鹼性真的防癌?從醫學基礎看破迷思

Posted by in Diet 食療

在日常診症中,一條乳癌復康病人問得最多嘅問題係「多食鹼性食物係咪真係可以預防復發?」簡單的答「係」定「唔係」都唔能夠解開心裡的鬱結,今次我地不妨由醫學基礎去看破迷思⋯⋯

什麼是酸鹼值?

原來日常生活中所有野都有所謂的酸鹼值(pH),或者你可能記得中學科學課都有教過,最酸嘅野pH係0(好似漒水),中性的係7,最鹼嘅野pH係14(好似通渠水哥士的)。

酸鹼值

圖片來源:互聯網

以上係一個好重要的基礎去了解以下的討論。

身體血液的酸鹼值

你會見到太酸或太鹼性嘅野都會傷害到身體,如果唔係人地點會淋人漒水去毀人容。

防癌

圖片來源:蘋果日報

咋一聲出曬煙諗都覺得痛,所以原來日常身體細胞係要特定的酸鹼度先生存到,如果唔係就會出問題,輕則短暫失去功能,重則細胞死亡引致生命危險。

而呢個血液酸鹼度其實係有得check嘅,只要抽D動脈血液去驗一個叫arterial blood gas嘅測試,就會知道身體血液pH。有得check,即係要有得分正常、唔正常先有意思,原來正常血液pH係界乎7.357.45,超出呢個範圍已經叫唔正常,身體機能可能出現問題。

「個範圍都幾窄⋯⋯」

聰明,上帝做人其實好奧妙,要特定環境平衡先生存到,例如體溫我地要37度,pH我地要7.35-7.45。

鹼性防癌?

「咁窄的正常範圍超出咗咁點?」

咁又唔洗擔心,身體會透過呼吸同腎臟排出廢物去調節酸鹼值

呢個正正係重點之一,即係話比我地聽,無論我地主動/因病令到酸鹼值超出正常範圍,一係身體會自動調節至回復平衡點,一係身體調節都調節唔到而機能出大問題

如果有人話進食多D鹼性食物,而令身體血液鹼性D去防癌。情況只有兩個,一係身體自動調節至回復平衡點(即係嗰D人白費心機),一係身體調節都調節唔到而機能出大問題(即係唔止癌細胞死,係正常細胞都死)。

「咦?即係我比人呃?」

所有騙案都係用少少科學術語去蒙騙大眾,一般加個「來自德國」(你有冇見人標榜話「來自中國」?你地班人崇洋只會覺得德國可信高質素,中國呃人會爆炸。就算明明assembled in China,係都要加返句designed in California)「提升自身免疫力」「西醫不會告訴你的秘密」「全靠它,她戰勝了乳癌」「科學實證」,成件事就變得引人入勝。

「Er,我都未係好信服自己受騙⋯⋯」

咁講多一個謬誤比你聽徹底擊破謊言。

你知唔知我地進食食物後,身體如何消化食物?

「知,胃囉」

啱,就係用胃去消化,咁胃又靠咩去消化食物呢?答案就係胃酸。

鹼性防癌

圖片來源:互聯網

原來胃酸的酸鹼度不是一般的酸,係可達致漒水酸度嘅pH1.5,即係我就算當你飲最鹼的通渠水pH14,一飲落去唔計你乸爛食道,真係去到胃先算,強酸加強鹼的東西撞埋一齊,做過中學實驗都知,咪變pH7囉。

重點二黎喇,即係日常進食一般偏鹼的食物,小腸未到,去到胃都已經比D胃酸中和曬,仲講咩影響血液酸鹼度、癌細胞生長環境,唔好玩啦。

結論

記住呢篇重點,任你食點樣鹼性的食物都好,係敵唔過胃酸的。就算你唔信,認為自己可以影響酸鹼度,一係身體就自動幫你調節返正常(即係白費心機),一係就令自己身體失衡,傷害緊自己。唔好見多人講就信,了解多少少醫學基礎就明白原來幾咁無䅲。請原諒我語氣重,見住病友比人呃我冇辦法唔肉緊。

有唔明?係下面寫低佢,我會盡量解釋你聽⋯⋯

封面圖片來源:互聯網