乳癌分期 ﹣ 我係早期定末期?

Posted by in Staging 分期

「醫生,我乳癌咩期數?早期?末期?有冇得醫?」

要打贏呢場硬仗,我地要有一個好好嘅作戰計畫。知己知彼,第一個好重要嘅問題就係「乳癌分期」。

就好似消防員(醫生)救火(醫癌症)咁,第一個問題就係火種源頭(癌症源頭)係邊度?有邊啲通道/樓層(邊啲淋巴/器官)受影響?呢家工業大廈喺幾多級大火(乳癌咩期數)?我地要派幾多人/帶幾多架撐(用咩治療:手術/化療/電療/標靶)入去?淋息啲火先處理火種(術前化療)?定係先處理火種後救火(術後化療)?

TNM 三大元素

要段定乳癌咩期數,要知道三個元素TNM:

1)腫瘤幾大(T – Tumor)

2)淋巴有冇受影響(N – lymph Node)

3)有冇擴散去其他器官,例如肺/肝/骨/腦(M – Metastasis)

乳癌分期

圖片來源:American Society of Clinical Oncology

照乜野掃描?

「我點先可以知道我嘅三個元素呢?」

頭兩項(腫瘤同淋巴)可以靠臨床檢查超聲波睇到,呢度冇咩爭議同分歧。

反而係點評估擴散,就各處鄉村各處例,主要分野都係負擔能力:

1)傳統做法:X光睇肺,超聲波睇肝。基本上呢個做法已經過時(等如625線彩色電視),咁低清,有野都照唔到出黎啦。

2)常見做法:電腦掃描(CT scan)睇肺/肝,骨掃描(Bone scan)睇骨。呢個就等如標清電視,大部分公立醫院都提供到,不過要排要等,好消息係而家香港政府有一個公私營資助計畫(private-public interface),會全費資助你去指定私家度照電腦掃描,唔洗錢仲要好快(約一星期)有得照。如果你負擔唔到照最高級嘅正電子電腦掃描,記得問公立醫生關於呢個計畫。

3)自選做法:正電子電腦掃描(PET-CT scan)睇晒頭顱底至大脾。呢個等同高清電視,公立醫院冇得排嘅,要自己比$8000(公立醫院轉介折扣價)-$16000(正價),就等如要自己比錢買機頂盒解碼器一樣。

乳癌正電子掃描 PET scan,有人做、有人唔做,究竟邊一個先啱?馬國權醫生
乳癌全身正電子掃描 PET scan 居然唔包照個腦!?馬國權醫生
正電子掃描洗唔洗落顯影劑?原來呢個就係原因⋯⋯馬國權醫生
PET SCAN正電子掃描,未睇前唔好去照⋯⋯馬國權醫生
乳癌指數高咗?一分鐘學會處理⋯⋯馬國權醫生

2016年3月更新:最近發現原來醫管局有公開各間正電子掃描中心的公立醫院折扣價,你可以按以下連結去睇下正電子掃描收費表,裡面除左有唔同中心的正電子掃描價錢,仲有埋地址電話,咁你就易D比較去邊到做好:

PET-CT_Scan.pdf

正電子掃描與電腦掃描的分別

亦都有醫生會選擇三樣都唔做,背後理據主要建基於「臨床早期走散機會唔高」。

 

乳癌分期 AJCC

有齊呢三個資料,就可以根據American Joint Committee on Cancer (AJCC) 7th edition (2010) TNM staging 去評估第幾期。

乳癌分期

圖片來源:American Joint Committee On Cancer

有興趣嘅,可以㩒入去仔細睇下成個staging嘅細項:

https://www.breasthk.com/pamphlet/breast-cancer-staging_AJCC_7th.pdf

有iPhone 又唔介意比$83嘅(暫時免費嘅我搵唔到一個好用),可以下載以下apps

TNM8 Breast Cancer Calculator

 

申延閱讀:

乳房原位癌 - 究竟係唔係乳癌?

乳癌零期原位癌 - 我係咪0期?

乳癌一期 - 我係咪第1期?

乳癌二期 - 我係咪第2期?

乳癌三期 - 我係咪第3期?

乳癌四期 - 我係咪第4期?

冇興趣/覺得好難明嘅,直接問自己醫生

「知道第幾期(幾多級大火)又有咩用?」

知道第幾期(幾多級大火),消防員(醫生)就估算得到死唔死得人多(存活率),同埋知道點救火(點醫)。

唔同期數點醫?

總共有五個級別(癌症分五期),大方向如下:

1)零期:即原位癌(工廠寫字樓剛剛起火),冇機會擴散去其他器官(樓層),成功醫好嘅機會最大,主要都係手術(處理火種)加減電療/食藥

2)一期(一級火)早期侵蝕性癌(起火嘅工廠裏面有易燃物品),有機會抗散去其他器官(樓層),雖然機會唔大。要醫得好,就要喺佢未擴散(爆炸及蔓延去其他樓層之前)前處理好。主力都係手術(處理火種)加減化療/標靶治療/電療/食藥

3)二期(二級火):都仲算喺早期侵蝕性癌(不過啲易燃物品已經發生小型爆炸),有機會抗散去其他器官(樓層),機會大過一期。如果可以喺佢未蔓延之前處理好,都有得醫,主要都仲係先手術(處理爆炸品),再加化療/標靶治療(救埋啲小火),加減電療/食藥

4)三期(三級大火):屬於後期,啲癌細胞(大火)已經擴散去淋巴(通道/電梯/樓梯),好大機會會擴散開去,先化療(救咗啲通道大火先),再做手術(處理爆炸品及火種),術後電療,加減食藥

5)四期(四級大火):屬於末期,啲癌細胞(大火)已經由淋巴(通道/電梯/樓梯)擴散致其他器官(成座大廈著哂火),主要都係化療/標靶治療。坐喺電視機前睇新聞報導都心知不妙,大家要有心理準備,消防員盡力拖,拖得一時得一時,希望奇蹟發生。

記住大火級數(癌症期數)係可以隨時間/治療而變嘅,可以唔受控升級要增援,又可以火勢受控降級(術前化療)。

以上比喻包含好多資訊,可能難明少少,唔明嘅請你返睇、遲啲再睇、一睇再睇。

 

總結

1)記住問醫生會決定你乳癌期數嘅大三元素:腫瘤、淋巴、同埋擴散。

2)記住香港政府有資助計畫可以免費去私家照電腦掃描。

 

下一篇,我會講一個極其敏感、好多人問、好多人想自己知、好多人唔想家人知、而醫生又唔肯講嘅題目:「香港乳癌存活率:我仲有幾耐命?」

警告:喺你撞入去之前真係要諗清諗楚,你心理上承唔承受到?如果唔得,就跳咗下一篇。

有哂心理準備嘅,我就帶你入去呢個神秘領域啦⋯⋯

香港乳癌存活率 : 我仲有幾耐命?

封面圖片來源:互聯網