乳癌手術 1 - 開刀我有咩可以揀?

Posted by in Surgery 手術

「醫生,我決定做乳癌切除手術喇,開刀時可唔可以割少D?幫我保留乳房?」

「我見D病友割晒格勒底淋巴後隻手腫晒,可唔可以唔割淋巴/割少D?」

乳癌手術咁多款,你應該點揀?又局部割,又全個乳房割,又前哨淋巴,又全淋巴割除,花多又眼亂。一連幾篇帶你走出迷宮,揀一個明智嘅選擇,做一個唔會後悔嘅決定⋯⋯

乳癌手術:開刀我仲有得揀?馬國權醫生

 

乳癌手術:做咩切我啲淋巴?馬國權醫生

 

前哨淋巴有感染,一定要切晒佢?馬國權醫生

 

未知點重建乳房前,千祈唔好做全乳切除。馬國權醫生

 

乳癌手術洗唔洗拆線?馬國權醫生

 

乳癌手術洗唔洗戒口?馬國權醫生

 

醫生要我全切,全乳切除痛唔痛?馬國權醫生

 

乳癌手術後運動,咁樣做就啱⋯⋯馬國權醫生

 

乳癌手術後手臂麻痹,原因竟然是⋯⋯馬國權醫生

 

重點一:乳癌手術有兩大部份

一係乳房,二係腋下淋巴

乳癌手術方式

乳癌手術時間

 

重點二:乳房部份基本上有兩個元素

一係乳癌割除,二係乳房重建

 

重點三:乳癌割除有兩個選擇

一係局部乳房割,二係全個乳房割

局部割主要為咗保留乳房,省卻乳房重建,不過唔係人人都做到,有咩條件?去乳癌手術2-保留乳房手術,我做唔做得?睇睇。

咁如果我有得揀,保留乳房好?定全個乳房割好呢?去乳癌手術 3 - 保留乳房手術 ,我揀唔揀好?睇睇。

如果揀全個乳房割,你就要諗開刀時重唔重建返嗰乳房出黎。點決擇?去乳癌手術 4 - 乳房重建手術 你要知睇睇。

如果揀全個乳房割,但又唔揀乳房重建,就要去睇睇義乳的秘密 - 重建乳房手術外的另一片天

乳癌手術醫生

重點四:抽針結果影響手術幅度(洗唔洗做淋巴)

格勒底淋巴咁洗唔洗做呢?視乎你個乳房腫瘤有冇侵蝕性而有兩個情況:一係冇侵蝕性(即原位癌),割唔割淋巴就選擇性,因人而異;二係有侵蝕性(非原位癌),淋巴就一定要割,割幾多就因人而異。仲記唔記得我喺「乳房檢查 三步曲3 - 乳房抽組織檢查」中講過,手術前一定要抽粗針去分別喺咪侵蝕性癌,其中一個用途就係決定開刀時洗唔洗割格勒底淋巴。

乳癌切除手術

重點五:割淋巴又有兩個選擇

一係割前哨淋巴加減全淋巴割除,二係直接全淋巴割除。醫生有得比你揀,就揀前哨淋巴,就係咁簡單。

乳癌手術 5 - 前哨淋巴結活檢術?咩黎㗎

割淋巴手術

重點六:四個基本組合揀一個,再加減增值服務

撇除乳房重建,乳癌手術有兩大部份(乳房同淋巴),每個部份有兩個可能性(局部乳房割/全個乳房割;前哨淋巴/全淋巴),二乘二即係有四個開刀組合/可能性:

1)局部乳房割+前哨淋巴

2)局部乳房割+全淋巴

3)全個乳房割+前哨淋巴

4)全個乳房割+全淋巴

答返標題條問題「開刀有咩比你揀」,就係以上四個常餐揀一個,至於其他增值服務(乳房重建、手術超聲波、急凍切片等等)就因人而異。

之後會一連幾集,仔細啲講吓以上選擇⋯⋯

乳癌手術 2 - 保留乳房手術 ,我做唔做得?

乳癌手術 3 - 保留乳房手術 ,我揀唔揀好?

乳癌手術 4 - 乳房重建手術 你要知

乳癌手術 5 - 前哨淋巴結活檢術?咩黎㗎

乳癌手術 6 - 專做乳房手術醫生的增值服務

義乳的秘密 - 重建乳房手術外的另一片天

有唔明?係下面寫低佢,我會盡量解釋你聽⋯⋯

封面圖片來源:互聯網