乳癌化療甩頭髮 - 點處理?幾時生返?

Posted by in Chemotherapy 化療, Soul 心靈復康

乳癌化療甩頭髮 - 一個令好多乳癌患者抗拒化療嘅原因。「我唔怕痛/唔怕嘔/唔怕死,但就係唔想甩晒D頭髮咁肉酸!你叫我點出街見人?我死都唔會化療㗎喇!」但如果我話比你聽有得處理,第時會生返呢?「咦?咁就有得考慮⋯⋯」

乳癌化療甩頭髮

方中信教你,真男人一句到尾「頭髮緊要過錢!」
但病人教我,真女人一句到尾「頭髮緊要過命!」

甩頭髮對女士黎講真係慘過攞咗佢條命。有人寧願乳癌復發攞命都好,「我死都唔做化療㗎喇,我唔可以冇咗D頭髮。」

呢份對頭髮嘅堅持,呢種甩頭髮嘅痛楚,我地做男人嘅,點會唔明吖。咁多年黎,白蘭地洗頭呀,咩霸王洗髮水呀,咩生烏絲素呀,中外古方乜都試齊,都唔知比人呃咗幾多錢,到最尾咪又係只可以左搭右、右搭左。

乳癌化療甩頭髮

圖片來源:互聯網

不過好多時,女士都會忘記咗/唔知道原來佢唔係男人地中海,佢D頭髮化療甩完係會生返嘅

「真係好似廣告咁『頭髮可以再生』?咁幾時生返?」

大概打完化療後三至六個月,頭髮就會開始生返,當然要長到好似以前咁,要一定嘅時間,視乎你本身幾長同埋頭髮生得幾快。

「第時生返啫,咁冇頭髮嗰時點算喎?點見人?」

化療前準備

買定假髮,剪自己少少頭髮攞去假髮店度對返顏色,因為唔係人人嘅頭髮都好似曾江咁,喺唔同嘅年代都係全黑嘅。

乳癌化療甩頭髮

圖片來源:Tender Loving Care

另外,可以叫你個髮型師幫你剪定第時假髮嗰髮型,例如長髮變短髮,或者倒轉,將假髮修剪到你而家/想要嘅髮型,咁到時真髮假髮過渡期就自然好多。

有D病友會選擇未甩就剃定頭先。因為第三星期開始一大束一大束頭髮脫落/洗頭甩到成個浴缸都係頭髮、塞埋去水口嗰個震撼場面,冇心理準備嘅話真係會嚇親。

甩頭髮時點處理

1)假髮:夏天戴假髮會係一個比較自然嘅選擇,靚少少嗰D假髮透氣都OK,唔會太焗。始終大熱天時長期戴帽係怪怪地,總會遇到有人口沒遮攔/童言無忌問你點解成日戴帽/頭巾,在意嘅,就好似比人在傷口上灑鹽咁痛。

乳癌化療甩頭髮

圖片來源:Tender Loving Care

2)戴帽:冬天嘅一個幾好選擇,好靚好型格。有D帽配以「假的水/髮腳」,出黎嘅效果更加自然更加靚。

乳癌化療甩頭髮

圖片來源:Tender Loving Care

3)頭巾:可以有型有款,成個藝術家咁。

乳癌化療甩頭髮

圖片來源:Tender Loving Care

「咁假髮貴唔貴?」

最平嘅選擇就係癌協呢方面幫到你。

唔想借嘅,平平地去花園街買D最普通嘅,百零二百蚊有交易。

想好少少,就買D用真髮織出黎嘅假髮,千零蚊起。

要求完美,最靚嗰D假髮可以去到成五千幾蚊。

小貼士:長假髮易打結,平嗰D梳多兩梳就爛,所以如果想買平野,都係揀返短假髮好D,二來亦易於打理。

「咁有冇假髮公司資料?」

有,以下資料係由病友搜集所得。(利益申報:我冇同任何一間公司有聯系,自己亦都未試用過佢地產品(希望自己唔好地中海啦),所以我係唔知佢地嘅服務/產品係好定唔好。但都寫出黎嘅原因,係希望幫到大家,做咗第一浸搜集工夫,唔洗連個公司名都要周圍搵。排名只係分區加隨機,並不表示邊間好D,你可以自己排嘅。

香港島

公司名稱電話地址網頁
愛髮織髮中心2881 0881香港銅鑼灣怡和街46-54號麥當勞大廈8樓803B室http://everhair.com.hk
哈佛增髮技術中心2526 3025香港金鐘道89號力寶中心第二座36樓3605室http://www.harvardaddhair.com
雅仕髮品公司2570 1919香港北角渣華道8號威邦商業中心8樓801室
金寶島2566 3447香港西營盤干諾道西88號粵財大廈15/F 1503室

九龍

公司名稱電話地址網頁
Cheerfulife 坤寧專業乳癌中心2156 9662九龍旺角彌敦道582號信和中心15樓1504B室http://www.cheerfulife.com/
嘉雯仿真髮2789 4894九龍旺角雅蘭中心1期11樓1113室http://www.carmenwigs.biz.com.hk
優質真髮中心2317 0992九龍尖沙咀山林道7號漢國佐敦中心12樓1201室http://www.qualityhaircentre.com
麗明珠真髮中心2722 7924九龍尖沙咀金馬倫道23-25A金馬倫廣場16字C室http://www.beautihaircentre.com.hk
哈佛增髮技術中心2723 6788九龍尖沙咀彌敦道132-134號美麗華大廈22樓2216室http://www.harvardaddhair.com
愛髮織髮中心2312 1988九龍尖沙咀寶勒巷9-11號和業中心11字樓全層http://everhair.com.hk
織麗絲2148 0319九龍旺角彌敦道750號始創中心10樓1002-1003室http://www.haireasy.com
劍橋織髮中心2393 9662九龍旺角通菜街142號啟運大廈2樓C座
絲絲髮品公司2311 0092九龍彌敦道172號太平洋大廈7樓A座
瑞美卡髮品有限公司6227 7286九龍旺角彌敦道688號旺角中心一期FK8B
專業真髮技術2882 9388九龍彌敦道216-228號恆豐中心1樓25-27號舖
HAT增髮專門店2723 7733九龍尖沙咀彌敦道132-134號美麗華大廈22樓2216室
麗麗真髮中心2367 4727九龍尖沙咀加拿芬道20號加拿芬廣場7樓703室
第五街2368 2628九龍尖沙咀金馬倫道15-17號1樓
星辰增髮設計中心2314 8944九龍尖沙咀加連威老道8A-10加威中心13樓
喜髮國際公司8104 7028九龍佐敦偉晴街10號白雲大廈7字樓B室
奧爾德專業織髮中心2302 1696九龍佐敦道德興街12號興富中心5樓505室
愛其美髮品零售中心2303 0400九龍長沙灣長裕街5號中國宏興大廈5樓C座

新界

公司名稱電話地址網頁
髮寶店2459 8250新界屯門湖翠路168號地下海翠坊32號舖

「我唔止甩頭髮,眉毛都甩,點算?」

有化開妝嘅可以選擇紋眉;有帶開眼鏡嘅可以試吓大隻粗框眼鏡,可以遮住稀梳嘅眉毛。

扮靚靚指南

以上圖片來自American Cancer Society 嘅Tender Loving Care 網站 http://www.tlcdirect.org

價錢好合理,有唔同假髮/配件過你揀,配搭出無限可能。我見佢網頁有國際運送,運費幾多錢我唔知,當然會貴過淘寶。

病友睇咗,應該知道原來化療甩頭髮都可以好靚,好有尊嚴。

老公/阿仔/阿女睇咗,應該送返個比老婆/阿媽,幫佢地打打氣,支援佢地渡過呢段最黑暗嘅日子。

今次幫你搞掂咗甩頭髮呢個精神上大問題,下次教你點處理肉體上嘅痛苦-「嘔」

乳癌化療嘔吐 - 終極止嘔藥

有唔明?係下面寫低佢,我會盡量解釋你聽⋯⋯

封面圖片來源:史雲遜護髮中心