乳頭凹陷 : 我係咪生乳癌?4

Posted by in Symptoms 病徵

乳頭凹陷 -「少少凹姐,冇事嘅~~」千祈唔好咁諗!!

你可能唔知嘅乳癌五大病徵|改變一生的九分鐘|馬國權醫生
我咁後生,乳癌唔關我事嘅!咁就大錯特錯⋯⋯馬國權醫生

 

乳頭凹陷

先講乳頭凹陷,其實好多女士都有咁嘅情况,有啲人可以自己整返凸出黎,即係問題間歇性。

不過間唔間歇性呢個都唔係重點,重點係時間性

 

咁咩叫時間性?即係問你「天生/細細個/後生已經有/有咗十幾年,定係新起/有咗幾個月/越來越凹?」

你由第一篇乳癌症狀  知道細細個係幾乎係冇可能生癌,時間證明一切,如果乳頭凹陷係天生/細細個/後生已經有/有咗十幾年,都仲未有事,仲可以坐係度上網,即係衰極有個普。

相反,如果乳頭凹陷係新起/有咗幾個月/越來越凹,即係乳房本身有變化,有啲野,甚至有啲衰野發生緊。

「咁有啲咩衰野啊?佢地又點解搞到我個乳頭凹咗嘅?」

首先我地又要了解下乳房既結構:

乳頭凹陷

圖片來源:改篇自互聯網

乳房要保持堅挺,主要係靠乳房的懸韌帶(Cooper’s ligament or suspensory ligaments of breast),佢地就好似鋼筋咁為乳房提供支撐。

當乳房生癌時,癌細胞就會侵蝕呢啲鋼筋,搞到乳頭凹陷/皮膚下陷

皮膚下陷同乳頭凹陷有少少唔同,係唔會天生嘅,除非之前做過乳房手術。如果冇做過手術,乳房皮膚係唔會無緣無故凹陷。如果你凹之外,仲摸到有腫塊/硬塊,請立即睇醫生。

橙皮紋(peau d’orange)都係同一樣原因,當皮膚因癌細胞而令淋巴水腫,但係一部份皮膚卻被呢啲縮短咗嘅鋼筋拉住擴展唔到時,嗰樣就好似啲橙皮咁。

小貼士:呢種乳房橙皮紋同平時懷孕/暴肥之後暴瘦嗰D係唔同嘅,唔好攪錯。

 乳頭下陷   橙皮紋, 乳頭凹陷

圖片來源:改篇自互聯網

下一篇講吓⋯⋯

乳房發炎 : 我係咪生乳癌?5

 

相關醫學專欄:乳癌警號三:乳頭凹陷、皮膚下陷及乳房橙皮紋

馬國權醫生

封面圖片來源:互聯網