乳癌醫生 ﹣ 睇咩科先啱 ?

Posted by in Doctor 醫生

要搵好嘅乳癌醫生,好多人以為「乳房喎,女人野,梗係搵婦科啦~」 咁就大錯特錯,你要嘅係一個好嘅乳腺科外科專科醫生⋯⋯

利益申報:以下僅屬個人意見,當然代表本人立場。本人乃公立醫院醫生,理應冇利益衝突。(行文之時為2013年,本人已於2017年3月轉為私人執業,僅此申報)。奈何此題目牽涉太多利益集團,總有人因此唔高興。請閣下自行分析各人嘅理據,從而作出判斷,真理總是越辯越明,好,開波⋯⋯

差之毫釐

好多人以為「乳房喎,女人野,梗係搵婦科啦~」

咁就大錯特錯,情況有如劉華、江華、劉江華,嗰名好似有關聯,殊不知差之毫釐,謬之千里。

婦科醫生專責範疇其實係女性盆腔既所有病痛,即係子宮/卵巢等有問題,就搵佢地啦,呢個正正係佢地嘅專長。但婦科醫生既訓練係唔包括乳房/液下淋巴,所以一般黎講婦科醫生見到啲乳房病痛最終都會轉介返乳腺科

乳腺科外科專科醫生

「你話乳腺科,我喺私家都見唔到呢嗰銜頭嘅?」

醒目!其實乳腺科同其他外科如大腸科/肝膽胰科等等都歸納入外科專科,所以你去私家就應該搵外科專科醫生,而唔係婦科醫生。

唔同科醫生嘅分工

「除咗外科醫生,仲有咩嘢醫生幫到我呀?」

唔同階段嘅你,有唔同既需要,以下為大致嘅分工:

1)問病歷、身體檢查、抽組織、做手術:呢啲係外科醫生嘅範疇

2)造影檢查(X光、超聲波):放射科醫生最叻

3)術前/術後化療、電療、標靶治療:由臨床腫瘤科醫生去做

4)荷爾蒙治療及定期檢查/跟進:又交返比外科醫生

5)其他幕後會用到,而又非常少接觸嘅醫生:麻醉科醫生(負責手術麻醉),病理科醫生(負責睇顯微鏡出病理報告)

所以成個流程,你應該搵外科醫生先,最終亦都係佢埋尾。咁實際係點應用呢?

實際應用

「我冇錢㗎,要睇公立醫生,都唔到我揀醫生㗎啦,關我咩事?知黎仲乜?」

係公立醫院,以上各個醫生已經有清晰既分工/崗位,情況就好似富士康做iPhone啲女工咁,你入得嗰條輸送帶(嗰間公立醫院),就係由嗰組女工(醫生)做㗎喇。但問題係邊間廠房(公立醫院)手工好啲,邊一條輸送帶(邊一組醫生)快手啲條隊短啲(快啲做手術),呢啲係可以打聽返黎。仲有,你揸住封轉介信,都唔好走去條輸送帶中間(臨床腫瘤科)度排吖,浪費自己時間,排到你先至發覺要由頭係輸送帶前(外科醫生)再排過。

「我好彩有買保險,咁多私家醫生點揀呀?」

情況就好似裝修咁,唔係太高要求嘅,就揀個好既個判頭(外科醫生)得㗎喇,佢地通常有哂自己班底(放射科/麻醉科/病理科/臨床腫瘤科),自然會叫你去邊度邊度。如果冇晒錢保險包唔晒而裝修爛尾,就返去公立醫院埋尾囉。

「我喺闊太尼,錢唔係問題,一定要最好!」

要生活態度,要品味裝修,所有嘢富然就要一絲不苟。除咗要揀個好既判頭之外,仲要揀最好嘅設計師/木工/水電工/油漆師傅,總之全部都要名醫。

當你知道原來無論公家私家,一開始要搵嘅都係一個好嘅乳腺科外科專科醫生,下一個問題就係好多人想知,但網上又冇咩人講嘅「錢」字⋯⋯

香港乳癌醫生 ﹣ 睇公立好?睇私家好?醫生攻略1

封面圖片來源:互聯網