乳癌手術 3 - 保留乳房手術 ,我揀唔揀好?

Posted by in Surgery 手術

上集講到你有冇資格揀保留乳房,如果好彩醫生開刀有得比你揀,你應該點揀呢?保留乳房手術有咩優點缺點?全乳房切除手術又喺咪一定唔好呢?

乳癌手術洗唔洗拆線?馬國權醫生
乳癌手術洗唔洗戒口?馬國權醫生
醫生要我全切,全乳切除痛唔痛?馬國權醫生
乳癌手術後運動,咁樣做就啱⋯⋯馬國權醫生
乳癌手術後手臂麻痹,原因竟然是⋯⋯馬國權醫生

保留乳房手術

「如果我有資格揀,可唔可以詳細講吓唔同開刀方案的好處同唔好處?」

簡單黎講,保留乳房嘅優點就係全乳房切除嘅缺點,相反保留乳房嘅缺點就係全乳房切除嘅優點。(比較表最尾兩項)

乳癌手術

先講好處

1)局部割,即係保留乳房,如果做得(點為之靚?請參考「乳癌手術風險 - 安唔安全?高風險嗎?」),大部份女士都會滿意/接受。當然你唔可以有唔合理期望,例如要同未做之前一模一樣,咁係冇可能嘅,你始終都係割咗一忽乳房去(十個煲都冇十個蓋),變唔變型好視乎剩返幾多乳腺組織(蓋)。越剩得多蓋(乳腺組織),越有得走盞,越易彌補缺損(即係冇咁凹)。

全乳房切除手術

圖片來源:互聯網

之所以我成日講要做乳癌手術,記得搵個乳腺科外科專科醫生去做。因為佢地嘅經驗可以幫你割準D,割準D即係等如割少咗無辜既正常乳腺組織,即係留返多D蓋(乳腺組織)去冚D煲(割乳癌後剩落黎嘅缺損)。第二個賣點就係乳腺科外科專科醫生知道邊D煲會見光要冚咗先/冚好D(例如上內側就係見光要小心嘅位,因為胸圍遮唔到,同埋女士要著V領),再加上整型技術(Oncoplastic surgery),可以整返靚D。

2)全個割,即係冇咗個乳房,有兩個可能性:一係胸口平晒,之後著衫戴義乳

乳癌

圖片來源:互聯網

一係就做埋重建乳房手術(用肚腩/背脊)。

重建乳房手術

圖片來源:BRO Development

重建乳房

圖片來源:BRO Development

無論邊個情況,好處都係有可能可以避免電療,同埋可以割嘅乳腺組織都割晒,就算割唔清,最多加電療,一定唔會翻手要做第二次手術(前哨淋巴誤差就另計,遲D講到淋巴手術時會詳細講)。

到講唔好處

1)局部割,首先一定要電療,對一D老人家黎講真係好麻煩。因為你要日日去醫院電(星期一至五),電足十五至三十日,即係搞你成個月,對行動不便嘅女士真係好唔吸引。另外因為係局部割,所以如果割唔清嘅話(兩至三成機會),係要再做第二次(甚至更多次)手術去割清D乳癌。有D私家醫生係會手術中途送標本去急凍切片(即係快速測試)驗吓嗰邊邊位清唔清,以減低割唔清嘅機會,用多咗時間做增值服務(大部份嘅公立醫院都冇咁多時間同你增值),咁你梗係要比多D錢,值唔值?因人而異。因此好多老婆婆,都唔再介意外觀,又唔想有可能第二次手術/日日去電療,就會揀全乳房切除。

2)全個乳房割,如果唔重建,好明顯最大唔好處就係唔靚。就算重建,嗰新乳房通常(當然有例外)都唔夠局部割嘅好(自然度/手感/相似度),再加上如果用肚腩/背脊,會多一個大傷口問題。

 

「我初步明白唔同開刀方案嘅優點缺點,如果我有得揀,咁應該點揀?」

你選擇時要忠於自己心底深處嘅想法,問自己想唔想保留乳房,或者考慮自己接唔接到個胸平晒/乳房重建嘅大傷口,問問另一半佢點睇。有唔明就問乳腺科外科專科醫生,叫佢比D真相你睇睇,你會明白更多/知自己接唔接受到。

 

「我想返屋企問吓屋企人先決定,得唔得?」

得唔係唔得,不過要揀啱人傾。因為乳癌手術係外人眼中好簡單,就係靚同唔靚,又唔係割佢忽肉。不過病人要面對嘅就唔係咁膚淺,乳房係最重要嘅女性性徵,牽涉你嘅靈魂,影響你第時能唔能夠企翻起身,影響你嘅兩性相處,影響你嘅下半生。所以千祈唔好問姨媽姑姐/家庭觀眾,十個家庭觀眾有十個不同建議,加上佢地嘅資料九乘九錯(睇翻上一篇「乳癌手術 2 - 保留乳房手術 ,我做唔做得?」嘅三大迷思),只會令你作出錯誤嘅決定,要傾就搵乳腺科醫生(專業知識)、伴侶(情緒支援)或者其他乳癌病友(同路人經歷)傾。

 

下一篇帶你睇睇如果真係要全個乳房割,有咩乳房重建選擇過你揀⋯⋯

乳癌手術 4 - 乳房重建手術 你要知

有唔明?係下面寫低佢,我會盡量解釋你聽⋯⋯

 

化療後點解仲要割咁多?

「我已經打咗化療,腫瘤都縮細到摸唔到,點解醫生仲話要成個胸切晒?」

化療完後,我地一般都係割剩返落黎嘅腫瘤,有醫生叫佢做病灶(tumor bed),你可以睇成係乳癌個賊竇

如果有多個源頭(賊竇),割幾多,就要視乎佢地點縮法

大致有2種縮法:
1)腫瘤源頭縮細兼夾聚埋一齊,呢個最理想,可以切少D,易D做局部割。

乳房腫瘤

2)腫瘤源頭縮細但仲係分咁開,呢個冇咁理想,可能都係切咁多,同未打化療前冇咩分別。局部割「冇」易做咗,即係可能都要全乳房割。

乳癌手術

封面圖片來源:互聯網