乳癌化療需唔需要 - 著數計算機火併乳癌基因測試

Posted by in Chemotherapy 化療

上一篇講到病理報告有八大重點,去界定乳癌惡定唔惡。咁如果自己一D因素惡一D因素唔惡,咁結論即係我嘅乳癌惡唔惡呀/乳癌化療需唔需要呀?原來呢個世界上有樣野叫「著數計算機」同埋「乳癌基因測試」⋯⋯

乳癌我可唔可以唔化療?馬國權醫生
乳癌化療黃金期,我係咪等得太耐?馬國權醫生


國際指引

病理報告八大重點,假設每個重點都有三個可能性(唔惡/一般惡/好惡),已經有6561個組合,重未計每一點重要性都唔同。你就咁睇更係好複雜,就算醫生睇都好複雜,點記得邊個組合要化療邊個組合唔洗。

「醫生都唔記得?咁醫生點決定我需唔需要化療?」

醫生唔記得細分組合姐,記得大方向咪得囉。醫生會做嘅就係跟據一D國際指引去將你歸納為三類

1)乳癌唔惡:即係低危,冇咁易復發(漏水),食5-10年藥得喇。
例如腫瘤小(T1)、淋巴冇受影響(N0)、荷爾蒙受體好反應(ER+/PR+)、非HER2型(HER2-)、生長速度慢(low Ki67)、腫瘤組織學為一級(Grade1)、冇入侵附近小淋巴管小血管(LVI-)、及年老病發。

2)乳癌一般惡:灰色地帶,唔知化療利多於弊、定弊多於利。
例如腫瘤唔太大唔太細(T1/T2)、淋巴冇受影響(N0)、荷爾蒙受體好反應(ER+/PR+)、非HER2型(HER2-)、生長速度一般(average Ki67)、腫瘤組織學為二級(Grade2)、冇入侵附近小淋巴管小血管(LVI-)、及中年病發。

3)乳癌好惡:易復發,化療利多於弊,要做化療加埋其他合適嘅輔助治療。
例如腫瘤大(T3/T4)、淋巴受影響(N1-3)、荷爾蒙受體冇反應(ER-/PR-)、HER2型(HER2+)、三陰性型(ER-/PR-/HER2-)、生長速度快(high Ki67)、腫瘤組織學為三級(Grade3)、有入侵附近小淋巴管小血管(LVI+)、及年輕病發。

「咦?有灰色地帶?」

係,就係當八大重點一齊考慮時,達唔到一個共識/傾向,醫生就唔能夠咁簡單建議你做/唔做化療。佢會睇重D其他因素(你嘅意願/身體狀況)。

著數計算機

 

你唔怕老實同我講|其實我仲有幾耐命?|馬國權醫生

「咦,我正正就係灰色地帶喎,唔知利多於弊定弊多於利,咁點決定化唔化療好?」

腫瘤科醫生傳統黎講就會「寧枉無縱」,醫癌症喎,更係有殺錯無放過,化咗療先算。

慢慢地當經驗越來越多,醫學越來越進步時,醫生發覺「有殺錯」呢個方向都唔係好係路,就成就咗一D「著數計算機」去計吓究竟唔同化療組合喺唔同人度(萬千組合)有幾大著數,其中最出名最多醫生用嘅就係Adjuvant Online

乳癌

圖片來源:Adjuvant Online 截圖

Adjuvant Online www.adjuvantonline.com 係一個經過驗證嘅網上計算機,專比醫生用去計吓十年內乳癌病人幾大機會復發/死/因乳癌死。之後再加上唔同化療組合/荷爾蒙治療嘅資料,就會知道統計學上做咗化療/荷爾蒙治療後十年內乳癌病人幾大機會復發/死/因乳癌死。咁醫生就有D實在/個人化少少嘅資料解釋比病人聽化療有幾大著數。

注:
1)佢要用Java,即係iPhone/iPad 係用唔到,要用返電腦。
2)佢冇中文版,要睇得明簡單英文先得。
3)佢要登記先用得,不過唔洗錢同冇規範。
4)佢係喺外國人中驗證準確,香港人唔知,不過我地冇理由相信香港人特別D/化療效果有好大出入。
5)佢仲係2005版,未更新,冇考慮近年嘅標靶(HER2)發展。所以如果HER2+型嘅,大過1cm已經值得做化療,唔洗計。
6)佢係設計比醫生用,唔係比病人用,不過如果自己學識咗,有得免費屋企上網評估吓,點都好過信無憑無據嘅三姑六婆/收費嘅江湖術士幫你算命。

我地一齊去睇吓點樣用:

先登記(Register)

乳癌測試

圖片來源:Adjuvant Online 截圖

再登錄(Online access)

乳癌基因檢測

圖片來源:Adjuvant Online 截圖

揀乳癌(Breast Cancer),同意用Adjuvant Online 8.0 版本

乳癌基因測試

圖片來源:Adjuvant Online 截圖

入你嘅乳癌資料[我地假設你57歲、本身健康、荷爾蒙受體陽性(ER+)、組織學二級(Grade2)、侵入性癌2.5cm、淋巴冇受影響(N0)],之後就可以揀死亡率(mortality)或者復發率(relapse),其他藍色數字唔好搞佢(10 year risk, Hormonal therapy, chemotherapy, combine therapy)。

乳癌基因測試

圖片來源:Adjuvant Online 截圖

之後就揀不同治療嘅成效(Adjuvant Therapy Effectiveness):
Horm:一般人用Tamoxifen(Overview 2000)
Chemo:用第二代化療 2nd Generation Regimens(咩叫第二代遲D喺乳癌化療選擇 - 咁多組合點樣揀?會講)

最關心/最緊要當然係死亡率,咁我地揀咗死亡率之後,就會得出呢幅圖:

乳癌基因檢測費用

圖片來源:Adjuvant Online 截圖

你會見到原來100個咁樣病歷嘅病友未來10年,有17個會因為乳癌而走咗,有4個就因其他原因走咗。
如果佢地剩食抗荷爾蒙藥Tamoxifen,10年就會有5個救得返留得低。
如果佢地剩係打第二代化療(乳癌化療選擇 - 咁多組合點樣揀?),10年又係會有5個救得返留得低。
如果佢地雙管齊下(又打第二代化療又食抗荷爾蒙藥),10年就會有9個救得返留得低。

「即係咩意思?化療有幾大功效/著數?」

假設你肯食藥(大部份人都肯,因為好溫和),做化療比到你嘅額外著數係10年100人救返多4個人(9-5=4)。有咗呢D資料,你/醫生就能夠比較有根據去諗吓究竟化唔化療好(化療有冇著數),定係剩係食藥已經夠。

乳癌基因測試

全靠佢|我先唔洗做乳癌化療|馬國權醫生

「我個腫瘤科醫生建議我做個四萬幾蚊嘅乳癌基因測試,咩黎㗎?」

四萬幾蚊嘅乳癌基因測試,主要係針對荷爾蒙受體陽性(ER+)、淋巴冇受影響(N0)、比評為一般惡、肯打化療、又頂得順嘅乳癌患者。醫生會將你切咗出黎嘅乳癌組織送去外國做進一步測試(本地冇得做嘅呢D高科技野),驗一驗究竟你嘅乳癌惡唔惡,復發/死亡嘅機會率。如果復發/死亡嘅機會率高,醫生就會建議做化療。相反如果機會率低嘅話,剩食藥就夠。

乳癌基因測試好多唔同公司都有出,其中最出名最多人用嘅係OncotypeDx安可待乳癌腫瘤基因檢測 (https://oncotypedxhk.com/),另外一個外國都好多人用嘅叫MammaPrint(香港就少D人用)(http://www.agendia.com/healthcare-professionals/breast-cancer/mammaprint/),詳細係咩/技術細節其實你唔洗知/唔洗煩(叫得你做得呢D測試嘅醫生都係識野㗎喇,放心信佢啦),總括黎講就係比幾萬蚊去買多D資訊(你嘅乳癌有幾惡),從而估計做唔做化療好。

「乳癌基因測試都幾貴吓,咁我比唔比錢做乳癌基因測試好?免費著數計算機唔夠咩?」

免費著數計算機其實好多時都夠用,就好似買衫咁,大中細碼大部份人都啱著。

不過有D人會嫌中碼唔夠修腰/貼身,想再好D/想再啱身D又唔介意比錢,咪度身訂造靚衫(乳癌基因測試)。

如果你嘅乳癌擺明好善良(細碼)或者好惡(大碼),根本唔洗嘥錢做乳癌基因測試,度身訂造都係留返比D一般惡(中等身型)嘅人啦。

如果你本身死都唔肯打化療/頂唔順化療,又係可以慳返呢筆錢。

呢D乳癌基因測試同乳癌遺存基因測試(BRCA)大家都係基因測試,不過係唔同野黎,唔好搞錯。

阿爸係男人,李嘉誠又係男人,不過阿爸唔係李嘉誠。

乳癌基因測試係基因測試,乳癌遺存基因測試又係基因測試,不過乳癌基因測試唔係乳癌遺存基因測試。

實際操作

做完手術,有晒病理報告就問乳腺科醫生/自己對吓第幾期,另外睇吓有冇乳癌惡嘅八大因素,去評估自己高唔高危復發/死亡。

低危就唔洗做化療。

灰色地帶就用著數計算機計吓,有錢就做乳癌基因測試,之後先決定做唔做化療。

高危就睇自己意願同埋身體狀況,如果許可,就做化療。

下一步⋯⋯

當你知道要做/肯做化療,乳腺科醫生就會轉介你比腫瘤科醫生。由腫瘤科醫生去同你詳細傾吓用咩化療藥/成個療程係點。

你上網搜尋吓化療藥,呢個又話打咗AC針,嗰個又話佢打TC針,頭都大晒。

下一集我會同你講吓乳癌化療藥物 - AC針?TC針?乜黎㗎?

有唔明?係下面寫低佢,我會盡量解釋你聽⋯⋯

封面圖片來源:朗豪坊jetso圈app