乳癌康復後懷孕 - 我想生BB!

Posted by in Soul 心靈復康

「我已經由乳癌治療中康復過來,我同老公都好想好想生BB,究竟仲有冇可能??」乳癌康復後懷孕,究竟有咩困難會遇到?有生育問題時又有冇得搞呢?⋯⋯

乳癌康復後懷孕

生BB,一個對女性好重要嘅問題,好多時當確診乳癌嘅時候,大家都唔會諗咁多,「最緊要醫好個病先!」呢個係醫生/老公嘅標準答案⋯⋯

但當做好曬乳癌治療後,夜深人靜時,心裡面條刺總係要面對。

「究竟仲有冇可能有BB?」

只要一日未收經,都仲有可能,不過病友係要面對一D困難。

「有咩困難?」

乳癌康復後想懷孕有4怕:
1)怕復發
2)怕年紀大
3)怕化療後遺症
4)怕荷爾蒙治療副作用

1)怕復發

一講到懷孕,好自然諗到「女性荷爾蒙」!

「平時已經聞『女性荷爾蒙』色變,戒雞、戒豆漿、戒乜戒物⋯⋯而家仲話懷孕?咪好多女性荷爾蒙?好易復發?」

其實呢個暫時都仲係迷思,因為醫學文獻上乳癌治療康復後懷孕,其實唔會增加乳癌復發嘅風險(當然係有機會復發,因為就算BB腳頭有幾好都好,都唔會保你一世冇野)。

「唔會增加乳癌復發風險咁好?咁我係咪即刻可以計劃懷孕?」

理論上係,不過實際上,醫生係會建議完成治療後兩三年,確定冇野冇復發,先去計劃懷孕。背後理念係因為我地知道,頭兩三年康復期係易D復發/未咁穩陣(不論有冇BB都好)。如果呢個時候有BB,而又咁唔好彩乳癌復發,你老公唔會怨BB腳頭唔好,你老公只會追斬嗰個醫生。就算醫生逃得過被斬嘅命運,點都逃唔過比你喺Baby Kingdom一世唱衰嘅厄運。

所以比D時間自己、比D空間醫生,等過一排出面風聲冇咁緊,先考慮有BB。(講到好似走私/偷渡咁,唔好意思。)

「兩三年?歲月催人呀,雖然個衰佬口口聲聲話唔介意我年紀大,但我怕身體頂唔住呀~」

年齡呢個確確實實係一個困難要面對⋯⋯

2)怕年紀大

統計數字話比我地聽,通常有乳癌嘅病友以40歲以上為主。另一方面,我地知道生育能力隨住年齡慢慢下降,醫學上35歲已經係高齡產婦。因此就算唔計乳癌治療/監察時間,想生育時好大機會已經屬於高齡產婦,自然要面對一系列相關問題:例如妊娠高血壓、妊娠糖尿病、妊娠毒血症、早產、流產、同唐氏綜合症等等。

「嘩,水蛇春咁多問題?!」

問題係有,不過都唔驚得咁多,係人都知有仔趁嫩生,係人都知有錢解決好多問題,但現實歸現實,有問題咪諗吓點解決囉。更何況現代社會傾向遲婚,本身都好多人係高齡產婦,咪又係咁生,醫學昌明麻。

「咁諗都啱,為咗BB,都唔理得咁多。但我做過化療,咁又有冇影響呢?」

呢度牽涉第三怕-怕化療後遺症⋯⋯

3)怕化療後遺症

化療有咩後遺症會影響生育?」

主要都係卵巢冬眠/停工,因為卵巢係一個活躍嘅器官,所以化療藥對佢都幾傷,好多時化療期間,你會發覺經期會停咗。

「死啦,我停咗經都未黎返,遲D會唔會有返經期㗎?」

可能有,又可能冇。或然率上,我地知道40歲樓下大D機會有返,40歲樓上難D有返(尤其近5字頭嘅病友,好多時直接永久收經)。

「好彩,我上個月黎返經期,係咪一天都光曬?咩問題都冇?」

好唔好彩,答案係「唔係」。有返經期只係過咗第一關,仲要睇第二關「成孕能力」。

「咩叫『成孕能力』?」

原來有返經期只係代表身體嘅女性荷爾蒙有返周期性嘅轉變,同卵巢嘅排卵能力/質素冇直接線性關係。即係可以有經期,但唔排卵/D卵唔靚,成唔到孕

「咁我點先知我有冇成孕能力?」

咁呢個要試過先知,不過就算不育,都未必關曬女嘅事,可以係男方精子出問題都得嘅。

「唉,好似好被動咁添~」

如果唔想咁被動,就要化療前計劃好,盡早話比醫生聽想生小朋友嘅願望。費事你又冇問,醫生又冇講,蒙查查打咗化療先知你想要小朋友。

「咁化療前有咩可以做?」

視乎結咗婚未,未結嘅話(即單身),可以試試以下方法:

1)打停經針抑制卵巢(Zoladex injection):主要嘅目的係希望卵巢化療前進入冬眠狀態,減少化療對佢嘅傷害,至於究竟增唔增加到之後成孕嘅機會,呢個冇人知。

2)雪卵子(oocytes cryopreservation):呢個方法屬研究性質,尢其係未成熟嘅卵子(immature oocytes),因為以現今科技,我地仲未好有把握可以把解凍後嘅卵子同精子結合成胚胎。不過雪住先,希望第時科技有所突破。

「吖,我明明聽過人講試管嬰兒㗎,你上面又話雪卵子冇把握?」

以現今科技,的確雪卵子冇把握成功用得返,不過雪胚胎(embryos cryopreservation)就唔同講法,大D機會可以成孕。

「咁咩係雪胚胎?點解一開波我唔雪胚胎?而走去雪卵子?」

胚胎(embryo)即係卵子同精子嘅結成品。根據香港法例,要雪胚胎嘅先決條件係結咗婚,再喺持牌嘅輔助生育中心先有得做。呢個就係一開始我話「要視乎結咗婚未?」嘅原因。

「我結咗婚喇,邊度有得做?」

公立醫院就有瑪麗醫院、威爾斯親王醫院、同埋廣華醫院。

私家醫院就有養和醫院、同仁安醫院

仲有幾間私人中心有牌照,詳情(名稱/地址/服務範圍)可以去人類生殖科技管理局睇睇。

「如果我冇做化療呢?咪冇以上問題囉~」

可以咁講,但都要面對第四怕-怕荷爾蒙治療副作用⋯⋯

4)怕荷爾蒙治療副作用

如果你係荷爾蒙受體陽性(ER+),醫生係會建議你食藥嘅。而睇得呢篇野/關心生BB嘅,十成十都係後生未收經嘅病友,所以食藥嘅選擇,就好似我地選特首咁-「冇得選」,只可以選擇10年Tamoxifen

「食Tamoxifen同生BB有咩關係?」

原來Tamoxifen其中一個副作用,就係「可能引致畸胎」。因此,當你食緊藥時,醫生係會叫你避孕。

「我又想食Tamoxifen,但又想生BB,咁點算?」

只可以自己平衡好處同風險後二揀一,一係就放棄生育計劃,一係就唔食Tamoxifen。

「唔食我又唔想,可唔可以唔食10年咁耐?」

都冇話絕對唔得,可以「食住先」(話分兩頭,以前D人都係食5年㗎姐),到想生時就停,不過明顯呢個唔係「終極方案」,真係好似選特首司長叫你「袋住先」咁,唔通真係「有藥,你真係唔要?」。

乳癌患者懷孕

圖片來源:獨立媒體

你需要嘅,可能真係一個「多方平台」去同醫生/老公慢慢討論⋯⋯

講開BB,如果懷孕中先發現有乳癌又點算呢?下次「懷孕中乳癌治療攻略 - 腹中BB點算好?」再見⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網