乳房痛楚 : 我係咪生乳癌?2

Posted by in Symptoms 病徵

「我嘅乳房好痛,係咪生嘢啊?」

其實個題目有點誤導,大部份嘅乳癌係唔痛嘅。不過好多人因為乳房痛楚而去睇醫生,驚自己生嘢,所以我哋今日講吓乳房痛楚呢個問題⋯⋯

你可能唔知嘅乳癌五大病徵|改變一生的九分鐘|馬國權醫生
搞清乳癌痛唔痛,不再白費心機⋯⋯馬國權醫生
我咁後生,乳癌唔關我事嘅!咁就大錯特錯⋯⋯馬國權醫生

 

我講大部份,你會問「即係有幾大部份啊?」

我會話,一百個女士乳房痛楚嚟睇醫生,九十幾個都無乳癌。其中有五至六個有乳癌,不過痛楚都唔係因為乳癌而起,只不過咁啱得咁橋一齊發生。

咁有幾多人真係因為乳癌搞到痛? 一百人中只有一兩個人,因為乳癌蝕咗出皮膚而搞到痛,不過嗰啲病人就唔會剩係因為痛而睇醫生,通常都一大舊腫塊,什至潰瘍流血⋯⋯

好多醫生都會問你,一邊痛定兩邊都痛?關唔關經期事?係咪經期黎前一星期脹痛?

佢地咁問,係因為醫學院教「拿,如果兩邊痛,關經期事,經期黎前一星期脹痛,通常都係良性,安慰病人就得㗎喇。」

咁現實中係咪咁樣㗎呢?當然唔係。成個重點就係大部份嘅乳癌係唔痛嘅,齋痛同乳癌一齊發生只不過係咁啱得咁橋。

咁即係點?現實中即係有人生癌係唔痛/一邊痛/兩邊痛/經期前痛/經期後痛/收咗經都仲痛/老公掂下都痛。所以話以上問病既方法根本冇用,它的分辨能力根本唔高,問黎都多餘。

嘩,咁兒戲?!又唔係,始終醫生會綜合病徵臨床檢查造影檢查抽組織檢查(乳房檢查三步曲)先下一個定論。

乳房痛楚

講完一大輪,有兩個結論:

1)痛係因為乳房係一個好敏感既器官,好多時都冇得解,治療方法只有一個,就係止痛

2)唔好以為乳癌應該痛,自己唔痛就錯誤地認為自己冇事。再講多一次:大部份嘅乳癌係唔痛嘅

下一篇講吓⋯⋯

乳頭分泌物 : 我係咪生乳癌?3

相關醫學專欄:乳癌警號五:乳房痛楚怕不怕?

乳癌警號五

封面圖片來源:互聯網