乳癌治療時間 - 我需要用咩方法醫?2

Posted by in Treatment 治療方法

承上回講到乳癌治療方法我地有五大法寶:手術化療標靶治療電療荷爾蒙治療

下個問題就會問「咁我需要用咩方法醫先?如果唔關我事嘅,等我唔洗驚定先吖,就好似入戲院睇鬼片咁,我驚就驚咗呀,車~原來冇鬼嘅」

呢一篇「乳癌治療時間」會黎一個乳癌治療方法嘅總結,話比你聽做邊樣先同埋用你幾多時間⋯⋯

唔知你仲記唔記得喺「乳房抽針檢查 - 乳房檢查三步曲3」中我教大家抽粗針嘅好處,唔記得就返去再重溫⋯⋯

我話抽粗針可以知道癌細胞同啲藥夾唔夾,咁即係咩意思?

HER2/ER型乳癌

每個乳癌細胞都會有標靶藥受體(HER2受體),同埋荷爾蒙受體(ER受體)。對呢兩種治療有冇反應,就視乎受體水平有幾高。受體水平越高,即係對種藥越有反應。越有反應即係點?即係同種藥越夾,夾又點?夾即係如果你肯跟醫生指示去打標靶藥/食抗荷爾蒙藥,你會少啲復發,命都長啲,真係好似米雪話齋「日日keep住食,藥箱都變成首飾箱」。詳細關於受體水平嘅野交返比醫生,簡單啲講你只要知/只要識問醫生「我既癌細胞有定冇HER2受體荷爾蒙受體?」

攻略時間:

1)有HER2受體+腫瘤(Tumor)大過1cm->化療標靶

伸延閱讀:
乳癌標靶治療 - 乳癌HER2型點樣揀?
乳癌雙標靶治療-HER2型乳癌的春天
乳癌類型巡禮 - 與你細數HER2型乳癌的歴史

2)有HER2受體但腫瘤(Tumor)細過1cm->要睇埋其他因素(例如淋巴情況)先決定洗唔洗化療加標靶

3)冇HER2受體->冇需要標靶

4)有荷爾蒙受體->食藥

伸延閱讀:乳癌荷爾蒙治療 - 點解我仲要食藥?

5)冇荷爾蒙受體->唔洗食藥

「講咗咁耐都好似冇提過手術/化療/電療咁嘅?」

有追開嘅/順住去睇嘅,仲記唔記得喺「乳癌分期-我係早期定末期?」中講過TNM 分期同埋救火比喻?

如果唔記得/冇追開嘅,去返嗰篇睇完先返黎⋯⋯

乳癌治療時間表 

搞掂拿?好,我地繼續講⋯⋯

做唔做手術/化療/電療就睇你係第幾期

癌症分五期,大方向如下:

乳癌零期原位癌

冇機會擴散去其他器官,成功醫好嘅機會最大,主要都係手術加減電療。醫好後睇吓洗唔洗食5年藥

乳癌零期治療攻略-原位癌有咩咁特別?

乳癌症状

乳癌一期

早期侵蝕性癌,有機會抗散去其他器官,雖然機會唔大。要醫得好,就要喺佢未擴散前處理好。主力都係手術加減化療標靶治療電療食藥

乳癌一期治療攻略 - 早期都要做化療?

乳癌成因

乳癌二期

都仲算喺早期侵蝕性癌,有機會抗散去其他器官,機會大過一期。如果可以喺佢未蔓延之前處理好,都有得醫,主要都仲係先手術,再加化療標靶治療,加減電療食藥

乳癌二期治療攻略 - 做手術先?做化療先?

乳癌治療

乳癌三期

屬於後期,啲癌細胞已經擴散去淋巴,好大機會會擴散開去,先化療標靶治療,再做手術,術後電療加減食藥

乳癌三期治療攻略 - 醫好機會大唔大?

乳癌一期

乳癌四期

屬於末期,啲癌細胞已經由淋巴擴散致其他器官,主要都係化療標靶治療加減食藥。手術同電療呢啲局部治療,個別情況先用到。

乳癌四期治療攻略 - 末期仲有冇得醫?

 

點問醫生?

你要問醫生幾樣野:

未做手術前:有冇HER2受體?有冇ER受體?臨床係第幾期?

做咗手術後:HER2受體/ER受體情況有冇轉?病理學上係第幾期?(因為割出黎後顯微鏡底下睇可能同術前臨床評估有出入)

之後就再對返以上各項,大致估到有咩治療要做。

同你醫生建議冇出入,起碼你都有定心理準備。

同你醫生建議有出入,你就要問淸問楚。

 

下一篇我會以西醫嘅角度去睇吓乳癌嘅中醫治療⋯⋯

乳癌中醫治療 - 我唔想做手術,中醫得唔得㗎?

 

封面圖片來源:互聯網