乳癌荷爾蒙標靶藥CDK4/6抑制劑-不可不知的新希望

Posted by in CDK 4/6 inhibitor CDK 4/6 抑制劑

乳癌荷爾蒙標靶藥CDK4/6抑制劑-一個既熟悉又陌生的名字,好多人將佢同HER2型的標靶藥混淆,或者以為係荷爾蒙藥,誰不知差之毫釐,繆之千里。原來管腔型乳癌患者的新希望已經俏俏誕生!究竟CDK4/6抑制劑係咩黎?效果如何?又有咩副作用?價格又係點?點先可以得到資助?Palbociclib/Ribociclib/Abemaciclib 三隻CDK4/6抑制劑中揀邊隻好?千祈唔好錯過救你一命嘅新希望⋯⋯

管腔型乳癌

講得做管腔型乳癌患者的新希望,當然要了解下自己係咪管腔型乳癌先。管腔型乳癌即係等如荷爾蒙受體陽性乳癌(即係是但ER或PR陽性已經係)。仲係唔明的話,可以參考返以前D文章:

管腔A型管腔B型乳癌 - 不吸眼球的甘草

荷爾蒙治療的發展歷史

「喂,我係管腔型乳癌呀,繼續講落去⋯⋯」

傳統黎講,對荷爾蒙受體呈陽性反應,梗係用荷爾蒙治療,由1977年開始,舊藥Tamoxifen已經用咗幾十年都仲維持不可動搖的地位,你就知係呢方面發展唔係太迅速。及後到1995年先開始有第一隻新藥AI(1995 Anastrozole,1997 Letrozole,1999 Exemestane)的出現,到2002年就到第四代荷爾蒙針Fulvestrant(Faslodex)的突破。事隔13年後,我地終於迎來再一次的突破,就係今日我地嘅主角CDK4/6 inhibitor (CDK4/6抑制劑)

CDK4/6抑制劑

「咁咩係CDK4/6抑制劑?」

就係一D口服藥去抑制CDK4/6。唔好噓住,雖然嗰解釋好似好廢咁,但你又唔可以話我錯。

「okok,咁咩係CDK4/6先?」

CDK4/6即係細胞周期蛋白依賴激酶Cyclin-Dependent Kinases CDK4 同 CDK6。原來我地D細胞要生長要分裂,係要經歷一個生長週期,就好似揸車由一個地方去另一個地方咁,係要經歷一段旅程。而CDK4/6就係呢部車嘅油門,越踩油門,部車就越快,即係細胞分裂越快,癌細胞就係鍾意快。

原來對於管腔型非HER2型的乳癌,呢個CDK4/6油門,就係佢地嘅生長動力、佢地嘅命脈。由於特定地針對呢個點,同標靶藥導彈的特性好似,所以我地亦可以視佢為乳癌荷爾蒙標靶藥,不過此荷爾蒙標靶藥不同彼的HER2標靶藥,唔好比個名混淆左。

「咦,明明地,咁我地唔踩油咪得囉?」

聰明!不過我地要煞停呢部車(等乳癌細胞唔好分裂),除咗唔好踩油門之外,最好就更係踩踩brake,CDK4/6抑制劑就係呢部車嘅brake

CDK4/6抑制劑

圖片來源:互聯網

「咁好簡單姐,幫我踩盡個brake吖~」

當然唔止咁簡單,考吓你吖,除咗踩brake之外,仲可以點整停㗎車?

「我諗諗先⋯⋯」

唔等你喇,開估喇,就係唔好入油(電車就唔好叉電)。

「喺喎~」

荷爾蒙就係汽油,所以車裡面踩brake時(CDK4/6抑制劑),我地要配合車外面唔好入油(抗荷爾蒙治療),咁我地就可以最有效煞停呢部車。

CDK4/6抑制劑大比拼

由2015年第一隻CDK4/6抑制劑Palbociclib Ibrance)哌柏西利(愛搏新)開始,到2017年我地已經有多兩個競爭對手RibociclibKisqali)瑞波西利同埋AbemaciclibVerzenio)阿貝西利(D英文名雖然好難讀,但中文譯名又譯得幾好,乜乜犀利物物犀利,咁隻藥確實係犀利)。呢三隻CDK4/6抑制劑雖然暫時冇直接對頭對比,唔可以話邊隻跑得出,但佢地背後嘅開發研究,會促使醫生係特定情況傾向用某一隻,下面會詳細講講。

由於開發CDK4/6抑制劑的研究對象開頭集中喺收經後女士,所以暫時Palbociclib FDA只係批比收經後的女士用。而後來者Ribociclib就有一個叫MONALEESA-7(D研究名稱/內容我唔預一般人去深究,不過都寫出黎等大家如果有需要時,都知道D資料嘅來源,因為呢方面嘅發展太快,好容易就今天的我打倒昨天的我)的研究針對未收經的女仔,所以FDA就批Ribociclib比收經前或後的女士都用得,所以後生女仔就會傾向用Ribociclib

「明明地,收經後就Palbociclib,收經前就Ribociclib ,咁Abemaciclib呢?」

問得非常之好。由於新藥開發一般都需要勇者去試先,所以開初一定係喺擴散性嘅乳癌病人身上用先,時至今日20211月,CDK4/6抑制劑美國FDA主要都係批比荷爾蒙受體陽性非HER2型的擴散性(第四期)乳癌用。但當擴散性乳癌病人都用得咁好時,醫生就會想推而廣之用係早期一D嘅乳癌病人身上。而Abemaciclib就係唯一一隻,暫時有數據(monarchE trial)話佢係第二第三期荷爾蒙受體陽性非HER2型的乳癌病人身上都有幫助嘅CDK4/6抑制劑,Palbociclib個研究(PALLAS Trial)喺呢方面暫時顯示唔到有幫助。

假以時日,相信CDK4/6抑制劑嘅用途只會越來越闊,但今日我地集中返個討論去第四期乳癌度先。

另外如果係荷爾蒙受體陽性但同時又係HER2型的乳癌呢,一般係做化療加HER2標靶藥,因為個油門關鍵在於HER2呢條Turbo路徑,CDK4/6抑制劑暫時唔啱洗住

CDK4/6抑制劑實戰攻略

「咁點實戰法?」

當確認咗自己係荷爾蒙受體陽性非HER2型的擴散性(第四期)乳癌後,我地第一步要做的係評估D擴散係咪有即時生命危險,我地叫呢Dvisceral crisis

「喂,我唔會知我有冇即時生命危險㗎喎~」

呢個要靠醫生評估(例如抖氣唔順、肝酵素爆升),我唔預你DIY,所以要問返自己醫生。

「Ok,我會問返自己醫生,咁點解評估呢樣野咁緊要?」

原來有即時生命危險,係合適用化療行先,盡快撲熄D火。相反如果冇即時生命危險,係合適用荷爾蒙治療加CDK4/6抑制劑先,咁樣反而最有效得黎又最少副作用

「咁第二步又點做?」

第二步就分收咗經未?因為呢步限制咗我地抗荷爾蒙治療(斷癌細胞D油)嗰度出咩牌。

收咗經嘅,第一線就用AICDK4/6抑制劑。另一選擇就FulvestrantCDK4/6抑制劑

未收經嘅,第一線就抑制卵巢(停經針、電卵巢、切卵巢)加AITamoxifenCDK4/6抑制劑Ribociclib

CDK4/6抑制劑效用

「咁睇黎都係AI加CDK4/6抑制劑為主,其實佢地有幾有效呢?」

要知隻抗癌藥幾有效,我地要了解兩個重要嘅概念,Progression-free survival(PFS 冇惡化存活率)同埋Overall survival(OS 整體存活率)。

CDK4/6抑制劑

圖片來源:互聯網

人生就係一場馬拉松,人人都有佢個人嘅終點,有人跑到10公里已經到截龍時間比人接上回收車,有人跑到20公里先比人接上車,亦有好多人可以跑到42公里終點完成賽事。無論點都好,場賽事始終會完。

乳癌患者係弱者,去參賽就如負重去跑,當然冇人咁跑得,好多時未到42公里終點就已經比人接上車。

Overall survival(OS 整體存活率)就係個人嘅終點,如果隻藥係有效嘅,就應該能夠將個人嘅終點推後、將截龍嘅時間推遲,如果可以推到42公里的終點站就最好。呢個係最有意思的指標。

Progression-free survival(PFS 冇惡化存活率)就係幾時出現接人嗰架回收車,如果隻藥真係唔能夠將個人嘅終點/截龍嘅時間推遲,我地都希望佢可以推遲接人嗰架車出現嘅時間,起碼等我地多D時間欣賞沿途嘅風光,打下咭都好吖。呢個係退而求其次嘅目標。

「好似明明地⋯⋯」

今時今日(2021年1月)我地已經有好多研究證明到CDK4/6抑制劑能有效穩住個病情,等佢唔好惡化,即progression-free survivalD,咁我地就可以多D有生活質素嘅時間。由於progression-free survival的效果真係好突出,所以AI加CDK4/6嘅組合已經一早跑出,成為荷爾蒙受體陽性非HER2型的擴散性(第四期)乳癌首選藥物。

例如Letrozole vs Letrozole + Palbociclib(PALOMA-2  Trial),穩住病情的日子(progression free survival)由14.5個月大幅上升到24.8個月。

另一個差不多的研究Letrozole vs Letrozole + Ribociclib(MONALEESA-2 Trial),穩住病情的日子(progression free survival)由16個月大幅上升到25.3個月。

至於黄金標準整體存活率(overall survival),我地都開始有數據話CDK4/6抑制劑係得。

例如Fulvestrant vs Fulvestrant + Abemaciclib (MONARCH 2 Trial),整體存活率就由37.3個月上升到46.7個月。

CDK4/6抑制劑副作用

「咁CDK4/6抑制劑好似好得喎,咁佢有咩副作用㗎?」

由於佢係踩brake,正常細胞的分裂都會比佢踩停,所以最常見的副作用就係白血球低(neutropenia甚至發燒(neutropenic fever)。肚痾(常見於abemaciclib)亦都係常見副作用之一,另外佢仲可以搞到累、作悶、甩頭髪、肝酵素高(常見於 ribociclib)等。相比起化療,呢D簡直係小巫見大巫。

CDK4/6抑制劑費用

「咁副作用都OK,但CDK4/6抑制劑實制幾多錢先?」

又到傷感情的時刻,始終我地阿爸唔係李嘉城,我地始終要睇餸食飯。

28日為一個週期,Palbociclib同Ribociclib都係一日食一次,食三個星期停一個星期,而Abemaciclib就早晚食一次唔洗停(唔洗停係因為佢少D搞到白血球低)。每週期兩萬幾到三萬幾度(視乎你食邊隻、咩劑量、邊度買咁)。假設你好似研究D例子咁,平均食兩年,即係要成72萬。

「咁好貴喎,老問題,有冇資助先?」

有,其實都算幾多支援:

Palbociclib Ibrance)哌柏西利資助

呢隻藥由於出得最耐,關愛基金係有資助嘅(http://www.ha.org.hk/visitor/ha_visitor_index.asp?Content_ID=208076&Lang=CHIB5&Dimension=100&Parent_ID=206049&Ver=HTML)(項目13)。至於可以資助到幾多錢,就靠你地探子喺下面留言回報,始終我已經離開咗公營系統一段時間,政策嘅野唔夠你地update。

另一方面,聖雅各福群會惠澤社區藥房有三個資助計劃比公立醫院病人:
1)有資產審查的(個人可動用資產少於120萬):自己出兩週期,佢送一週期,第18週期之後佢送曬。
2)冇資產審查的封頂式資助計劃 :自己出頭18週期,第19週期之後佢送曬。
3)銜接資助計劃:頭18週關愛基金出,第19週期之後佢送曬。

有單張自己睇,呢D計劃又係五時花六時變,因為藥廠隨時改條款,如果第時更新咗,自己去聖雅各福群會惠澤社區藥房個網頁搵最新資訊:

https://charityservices.sjs.org.hk/uploads/表格及單張/單張/腫瘤科藥物資助單張/Palbociclib_IBRANCE_SJS_Booklet_20.pdf

Ribociclib Kisqali)瑞波西利資助

2020年關愛基金亦都已經覆蓋到呢隻藥(http://www.ha.org.hk/visitor/ha_visitor_index.asp?Content_ID=208076&Lang=CHIB5&Dimension=100&Parent_ID=206049&Ver=HTML)(項目17)。另外聖雅各福群會惠澤社區藥房一樣都有三個資助計劃比公立醫院病人:

1)有資產審查的(個人每月入息少於60000):頭4個週期自己出一週期,佢送一週期,即係最多送2週期,跟住自己出到20週期,之後佢送曬。
2)冇資產審查的封頂式資助計劃 :自己出頭25週期,第26週期之後佢送曬。
3)銜接資助計劃:頭18週關愛基金出,第19週期之後佢送曬。

有單張自己睇:

https://charityservices.sjs.org.hk/uploads/表格及單張/單張/腫瘤科藥物資助單張/Ribociclib_KISQALI_SJS_leaflet_19.pdf

Abemaciclib Verzenio)阿貝西利資助

由於佢係最遲黎嘅CDK4/6抑制劑,所以時至2021年1月關愛基金都仲未覆蓋到呢隻藥。但觀乎佢係第二第三期乳癌病人的重大成就,佢會係一匹來勢洶洶嘅黑馬,被納入計劃只係時間問題。而家只可以靠聖雅各福群會惠澤社區藥房嘅資助計劃:

1)有資產審查的(個人可動用資產少於150萬):自己出四週期,佢送一週期,第18週期之後佢送曬。
2)冇資產審查的封頂式資助計劃 :自己出頭18週期,第19週期之後佢送曬。

個計劃新到連單張都未有。

結語

對於荷爾蒙陽性HER2陰性的擴散性乳癌,冇即時生命危險的話,環芳香抑制劑Aromatase inhibitorAI)加埋荷爾蒙標靶藥CDK4/6抑制劑(PalbociclibRibociclibAbemaciclib)就係2021年的最新皇道。如果未收經用唔到AI的話,就抑制卵巢等自己可以用到AI,或者配合Ribociclib就得。只要我地耐心等待,比D時間呢幾隻明日之星,用途只會越來越多,控制管腔型乳癌更有把握。如果想幫手救人,就幫我share篇文出去,介紹呢幾個明日之星比有需要的朋友識。下次再有好野同你分享時再見,byebye。

 

有唔明?係下面寫低佢,我會盡量解釋你聽⋯⋯

封面圖片來源:互聯網