貪佢有彈性同埋冇硬膠條/鐵線,唔會整親個傷口。

同埋最緊要前扣式,因為做完手術隻手開頭冇咁靈活,拗去後面解胸圍扣會好唔方便。

義乳

圖片來源:互聯網

義乳就揀一D輕身嘅義乳,例如纖維質地或者綿質(有D係內裡D綿花可填補嘅,可以自行調節理想嘅大細,想大D就入多D綿花,想細D就減咁D綿花)。

義乳價錢

圖片來源:互聯網

而呢D輕身型義乳,亦都好合適訓覺用,貪佢唔洗有舊重野壓住,同埋又透氣D,咁就可以訓得舒服D。

不過咁輕身,你都估到摸落去手感一定唔好,覺得好虛/冇彈性嘅,唔太合適長久用

康復之後

「咁短暫手感差D都可以接受,但康復之後長期點算呢?」

康復之後,傷口已經穩定晒,佢唔再係一個考慮,呢個時候(手術後四至八星期後)就可以去義乳公司揀一D合適嘅胸圍同義乳。佢地會有專家去陪你試身(breast prosthesis fitting),介紹一D啱你/sell你一D產品。

義乳公司

「咁有冇義乳公司資料?」

有,以下資料係由病友搜集所得。(利益申報:我冇同任何一間公司有聯系,自己亦都未試用過佢地產品(我係冇易服癖嘅),所以我係唔知佢地嘅服務/產品係好定唔好。但都寫出黎嘅原因,係希望幫到大家,做咗第一浸搜集工夫,唔洗連個公司名都要周圍搵。排名只係分區加隨機,並不表示邊間好D,你可以自己排嘅。

公司名稱電話地址網頁
華歌爾有限公司2523 5784香港中環威靈頓街12號1樓 (港鐵中環站D1出口)http://www.wacoal.com.hk
匯寶醫療用品配套有限公司2688 2933香港銅鑼灣渣華道5-19號京華中心902室http://www.solutions-healthcare.com.hk
匯寶醫療用品配套有限公司2809 2933香港跑馬地山光道1A地下Chttp://www.solutions-healthcare.com.hk
顯榮行2541 0909香港北角屈臣道2-8號海景大廈B座11樓1103B室http://www.hindwing.com
坤寧專業Cheerfulife2156 9661香港北角英皇道339號恆生北角大廈15樓1508室http://www.cheerfulife.com/
匯寶醫療用品配套有限公司2395 2922九龍旺角花園街168號1樓http://www.solutions-healthcare.com.hk
坤寧專業Cheerfulife2156 9662九龍旺角彌敦道582號信和中心15樓1504B室http://www.cheerfulife.com/
Amoena愛美麗義乳胸圍有限公司3188 3846九龍佐敦道8號12樓1205室http://www.amoena.com
維鎂有限公司2744 2882九龍長沙灣青山道478號百欣大廈9樓B室
匯寶醫療用品配套有限公司2559 1913元朗青山公路(大馬路)19號元美大廈地下3號舖http://www.solutions-healthcare.com.hk

矽膠義乳

「咁佢地有咩產品啱我/sell我呢?」

喺去見sales之前,了解吓產品特性,係有助成為一個精明嘅消費者。

已經康復後,呢個時候「禮貌」嘅要決在於重量、手感、同埋型狀

「點解重量咁緊要?」

首先,因為切晒成個乳房,脊骨兩邊嘅重量唔平衡,係可以搞到背脊痛嘅,呢個情況喺乳房豐滿嘅病友身上尤其嚴重。因此希望搵返個差唔多重嘅義乳,去平衡返佢

「但我唔係太豐滿咋喎⋯⋯」

重量都緊要,冇返咁上下重量,係唔夠墜手嘅。如果上身太大動作,胸圍可能縮咗上去,如果喺社會場合發生D咁嘅事,會非常尷尬,就好似D女明星比記者影到高低胸一樣。

乳癌後遺症

圖片來源:網易論壇

所以適當嘅重量,係有助墜住個胸圍,等成個外型/動態自然D,有禮貌D

「咁我明喇,邊D義乳有重量D?」

通常都係矽膠義乳,佢無論喺重量定手感,佢都係勝人一籌,所以最多人揀,價錢亦只係貴少少。

乳癌手術後遺症

圖片來源:東網

不過佢都有唔好處,就係如果太大嘅義乳,可能「過重」,返而令膊頭位痛。

仲有膠質嘅關係,佢係唔索汗嘅,夏天大熱天時/做運動時,配帶矽膠義乳就冇咁舒適

「嗰間公司話有超輕身矽膠義乳喎~」

雖然都有D矽膠義乳標榜自己超輕身,不過唔好處通常就係手感硬身D,摸落去冇傳統矽膠咁自然。

當然有D品牌/型號講到自己無敵咁,又輕身、又自然、又透氣、手感又好,係咪真係咁正,定係違反商品說明條例,真係要試過先至知啱唔啱自己

另外有樣野要留意,雖然膠質防水,但都唔好浸佢落太熱嘅水度/浸溫泉/焗桑拿,質地會變㗎。

「重量同手感我明喇,咁型狀呢?」

揀完重量/手感就揀型狀。

乳房型狀呢樣野,其實人人唔同,並唔係好似D明星隆胸咁,個個都警鐘型嘅。原來義乳胸型都有分幾款,有三角型、有雨滴型、有心型、有分左右嘅不規則型。自己鍾意咩類型,可以去試身(prosthesis fitting)時試清佢

義乳胸圍

「吖,唔記得咗問埋配合義乳嘅胸圍添~」

胸圍除咗可以揀平時用開嘅款式之外,好多病友都會揀埋專登設計比配戴義乳所用嘅胸圍,貪佢令義乳冇咁易移位。

大部份特製胸圍都係含有暗袋/夾層,方便攝自己嘅義乳入去。

乳癌局部切除

圖片來源:互聯網

有D公司可以幫你直情車埋纖維/綿質嘅義乳落去個胸圍度,連成一體咁就一定唔會移位。

「咁呢D義乳同特別胸圍貴唔貴?」

如果最基本嘅矽膠義乳,加埋一套有內格嘅胸圍,大概$800度起步,當然有D靚D貴D嘅選擇,去襯返高貴嘅妳。

「咁襟唔襟用㗎?」

一般正常耗損,義乳公司就話用2年度。如果保養得好,用幾年都得嘅。

義乳泳衣

「我鍾意游水㗎,戴義乳點游水呢?」

當然冇問題,呢D公司都有相應有暗袋/夾層嘅特製泳衣,可以配合充滿活力嘅你。

重建乳房手術外的另一片天

最後喺youtube搵咗幾段片比你睇,希望你見到原來除咗重建乳房手術之外,天空仲係好闊嘅⋯⋯

下回預告

當完成晒成個乳癌治療階段,而家連扮靚靚都搞掂埋,下一個最關心嘅問題當然係「醫好乳癌之後應該點跟進?乳癌點check?要做咩乳癌檢查?幾耐做一次先最好?」。

下次「乳癌檢查 - 醫好乳癌之後點跟進?」再見⋯⋯

有唔明?係下面寫低佢,我會盡量解釋你聽⋯⋯

封面圖片來源:電影關雲長