東張西望，由開心到憂心，由偽專家證人慘變涉事醫生⋯⋯

Posted by in 其他

認識我耐嘅朋友可能都留意到，我絕少喺社交媒體講自己嘅嘢，我生活有幾好、我生活有幾慘，對大家而言，根本就冇養分，對大家所面對嘅困難，根本就冇幫助。所以呢10年我只堅持分享一啲有價值嘅資訊，希望可以幫助大家脫離困境。

但今次東張西望單野，令關心我嘅人擔心，我終於按耐不住，要澄清兩句⋯⋯

以為光宗耀祖⋯⋯

是咁的，我嘅姑娘5月19日收到東張西望製作組電話，想問關於一個投訴個案嘅專業意見，我心諗：正，終於到我踏上大舞台。係，我認我膚淺，作為一個睇TVB大嘅草根市民，上電視就好似光宗耀祖嘅頭等大事，但我萬萬估唔到，呢個係惡夢嘅開始⋯⋯

5月31日，製作組上嚟診所拍攝，為免對涉事醫生不公，我冇對個個案下任何批判性評語，始終我唔喺案發現場，永遠唔知病人與醫生之間嘅溝通出咗咩問題，正所謂公說公有理，婆說婆有理。我只可以就住啲客觀報告，講返正常情況下應該點樣點樣做，邊啲位可以做好啲。

完成拍攝之後，我連幾時播都冇問，更遑論點樣剪輯，因為我知道上電視對小市民就係頭等大事，但對製作組只係家常便飯，唔好煩人啦。始終講到尾，成件事都唔關我事，行得正企得正，點樣剪應該都唔會有問題啦我心諗。少年，你太年輕喇⋯⋯

惡夢嘅開始⋯⋯

6月25日訪問片段出街，收到唔少好友開心share比我睇，甚至叫我post喺社交媒體，好好宣傳一番。但我諗，同我一貫作風，只share正能量嘅嘢相違背，散播呢啲負面個案，只會增加仇恨。另一方面，我亦都怕其他醫生以為我踩住人上位，所以決定隻字不提，以為咁樣就白過白紙、清過清水，點知原來沉默係會招致麻煩⋯⋯

我陸陸續續收到好友、病人嘅關心，問我有冇事，我心諗，我有咩事？原來好多人，誤會咗我就係涉事醫生。由於電視台冇公開涉事醫生姓名，而剪輯嘅關係，令到成個畫面就係病人投訴完，接着就我解釋，成個感覺就係我喺度掩飾緊咁。再加上，電視台到好後尾先交代涉事醫生的電郵回覆，如果唔係由頭睇到落尾，真係好容易有錯覺我就係嗰個涉事醫生。

由天堂變地獄，由令家人開心變憂心，實在係我萬萬估唔到。

如果我有一日出事，就算唔阻擋佢個鏡頭，我都唔會坐定定比佢影。就算唔俾黑色雨褸我包勻全身，最起碼都幫我打返個格仔吖⋯⋯

冇打格仔嘅馬醫生