東張西望，由開心到憂心，由偽專家證人慘變涉事醫生⋯⋯
認識我耐嘅朋友可能都留意到，我絕少喺社交媒體講自己嘅嘢，我生活有幾好、我生活有幾慘，對大家而言，根本就冇養分，對大家所面對嘅困難，根本就冇幫助。所以呢10年我只堅持分享一啲有價值嘅資訊，希望可以幫助大家脫離困境。
但今次東張西望單野，令關心我嘅人擔心，我終於按耐不住，要澄清兩句⋯⋯
以為光宗耀祖⋯⋯
是咁的，我嘅姑娘5月19日收到東張西望製作組電話，想問關於一個投訴個案嘅專業意見，我心諗：正，終於到我踏上大舞台。係，我認我膚淺，作為一個睇TVB大嘅草根市民，上電視就好似光宗耀祖嘅頭等大事，但我萬萬估唔到，呢個係惡夢嘅開始⋯⋯
5月31日，製作組上嚟診所拍攝，為免對涉事醫生不公，我冇對個個案下任何批判性評語，始終我唔喺案發現場，永遠唔知病人與醫生之間嘅溝通出咗咩問題，正所謂公說公有理，婆說婆有理。我只可以就住啲客觀報告，講返正常情況下應該點樣點樣做，邊啲位可以做好啲。
完成拍攝之後，我連幾時播都冇問，更遑論點樣剪輯，因為我知道上電視對小市民就係頭等大事，但對製作組只係家常便飯，唔好煩人啦。始終講到尾，成件事都唔關我事，行得正企得正，點樣剪應該都唔會有問題啦我心諗。少年，你太年輕喇⋯⋯
惡夢嘅開始⋯⋯
6月25日訪問片段出街，收到唔少好友開心share比我睇，甚至叫我post喺社交媒體，好好宣傳一番。但我諗，同我一貫作風，只share正能量嘅嘢相違背，散播呢啲負面個案，只會增加仇恨。另一方面，我亦都怕其他醫生以為我踩住人上位，所以決定隻字不提，以為咁樣就白過白紙、清過清水，點知原來沉默係會招致麻煩⋯⋯
我陸陸續續收到好友、病人嘅關心，問我有冇事，我心諗，我有咩事？原來好多人，誤會咗我就係涉事醫生。由於電視台冇公開涉事醫生姓名，而剪輯嘅關係，令到成個畫面就係病人投訴完，接着就我解釋，成個感覺就係我喺度掩飾緊咁。再加上，電視台到好後尾先交代涉事醫生的電郵回覆，如果唔係由頭睇到落尾，真係好容易有錯覺我就係嗰個涉事醫生。
由天堂變地獄，由令家人開心變憂心，實在係我萬萬估唔到。
如果我有一日出事，就算唔阻擋佢個鏡頭，我都唔會坐定定比佢影。就算唔俾黑色雨褸我包勻全身，最起碼都幫我打返個格仔吖⋯⋯
冇打格仔嘅馬醫生
香港乳癌及乳病治療中心 
馬醫生，你是一個好好好好既醫生，我支持你💪🏼💪🏼💪🏼💪🏼💪🏼💪🏼🌹
涉事舉報人所交代的事疑點重重，又推卸自己嘅責任。如果佢覺得自己有道理，咁長時間，點解唔去相關嘅醫務部門投訴及索償？ 反而咁長時間之後，先至去一個電視節目度講，無論所涉的醫生係邊位，都係被作出不平等嘅投訴。
馬醫生接受訪問，如果係涉事醫生，東張西望最後一定會講出嚟，問佢有咩可以交侍，所以係一定唔係馬醫生啦.
呀哎! 原來今次訪問令大家有咁嘅誤會, 所以忍唔住想分享少少個人經驗. 幾年前係因為媽咪患病, 而認識馬醫生呢個網頁. 個網頁幫到我好多. 幾年後因為自身疫病想問多個醫生意見, 機緣巧合下約見馬醫生, 馬醫生解釋得好淸楚, 將我對治療嘅憂慮全消, 淸楚了解有何選擇, 每個選擇嘅利弊, 及術後嘅效果令我有合理期望, 之後索性轉去搵馬醫生做手術. 術後, 馬醫生好照顧, 一日巡兩次房, make sure 我係ok. 我好感恩當初轉過來搵馬醫生去做手術. 所以對今次嘅誤會, 實在想多事講句客觀事實.
我驚我多事, 沒有配合馬醫生低調嘅作風😝
如果覺得唔適合, 歡迎delete comment.
你唔係小市民，你係一個救返好多人既醫生。
做好自己就足夠了，認識你既人會明白。
我看初頭的片段都以為係講緊你呀！🤔
馬醫生，我日日都睇東張西望，呢個訪問我知你係訪問專家（唔係嗰個涉事醫生），因為無打格仔。我唸只係有d唔清楚情況嘅人亂唸。你可以試吓揾東張西望幫你唸辦法澄清吓（佢哋有時會咁做）。支持你！
馬醫生幫咗好多人救咗好多命!
大台係垃圾,加油馬醫生!
成個訪問完全係馬醫生比緊專業意見, 如果係涉事醫生, 根本唔會肯上鏡接受訪問, 加上主持人完全無任何質詢馬醫生有關該位好仕情況, 唔明點解會有人聯想到同馬醫生有關, 佢地應該諗多左. 加上尾段涉事醫生已用電郵回覆啦. 我本身都係睇馬醫生, 亦比醫生開過刀, 馬醫生仁心仁術, 關心病人, 手術前同我講解得好清楚, 今次真係無妄之災.
多謝馬醫生23年8月頭為我動手術。傷口不大，復原得好快。醫生解釋好清楚，仲俾到信心我，只要乖乖完成所有化療及電療就可以好番！
今日才看到這文章，只是東張西望處理得唔好，令人誤會。但我作為病人，就算我之前睇到播出街，我都一定不會誤會，一定係另一個醫生。因為東張西望成日找好有經驗專業人和醫生解釋個案。D人睇d又唔睇d，係度亂諗。