乳癌二期 - 我係咪第2期?

Posted by in Staging 分期

你上次教我地咩叫乳癌一期,我對返自己個報告,好唔開心侵蝕性部分大過2cm呀!咁而家即係第幾期?仲有冇可能係早期/乳癌二期呢?我仲有好多野未做,唔可以咁快死㗎⋯⋯

我係咪乳癌二期呢?

「我係咪乳癌2期呢?」

最簡單嘅方法就係問醫生

「佢話比我聽確診乳癌時,個心都離一離,我已經亂到唔識問⋯⋯」

第二個方法,就係睇返自己乳房造影/電腦掃描/正電子掃描/手術個報告

有齊資料,就可以根據American Joint Committee on Cancer (AJCC) 7th edition (2010) TNM staging 去評估第幾期。

乳癌二期

圖片來源:American Joint Committee On Cancer

有興趣嘅,可以㩒入去仔細睇下成個staging嘅細項:

https://www.breasthk.com/pamphlet/breast-cancer-staging_AJCC_7th.pdf

有iPhone 又唔介意比$83嘅(暫時免費嘅我搵唔到一個好用),可以下載以下apps

TNM8 Breast Cancer Calculator

 

「自己唔係好識睇,可唔可以講多少少?」

乳癌二期

圖片來源:American Joint Committee On Cancer

乳癌2期TNM上限為T3N0M0或T2N1M0,即係要:

1)如果腋下淋巴冇擴散(N0),乳癌侵蝕性部份可以大過5cm(T3)。
2)如果腋下淋巴有1-3粒淋巴擴散(N1),乳癌侵蝕性部份就要5cm或以下(T2/T1)。
3)以上兩點要加埋冇擴散去其他器官。

腋下淋巴有冇擴散?

「點先知我嘅淋巴係N0定N1?」

淋巴嘅分法其實有2套方法:

1)手術前醫生就用臨床去評估(呢部份真係冇得自己學,因為牽涉身體檢查,即係講經驗),要問返乳腺科醫生

2)手術後就睇病理報告有幾多粒淋巴有癌細胞。你可以做嘅就係睇吓自己報告有幾多粒淋巴受影響。

重點一:乳癌二期淋巴可以冇受影響(N0)/或者1-3粒(N1)有擴散都得。

「我4粒淋巴有事喎~」

4-9粒淋巴有事係N2,起碼已經乳癌三期,呢篇唔啱你,等下一篇啦。

乳癌侵蝕性部份幾大?

「點先知我個腫瘤幾大?」

手術前,最準就係乳房超聲波,其次係醫生手摸/乳房X光。呢D我地叫臨床評估,主要用黎手術前決定治療方向。

手術後,當然係睇病理報告,喺顯微鏡底下睇就一定最準。呢D我地叫黃金標準,主要用黎確定第幾期。

「明明醫生手術前話4cm,做完手術佢話原來6cm,咁都得㗎咩?」

絕對有可能發生。因為臨床評估唔係百份百準確,尤其係侵蝕性部份嘅大細。可以顯微鏡發現6cm有侵蝕性,但超聲波只見到4cm陰影。

如果係侵蝕性癌,我地只在意侵蝕性部份(invasive component),原位癌部份(in situ component)我地係唔睇嘅,所以一切都以手術後病理報告為準。

因為以上原因,情況可以掉轉發生,可以手術前話6cm(侵蝕性加原位癌),手術後話4cm(只睇侵蝕性部份)。

「點解只在意侵蝕性部份,而唔理原位癌部份?」

情況有如有個罪犯又殺人(侵蝕性)又偷野(原位癌),上到庭個官判,梗係著意殺人嗰條罪,夠判佢終身監禁,偷野嗰條罪唔洗睇。

侵蝕性癌可以擴散/攞命,但原位癌唔會擴散/唔會攞命,醫生梗係著意會攞命嘅侵蝕性癌,原位癌唔洗睇。

重點二:我地只在意侵蝕性部份(invasive component)

「我嗰腫瘤明明3cm,唔係T2咩?點解醫生話T4?」

如果腫瘤蝕咗出皮膚(損咗/皮膚流血/流膿)或者蝕咗落深層肌肉,就唔理幾大,都叫T4。T4又係起碼乳癌三期,呢篇唔啱你,等下一篇啦。

冇擴散去其他器官

「點先知有冇擴散去其他器官?」

呢個要照掃描先知。免費嘅就有普通電腦掃描(CT scan)同埋骨掃描(Bone scan),貴嘅就有正電子掃描(PET scan)。詳見乳癌分期 ﹣ 我係早期定末期?

乳癌正電子掃描 PET scan,有人做、有人唔做,究竟邊一個先啱?馬國權醫生
乳癌全身正電子掃描 PET scan 居然唔包照個腦!?馬國權醫生

2014-04資訊:香港政府會免費資助新確診乳癌病人,去私家醫院照普通電腦掃描(公私營計劃),唔洗係公立醫院慢慢等,1個星期就有得照,計劃幾時完就唔知。至於正電子掃描,最平應該係沙田仁安醫院(有D小型化驗所可能仲平D,不過質素參差),公立醫院轉介去有折,大概$8000,優惠幾時完又係唔知。

乳癌二期治療攻略

滿足晒以上3個條件,臨床診斷為乳癌第二期之後,就可以開始治療。

而當中最多病友困惑嘅,就係明明自己係第二期早期黎㗎,點解醫生都仲建議做咗化療先做手術㗎呢?

不過今次講住咁多先,等你慢慢消化下。下篇先教你「乳癌二期治療攻略 - 做手術先?做化療先?」⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網