真人實測BioNTech復必泰新冠疫苗,乳癌病人打唔打得?

Posted by in 其他

呢場疫症搞咗成年幾,真心累,係時候黎個了結。當政府開放復必泰疫苗預約,我即刻好似人地捕演唱會飛咁衝去登記,今日完成第一針,同大家報告一下⋯⋯

BioNTech復必泰新冠疫苗打針流程

真人實測BioNTech復必泰新冠疫苗,乳癌病人打唔打得?

個人感覺非常良好,成個過程井然有序,我去九龍塘教育服務中心打,登記只係check一check身分證同SMS,睇一睇單張,填份簡單的同意書,再喺等候區睇一睇片,大概20分鐘就到我,之後入去注射房,登一登記醫健通就可以開始,姑娘手法純熟,用最幼嘅針咀(用淘寶嘅說法:同高官同款),拮落去嘅感覺分分鐘仲舒服過打平時D流感針。雖然我知道呢針唔係興奮劑,但居然真係有興奮嘅感覺,因為我知道我即將同新冠病毒告別

BioNTech復必泰新冠疫苗

圖片來源:互聯網

之後就喺休息區等15分鐘睇吓有冇過敏反應,冇問題就順利完成。夜晚收工返到屋企,手臂確係有少少赤赤地。

乳癌病人打唔打得新冠疫苗?

可能個個人都唔想孭飛,個個都叫你問返自己醫生意見。阿嬌講得啱,個個都問醫生,唔通個個都想問醫生咩,我有醫生比我問先得㗎。我近日嘅診症日常已經變咗疫苗問答大會,以下就係病友嘅日經題(先旨聲明,我唔係疫苗專家,我識嘅野唔比你多,我只係用小市民街頭智慧去諗):

「打科興好?定打復必泰好?」

喺香港呢個咁兩極化嘅社會,迫人埋牆問人啲咁尷尬嘅問題,好衰㗎你!口裏說不/得,身體卻很誠實,我都真人實測咗咯(用淘寶嘅說法:同袁國勇教授、香港大學醫學院院長梁卓偉教授、中文大學醫學院院長陳家亮教授、許樹昌教授同款),你明嘅,自己睇路。

「乳癌病人打唔打得?」

呢個要分開剛確診同康復咗去睇。

剛確診乳癌嘅你

剛剛確診嘅你,就住唔同嘅治療階段,我睇到有以下要注意嘅地方:

「我啱啱確診,等緊手術,打唔打得?」

等緊手術唔好打「住」,因為打任何疫苗針,都有機會發燒嘅。係呢個咁敏感嘅時刻,發燒嘅話好有可能醫院唔比你做手術要推遲,咁就影響到正規治療。

「我做完手術,等緊/做緊化療,打唔打得?」

做緊化療免疫治療唔好打「住」,化療係會影響個免疫系統,唔好計有冇咩副作用,醫生都擔心打咗針都未必可以產生足夠抗體,咁就浪費咗個打針quota(要記得疫苗暫時全球都仲係中央配給緊嘅戰略物資,幾時先可以輪第二轉再打冇人知)。仲未計頭先講發燒個問題,你知啦,化療時發燒醫生幾緊張啦,又叫你即刻去急症室又盛。所以我個人傾向睇定D先,都係等多3-4個月姐,不如完晒化療先去打,不過外國有D指引(例如歐洲腫瘤學會、美國疾病管制與預防中心)話打得,都係好處大過風險、可以接種不過數據有限等等D官腔野。

「我完成晒手術同化療㗎喇,淨係3個星期打一次標靶姐,又打唔打得呢?」

標靶治療(講緊Herceptin/Pertuzumab,不包括有化療成份嘅TDM1)緊可以打,睇唔到有咩問題,跟返康復者要注意嘅事項去決定。

「我唔洗標靶,但要電療又點呢?」

電療可以打,睇唔到有咩問題,跟返康復者要注意嘅事項去決定。

「我完成咗D治療好耐,不過仲食緊抗荷爾蒙藥,咁我又點做好?」

荷爾蒙治療可以打。一般抗荷爾蒙藥講緊都食五至十年,雖然佢哋同疫苗之間有冇咩互動冇人知,始終疫苗都係得一年貨仔嘅新野,但要等五至十年完成晒荷爾蒙治療先去打又好似講唔通,高官出場喇,自己衡量。我個人覺得安全,帶返個頭盔先,呢個係純感覺,唔科學嘅

圖片來源:立場新聞

乳癌康復嘅你

同正常人一樣,我係鼓勵你去打一隻有效嘅疫苗。一般要注意嘅野同平時流感針差不多:

1)有冇過敏反應

2)有冇出血傾向,例如服用薄血丸,阿士匹靈等。

以下就係打復必泰之前會比你睇嘅官方單張:

BioNTech復必泰新冠疫苗

或者懶就睇一圖看清簡單版:

BioNTech復必泰新冠疫苗

其實講到底,我地大家都想盡快回復正常生活,我地都唔想24小時帶口罩,我地都想小朋友返學,我地都想去旅行,我地都想出街食飯,我地其實只係想場疫症盡快完結。所以約定你去打一隻有效嘅新冠疫苗,以上資訊如果第時回望有錯就打我個頭,2021年3月12日小市民真人實測報告完畢。