香港乳癌及乳病治療中心－一個實踐愛．乳．希望的地方
一個實踐「愛‧乳‧希望」的地方。這裡不止是一所診所，這裡希望成為大家一個可以聚腳的一個家。
由2017年3月起步，一晃便將近三個年頭，承蒙大家的支持及關愛，我地呢個家得以發展擴充，提供更佳的空間及設備去為大家服務。
由未發生運動時簽約，裝修在香港風雨飄搖下進行，歷時四個月，今個星期入伙，係時候等土炮＜樓盤傳真＞帶大家去睇睇呢個轉變⋯⋯
在過往兩年多的營運中，大家比咗好多好好嘅建議我地，我地一直記在心中，直到現在儲夠能量，決心來一個徹底變革。
一入門口，就要講講部水機，之前部水機顔值係高，不過被投訴率亦高。
因為嘈之外，最主要係要好複雜咁㩒住先出到熱水，莫講話婆婆，連後生都會考起，基本上姑娘要每日教人點樣用佢。但之前一路都唔換，因為佢係東華醫院舊同事送，牽頭嘅係好錫我嘅美琴經理（佢已經返咗天家），所以一路用到而家壞為止。新嘅係一部靜D易用D嘅水機，舊嘅長駐我心中。
等候睇醫生最痛苦莫過於唔知等到幾時，又唔行得開，又未食飯好肚餓。一個唔覺意，又比D面皮厚嘅話趕時間想插隊。為咗令大家等候時可以自由D，可以公平D，可以行吓街醫下肚，特意模仿食肆攞飛排隊，掃一掃個QR code，就知條隊咩狀況，從此等睇醫生變得不再被動。
之前等候區係黑廁黎嘅，冇窗，由早等到晚，又唔知出面點，掟催淚彈都唔知，人都等到抑鬱。
新嘅有窗有差電，扮足cafe，等都冇咁抑鬱，雖然都係抑鬱。我都唔想大家等，不過亦都唔想求求其其咁睇症。
掛喺大廳始終係大聯盟的字畫，冇大聯盟便沒有我。
舊時你地送比我的禮物只可以擺係房，因為個廳冇位。
而家專登做個飾櫃去貼堂，喂，仲唔快D投稿。
D 梳化又要講講，上次張白色Barcelona chair比人投訴到暈，因為窩左落去D婆婆坐得耐發唔到力起身。
今次換張平身D 梳化，希望易D發力，點知短短幾日，已經有人投訴唔好挨，睇黎又要fail 多次。
之前隔音做得差（其實已經加左隔音棉），搞到診症室入面講野出面都聽到D，嗰時只可以開大啲個背景音樂去遮一遮。今次將診症室縮入好多，再加上磚牆加木牆加隔音棉，隔音好好多，你見門框幾厚就知足料。
之前收銀處即係接待處即係等候區，好多病友反映冇私隱，食藥人地又知，做手術人地又知。
今次將收銀處同接待處用個玻璃門乾濕分離，病人私隱level up。
診症室今次多咗兩個，共三個，方便姑娘問症同講解入院程序。
我間房由黑廁變成有窗，有自然光舒服D。色調轉為淺色冇咁沉重。加上射燈改為酒店嵌入式，會比較舒服。X光燈箱亦都移近左病友，方便可以埋D睇片，了解自己病情。
治療室改為三邊落床，盡量個頭唔需要掉來掉去。
同時豪花80萬添置一部頂級超聲波，一於輸人唔輸陣。
上次太空館式投影廣受好評，今次進化連牆都投影埋，照顧埋同行陪診者。
上次治療室冇咩鏡，用落先發覺女士係好需要一面鏡去整理儀容，今次整到周圍都係鏡。
睇完醫生往往家人都要消化資訊同商量，之前冇位傾，傾就要大庭廣眾傾。今次整間玻璃房慢慢傾。
約嫌唔夠私隱就即刻轉磨沙俾你。
有D媽媽乳腺炎睇醫生，最好都係泵咗奶先照超聲波準確D，走廊盡頭暗門後就係育嬰室，泵完奶先檢查。
茶水間係員工福利的地方，姑娘好多時都冇飯食，再唔係度差下電就會劈炮。
咁樣搞一搞，元氣大傷，但只要比到大家更佳的體驗，我相信係值得嘅。
睇完片記得Like, subscribe, 同share我個YouTube Channel，咁我先有動力拍多D片比大家睇。
多謝收看今集＜樓盤傳真＞。係，唔記得咗講最重要嘅地址，由701室搬咗去1705室，其他所有野乜都冇變：
診症時間：（敬請預約）
星期一至五 9:30-18:30
星期六 9:30-13:30
星期日及公眾假期：休息
聯絡方法：
傳真：27710398
香港乳癌及乳病治療中心 
Congrats, Dr Ma! Your new clinic looks great! 👏👏👏
照顧周到，病人之福
馬醫生 :
你的新治療中心真 good !
你好有❤&心思惠及人 !
好彩你都無忘對自己好d。
有景望吓可舒展 !
你咁大手筆去擴充 , 必能回報 !
祝願你&靚靚姑娘們係新中心
工作愉快又安健 !
受惠者 : 炎卿
其實我覺得你舊嘅診所已經好正好鬼以人為本，估唔到可以再level up咁勁！祝工作愉快～