乳腺纖維瘤 - 其實好簡單

Posted by in Breast Disease 乳腺病

「乳腺纖維瘤」- 一個困擾好多女性嘅問題。好多人都想知乳腺纖維瘤係咩黎?有咩成因?會唔會變惡?洗唔洗做手術?手術後會唔會翻發?洗唔洗戒口?有冇咩食療?一大堆問題,其實答案好簡單⋯⋯

少女乳房有粒粒,唔通生乳癌?| 乳腺纖維瘤 - 其實好簡單|馬國權醫生

乳腺纖維瘤

「我乳房生咗粒野,朋友話係乳房纖維瘤,其實咩係乳房纖維瘤?」

好簡單,乳房/乳腺纖維瘤(fibroadenoma)係良性腫瘤。

「吓?!腫瘤?即係生癌?」

腫瘤(tumor)即係生咗舊野,可以良性(benign),可以惡性(malignant),唔一定係癌(cancer)。

「咁咩係良性腫瘤?」

好簡單,生咗舊良性嘅野

「唔好玩啦,人地話腫瘤係癌㗎!」

冇玩你,腫瘤係可以係癌,不過要惡性腫瘤先係。希望你睇完呢篇,終於明白係冇「良性癌」或者「唔係癌嘅惡性腫瘤」。呢個世界所有腫塊/硬塊就係腫瘤,可以係良性腫瘤,可以係惡性腫瘤(癌)(malignant tumor = cancer),唔好諗到太複雜。

「唔係喎,我見啲明星話自己係有惡性腫瘤,但佢冇生癌喎~」

如果佢真喺識野,而咁對記者講,就係表演緊語言偽術,或者好似高登仔咁講「佢生語癌」。

如果佢真喺唔識野,而咁對記者講,佢講錯哂係完全合乎佢明星嘅身份,因為佢唔係醫生。

如何檢查?

「咁你點知我舊野係咪良性?」

咁就要靠「乳房檢查三步曲」中臨床檢查、造影檢查、抽組織嘅資料而得出黎嘅結論。

「咁咪要睇醫生先知?」

係。唔係/唔會問多幾個朋友就知自己舊野係咪良性。

「真係完全冇得估?」

係有得估,你仲記唔記得「乳房硬塊:我係咪生乳癌?1」嗰幅圖?你都係懶得去click,upload埋比你睇:

乳腺纖維瘤英文

睇歲數:20歲樓下,90%以上係纖維瘤。年紀越大,纖維瘤機會越細,越應該睇醫生

乳腺纖維瘤病徵

「我見D人教如果表面光滑,邊界清晰,會郁嘅,就係乳房纖維瘤,啱唔啱?」

啱又啱唔晒,不過最重要嘅係唔係由你嘅角度出發。先講點解啱唔晒,所有乳房嘅病都要由乳房檢查三步曲先可以確診,點可以只憑著臨床資料就話佢係定唔係乳腺纖維瘤。再講,早期乳癌都可以表面光滑/邊界清晰/會郁嘅,咁你點分?

最重要最重要係由你嘅角度出發,你只係得一粒(最多幾粒)野,點識分辨咩叫表面光滑/邊界清晰/會郁嘅?

乳腺科醫生嘅作用就係咁,日日睇幾十人,長年累月就會知咩叫表面光滑/邊界清晰/會郁嘅,呢個病人有可疑,嗰個病人冇咩事,呢D叫經驗。所以呢D資料就算啱,對你黎講都係冇意思,因為你缺少經驗。與其紙上談兵估估吓,都係實際D搵個乳腺科醫生睇睇

乳腺纖維瘤抽針

「乳腺科醫生叫我抽針,但我聽中醫講話會撩散佢,或者令佢惡化?」

良性就係良性,唔會因為你拮吓佢而令佢變惡,唔好誤信讒言。假設抽針真係會令佢變惡,即係本身係良性都變惡性,本身惡性又係惡性,咁抽針只會有一個結果,就係惡性,咁我抽黎仲乜?貪得意?

如果抽親針都會生乳癌,世界衛生組織應該將抽針列為致癌物質,因為佢仲毒過食煙,恐怖過輻射。用吓你嘅邏輯,睇吓抽針嘅結果(真係有良性),你就知呢種說法幾咁無稽。

乳腺纖維瘤原因

「我睇咗乳腺科醫生,做哂三步曲,確診係乳腺纖維瘤,咁點解會生啲咁嘅瘤?成因係咩?」

好簡單,冇得解

「唔係喎,我上網睇話關女性荷爾蒙事㗎喎~」

嗰嗰女性都有女性荷爾蒙,點解我生啲咁嘅野而佢又冇生?佢地會話因為荷爾蒙水平嘅高低,咁點解高/點為之高?女性荷爾蒙水平日日唔同,你點量度/點量化/點比較?冇得比較你又點可以咁簡單賴晒佢?講到尾,就係好簡單,冇得解。就好似有D人靚D,有D人醜D一樣。

「唔係喎,醫生話係ANDI (Aberrations of Normal Development and Involution) 嘅一種」

Aberrations of Normal Development and Involution 係 LE Hughes 喺1987提倡嘅一種分類⋯⋯下刪一萬字⋯⋯,你無謂嘥時間去睇睇睇,因為睇完晒你都唔會明,幾時先明?當你明白呢個世界好多野喺「冇得解」嘅時候,你唔會再好似個三歲小朋友咁不斷問點解,正如你唔會再死諗爛諗有雞先定有蛋先一樣,因為冇得解。

「如果乳腺纖維瘤係冇得解,咁我仲咩要睇醫生?」

因為佢知將來你個纖維瘤會點發展,同埋可以幫你割咗佢。最驚你誤以為自己生乳腺纖維瘤,原來實質係生乳癌。

「咁個纖維瘤第時會點發展?會唔會變惡性?」

九成九唔會。

乳房粒粒,良性會唔會變惡性?馬國權醫生

「即係都有機會?」

文獻記載大嘅乳腺纖維瘤(大過5cm),變惡嘅機會係0.3%。機會率仲細過你自己本身生乳癌。即係你可以睇成佢唔會變惡性/攞你命,不過佢又唔係護身符/保你一世唔會生乳癌。你同其他女性患有乳癌嘅機會一樣,唔會因為你割左佢就安全咗,因為纖維瘤都唔會搞搞震。

乳腺纖維瘤治療

「咁點樣醫?」

良性瘤,唔會變惡,冇需要醫,觀察吓就得。

「觀察D咩?」

睇吓有冇大,會唔會斷錯症。

「我會繼續觀察粒野嘅變化,但我想問下粒野如果真係良性嘅乳腺纖維瘤,會唔會有機會自動消失?」

有機會。通常收經後就會慢慢細/自動消失,所以D人覺得關女性荷爾蒙事。不過話分兩頭,當你觀察粒野到50歲收經時,又到咗一個驚生乳癌嘅年紀,所以消失晒都會建議定期檢查/照乳房。

乳腺纖維瘤食療

「我見好多人問乳腺纖維瘤食療/飲食/藥物,有冇野可以預防纖維瘤?我生活上有冇咩要注意?」

當你知道乳腺纖維瘤係良性、唔會變惡,你就唔會/唔應該問以上問題。正如你唔會問有冇野可以預防頭髮生長,道理一樣。生活上均衡飲食,唔洗戒口,戒食雞/黃豆/燕窩係幫唔到件事,同埋係冇藥食。

「咁簡單?」

簡單邏輯,連咩成因講到尾人類都係唔知,你覺得仲可以針對成因對症下藥?醫生可以做嘅就係幫你割咗呢舊生多咗嘅野。

乳腺纖維瘤手術

「你話可以割,我見個朋友都做左手術,咁乳腺纖維瘤幾時先要做?」

當我地唔能夠百分百確定佢係良性時:大得好快/大過2cm/三步曲三個環節結論唔一致;或者你好想時:心理壓力/擔心醫生誤診/引致痛楚

「搵咩醫生割?」

要搵就搵乳腺科外科醫生割。乳腺科外科醫生可以用微創方法割佢出黎,或者盡量將疤痕隱藏喺乳暈邊,咁樣就最美觀

「咩叫微創?」

醫生會幫你局部麻醉,係乳房外側開個4mm嘅傷口,之後用把微創槍,係超聲波睇住嘅情況吓刨佢出黎。

直撃乳房微創手術現場,傷口究竟可以有幾細?馬國權醫生

「係咪人人都啱做微創?」

做微創粒野最好細過2.5cm,有經驗嘅醫生最大3.5cm度已經係極限。同埋有D位置(例如太近皮膚/邊緣位置)就唔係太適合,詳細要乳腺科醫生用超聲波評估完先知做唔做得。

「微創刨完/手術割完會唔會翻發?」

有可能。如果醫生割唔清,係可以嘅。不過更大機會係割清咗,自己乳房再生過纖維瘤,所以你見好多女仔係有好多粒乳腺纖維瘤嘅。

總結

「可唔可以總結一下我有咩要知?」

乳腺纖維瘤係良性腫瘤,要搵個乳腺科醫生做哂乳房檢查三步曲先確診到,抽針唔會令佢變惡。佢唔會攞你命,不過佢又唔係護身符,唔會保你一世唔生乳癌。平時觀察吓就得,唔需要戒口,冇咩野食療,冇藥食。如果唔能夠百分百確定佢係良性時:大得好快/大過2cm/三步曲三個環節結論唔一致,或者你好想時:心理壓力/擔心醫生誤診/引致痛楚,就搵個乳腺科外科醫生割咗佢。至於嗰啲咩成因/病徵/特徵/食療等等,忘記它吧。乳房生咗粒野,因為你缺少經驗,與其紙上談兵估估吓,都係實際D搵個乳腺科醫生睇睇啦。

相關醫學文章:

美麗以外也要注重健康!關於乳腺纖維瘤的小知識

乳腺纖維瘤手術

乳房纖維瘤是懷孕的天敵??

馬國權醫生

乳房百寶箱三:乳腺纖維瘤,原來不用怕!

乳腺纖維瘤

封面圖片來源:互聯網