乳癌資助計劃 - 為你搜盡全城最紅乳癌優惠

Posted by in Support 支援

一睇個標題,係咪好有衝動㩒入黎睇吓有咩優惠呢?就好似D騙案咁,正所謂「唔買都埋黎睇吓啦」⋯⋯

人地話「講錢失感情」,計我話「派錢受歡迎」。

為咗得到你嘅感情、為咗可以受你歡迎,呢次我為你搜盡全城最紅乳癌優惠。寫完我都覺得好似滙豐信用咭廣告,冇辦法,呢個廣告真係入曬腦。派錢當然唔係派我D錢,我地呢D擁有最低工資、最高工時嘅在職貧窮,係唔會派自己錢比你嘅。有咁多錢派嘅話,就唔洗為咗3%去靜坐。不過我冇姐,香港地仲有好多善長人翁。

係未講每一個計劃/優惠之時,我地講吓一D基本原則:

1)要夠窮。

講得資助計劃,梗係資助有需要而又有困難嘅人,其中一樣最常見嘅就係「窮」。咁咩叫夠窮?原來都可以好寬鬆,好似Herceptin 撒瑪利亞基金嘅經濟審查咁,「第一間自住物業和所持有的生財工具不會計算在內」。 咦咦咦,有樓都可以叫窮,咁唔怪得財爺搵30萬先至係中產,「窮」原來真係可以「窮得只剩下錢」。

  圖片來源:書本<窮得只剩下錢>

2)大部份計劃都要經醫生轉介。

即係你要主動話比醫生聽你想申請乜乜乜資助,尤其是當醫生唔太清楚/甚至唔知有呢D計劃嘅時候

3)好多時都要醫務社工幫手。

無論經濟審查,定係填form交form,都要醫務社工幫手。記低佢地嘅聯絡方法,對你百利而無一害。

醫務社工地址電話

唔同階段嘅你,有唔同嘅需要。以下會將所有計劃歸納為不同階段去介紹比你聽。


健健康康的妳

無事無幹得閒都檢查吓乳房啦,尤其40歲以上女士,因為香港乳癌病發率有上升趨勢,而家已經係一年三千個新確診乳癌個案,十七個女士中就有一個中招(個概念大概係如果有一架小巴,全車連司機都係四十歲以上女士,其中就有一個有乳癌),都咪話情況唔嚴重。


圖片來源:facebook / 小心駕駛群組

「咁去邊度檢查好呢?」

有錢梗係去私家,快靚正。更何況如果你冇病徵嘅話,公立醫院係唔會提供任何預防性/普查式的乳房檢查服務。

「喂喂喂,咁我冇錢點算?」

冇錢咪冇得檢查囉。我知我咁講你實打我個(死人)頭,所以我係唔會咁講嘅,我當然有好野介紹比你:登登登櫈 - 免費乳健檢查計劃

免費乳健檢查計劃

圖片來源:香港乳癌基金會免費乳健檢查計劃截圖

呢個係由賽馬會資助,透過香港乳癌基金會(Hong Kong Breast Cancer Foundation)提供嘅免費乳健檢查計劃。內容包括:

1)自我檢查方法指導 - 由醫護人員指導正確自我檢查乳房方法

2)臨床乳房檢查 - 由醫護人員觀察及觸檢乳房

3)乳房X光造影檢查 - 利用X光進行乳房攝影,偵測觸摸不到的腫塊

申請資格:40歲或以上+有香港身分證+兩年內冇照過乳房X光造影+以下類別人士:

1)攞綜援

2)攞交通津貼

3)攞傷殘津貼

4)低收入人士(詳情睇以下官方申請表)

http://www.hkbcf.org/download/FMM_Application_form_donor_1_chi.pdf


剛剛確診乳癌的妳

乳癌資助計劃

圖片來源:University of Rochester Medical Center

啱啱確診乳癌其中一樣好重要嘅野,就係判斷第幾期。而咁多樣檢查之中,以PET scan最為準確。好可惜,一般市民政府係唔包嘅。不過你可以經以下途徑得到資助:

1)政府資助免費照。

「唓,你上面又話政府唔包~」

你細心咁睇,我係話「一般市民」政府唔包。如果你係「非一般市民」,咁咪包囉。

「咁咩係非一般市民?」

公務員、醫管局職員同埋攞綜援人士,政府係會包去伊利沙伯醫院/東區醫院照PET scan。

2)撒瑪利亞基金

呢個其實係立法局(立法會的前身)係1950年設立的基金。官網介紹『基金設立的目的是為符合特定臨床準則及通過經濟審查的有需要病人提供經濟援助,以應付一些治療過程中需要,但不屬公立醫院和診所標準收費提供的「自資購買醫療項目」或新科技的費用。根據沒有人會因為經濟問題,而得不到適當的醫療服務的理念,基金希望為有需要的病人儘量提供經濟援助。 』

其中一樣佢會包嘅就係PET scan。呢個計劃要醫生轉介比醫務社工,之後通過經濟審查,先知得唔得到資助。

「點搵醫務社工?」

醫務社工地址電話

「經濟審查有幾嚴?」

自己睇官網

http://www.ha.org.hk/visitor/ha_visitor_index.asp?Content_ID=212020&Lang=CHIB5&Dimension=100&Parent_ID=10048&Ver=HTML

3)香港防癌會張謝寶英乳癌康復資助計劃

https://www.hkacs.org.hk/tc/medicalnews.php?id=62

根據官方網頁,「可以資助嘅項目包括營養品、義乳及藥物、PET scan(基金會將資助乳癌病人7000元以支付在私家醫院做正電子掃描的費用)。

申請手續非常簡單,凡在公立醫院求診的乳癌病人,只需要聯絡醫院的社工,或香港防癌會“攜手同行”計劃的同事,得到他們的推薦,就能獲得資助。雖然資助金額不多,但希望受助病人能感受到關懷與支持,知道自己並非孤軍作戰,並與香港防癌會或醫務社工聯絡,協助她們其他方面的需要。」


正在接受治療的妳

其中一個最常見的困難就係藥費貴。當中尤其以標靶針最乸脷,動輒成三十萬,唔係一個細數目。好在又係有撒瑪利亞基金

同上面一樣,又係醫生轉介比醫務社工,之後通過經濟審查,先知得唔得到資助。

你要知嘅野,已經係曬呢個申請需知度,自己㩒入去慢慢參詳

http://www.ha.org.hk/haho/ho/sf/sf_drug_leaflet_b5.pdf

 

乳癌資助計劃

圖片來源:堅毅忍者‧障殘人士國際互助協會

講完藥費,到講最多病友關心嘅傷殘證同傷殘津貼。

傷殘證呢個醫生批得好鬆手,先去填咗張傷殘證申請表,再比醫生簽名就搞掂。成功批核(真係好似信用卡廣告),張證有以下用處:

1)入海洋公園免費,同行人士半價。

2)康文署租場半價。

3)部分康文署音樂會/其他節目半價/優惠價

4)部分渡輪半價

5)優先上飛機、郵輪

6)香港及日本迪士尼免排隊

至於另一個傷殘津貼,又係要去搵醫院嘅醫務社工,同佢講你想申請傷殘津貼,佢就會將表格交比你主診醫生/同一組醫生審批,當中唔洗資產審查。如果醫生肯批(通常化療期間都肯批),你會收到每個月$1685資助,另外供養人亦可獲額外免稅額,當幫補吓呢段洗咗咁多錢嘅時間。之後可以申請傷殘八達通,搭車搭地鐵2蚊。


不幸乳癌擴散的妳

呢個時候好多時要用一D最新嘅藥物,咁D藥咁新,唔洗審都知貴。好在香港乳癌基金會(Hong Kong Breast Cancer Foundation)癌症基金會(Cancer Fund),都有一D乳癌藥物資助計劃去幫你。自己對吓自己有冇用緊以下5種藥,有就㩒入去睇吓點申請資助:

骨針Denosumab (Xgeva適治華)

http://www.hkbcf.org/article.php?aid=213&cid=71&lang=chi

標靶藥T-DM1(Kadcyla)

http://www.hkbcf.org/article.php?aid=223&cid=71&lang=chi

化療藥Eribulin (Halaven)

http://www.hkbcf.org/article.php?aid=195&cid=71&lang=chi

荷爾蒙標靶藥Everolimus 依維莫司(Afinitor安妥)(2015年12月22日起不接受新申請)

http://www.hkbcf.org/article.php?aid=193&cid=71&lang=chi

口服標靶藥Lapatinib拉帕替尼 (Tykerb泰康達) (呢隻藥已經由舊藥廠GSK賣咗比新藥廠Novartis,所以亦都係2015年12月22日起不接受新申請)

http://www.hkbcf.org/article.php?aid=192&cid=71&lang=chi

https://www.cancer-fund.org/drugsubsidy/chi/leaflet_relieffund.pdf

另外如果你係屯門醫院、基督教聯合醫院、伊利沙伯醫院及瑪嘉烈醫院嘅病友,仲可以申請仁愛堂莊舜而醫療基金(治療癌症),佢專係資助一D撒瑪利亞基金唔包嘅項目。

乳癌資助計劃

圖片來源:仁愛堂莊舜而醫療基金(治療癌症)

官方網頁係咁寫「基金主要援助屯門醫院、基督教聯合醫院、伊利沙伯醫院及瑪嘉烈醫院符合基金審批資格的癌症病人。受助人經醫生進行評估,然後由醫務社工作家庭經濟狀況審查,再由仁愛堂作最後審批。每名符合申請條件的病人之資助上限為80,000港元。」

http://www.yotcancerfund.org.hk/zh/fund_management.php

http://www.yot.org.hk/adv/ea/2015/CancerFund_2013.pdf

 

結論

結論都係冇咩結論,只係想話比你知,抗癌路上並不孤單,仲有好多人會幫你。最後好老土講句:請大家有錢出錢(捐錢比以上機構),有力出力(廣傳此文),以達到助人目的。謝謝你的幫忙。

以上資料基於2015年10月份資料撰寫,如果你有進一步資料/更新/更正,歡迎提出,我會不定期更新。

封面圖片來源:匯豐銀行信用咭廣告