乳癌標靶治療 - 乳癌HER2型點樣揀?

Posted by in Chemotherapy 化療, Target Therapy 標靶

乳癌標靶治療 - 上一篇講咗非HER2型嘅乳癌有6大化療組合,咁如果我係HER2型乳癌又點呢?乳癌標靶治療加化療有幾多組合過我揀?呢篇繼續⋯⋯

乳癌我可唔可以唔標靶治療?馬國權醫生
正廠副廠大比拼,乳癌標靶治療效果相差⋯⋯馬國權醫生
乳癌標靶治療,吊針好?打皮下好?馬國權醫生
乳癌化療要打幾多針?馬國權醫生

乳癌標靶治療

非HER2型乳癌化療組合相比,乳癌標靶治療加化療嘅組合簡單好多,得3款。因為治療效果差不多,甚至統計學上係冇分別,所以揀咩都冇咩所謂,主要在於你個醫生信邊一套。

(2015年12月更新:今個月喺San Antonio Breast Cancer Symposium發表咗一個重磅研究BCIRG 006的10年跟進結果。發現TTCH同ACTH效果一樣,不過TTCH嘅心臟副作用就少好多。可以預期從此以後,TTCH將會一統江湖成為首選,冇咩人會再打ACTH/ACPH。)

標靶加化療副作用黎講,除咗化療嘅副作用之外,基本上你係感覺唔到嘅。因為標靶藥Herceptin(H)只有一個副作用,就係傷心臟,所以醫生每三個月就會檢查吓心臟功能。實際上你感覺得到嘅副作用,就係傷荷包,因為一針標靶大概$15000打足一年17-18針要$250000-$270000

係時候睇吓呢3個套餐:

TTCH

標靶藥

TTCH(DCH),即係化療TTC(TaxoTere-Carboplatin)同H(Herceptin)一齊打,三星期一針,化療就18個星期完成,標靶就吊足一年。今次個配角C係Carboplatin,唔好同TTC x 4個Cyclophosphamide搞錯。

「有咩副作用?」

感覺得到嘅副作用來自化療,有TT所以發燒;有H會傷心臟(不過你唔會感覺到)。

「咩人適合?」

HER2+型乳癌腫瘤大過1cm,已經叫高危,呢個係第一線嘅打發。

「化療藥費幾多錢?」

淋巴冇擴散,TT$8000一針,化療總數$48000淋巴有擴散,TT政府包,化療免費,標靶另計。65歲或以上政府包埋升白針。

ACTH

乳癌

ACTH,即係先打化療AC(Adriamycin-Cyclophosphamide)4針,再TT(Taxotere)同H(Herceptin)一齊打4針,之後剩H,三星期一針,化療就24個星期完成,標靶就吊足一年。

咁打嘅原因係有啲醫生確信乳癌化療組合一定要有A,但A又會傷心臟,所以A同H唔可以一齊打,要推遲少少個H直至AC x 4完成先開始得。

「有咩副作用?」

有A會嘔,有TT會發燒,有H會傷心臟。

「咩人適合?」

當你係HER2+型乳癌腫瘤大過1cm,加上你醫生信ACTH係好過TTCH嘅時候

「化療藥費幾多錢?」

淋巴冇擴散,TT$8000一針,化療總數$32000淋巴有擴散,TT政府包,即係化療免費,標靶另計,升白針免費

ACPH

 乳癌治療

ACPH係ACTH嘅變種,即係先打化療AC(Adriamycin-Cyclophosphamide)4針(三星期一針),再P(Paclitaxel)同H(Herceptin)一齊打(P就一星期一針,H就三星期一針),之後剩H(三星期一針),化療就24個星期完成,標靶H就吊足一年。

有咁嘅變種,係因為有大型研究係咁樣打法,另外有D醫生信每星期打P係好過/舒服過三星期先打一次TT

「有咩副作用?」

有A會嘔,有P會發燒(不過機會細好多,因為三星期嘅劑量攤開三針每星期打一針,會舒服啲,所以應該唔洗升白針,有H會傷心臟。

「咩人適合?」

當你係HER2+型乳癌腫瘤大過1cm,加上你醫生信ACPH係好過TTCH/ACTH嘅時候。

「化療藥費幾多錢?」

淋巴冇擴散,P$2000一針,化療總數$24000淋巴有擴散,P政府包,即係化療免費,標靶另計。

細過1cm嘅HER2型乳癌

「我見你上面寫親都話HER2型大過1cm就點點點,咁細過1cm又點呢?」

好眼力,我咁寫係因為通常腫瘤大過1cm(T1c),Herceptin就有得資助,因為呢類病人有好強烈嘅證據顯示佢地需要標靶藥。

腫瘤大於5mm至1cm(T1b),開始有國際指引/證據話標靶藥對佢地都有幫助。不過呢類病人想用標靶藥就要自費

至於腫瘤細過或等如5mm(T1a),暫時冇證據話標靶藥有幫助,所以用返上一篇第一或第二代化療TTC x 4/FAC x 6/AC x 4。

乳癌標靶治療費用有冇資助?

「乳癌標靶治療加埋化療要成三十萬真係好貴,我唔夠錢但又想用標靶藥,有冇方法幫幫我?」

要睇你腫瘤幾大同淋巴有冇受影響,以今時今日嘅指引準則(第時會唔會鬆D冇人知),腫瘤大過1cm或淋巴有受影響,就合資格申請資助。撒瑪利亞基金會根據資產/入息有不同程度嘅資助,你可以叫你醫生轉介醫院嘅醫務社工,佢地會幫你做家庭入息審查(好在自住樓係唔計),睇吓你可以得到幾多資助。有申請門檻,自然有人唔合資格,例如啱啱1cm而淋巴又冇受影響嘅病友,就好似夾心階層/N無人士一樣咁慘,醫生都愛莫能助。

2018年1月更新:有病友話我聽,原來而家已經有網上計數機可以自己入資料估算自己得到幾多資助,快D去自己計一計,就唔洗再等見醫務社工已經可以有眉目https://sfecal.ha.org.hk/

伸延閱讀:乳癌資助計劃 - 為你搜盡全城最紅乳癌優惠

2018年1月更新:最近發現羅氏大藥廠整咗個幾全面嘅乳癌教育網頁,http://her2morrow.com.hk,有興趣嘅朋友可以去睇下。

原來乳癌標靶治療發展急促,現在HER2型乳癌治療已經悄悄迎來春天。下一篇乳癌雙標靶治療-HER2型乳癌的春天

有唔明?係下面寫低佢,我會盡量解釋你聽⋯⋯

封面圖片來源:互聯網