乳癌三期治療攻略 - 醫好機會大唔大?

Posted by in Treatment 治療方法

我係乳癌三期病人,好擔心自己遲咗去睇醫生,究竟乳癌3期係點醫㗎?醫好機會大唔大?呢次「乳癌三期治療攻略」教你點醫先最好,以後唔洗再怕「有乳癌點算好?」⋯⋯

上回講到,確診為乳癌第三期之後,就可以開始進入治療階段⋯⋯

手術前定手術後知乳癌第三期?

乳癌去到第三期,佢已經好惡,所以有得用嘅話,一定用盡乳癌治療5寶:手術、化療、標靶治療、電療、抗荷爾蒙治療。

既然所有野都要做齊,要決定嘅只係佢地嘅先後次序。5寶之中以手術/化療/標靶最為重要,所以可以揀嘅野唔多,只係揀做化療/標靶先,定係做手術先

一般黎講,如果未做手術已經知係臨床第3期,就應該化療/標靶先,因為直接做手術驚做唔清,第時會易D翻發。

乳癌三期治療攻略

另一方面,如果開頭唔知咁惡第3期,做咗手術先知,咁就照返早期乳癌正常治療次序:

 乳癌症狀硬塊

乳癌三期化療篇

乳癌症狀分期

乳癌我可唔可以唔化療?馬國權醫生

「我決定聽我醫生建議打化療先,咁同早期乳癌嗰D化療有咩分別?有咩要注意?」

都係用返2大主力A針紅魔鬼同埋T針紫杉醇。想知多D就去睇乳癌化療藥物 - AC針?TC針?乜黎㗎?

咁惡嘅乳癌,一定用最進取嘅打法-6至8針嘅第3代化療組合乳癌化療選擇 - 咁多組合點樣揀?),頂得順嘅話,有好多醫生會建議密集打法(dose-dense)添,即係2星期打一針

打得咁激,自然要留意身體頂唔頂得順(乳癌化療副作用 - 辛唔辛苦?點處理?)。另一方面,亦都要留意荷包頂唔頂得順,因為好多時都要升白針個免疫力先頂得住,而升白針有時免費有時自費,呢度要預多少少錢(乳癌化療費用 - 要用幾多錢?貴唔貴?),以免失咗預算。

乳癌標靶治療

乳癌我可唔可以唔標靶治療?馬國權醫生

「咁乳癌3期洗唔洗做埋標靶治療?」

乳癌2期一樣:
如果非HER2型(HER2-)就唔洗。
如果係HER2型(HER2+)就要。

有樣野值得留意,因為標靶要同化療一齊用先產生最大功效,所以標靶同化療係捆綁式做(好似手機上台咁),唔會只做標靶唔做化療。

「咁有咩化療加標靶組合比我揀?」

都係嗰3個組合,詳見乳癌標靶治療 - 乳癌HER2型點樣揀?唯一同乳癌2期(通常TTCH)小小分別,就係多咗醫生揀ACTH,因為佢地覺得成個組合有A針好D。

(2015年12月更新:今個月喺San Antonio Breast Cancer Symposium發表咗一個重磅研究BCIRG 006的10年跟進結果。發現TTCH同ACTH效果一樣,不過TTCH嘅心臟副作用就少好多。可以預期從此以後,TTCH將會一統江湖成為首選,冇咩人會再打ACTH/ACPH。)

另外又有野要留意,因為乳癌咁惡,所以有好多研究全世界一齊做緊,睇吓一D新嘅標靶藥(Pertuzumab,T-DM1)對後期嘅乳癌有冇幫助。呢D係一D好值得參加嘅國際研究,因為D藥又新又靚(注:行文之時為2014年,如果你好耐之後睇呢篇文章,可能已經唔update,敬請留意),通常香港只分得幾個研究配額。如果想參加研究嘅話,就去龍頭教學醫院問吓醫生有冇研究啱自己。

2016年更新:
乳癌雙標靶治療-HER2型乳癌的春天
乳癌類型巡禮 - 與你細數HER2型乳癌的歴史

乳癌三期手術篇

乳癌症狀痛

乳癌手術:開刀我仲有得揀?馬國權醫生
乳癌手術:做咩切我啲淋巴?馬國權醫生
未知點重建乳房前,千祈唔好做全乳切除。馬國權醫生

乳癌3期雖然屬於後期,手術都仲係其中一大治療主力,所以都係要做嘅。

「手術有咩揀?」

手術2大部份:乳房同埋腋下淋巴都要做

乳房:局部切除vs全乳房切除加減乳房重建。
腋下淋巴:前哨淋巴vs全淋巴切除。

乳癌手術 1 - 開刀我有咩可以揀?
乳癌手術 2 - 保留乳房手術 ,我做唔做得?
乳癌手術 3 - 保留乳房手術 ,我揀唔揀好?
乳癌手術 4 - 乳房重建手術 你要知
乳癌手術 5 - 前哨淋巴結活檢術?咩黎㗎
乳癌手術 6 - 專做乳房手術醫生的增值服務
義乳的秘密 - 重建乳房手術外的另一片天

「即係同早期乳癌嘅手術冇分別?」

理論上冇分別,實際上有幾點要留意:
1)難D做保留乳房手術(局部割),主要因為腫瘤大,割咁多乳腺組織,做完手術都凹晒,一定同你理想嘅手術效果有落差。如果真係好想好想保留乳房,就打化療先,睇吓縮唔縮細到嗰腫瘤先做手術,成功機會大D/效果好D。詳情參考乳癌化療時間 - 手術前做?手術後做?

2)如果揀全乳房切除,又想做乳房重建,就要考慮幾時重建。因為乳癌三期相比乳癌一二期係大D機會復發,所以可以考慮「延遲重建」,即係完成晒D輔助治療(化療/標靶治療/電療/抗荷爾蒙治療),等一兩年穩定D先重建。費事揀咗即時重建,之後唔好彩好快復發,重建手術咪白做,白白多個傷口。

3)前哨淋巴通常唔做得,因為第3期乳癌好多時已經影響咗淋巴。手術前淋巴確定有擴散,當然冇得揀。手術前唔知淋巴有擴散,做咗前哨淋巴,急凍切片通常都係有野㗎喇,又係要全淋巴切除,所以要有割晒淋巴嘅心理準備

乳癌三期電療篇

乳癌三期電療篇

乳癌我可唔可以唔電療?馬國權醫生

「咁我洗唔洗電療?」

一定要電療。因為N2會建議電,T3/T4又會建議電,基本上第三期乳癌電療冇走雞,唔好誤會全乳房切除就可以避咗唔洗電。

電療時有咩要注意就去參考返乳癌電療大解構-原來唔洗驚

乳癌三期抗荷爾蒙篇

乳癌症狀會痛嗎

乳癌荷爾蒙治療 - 我可唔可以唔荷爾蒙治療?馬國權醫生

「咁我洗唔洗食抗荷爾蒙藥?」

食唔食藥,就睇你隻癌對D藥夾唔夾。

冇荷爾蒙受體(ER-)唔洗食藥
荷爾蒙受體(ER+)食藥

「點解乳癌三期咁惡都可以唔洗食藥?」

因為通常惡嘅乳癌都係冇荷爾蒙受體嘅(ER-),所以就算乳癌三期都有可能唔洗食藥。向壞嗰方面諗,隻乳癌少咗把柄比我地捉住,難D箝制佢。向好嗰方面諗,唔洗日日食藥食足幾年。

乳癌荷爾蒙治療 - 點解我仲要食藥?
乳癌荷爾蒙藥-究竟食咩藥?
乳癌荷爾蒙藥-不同年紀嚴選最正確食法

乳癌三期醫好機會

「咁Breast HK你都未講,究竟乳癌三期醫好機會大唔大?」

我只可以講:「有得醫」,而唔會講幾大機會醫好。

因為無論咩數字都好,人總係好難滿足嘅。

你只會同我講:「唔夠大,有冇得再大D?」
就好似D靚模同整型醫生講:「唔夠大,有冇得再大D?」

乳癌三期治療攻略

最後呢2個時間表就係你嘅乳癌三期治療攻略:
手術前已知第三期,做化療/標靶先:

乳癌照片

手術後先知第三期,咁就照返乳癌正常治療次序:

 乳癌成因

你需要做手術/化療/電療,加減標靶治療/食藥。手術前已知乳癌第三期,做化療/標靶先啦。係咪清楚晒?以後唔洗再怕「有乳癌點算好?」

下篇到講唔開心野,如果唔想睇/未有心理準備前,唔好撞入去。雖然唔開心但都仲係要講,因為逃避/忌諱唔等如冇事發生,每一日都有病友/家人要面對人生逆境,佢地正正就係徬徨無助但被忽略咗嘅一群:

乳癌四期 - 我係咪第4期?」⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網
分段圖片來源:改篇自互聯網