香港乳腺科醫生 - 點先可以快D睇?

Posted by in Doctor 醫生

讀者來函:我想找一個好嘅香港乳腺科醫生睇,上網尋找,嘗試打電話問一問,診金昂貴之餘,現在已經排期到兩個月後!搵私家醫生,本來就係想快靚正,但睇黎我係想得太簡單。如果搵政府,我估排期時間應該會好長。究竟點先可以快D見到醫生?呢篇教你「源頭減廢」⋯⋯

乳腺科醫生未見你個人,先見你封信。要快D見到醫生,就要令到醫生睇完你封信後想快D見你

「我知點做!我咁靚,等我貼自己張相落去咪得囉~」

現實係冇人會貼自己張靚相落轉介信度,咁點樣先可以喺云云轉介信中突圍而出?

唔通要好似大陸咁比紅封包?

你並唔需要好似前廉政專員湯顯明咁送禮酬酢,你需要嘅係同醫生好好合作,做到「源頭減廢」。

源頭減廢

「咩係源頭減廢?係咪好似政府高官咁,一個一個咁落台,就係源頭減廢?」

源頭減廢即係由你封轉介信做起,盡量做到言簡意賅,重點/賣點清晰分明,資料要足/報告要齊,最重要記得唔好鬼劃符。

「我封信D字真係幾潦草,雖然我唔睇唔明,可能乳腺科醫生睇得明呢~」

封信黎到我度,面對住轉介醫生嘅草書,我連你D英文字母都睇唔到,就算我係醫學活字典都冇用啦。我係唔應該/冇責任/冇動力去估轉介醫生寫D乜。而唔知你轉介信寫乜,我真係唔會知你咩事黎睇乳腺科/急唔急,好自然你見醫生個期就會被安排到隊尾。如果後來唔好彩出咗事,你都唔怪得人/追究唔到

「死啦,我封信真係鬼劃符,點算?」

有錢嘅,搵過第二個醫生再寫。冇錢嘅,禮貌地要求醫生用電腦打過,都廿一世紀啦,仲唔用電腦,阿公阿婆都用智能手機/「鴨舌」啦。

「慘~個醫生唔肯寫過/打過⋯⋯」

你如果唔好彩遇著嗰醫生唔肯寫,你只要比佢知道,佢寫過/打過封信仲快過同你糾纏,我想信醫生最終都會寫/打比你。實際點操作,請發揮你嘅創意。

「好野,我攞到封睇得到英文字母嘅轉介信喇,等我即刻去遞信先⋯⋯」

唔好咁心急住,封信睇得到,並唔代表寫得好。仲記唔記得我上面講重點/賣點要清晰分明?乳腺科醫生而家睇得到你封信,咁下一步就係斷定你急定唔急。呢個時候就要睇你個轉介醫生嘅功力:

如果佢寫得出你有患乳癌嘅高危因素(女性/年紀大/曾患乳癌/重家族病史)或者乳癌症狀(越黎越大硬塊/腫塊血色分泌物乳頭凹陷、皮膚凹陷、橙皮紋),甚或至已經抽咗針確咗診(乳癌/非典型乳腺增生乳房葉狀腫瘤)嘅,我地會好快睇

但係如果佢將個重點放落低危因素(男性/年紀輕)或非乳癌症狀(乳房痛楚/怕自己生野),甚或至已經抽咗針確咗診良性嘅(乳房纖維瘤乳腺增生),好簡單,排隊尾囉。

「封信醫生寫,佢寫咩我控制唔到㗎喎~」

你真係認為你控制唔到佢寫咩?諗真D,並唔係~

醫生寫信嘅資料來源咪你度黎,你重點放係廢野(乳房痛楚)度,封信咪廢囉。你清楚知道並講比醫生聽你既乳癌高危因素或者乳癌症狀,封信咪突圍有力囉。唔係教你講大話,但避重就輕係人生必需學嘅一課,所以記住源頭(你自己)減廢(話/料)。

資源回收

「你話資料要足/報告要齊,報告我係有啊,不過係你上一篇所講嘅廢報告,我準備掉咗去」

唔好咁衝動,我地做好源頭減廢,下一步就要做資源回收。報告係廢,不過「廢」係由乳腺科醫生角度出發,因為要由頭做過晒/做多次檢查。不過由你嘅角度呢,廢嘅報告都有佢嘅用途,尤其係用黎寫轉介信時

「廢都有用?此話何解?」

報告廢,係廢在「模棱兩可」,你正正就係要利用佢嘅「模棱兩可」。「模棱兩可」可以令到乳腺科醫生都唔能夠肯定你真有事定假有事,只好比個「快期」你。如果好彩,有時可能仲有個「特快期」添。

點先可以快D睇香港乳腺科醫生?

「我已經做好晒自己本份,絕對係源頭減廢,自問重點/賣點清晰分明,資料足/報告齊,但返黎個期都係好遲,仲有冇咩方法可以快D?」

睇私家同睇公立有唔同處理方法。

睇私家,同你接頭嘅係接待處嘅姑娘,佢地做又三十六,唔做又三十六,唔做仲可以收早啲,你死求佢都冇用,佢只會答你:「X醫生好忙,最快睇都要兩個月。」消費者只可以做最簡單嘅事,貨比三間用腳投票。

睇公立呢,你可以試吓搵多幾個唔同嘅醫生寫信,一封唔得就兩封,兩封唔得就三封,就好似D家長搵學校扣門咁日日寫信比校長,實行以「誠意」去打動醫生。

「咦,真係得喎,唔通醫生都比我感動咗?」

要知道點解呢招得,咁我地就要解拆吓公立醫院專科門診,究竟係點樣分流?

點樣分流?

公立醫院專科門診,一般由櫃位文員收信,之後交比姑娘/護士長睇信。第一浸姑娘佢地睇咗先,由佢地決定比個咩期你,由「特快期」、「快期」到「唔快期」不等。你個病情係真急定假急,同佢地比咩期你唔係一個正比例關係。最決於好多因素,佢有冇經驗/醒唔醒目/多唔多野做/精神集唔集中/你封信喺咪鬼劃符/報告齊唔齊/轉介信嘅內容。

係,你冇睇錯,轉介信嘅內容只係眾多因數之一

如果姑娘冇經驗/唔醒目/好多野做/精神唔集中/你封信鬼劃符/報告唔齊,話之你轉介信內容寫到識飛,病人名叫梁振英都冇用,因為鬼掩眼根本睇唔到。

「可惜嗰個落雨嘅晚上,嗰條濕滑嘅公路,嗰個粗心大意嘅司機 ,令我唔可以趕到嚟呢間咖啡室,親口對你講一句『我愛你』」

問題係點解個司機唔用愛膚堅呢?

「可惜嗰個落班嘅下午,嗰條濕濟嘅熱線,嗰個粗心大意嘅姑娘,令我唔可以趕到嚟呢間專科門診,親口對醫生講一句『我怕癌』」

你交多幾次信,就係希望自己唔好咁黑仔,盡量避免不利因素。睇吓交第二封信第三封信嗰日,會唔會撞到個姑娘有經驗/好醒目/精神集中,懂得欣賞你封信/報告嘅內容,從而比個「快期」你。

好喇,假設你過左姑娘第一關。係,冇錯,打咗咁多字先過咗第一關。嗰時文員就會通知你幾時睇。如果你不幸地比姑娘判咗做「唔快」類別,2017。2017?係,又係冇錯,就係D人好天真以為可以普選特首嘅一年。唔快嘅專科門診期係斷年計嘅。

「喂,咁唔掂㗎喎,睇相佬批我冇咩民主命,有生之年都唔會見到普選特首,2017我死咗喇喎,到時黎唔到,又打唔到黎比你取消,浪費你地D期,真係好對唔住。」

為咗唔好比你死住,所以會有第二關。已分好晒期嘅信會交到去高級醫生手上,再睇下有冇嚴重錯漏,明明急,錯判咗唔急嘅,就call返黎快D睇。如果冇大問題嘅,就一切依時跟次序睇。

「咁點解遞多幾封信有可能可以早D有得睇呢?唔通醫生都比我感動咗?」

分流個醫生一日睇幾十封信,睇信都睇到麻木晒,點會比你感動到吖。

「唔明,我感動唔到醫生,醫生仲咩對我咁好比快期我?」

點解咁神奇?可能性如下:

1)第二次遇著個醫生有經驗/好醒目/精神集中。冇錯,醫生同姑娘都係一樣,大家都係人。

2)就算遇著同一個分流醫生,假設以上所有因素都一樣,個分流醫生面對幾封同行唔同時間寫黎嘅信,姑娘仲比2017,係咪自己睇漏野?仔細睇多次/睇多幾次先。用多D時間係你封信度,自然大D機會睇到你要求早D睇嘅賣點。

3)幾封轉介信互相補足,令到醫生了解你更多。

衞道之士實會衝出黎鬧我:「嘩,乜你咁教人濫用公立醫院服務㗎~」

始終最尾決定比快期定慢期嘅,都係負責分流嘅高級醫生。如果醫生唔把好關,你又點可以怪冇專業知識嘅病人濫用呢?

咩話,你封封信都資料唔齊/鬼劃符/冇賣點?

法國醫院乳腺科醫生

圖片來源:互聯網

咁你只可以等民建聯幫你「成功爭取2017睇醫生」。

諗深一層,你自問已經做好晒源頭減廢、資源回收,但醫生都仲比2017年嘅期你,即係你已經係低危中嘅低危,醫生覺得你冇事。其實未睇醫生,已經睇咗醫生,應該可以放心。

下一次,教你點樣「醫乳癌公私營合作 - 教你點保障自己」⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網