3D立體乳房造影-3D?2D?睇真D!

Posted by in Investigation 檢查

唔知由幾時開始,「3D」呢兩隻字對我地好似有特別魔力咁,所有野加個「3D」就即刻覺得好正好正,頓時升格十倍。細路仔去迪士尼睇電影要3D,後生仔打機又要3D,連普通睇電視都要3D。醫生都係人,所以逃唔出萬有引力,今次乳房造影都加個「3D」比佢,係咪頓時覺得正咗好多先?由於亞視已經執咗笠,今次唔係由大姐明帶你睇真D,而係由breasthk同你睇真D⋯⋯

一片睇清乳房三大造影,6分鐘教你唔好照錯|馬國權醫生
夾胸2D又3D,究竟我要照邊D?馬國權醫生

2D乳房X光造影

未講3D之前,先由淺入深,講咗咩係2D先(拿拿拿,我都話3D對你有特別吸引力㗎啦):

傳統嘅乳房造影就係將一個立體的器官(乳房)壓成平面,再照一張X光睇下裡面有冇問題。「壓」呢個過程就係你成日聽到嘅「夾胸」。

2D乳房造影

圖片來源:互聯網

一個立體器官裡面如果有問題,我地要定位,自然要有三個軸(X axis,Y axis同z axis)的座標,所以醫生會幫你夾兩個角度,一個側側地睇(MedioLateral Oblique view, MLO),一個鳥瞰式咁睇(Cranial Caudal view, CC)。

乳癌檢查方式

圖片來源:slideshare.net

乳癌檢查費用

圖片來源:slideshare.net

 

「明明地,兩個角度定到位咁仲有咩問題?」

將立體變成平面咁睇,諗都諗到有問題,就係唔同層次的影像會疊埋曬一齊(即係你個影遮住我個影),之後有兩個問題會發生:一係有事的地方被前後組織遮住咗(即係有事但偵測唔到),一係就調返轉,明明冇事但D影像疊埋一齊誤以為個度有舊野(即係冇事當有事)。兩個情況都係唔理想的,一個就錯失左及早診治的機會,一個就明明冇嘢但嚇餐飽。

「咁好大問題喎⋯⋯」

傳統醫生如果有懷疑但唔肯定,通常會叫病人返黎翻照,例如Magnification view/spot compression view等等,希望加大D壓力、放大D、唔同角度等等去睇真D。又或者輔以其他方式(例如超聲波、磁力共振),去睇清睇楚。

無論用咩方法都好,當病人一收到醫生/醫院電話要翻照,三魂都一定唔見咗七魄,以為自己呢次死喇死喇實出事喇,原來好多時呢D recall只係技術局限照唔清楚,並唔係自己諗到咁灰咁。

為咗突破呢種局限,就輪到我地呢集主角出場,登燈登櫈,3D立體乳房造影,等我帶大家睇真D。

3D立體乳房造影

「咁3D立體乳房造影又係咩黎呢?洗唔洗帶3D眼鏡睇?」

隨著醫療科技大躍進,2011年推出咗第一代的3D立體乳房造影(Tomosynthesis),佢嘅原理係希望用唔同角度(正負7.5度)去望個乳房(立體器官用返立體的方式去評估),咁就可以分辨出唔同層次的組織(原理有如電腦掃描CT scan咁,將乳房每1mm切開一個斷層黎睇,就好似一本書有好多頁,醫生就遂頁遂頁睇,所以係唔洗帶3D眼鏡睇嘅),希望可以解決有病變但被人遮住,或者冇野以為有野的問題。

「咁好正喎,點解唔大規模採用嘅?」

第一代Tomosynthesis有兩大問題,第一係價錢,因為傳統乳房造影只係睇四張X光片,但3D立體乳房造影動輒要睇成幾十張片(1mm厚一張片),撰寫報告嘅人力物力要求大大增加,成本自然好可觀。

第二係輻射量,因爲除左要照多角度之外,傳統2D嗰兩個角度(MLO,CC)都要照,所以輻射量大概係傳統乳房造影的兩倍(因爲佢要照一套3D,之後再照一套2D,廠叫呢個做Combo Mode)。

一聽到貴,二聽到輻射,三再加上缺乏大量數據支持(因為新),所以阻礙咗佢大規模嘅發展(其實都叫發展得好迅速㗎喇)。

第二代3D立體乳房造影

「咁好可惜⋯⋯」

又唔洗咁快可惜住,有得第一代自然有第二代(2013年推出),而家輻射嘅問題已經9成獲得解決,3D立體乳房造影的輻射量已經同傳統乳房造影相約。佢已經唔洗再分照一套3D一套2D,個系統已經進步到只照一套3D,就已經可以後製合成做2D片(用一個叫C-View嘅軟件後製,廠叫呢個做TomoHD Mode)。照多咁多角度,但輻射量竟然差不多,呢個係一個好驚人的進步。

「咁好,咁公立醫院有冇得照呢?」

一間間,有D教學醫院/龍頭醫院有,有D資源冇咁豐富嘅醫院當然暫時未有。

「咁如果我自己出去照又幾貴?」

如果係私家做3D立體乳房造影加超聲波,大概$3800,相比起傳統乳房造影加超聲波的$2200,仲係貴咗一節。

「貴咁多,仲有冇其他賣點先?」

3D立體乳房造影仲有標榜冇咁痛,因爲唔洗好似傳統咁夾到扁晒,對於一D怕痛的女士係好吸引嘅。

而且佢用電腦合成(C-View)的後製2D片,係仲清過直接照的2D片(真係竟然咁都得),其實都唔難理解,就好似手機HDR(high dynamic range)相咁,影幾張相合成後的色域係好過直接影一張相一樣:

3D立體乳房造影

圖片來源:lowdose3d.com

上圖FFDM 2D即係傳統2D乳房造影直接照出黎嘅片,C-View 2D即係3D後製合成2D片,你係右上角放大嗰度會見到C-View 2D睇鈣化點仲清淅過傳統直出片,真係要寫個服字。乳癌檢查醫院

圖片來源:lowdose3d.com

至於呢幅圖呢就顯示指住嗰舊癌,又係C-View完勝。

另外D研究仲話可以減低回頭翻照率(recall rate)達40%,同增加發現侵蝕性癌症率(invasive cancer detection rate)達41%,呢個又係好重要嘅賣點。

大勢所趨

當日數碼乳房造影(digital mammography)取締菲林乳房造影,情況就有如數碼相機取締菲林相機一樣。今日的3D立體乳房造影,就有如連手機都做到高速連拍一樣,要捕捉小朋友笑容一刻,點都好過冇連拍的手機,取締2D乳房造影,實在是大勢所趨,價錢就係最後唯一的障礙。

相關醫學專欄:誰是壓死2D乳房X光造影的最後一根稻草?

馬國權醫生

有唔明?係下面寫低佢,我會盡量解釋你聽⋯⋯

封面圖片來源:亞洲電視<今日睇真D>截圖