3D立體乳房造影－3D？2D？睇真D！
唔知由幾時開始，「3D」呢兩隻字對我地好似有特別魔力咁，所有野加個「3D」就即刻覺得好正好正，頓時升格十倍。細路仔去迪士尼睇電影要3D，後生仔打機又要3D，連普通睇電視都要3D。醫生都係人，所以逃唔出萬有引力，今次乳房造影都加個「3D」比佢，係咪頓時覺得正咗好多先？由於亞視已經執咗笠，今次唔係由大姐明帶你睇真D，而係由breasthk同你睇真D⋯⋯
2D乳房X光造影
未講3D之前，先由淺入深，講咗咩係2D先（拿拿拿，我都話3D對你有特別吸引力㗎啦）：
傳統嘅乳房造影就係將一個立體的器官（乳房）壓成平面，再照一張X光睇下裡面有冇問題。「壓」呢個過程就係你成日聽到嘅「夾胸」。
圖片來源：互聯網
一個立體器官裡面如果有問題，我地要定位，自然要有三個軸（X axis，Y axis同z axis）的座標，所以醫生會幫你夾兩個角度，一個側側地睇（MedioLateral Oblique view, MLO），一個鳥瞰式咁睇（Cranial Caudal view, CC）。
圖片來源：slideshare.net
圖片來源：slideshare.net
「明明地，兩個角度定到位咁仲有咩問題？」
將立體變成平面咁睇，諗都諗到有問題，就係唔同層次的影像會疊埋曬一齊（即係你個影遮住我個影），之後有兩個問題會發生：一係有事的地方被前後組織遮住咗（即係有事但偵測唔到），一係就調返轉，明明冇事但D影像疊埋一齊誤以為個度有舊野（即係冇事當有事）。兩個情況都係唔理想的，一個就錯失左及早診治的機會，一個就明明冇嘢但嚇餐飽。
「咁好大問題喎⋯⋯」
傳統醫生如果有懷疑但唔肯定，通常會叫病人返黎翻照，例如Magnification view／spot compression view等等，希望加大D壓力、放大D、唔同角度等等去睇真D。又或者輔以其他方式（例如超聲波、磁力共振），去睇清睇楚。
無論用咩方法都好，當病人一收到醫生／醫院電話要翻照，三魂都一定唔見咗七魄，以為自己呢次死喇死喇實出事喇，原來好多時呢D recall只係技術局限照唔清楚，並唔係自己諗到咁灰咁。
為咗突破呢種局限，就輪到我地呢集主角出場，登燈登櫈，3D立體乳房造影，等我帶大家睇真D。
3D立體乳房造影
「咁3D立體乳房造影又係咩黎呢？洗唔洗帶3D眼鏡睇？」
隨著醫療科技大躍進，2011年推出咗第一代的3D立體乳房造影（Tomosynthesis），佢嘅原理係希望用唔同角度（正負7.5度）去望個乳房（立體器官用返立體的方式去評估），咁就可以分辨出唔同層次的組織（原理有如電腦掃描CT scan咁，將乳房每1mm切開一個斷層黎睇，就好似一本書有好多頁，醫生就遂頁遂頁睇，所以係唔洗帶3D眼鏡睇嘅），希望可以解決有病變但被人遮住，或者冇野以為有野的問題。
「咁好正喎，點解唔大規模採用嘅？」
第一代Tomosynthesis有兩大問題，第一係價錢，因為傳統乳房造影只係睇四張X光片，但3D立體乳房造影動輒要睇成幾十張片（1mm厚一張片），撰寫報告嘅人力物力要求大大增加，成本自然好可觀。
第二係輻射量，因爲除左要照多角度之外，傳統2D嗰兩個角度（MLO，CC）都要照，所以輻射量大概係傳統乳房造影的兩倍（因爲佢要照一套3D，之後再照一套2D，廠叫呢個做Combo Mode）。
一聽到貴，二聽到輻射，三再加上缺乏大量數據支持（因為新），所以阻礙咗佢大規模嘅發展（其實都叫發展得好迅速㗎喇）。
第二代3D立體乳房造影
「咁好可惜⋯⋯」
又唔洗咁快可惜住，有得第一代自然有第二代（2013年推出），而家輻射嘅問題已經9成獲得解決，3D立體乳房造影的輻射量已經同傳統乳房造影相約。佢已經唔洗再分照一套3D一套2D，個系統已經進步到只照一套3D，就已經可以後製合成做2D片（用一個叫C-View嘅軟件後製，廠叫呢個做TomoHD Mode）。照多咁多角度，但輻射量竟然差不多，呢個係一個好驚人的進步。
「咁好，咁公立醫院有冇得照呢？」
一間間，有D教學醫院／龍頭醫院有，有D資源冇咁豐富嘅醫院當然暫時未有。
「咁如果我自己出去照又幾貴？」
如果係私家做3D立體乳房造影加超聲波，大概＄3800，相比起傳統乳房造影加超聲波的＄2200，仲係貴咗一節。
「貴咁多，仲有冇其他賣點先？」
3D立體乳房造影仲有標榜冇咁痛，因爲唔洗好似傳統咁夾到扁晒，對於一D怕痛的女士係好吸引嘅。
而且佢用電腦合成（C-View）的後製2D片，係仲清過直接照的2D片（真係竟然咁都得），其實都唔難理解，就好似手機HDR（high dynamic range）相咁，影幾張相合成後的色域係好過直接影一張相一樣：
圖片來源：lowdose3d.com
上圖FFDM 2D即係傳統2D乳房造影直接照出黎嘅片，C-View 2D即係3D後製合成2D片，你係右上角放大嗰度會見到C-View 2D睇鈣化點仲清淅過傳統直出片，真係要寫個服字。
圖片來源：lowdose3d.com
至於呢幅圖呢就顯示指住嗰舊癌，又係C-View完勝。
另外D研究仲話可以減低回頭翻照率（recall rate）達40％，同增加發現侵蝕性癌症率（invasive cancer detection rate）達41％，呢個又係好重要嘅賣點。
大勢所趨
當日數碼乳房造影（digital mammography）取締菲林乳房造影，情況就有如數碼相機取締菲林相機一樣。今日的3D立體乳房造影，就有如連手機都做到高速連拍一樣，要捕捉小朋友笑容一刻，點都好過冇連拍的手機，取締2D乳房造影，實在是大勢所趨，價錢就係最後唯一的障礙。
相關醫學專欄：誰是壓死2D乳房X光造影的最後一根稻草？
香港乳癌及乳病治療中心 
請問怎樣分別那一家所用的3D mammogram 是第一代還是第二代？可否單從他們的印刷品就知道？
佢地可能會標榜「第二代」「C-View技術」「快速掃瞄時間3.7秒」「低輻射量」等。
第一代scan Combo Mode要大概10秒。
謝謝回覆，明白了。
請問哪間公立醫院可以做3D乳房造影?如何申請?價錢多少呢？
廣華、瑪麗、東區有，其他醫院唔清楚。冇得申請，醫生肯寫便得，唔洗錢。
如果想在公立醫院做3D乳房造影，是否先看門診，告訴他們我的問題(乳房內有大大小小的水囊)才可以用這項服務？一般排期多久？
做法正確，不過用唔用到呢項服務最終由醫生決定。間間醫院條龍都唔同，亦都因應問題緩急輕重而有所快慢，所以冇話一般排幾耐。
你好,請問我去體檢中心先做檢查,如有問題再返公立排期,請問是否會受理?排期時間長唔長？
另外,做左3D乳房造影，需要做埋乳房超聲波，取得更準確的資料嗎？
應該點樣揀3D乳房造影的體檢中心？IMC可以嗎？
會受理。
排期時間長唔長視乎有冇野。
做埋乳房超聲波百利而無一害。
靠口碑／醫生介紹。
為免瓜田李下，不作網上個別中心評價。
我舊年響廣華做過3D乳房造影，但都係超級痛，要夾到好扁，同埋每一下夾都要夾成起碼10秒，兩邊加埋夾4次，其中一次夾完又話唔得要再夾，即一共夾5次，痛到有少少頭暈！所以我好懷疑3D同2D個分別係咪真係咁大？
可以親身去試下比較下。
馬醫生你好: 以下係乳病治療中心, 外科專門科醫生的US報告19/10/2022,
The breasts show heterogeneous glandular parenchymal echoes. Small lesion may be obscured. Hypoechoic lesions are noted with details as follows:
L3H, 3cm from nipple, 0.3×0.3×0.3cm, Roundish. Smooth. Parallel to skin. Doppler negative. Probably benign
L12H, 1cm from nipple, 0.4×0.3×0.6, Oval. Smooth. Parallel to skin. Doppler negative. Probably benign
No other gross focal suspicious lesion is noted in the rest of both breasts. No dilated ducts are seen. Subcutaneous and retromammary fat planes are normal. No abnormally enlarged lymphadenopathy over both axillary regions.
Impression: Hypoechoic nodules in left breast as described. Suggest short interval follow up ultrasound scan in 6-9 moths to establish stability.
廣華醫院2020的報告左邊同右邊: BIRADS Category – Benign calcification.
請問Hypoechoic lesions幾大才需要抽針?如果下次照ultrasound無增大或增多, 是否可以一年後再照?
體積只係其中一個指標，冇話幾大一定要抽，要睇埋其他特徵，技術上2mm以上已經可以抽到（當然越細越難抽），5mm以上就相對易抽D，所以好多醫生都5mm以上先考慮抽。你嗰兩粒嘢好細，可以照跟報告六個月後再照，睇吓有冇變化先決定抽唔抽。
如果下次超聲波冇變化，可以拖疏D九個月至一年再覆照去監察住佢。
請問我現在懷孕27週，經HA core needle biopsy confirmed 係IDC, 現在等緊Fish test 結果（暫時所有荷爾蒙受體都係陰性），因係懷孕期間發現所以淨係照過Utlrasound, 醫生叫我再照其他睇清楚啲嗰腫瘤同另一邊乳房，想請問下可唔可以照3D乳房造影？幅射量會唔會影響胎兒，或者有冇方法可以提供保護俾胎兒？本身想照磁力共振，但原來顯影都係會影響胎兒，好多醫院機構都唔做，請問仲有冇其他選擇，或是直接做手術就算？
都可以照3D乳房造影，用lead shield 保護個肚就可以減低輻射嘅影響。如果真係唔想照，又肯承擔遺留其他癌腫病變嘅風險，直接做手術唔照都可以，等BB出世之後先再照返。
馬醫生你好，家人是患者由政府醫院跟進，並於2021年巳完成5年抗荷爾蒙藥治療。請問之後需不需要每年做造影及超聲波檢查呢？政府因為患者太多2022年排不到期照，要排到2024才可照造影及超聲波。謝謝你！
同你一樣，係東華。又話3D ,痛到顛。懷疑係第一代3D
馬醫生你好,想問我今次33歲,我之前照超聲波,一直話我
• 0.5 x 0.3 x 0.5 cm (LxWxAP) at right 10 o’clock 1 cm from nipple, hypoechoic.
• 0.3 x 0.2 x 0.3 em (LxWxAP) at right 7 o’clock 3 em from nipple, hypoechoic.
• 0.6 x 0.4 x 0.6 em (I.xWxAP) at left 3 o’clock 2 em from nippIc, hypoechoic.
• 0.6 x 0.3 x 0.6 cm (LxWxAP) at left 4 o’clock 1 cm from nipple, hypoechoie.
• 0.5 x 0.3 x 0.6 cm (LxWxAP) at left 10 o’clock 2 cm from nipple, hypoechoic.
• 0.4 x 0.2 x 0.4 em (LxWxAP) at left 10 o’clock 3 em from nipple, hypoechoic.
No sign of intramammary duct dilatation is identified.
Bilateral axillary lymph nodes are not enlarged.
佢就咁寫Please follow up
我想問我係咪應該去照多一次超聲波?定係去照3D比較好? 應該照完先去睇醫生??
定其實最好照3D+超聲波? 之後再拎報告比醫生去睇下做唔做抽針?
你個報告太簡短，只係描述嗰啲一粒二粒嘅大細，冇講到佢地嘅特徵，又冇講BIRADS 幾。
建議你去搵過一個正經照乳房超聲波嘅地方再照過。你呢個歲數唔使照3D夾胸住。
请问微创手术（ vacuum assisted excision） 是大约需要多少钱才可以？
度度地方唔同，又視乎複雜程度同醫生經驗，直接打去心儀嘅診所問就最好。